Legebiltzarra

Ikus-entzunezko Komunikazioari buruzko Legeak gutxiengo nazional eta linguistikoen babesa bermatu behar du

EH Bilduk legez besteko proposamen bat aurkeztu du Legebiltzarra Gobernu espainolaren lege proiektuaren aurka ager dadin hizkuntza eta kultura aniztasunaren aurkakoa delako.

| 2021-09-24 14:46:00

Gobernu espainola lantzen ari den Ikus-entzunezko Komunikazioari buruzko Legea Estatuko “hizkuntza eta kultura aniztasunaren aurkakoa” delakoan, EH Bilduk legez besteko proposamen bat aurkeztu du Legebiltzarrak Sanchez Gobernuaren egitasmoa salatu eta berau aldatzeko eska dezan, gutxiengo nazional eta linguistikoen babesa, bai eta hizkuntza eta kultura aniztasuna ere, bermatzeko. Halaber, proposamenak Jaurlaritzari eskatzen dio 2022ko aurrekontuetan diru gehiago bideratu dezala euskarazko ikus-entzunezko proiektuak sortu, garatu eta ekoiztera.

Jasone Agirrek adierazi duenez, “teknologia berrien garapenarekin kontsumo ohiturak guztiz aldatu dira euskarriei dagokienez eta ikus-entzunezko komunikazioan paradigma aldaketa ematen ari da mundu osoan; gure kasuan, hizkuntza gutxitua dugun herrialdeetan, hizkuntza beraren biziraupena ikus-entzunezkoetan jokatzen da, hori baita gazteen komunikazio eta aisialdirako esparru nagusia”.

Paradigma aldaketa horrek ­–azaldu du Agirrek– “ikus-entzunezko komunikazioaren inguruko legedia errealitate berri horretara egokitzea” eskatzen du, baina Gobernu espainolak esku artean duen proiektuak “arriskuan jartzen du kultura eta hizkuntza aniztasuna”. Izan ere, aniztasuna aipatu arren, ez da kultura edo hizkuntza betebeharrik zehazten, ez da ehuneko zehatzik aurreikusten gaztelania ez den beste hizkuntzetarako eta ez du tarterik uzten, esaterako, autonomia erkidegoek plataformetan esku har dezaten.

Jaurlaritza salgai dauden babes publikoko etxebizitzak erostera legez derrigortzea proposatu du EH Bilduk

Unai Fernandez de Betoñok lege proposamena aurkeztu du alokairu sozialeko parke publikoa handitzeko. Gobernuak babes publikoko etxebizitzak eskuratzeko eskubidea du egun; EH Bilduren legearekin obligazioa izango luke. Legeak putre-funtsen jarduera ere mugatuko luke etxebizitza merkatuan.

| 2021-09-22 12:10:00

EH Bilduk lege proposamen bat aurkeztu du gaur Legebiltzarrean herritar orok duen etxebizitza izateko eskubidea benetan egikaritzeko bidean. Unai Fernandez de Betoñok mahai gainean ipini duen legea onartuz gero, Jaurlaritzak merkatura ateratzen diren babes publikoko etxebizitzak erosteko obligazioa izango luke; gaur egun erosteko eskubidea du, baina azken sei urteotan 28 aldiz bakarrik aplikatu du. “Gure legearekin gaur hautazkoa dena obligazioa litzateke Gobernuarentzat”. Beti eta udalerri guztietan? Ez. Soilik alokairu babestuko eskaintza publikoak Etxebiden erregistratutako eskarien %80 asetzen ez dituen udalerrietan; hau da, EAEko gehien-gehienetan. Izan ere, gaur alokairu babestuko parke publikoan 24.000 etxebizitza daude, baina Etxebideren zerrendetan 60.000 eskatzaile daude.

EH Bilduko legebiltzarkideak azaldu duenez, “lege honen bitartez eskuratutako etxebizitza guztiak alokairu sozialera bideratuko lirateke, horixe baita proposamen honen helburu nagusia, alokairu sozialeko parke publikoa handitzea, alegia”. Legeak kontu publikoetan izango lukeen inpaktu ekonomikoa ere kuantifikatu du Fernandez de Betoñok: “Urtean babes publikoko 600 etxebizitza inguru saltzen direla kontuan hartuta, Jaurlaritzak 80-90 milioi euro beharko lituzke horiek guztiak erosteko, gutxi gorabehera orain etxebizitza prestazioetara bideratzen duena. Finean, prestazioetan oinarritutako sistema batetik etxebizitza parke publiko sendo batean oinarritzen den eta egiturazko erantzunak ematen dituen sistema batera pasako ginateke”.

Zeharka, legeak beste helburu bat lortzea ere ahalbidetuko luke: etxebizitza babestuen salerosketetan udalerri batzuetan hain hedaturik dagoen iruzurra, diru beltzaren erabilera, amaitzea.

EH Bilduk proposatu duen legea etxebizitza babestuei ez ezik, merkatu libreko etxebizitzei ere aplikatuko litzaieke inbertsio-funtsen jarduera mugatzeko. 2015az geroztik indarrean dagoen Etxebizitza Legearen arabera, Jaurlaritzak etxe libreen salerosketa batzuetan esku hartu eta lehentasunez erosteko eskubidea du, baina orain arte ez du inoiz baliatu. Fernandez de Betoñok adierazi duenez, “gure legeak ez du derrigortzen kasu horretan, baina aukera zabaldu egiten du, bereziki putre-funtsek egiten dituzten salerosketa handietan pentsatuz: jabe bakar batek 5 etxebizitza baino gehiago saltzen dituenean lehentasunez erosi ahal izango lituzke Jaurlaritzak”.

Horren haritik, gogora ekarri du 2016an putre funts batek 520 etxebizitza eskuratu zituela Donostiako Benta Berri auzoan, 2020an beste batek alokairuko 320 etxe eskuratu zituela Donostiako hainbat auzotan eta iaz ere hirugarren funts batek babes publikoko alokairuko 490 etxe erosi zizkiola banku bati Salburuan eta Zabalganan, Gasteizen. “Soilik hiru operazio hauetako etxebizitzak Administrazioak lehentasunez erosi izan balitu, alokairu sozialeko parke publikoaren eskaintza %6 handituko zen EAEn”.

Arriolak ETS-Euskal Trenbide Sarearen lizitazio batean EH Bilduk salatutako ustezko iruzurra argitu gabe darrai

Unai Fernandez de Betoñoren ustez, sailburuaren azalpenak ez dira nahikoak. “Haren arabera dena da kasualitatea, kasualitatez lehiaketa publiko baten baldintza-pleguak gero irabazle atera zen enpresaren izena du izenburu eta kasualitatez ere EH Bilduk lau hilabete lehenago asmatu zuen notaria batean zein enpresak irabaziko zuen lehiaketa”.

| 2021-09-20 18:12:00

EH Bilduk ustezko iruzur kasu bat salatu zuen uztailean ETS-Euskal Trenbide Sarearen kontratazio batean, ustez lehiaketa publiko bat aldez aurretik bideratu ahal izan zuelakoan Sener Ingenieria y Sistemas enpresari 1,2 milioi euroko kontratu bat esleitzeko. Unai Fernandez de Betoño eta Josu Estarrona legebiltzarkideek susmo horren berri eman zuten publikoki lehiaketa haren baldintza-pleguaren izenburuak, hain justu, enpresa horren izena zeukala egiaztatu ostean. Horrek pentsarazten zuen kontratua aldez aurretik adostuta egon zitekeela ETS eta Senerren artean, lehiaketa publiko guztietan bermatu behar diren berdintasun, gardentasun eta lehia askearen printzipioak urratuta.

Iñaki Arriola Lurralde Planifikazio, Etxebizitza eta Garraio sailburua Legebiltzarrean agertu da gaur arratsaldean EH Bilduren salaketari erantzuteko, baina azalpenak ez dira nahikoa izan gertatutakoa argitzeko. Arriolak akats informatiko bati egotzi dio dena; azaldu duenez, akats horrek azalduko luke zergatik zen ‘Contrato Sener’ lehiaketaren baldintza-pleguaren PDFaren izenburua, hau da, gerora irabazle atera zen enpresaren izena.

Unai Fernandez de Betoñoren iritziz, sailburua ez da sinesgarria izan. “Bere azalpenak ontzat emanez gero, den-dena kasualitate hutsa izan dela onartu beharko genuke: kasualitatez, lehiaketa publiko baten baldintza-pleguak izenburu zeukan ondoren kontratua eskuratu zuen enpresaren izena, eta kasualitatez ere EH Bilduk enpresa hori irabazle aterako zela asmatu zuen notario aurrean lau hilabete lehenago, magoak bagina bezala eta kristalezko bola batean ikusi izan bagenu bezala. Dena kasualitatea izatea aukera bat da, baina ez da oso probablea. Eta kontratazio-prozesuari dagokionez, ez du argitu zergatik Senerren eskaintzak baloraziorik onena jaso zuen irizpide subjektiboen atalean, guztiz erabakigarria izan zena, nahiz eta azterketa teknikoan ohartarazi zen bere proposamenaren zati batek galera funtzionalak ekar zitzakeela”.

EH Bilduk laguntza lerro berria irekitzeko eskatu dio Jaurlaritzari pandemiak jotako sektoreentzat

Enpresa eta autonomoen eskari kopurua oso murritza izan dela ikusirik, EH Bilduk laguntza programa berri bat zabaltzeko eskatu dio Lakuari, bai eta ekimena hartzeko ere Gobernu espainolak laguntzak jasotzeko baldintzak malgutu ditzan.

| 2021-09-10 13:13:00

EH Bilduk legez besteko proposamen bat aurkeztu du pandemiak jotako sektore ekonomikoek behar eta merezi dituzten diru-laguntzak jasoko dituztela bermatzeko asmoz. Izan ere, Araba, Gipuzkoa eta Bizkaian Gobernu espainolak 218 milioi euro bideratu zituen enpresa eta autonomoei laguntza zuzenak ematera eta Jaurlaritzak beste 50 milioi ipini zituen EH Bilduren proposamen baten ondorioz. 268 milioi guztira, baina praktikan ez dira erabili. Programaren porrota erabatekoa izan da: 4.000 eskari inguru bakarrik aurkeztu dira, laguntzak jaso ahal izateko Madrilek jarritako baldintzak gehiegizkoak direlako.

Hori dela eta, Ibai Iriartek gaur erroldatu duen proposamenaren bitartez, EH Bilduk aurreikusita zeuden diru-laguntzak enpresa eta autonomoengana iritsiko direla ziurtatu nahi du. Horretarako, Jaurlaritzari eskatu dio jada jaso dituen enpresa eta autonomoen eskariak lehenbailehen tramitatu eta ordaindu ditzala eta, gainera, laguntza lerro berri bat ireki dezala 50 milioi euroko zuzkidura osoa erabiltzeko. Ibai Iriarteren iritziz, “enpresa eta autonomo askoren egoera dramatikoa da benetan eta 50 milioi horiek ezin dira Jaurlaritzaren kutxan geratu; beharrak hain handiak direnean axolagabea litzateke agindutako diru-laguntzak ezerezean geratzea”.

Helburu horrekin ere, EH Bilduren proposamenak bigarren zati bat dauka: Urkulluren Gobernuari Madrilen beharrezkoak diren bideak jorratzeko eskatzen dio Gobernu espainolak laguntzak jasotzeko baldintzak malgutu ditzan eta, hala, horretara bideratu zituen 218 milioi haiek Araba, Bizkaia eta Gipuzkoako enpresa eta autonomoengana iritsi daitezen.

EH Bilduk proposamena aurkeztu du Osakidetzak langileak euren jatorriagatik diskriminatu ez ditzan

Rebeka Uberaren iritziz, “onartezina da Osakidetzak europar nazionalitatea ez duten langileak kontratatzeari uko egitea, areago osasun sistemaren gabeziak hain handiak direnean; jatorria ezin da arrazoi bat izan herritarrei enplegu publikorako sarbidea galarazteko”.

| 2021-09-07 12:31:00

EH Bilduk legez besteko proposamen bat aurkeztu du Legebiltzarrean Osakidetzak langileak euren jatorriagatik diskriminatzeari utz diezaion. Izan ere, duela egun gutxi ESK sindikatuaren salaketa batek argitara atera zuenez, Osakidetzak Europaz kanpoko behin-behineko langileei ez dituela berriz kontratatuko jakinarazi die, hain justu ere, europar nazionalitatea ez edukitzeagatik. Hori dela eta, langileak euren jatorriagatik diskriminatzea onartezina delakoan, EH Bilduk ahalik eta lasterren lege proiektu bat aurkez dezala eskatu dio Jaurlaritzari, Osakidetzan enplegurako sarbidea inori ez ukatzeko bere jatorriagatik.

Rebeka Uberak azaldu duenez, “Enplegatu Publikoaren Oinarrizko Estatutuaren Legeak kontratazio publikoetan nazionalitatea kontuan ez hartzea ahalbidetzen du interes orokorrak hala eskatzen duenean, eta bistakoa da Osakidetzak beharrizan handiak dituela pertsonal arloan”. Hortaz, horretara jotzen du EH Bilduren proposamenak, nazionalitatean oinarritutako diskriminazioa desagerraraztera. Halaber, horretarako legea prestatu bitartean, orain arte Osakidetzan aritu diren langile guztiak, Europar Batasunetik kanpokoak barne, kontratazio-poltsetan mantentzeko galdegin dio koalizioak Jaurlaritzari, bai eta haren gainerako sailetan jatorriagatik eman daitezkeen diskriminazio egoerak identifikatu eta zuzentzeko ere.

Uberaren esanetan, “2021. urtean onartezina da jatorriagatik enplegurako sarbidea murriztea; Amerika, Afrika edota Asiatik iritsitako herritarrek Administrazioan lan egiteko eskubidea dute, beste edozein pertsonari eskatzen zaizkion baldintzak betez gero. Gainera, ez da logikoa osasun arloko langileei Osakidetzako ateak euren jatorriagatik ixtea osasun sistema publikoan profesionalen beharra hain handia denean. EAE pertsona guztientzako benetako harrera lekua izan dadila nahi dugu, giza eskubideak babestu eta aniztasunean oinarrituko den elkarbizitza garatzeko, eta horretarako funtsezkoa da herritartasun unibertsalari lotutako eskubideen defentsa aktiboan oinarritutako politika propioak sustatzea”. 

ALBISTEAK

Ekarpen Legeak ez du udal finantzazioa bermatzen eta konpontzeke uzten du baliabideen banaketaren arazoa

2021-10-07 11:52:00

EH Bildu Jaurlaritzak aldundiekin adostutako legearen kontra agertu da. “10 urteko atzerapenarekin iritsi arren, lege honek ez die konponbiderik ematen urteetan agerikoak izan diren arazo eta desorekei”.

2020ko aurrekontu orokorrak bete ez eta ikertzaileen soldatak igotzeari uko egin diote EAJk eta PSEk

2021-09-29 15:37:00

EH Bilduk iazko aurrekontuetan agindutako igoera gauzatzeko eskatu dio Jaurlaritzari, bai eta ikertzaileen gutxieneko ordainsariak bataz besteko soldataren %60ra igotzeko ere.

EH Bilduk axolagabekeria egotzi die EAJ eta PSEri irakaskuntzan telefono mugikorren erabilera aztertzeari uko egiteagatik

2021-09-29 15:35:00

Lore Martinez Axpek azterlan baten beharra aldarrikatu du Hezkuntza Sailak horren inguruko araudi proposamen bat helaraz diezaien ikastetxeei

EH Bilduk Natura-Ondarea Kontserbatzeko Legea adostu du Jaurlaritzarekin

2021-09-28 12:45:00

Mikel Otero pozik agertu da akordioarekin, “besteak beste, legearen xedeak betetzeko aurrekontu-partida zehatzak bideratzea lortu dugulako”.