Legebiltzarra

EH Bildu eta Podemosen ekimenez, Legebiltzarrak haurren aurkako sexu abusuei buruz arituko den ponentzia bat sortzea onartu du

Oihana Etxebarrieta (EH Bildu) eta Eukene Arana (Elkarrekin Podemos) legebiltzarkideek aurkeztu dute talde parlamentario guztiek aho batez onartu duten proposamena. Ponentziak memoria kolektiboa eraikitzeko, biktimen egia aitortzeko, prebentziorako neurriak hartzeko eta aurrerantzean horrelako erasoak saihesteko mekanismoak jartzeko lan egingo du.

| 2019-05-30 15:04:00

EH Bildu eta Elkarrekin Podemosek justiziarentzako preskribituta dauden haurren kontrako sexu abusuak ikertzeko ponentzia bat sortzea proposatu dute gaur. Proposamena aurkeztu duten taldeen iritziko, Legebiltzarrak erantzun politiko eta instituzionalak eman behar dizkie sexu abusuen biktima izan diren pertsonei, are gehiago Justiziaren arloan kasu gehienak preskribaturik daudela kontuan hartzen bada. Proposamenaren aurkezpena egin zenean Garaitza, Save the Children eta Infancia Robada elkarteek parte hartu zuten, eta gaurkoan Osoko Bilkuran ere presente egon dira. Gaurtik aurrera, eragile, aditu eta biktima izandako pertsonen agerraldiak eskatzeko tartea irekiko da, eta ponentziaren lana ahal bezain arinen martxan jartzea espero da.
Oihana Etxebarrietak adierazi duenez, “biktimekin genuen zor bat zen hau. Berandu gatoz, baina hemen gaude, talde guztiek alde bozkatu duten proposamen batekin. Hau elkarteek eta biktima izandako pertsonek egindako lanari esker izan da”. Elkarrekin Podemoseko legebiltzarkide Eukene Aranak “bide judiziala garrantzitsua bada ere, ez da bakarra; badaude biktimen egia aitortzeko eta jendarte bezala prebentziorako ditugun tresnen gainean hausnartzeko eta berriz ez errepikatzeko bermeak ezartzeko moduak, eta hori izango da hain justu proposatu dugun ponentzia parlamentarioaren lana. Izan ere, hainbat biktimek eskatzen dute gertatutakoa aitortzea, egungo zein etorkizuneko haurrei berriz ez gertatzeko bermeak jartzea eta biktimei babesa emateko bitartekoak ipintzea” gaineratu du.
Hala, ponentziak, besteak beste, prebentziorako, detekzio goiztiarrerako, babeserako, berriz ez errepikatzeko bermeak ezartzeko eta erreparaziorako elementuak identifikatuko ditu eta giza eskubideen urraketa larria diren haurren kontrako abusuen gaineko egia eraikitzeko eta memoria kolektibo eta historikorako ekarpena egingo du. Pausu hau oso garrantzitsua da, eremu publikotik aztertu eta landuko delako, duela urte batzuk arte, eremu pribatuko arazo puntual bezala identifikatzen zen hori.

Enpresen deslokalizazioa eragozteko EH Bilduren lege proposamena atzera bota dute EAJ, PSE eta PPk

Iker Casanovaren proposamena onartuz gero, enpresek 10 urteetan jasotako laguntza publikoak itzuli beharko zituzten euren jarduera justifikatu gabe kanpora eramatekotan. EAJ eta PSEk 2007an Bizkaian onartu zutenaren kontra egin dute; han antzeko arau bat indarrean dago.

| 2019-05-30 14:09:00

Iker Casanovak enpresen deslokalizazioa eragoztea helburu zeukan lege proposamen bat defendatu du gaur Legebiltzarrean, baina EAJ, PSE eta PPk bat egin eta atzera bota dute. EH Bilduko legebiltzarkideak azaldu duenez, “funtsean enplegua babestu eta enpresek lurraldearekiko izan behar duten erantzukizuna eta konpromisoa indartu nahi genituen eta, horretarako, gure proposamenak hainbat neurri jasotzen zituen deslokalizazioen mehatxuari aurre egiteko”. Besteak beste, legea onartuz gero, deslokalizazio kasuetan enpresek azken 10 urteetan jasotako diru-laguntza publiko guztiak itzuli beharko zituzten. “Hala, enpresek bi aldiz pentsatuko lukete euren produkzioa kanpora eraman aurretik. Gu ados gaude enpresei laguntzearekin, baina ez diegu diru publikoa oparitu nahi, dirua hartu ostean alde egiten badute euren jarduera modu iraunkorrean garatu gabe”.
Casanovak gogora ekarri du Bizkaian antzeko arau bat indarrean dagoela 2007az geroztik eta, horri esker, bertako Aldundiak Siban enpresaren deslokalizazioa neutralizatzea lortu zuen. Hortaz, “onuragarria izango zen formula hori orokortzea eta Araba eta Gipuzkoara ere hedatzea; hori da azken batean proposatzen ari ginena, baina EAJ eta PSE Bizkaian onartu zutenaren kontra agertu dira gaur Legebiltzarrean; kontraesana bistakoa da”.
Gobernukideek argudiatu dute EH Bilduk proposatutako legea onartuz gero, Araba, Bizkaia eta Gipuzkoa ez liratekeela lehiakorrak izango Europako testuinguru ekonomikoan, baina argudioa desmuntatu die Casanovak. Batetik, Bizkaiak ez duelako lehiakortasuna galdu 2007an onartu zuen arauarekin; bestetik, laguntza publikoak jasotzeko enpresei baldintzak jartzea ez doalako lehiakortasunaren aurka, eskubideetan oinarritutako eredu produktibo baten alde baizik.
 

Larria eta onartezina da EHUko Medikuntza Fakultatean euskaraz ikasten dutenei lanak gaztelaniaz aurkezteko eskatzea

Rebeka Uberak kontuak eskatu dizkio Hezkuntza Sailburuari Parlamentuan “lotsagarria delako 2019an ikasle euskaldunak bigarren mailakoak izaten jarraitzea”. Ikasle horiei berdintasun baldintzetan aritzea bermatzeko exijitu dio Jaurlaritzari.

| 2019-05-29 14:24:00

Rebeka Uberak interpelazioa egingo dio Cristina Uriarte Hezkuntza sailburuari Legebiltzarrean, Kontroleko Osoko Bilkuran, “larria, lotsagarria eta onartezina delako Euskal Herriko Unibertsitatean Medikuntza Gradua euskaraz ikasten ari diren ikasleei lanak gaztelaniaz aurkez ditzatela eskatzea”. Horixe gertatu zaie Gradu amaierako lanetan ohorezko matrikula lortzeko aurkeztu diren lau ikasleri, horren inguruko erabakia hartu behar duen epaimahaian bi irakaslek, antza, ez dutelako euskara ulertzen. “2019an gaude, baina ikasle euskaldunak oraindik bigarren mailakoak direla dirudi”, salatu du EH Bilduko legebiltzarkideak.
Fakultateko dekanoak barkamena eskatu izana ez da inondik inora nahikoa, Uberaren irudiko. “Arazoak bere horretan jarraitzen du, ikasle horien lanak ebaluatu behar dituen epaimahaian bi kidek ezin izango dituztelako ebaluatu; argi dago horrek aukera berdintasunaren printzipioa urratzen duela ikasle euskaldunak ez direlako lana gaztelaniaz aurkeztuko duten ikasleen baldintza beretan egongo, lan horiek epaimahai osoak ebaluatuko dituelako. Hezkuntza Sailaren ardura eta obligazioa da ikasle guztiek Gradu amaierako lanak berdintasun baldintzetan aurkeztuko dituztela bermatzea”.
 

Kutxabankeko presidenteak Legebiltzarra mespretxatu du, Euskalteli buruzko azalpenak emateari uko egin baitio

Zegonak Euskaltelen kontrola hartu ostean EH Bilduk Gregorio Villalabeitiaren agerraldia eskatu zuen, bankuaren desinbertsio prozesua azal zezan. “Euskal gizarteak zer gertatu den jakiteko eskubidea du eta larria da Kutxabankeko presidenteak azalpenak emateari uko egitea”.

| 2019-05-20 15:08:00

Zegona inbertsio funts britainiarrak Euskaltelen kontrola eskuratu bezain laster EH Bilduk Kutxabankeko presidente Gregorio Villalabeitiaren agerraldia eskatu zuen Legebiltzarrean, haren bankua Euskaltelen jabeetariko bat delako eta bertan burutu duen desinbertsio prozesuak Zegonari kontrola hartzea erraztu diolako. Hala ere, Villalabeitiak uko egin dio azalpenak emateari eta hala jakinarazi dio gaur bertan Legebiltzarrari. Iker Casanovaren iritziz, “Kutxabankeko presidenteak Parlamentua eta bertan ordezkatuta dauden herritar guztiak mespretxatu ditu erabaki horrekin; ezin dezakegu ahaztu Kutxanbanken jabe diren banku fundazioak diru publikoarekin sortu zirela duela urte asko eta, beraz, euskal gizarteak eskubidea du Euskaltelen zer gertatu den jakiteko eta horren inguruko azalpen guztiak jasotzeko”.
EH Bilduko legebiltzarkideak Kutxabankek Euskaltelen duen ardura azpimarratu du gainera. “Patronalak berak berretsi du guk behin eta berriz egin dugun salaketa, alegia, Jaurlaritzak eta Kutxabankek Euskaltelen burutu duten desinbertsio prozesua dagoela afera honen jatorrian eta horrek azaltzen duela, hein handi batean, zergatik gaur konpainiaren kontrola inbertsio funts britainiar baten esku dagoen. Gero eta argiago dago Kutxabankek azken urteotako desinbertsio prozesua irauli behar duela eta enpresa estrategikoetan inbertsio politika esanguratsu eta iraunkorra garatu behar duela enpresa horien lurraldearekiko atxikimendua ziurtatzeko eta eredu produktibo propio sendo, osasuntsu eta jasangarria garatzeko”.
 

Helduen Hezkuntzari buruzko Legea egitea proposatu du EH Bilduk

Helduen Hezkuntzari buruzko ponentzia parlamentarioak alderdien proposamenak jaso ditu gaur. Jaurlaritzaren dekretu zirriborroa bertan behera uztea eskatu du Rebeka Uberak, murrizketak egiten dituelako.

| 2019-05-20 14:14:00

EH Bildu eta Podemosen ekimen komun bati jarraituz, talde parlamentarioek Helduen Hezkuntzaren helburu, funtzio, hartzaile eta bitartekoak zehazteko egin beharreko plan integralaren oinarri eta irizpideak landu eta eztabaidatu dituzte ponentzia batean azken hilabeteotan. Organo horretan gaur amaitzen da epea talde bakoitzak ekarpen eta proposamenak egiteko. EH Bilduk hala egin du: lehenik, Helduen Hezkuntzan murrizketak ekarriko lituzkeen dekretu zirriborroa –irakasleak horren kontra agertu dira jada– bertan behera uzteko eta hasieratik berraztertu eta adosteko eskatu dio Jaurlaritzari; bigarrenik, Helduen Hezkuntzari buruzko Legea egitea proposatu du. Izan ere, Rebeka Uberak azaldu duenez, “lege bidez arautuz gero, Helduen Hezkuntzari duen garrantzia aitortuko genioke eta bere osotasunean landu ahal izango genuke; lege batek gai horren inguruan dauden baliabide publiko guztien arteko koordinazioa ahalbidetuko luke, bai eta ebaluazio eraginkor bat egitea ere”.
EH Bilduko legebiltzarkideak adierazi duenez, Helduen Hezkuntzak honako helburu hauek izan behar ditu: titulazioak eskuratzeko bide bat izatea, enplegua, aukera berdintasuna, inklusioa, adinekoen ongizate sozial, emozional eta intelektuala eta erakunde publikoen arteko koordinazioa.
Helburu horiei begira, Uberak hainbat proposamen aurkeztu ditu, arloko adituek eta profesionalek ponentzian eginiko ekarpenak aintzat hartuta. Hala, beharrezkotzat jo du Hezkuntza Sailak Helduen Hezkuntzako ikastetxeen mapa zehaztea. Azaldu duenez, “ikastetxeak edota gela desplazatuak irekitzeko komenigarritasuna aztertu behar da langabezia tasa altuak dituzten, konplexutasun sozial handia duten edo, zenbait faktore dela eta, inklusio arazoak dauden hirigune eta herrietan, ikastetxe horiek gizarteratzeko elementu gisa ere baliatu behar direlako”.
Enplegarritasuna xede, Helduen Hezkuntzako ikastetxeen eta Lanbideren arteko koordinazioa ezinbestekoa da, EH Bilduko legebiltzarkidearen iritziz. Halaber, Helduen Hezkuntzaren curriculuma zehaztea eta adostea proposatu du, prestakuntza arautua zein ez arautua jasota, bai eta Lanbide Heziketarekiko lotura indartzea ere. Horri dagokionez, “goi mailako Lanbide Heziketarako sarbidean kopuru bat, %5 izan litekeena, gorde beharko litzateke Helduen Hezkuntzako ikasleentzat”.
 

ALBISTEAK

Artistaren Estatutua onartzeko prozesua abian jartzeko EH Bilduren proposamenari ezezkoa eman diote EAJk eta PSEk

2021-03-25 15:37:00

Josu Estarronak premiazkotzat jo du sektorearekin adostutako arau-marko bat ezartzea kultura arloko langileei jarduteko baldintza egokiak emateko. Kongresu espainolean onartutako estatutuak ez dio euskal kulturgintzaren errealitateari behar bezala erantzuten.

EAJk eta PSEk Osasun Sailari txertaketa kanpaina azkartzeko eskatzeari uko egin diote

2021-03-25 11:57:00

EH Bilduk hala proposatu du, egungo erritmoarekin 2024an lortuko dugulako biztanleriaren %70 inmunizatzea. Rebeka Uberak kritikatu duenez, Osakidetzak 64.000 txerto baino gehiago ditu ipini gabe.

EH Bilduk merkataritza elektronikoa eta saltoki handiak gehiago zergapetzea proposatu du, denda txikiekiko lehia justua izan dadin

2021-03-23 13:09:00

Iker Casanovak merkataritza txikiaren aldeko estrategiaren baitan kokatu ditu proposamenak. Azaldu duenez, saltoki handiek okupatzen dituzten metro karratuen arabera ordainduko lukete eta, hala, Administrazioak 12 milioi euro inguru jasoko lituzke urtero zerga berri horren bitartez.

Aldaialde ikastetxea eraikitzeko obrak berehala lizitatzeko eskatu dio EH Bilduk Hezkuntza sailburuari

2021-03-22 16:58:00

Maria Garderen iritziz, Jaurlaritzak ez du aitzakiarik lizitazioa atzeratzen jarraitzeko. Gasteizko auzo berrietan oinarrizko azpiegiturak atzeratzen ari dira Hezkuntza Sailaren aurreikuspen eta planifikazio faltagatik, salatu du.