Legebiltzarra

EH Bilduren ekimenez, Legebiltzarrak Estatuarekiko harreman eredu berria eskatu du, erabakitzeko eskubideari bide emango diona

| 2019-04-11 21:19:00

EH Bilduk eta EAJk adostuta, Parlamentuak Estatuaren inboluzioaz ohartarazi, oinarrizko eskubideen aurkako erasoak arbuiatu eta eskumenak errespetatzea exijitu du euskal herritarren eskubide politiko, sozial, ekonomiko eta kulturalak bermatzeko.

EH Bilduren proposamena aintzat hartuta, Legebiltzarrak Estatu espainolarekiko harreman eredu berria eskatu du gaur, berdinen artekoa, euskal herritarren erabakitzeko eskubidea egikaritzeari bide emango diona, horixe –autogobernua eguneratzea eta behar besteko eskumenak zuzenean kudeatzea– modu bakarra baita euskal gizartearen eskubide politikoak, sozialak, ekonomikoak, linguistikoak eta kulturalak bermatzeko, Maddalen Iriartek azpimarratu duenez. “Estatuarekin izan beharreko harremana ezin da morrontza harreman bat izan; ezin dugu azken 40 urteotan bezala jarraitu, Madrili baimena eskatuz lanaldiaren iraupena ezartzeko edota irakasle eta mediku gehiago kontratatzeko. Menpekotasunean oinarritzen den eredu hori ez da XXI. mendeko Euskal Herriak behar duena”.

Hausnarketa orokor horri jarraituz, EAJrekin adostuta, Parlamentuak Estatuaren inboluzioaz ohartarazi eta oinarrizko eskubideen aurkako erasoak arbuiatu ditu, bai eta ideologia batzuen ilegalizazioa eskatzeraino heltzen direla gogora ekarri ere. Horren ildotik, LOMCE, lan erreforma eta Mozal Legea bezalako legeak indargabetzeko eta espetxe politika aldatzeko eskatu du, euskal presoak Euskal Herriratzeko eta gaixotasun larri eta sendaezinak dituztenak aske uzteko. Izan ere, Iriarteren hitzetan, “egoera larria da eta ezin dugu burua zuloan sartu ostruken moduan; hala jokatuko bagenu, ez ginateke herritarrek gugan jarritako konfiantzaren mailan egongo. Estatu espainolean bizi den giro inboluzionistak okerrera besterik ez du egin, herritarron eskubide zibil eta politiko ia guztiak daude jomugan, eta ez da Vox bakarrik, ez gaitezen engaina!”.

Hala, Pedro Sanchezen jokabidea ere kritikatu du EH Bilduko bozeramaileak, autodeterminazio erreferendumak egiteko eskubidea eta, finean, demokrazia bera ukatzeagatik. “Inmobilismoa arduragabea da, sistema demokratiko batek ezin du beste alde batera begiratu Katalunian eta Euskal Herrian herritarren multzo handi bat Espainiarekin identifikatzen ez denean; hala jokatzea ez da demokratikoa”.

Legebiltzarrak Jaurlaritzak Euskaltelen egin duen kudeaketa arduragabea gaitzestea eskatu du EH Bilduk

| 2019-04-10 11:17:00

Zegonak ez zukeen Euskaltelen kontrola eskuratuko eta enpresaren erabakiguneak ez leudeke arriskuan, Lakua eta Kutxabank desinbertsio prozesu batean sartu ezean. EH Bilduk ekimen sorta iragarri du Lakuak esku hartzeko. “Gobernu serioek enpresa estrategikoak babesten dituzte”.

Zegona inbertsio funts britainiarrak Euskaltelen kontrola eskuratu izana hain da larria eta arriskutsua euskal ekonomiarentzat, ezen EH Bilduk Legebiltzarrak Jaurlaritzaren jokaera gaitzestea proposatu baitu, “Urkullu buru duen Gobernuaren utzikeriak, arduragabekeriak eta inakzioak ahalbidetu dutelako Zegonaren operazioa”, Iker Casanovak salatu duenez. “EH Bilduk zortzi aldiz ekarri du gaia Parlamentura eta lehen momentutik ohartarazi zuen gerora errealitate bilakatu den arriskuaz, eta Jaurlaritzak bere lana arduraz egin balu, gaur Zegonak ez luke Euskaltelen kontrola izango eta inork ez luke hitz egingo enpresaren egoitza eta erabakiguneak Euskal Herritik kanpora eramateko arriskuaz. Patronalak berak ohartarazi du euskal ekonomiari sekulako kaltea egingo liokeen arrisku horretaz eta, are gehiago, berretsi du EH Bilduk behin eta berriz egin duen salaketa, alegia, Jaurlaritzak eta Kutxabankek Euskaltelen burutu duten desinbertsio prozesua dagoela afera honen jatorrian”.

Horri jarraituz, Casanovak gogor kritikatu du Euskaltel auzian Lakuako eledun Josu Erkorekak emandako erantzuna. “Benetan larria eta penagarria da, eta euskal herritar guztiak kezkatu beharko lituzke, Urkulluren Gobernuak eskaintzen duen konponbide bakarra izatea adi egotea eta begira jarraitzea, inolako neurririk proposatzeko kapaza izan gabe, eta hori Jaurlaritza bera denean hein handi batean Zegonaren operazioaren errudun nagusietariko bat, bere garaian Euskaltelen zituen akzioak saldu zituelako eta gero, konpainiaren kontrola Euskal Herrian mantentze aldera, akzioak berriz erosteari uko egin diolako EH Bilduk hala proposatu duenean. Gobernu serio batek bere herriko enpresa estrategikoak defendatzen ditu eta, Jaurlaritzak hala egiten ez badu, ondorioztatu behar dugu ez gaudela gobernu serio baten aurrean”.

Hori dela eta, EH Bilduk legez besteko proposamena aurkeztuko du Legebiltzarrak EAJ-PSE Gobernuaren kudeaketa arduragabea gaitzetsi dezan eta Lakuari neurri zehatzak hartzeko –Euskaltelen akzioak erosteko– eska diezaion, Zegonaren operazioaren ondorio kaltegarriak ezerezean uzteko. Zehazki, Casanovak azken urteotako desinbertsio prozesua irauli beharra aldarrikatu du. “Jaurlaritzak, Kutxanbankek zein azken honen jabe diren hiru Banku Fundazioek estrategikoak diren enpresetan inbertsio politika esanguratsu eta iraunkorra garatu behar dute enpresa horien lurraldearekiko atxikimendua eta erabakimena bertan dagoela ziurtatzeko eta eredu produktibo propio sendo, osasuntsu eta jasangarria garatzeko”.

Halaber, legez besteko proposamenetik harago, EH Bilduk kontuak eskatuko dizkie Legebiltzarrean Urkullu lehendakariari eta Arantxa Tapia Ekonomiaren Garapen sailburuari, eta Euskaltel, Kutxabank eta Kutxa, Vital zein BBKren fundazioetako presidenteen agerraldiak ere galdegingo ditu.

ALBISTEAK

Hijas de la Cruz ikastetxea erostea proposatu dio EH Bilduk Hezkuntza Sailari, Alde Zaharrean eskaintza publikoa indartzeko

2021-03-22 16:50:00

Ikasturtea amaitzean Hijas de la Cruz ikastetxea ixteko Kristau Eskolaren erabakia “aukera leiho bezala baliatzeko” eskatu dio Ikoitz Arresek Gobernuari. Proposamena egin du lanpostuak salbatzeko eta Solokoetxek, Atxurik eta Alde Zaharrak hezkuntza arloan dituzten beharrak asetzeko.

Mahaia banatzeko EAJ, PSE eta Podemosen arteko akordioak interes alderdikoiak lehenetsi ditu, proportzionaltasuna baino

2020-08-03 13:11:00

EH Bilduren iritziz, Legebiltzarreko lehen presidenteordetza PSEri ematea ez dator bat herritarrek bozkatu dutenarekin. “Gu ez gaude aulkiak banatzeko eduki politikorik gabeko estrategia huts batean eta ez gara horretan katramilatuko. Hori ezin da garrantzitsuena izan krisi larri bati aurre egin behar diogun honetan”.

Urkulluk adostutako defizit muga ez da nahikoa murrizketak saihesteko, ohartarazi du EH Bilduk

2020-07-31 16:51:00

%2,6ko muga oso urrun dago Lakuak planteatutako %3,5etik eta, zerga politika aldatu ezean, murrizketak ekarriko ditu. Ez da onargarria Madrili baimena eskatu behar izatea herri honek behar dituen neurriak hartu ahal izateko; menpekotasunetik burujabetzara salto egin beharra dugu.

Ratioak 15 ikaslera jaistea eta 10.000 irakasle gehiago kontratatzea, EH Bilduren proposamena ikasturte berrirako

2020-07-29 15:21:00

EH Bilduren iritziz, salbuespen neurriak behar dira ikastetxeetan osasun eta segurtasun baldintzak bermatzeko. Proposamen irekia da, Hezkuntza Sailak eta sektoreko eragileek negoziatu beharrekoa. Arduragabekeria da ikasturtea ohi legez hastea, Uriarte sailburuak planteatu bezala.