Legebiltzarra

Pobreziaren gorakada Jaurlaritzaren politika sozialen porrotaren isla da, salatu du Nerea Kortajarenak

EH Bilduk ezagutzera eman ditu Pobreziari buruzko Inkestaren emaitzak, Lakuak ezkutuan edo dauzkanak. Urkulluren xedea %20 jaistea izan arren, pobreziak gora egin du 2016az geroztik eta prekarietatea hedatzen ari da. Ezinbestekoa da kalitatezko enplegua sustatu eta DSBE zabaltzea.

| 2019-07-12 13:25:00

Pobreziari eta beharrizan sozialei buruzko Jaurlaritzaren azken inkestaren emaitzak (http://www.euskadi.eus/contenidos/estadistica/epds_tablas_ens_2018/es_tblestad/data/EPDS_2018_es.xlsx) ezagutzera eman ditu gaur EH Bilduk, nahiz eta horren ardura Enplegu eta Gizarte Politiketako sailburuak bere gain hartu beharko zukeen. Nerea Kortajarenak adierazi duenez, “sailburuak aurkeztu beharko zituen inkestaren emaitzak, baina gardentasunez jokatu beharrean, publizitaterik gabe eta ia ezkutuan Jaurlaritzaren webgunean zintzilikatu ditu; ez gaitu harritzen emaitzak txarrak direlako eta bere politika sozialen porrotaren isla zuzena direlako”.
Kortajarenak gogora ekarri du legealdi hasieran, 2016an, Urkulluk haren gobernuaren xede nagusiak zehaztu zituela eta, besteak beste, pobrezia %20 jaisteko borondatea adierazi zuela. “Berrikuntza arloko politikak indartu beharra ere txertatu zuen helburuen zerrenda hartan, baina gaur daukaguna guztiz kontrakoa da: berrikuntzan behera egin dugu eta pobrezian, gora. Porrota erabatekoa da, hori da Jaurlaritzaren politiken definizioa”.
Izan ere, EH Bilduko legebiltzarkideak azaldu duenez, “Jaurlaritzak berak eginiko inkestaren arabera, pobreziak eta pobrezia arriskuak ez dute behera egin, kontrakoa baizik. Pobrezia errealaren indizea %5,7tik 6,1era igo da 2016az geroztik eta 131.000 herritar pobrezian bizi dira, 2016an 122.000 zirenean. Eta pobrezia arriskuan bizi direnak ere gehiago dira orain duela hiru urte baino: 172.307 pertsona pobrezia arriskuan bizi dira Araba, Gipuzkoa eta Bizkaian, 2016an baino %14 gehiago eta 2008an baino %41 gehiago”. Oro har, erantsi du Kortajarenak, “pobrezia arriskua neurtzen duten adierazle guztiek okerrera egin dute, 2000. urteaz geroztik inoiz ez da hainbeste pertsona egon pobrezia larri arriskuan, eta eszenatoki horretan nabarmena da emakumeek duten protagonismoa, pobreziak emakume izena duelako batez ere”.
Kortajarenaren iritziz, Jaurlaritzaren inkestaren emaitzek EH Bilduren aspaldiko diagnostikoa berretsi egiten dute. “Prekarizazio egoera berri baten aurrean gaude, ekonomiak hobera egin arren, hori ez delako herritarrengana iristen ari”. Salatu duenez, “oso agerikoa da herritarren bizitzak prekarizatzen ari direla, eta hori inertzialak diren EAJ-PSE Gobernuaren politiken ondorio da, murrizketetan oinarritutako politiken ondorio, eta, noski, gure eskumen faltaren ondorio ere bai, zeren eta kasu honetan ere Madrilen hartzen diren erabakien ondorioak agerikoak baitira: pentsioen ingurukoek, lan erreformak… isla argia dute datu hauetan”.
Legebiltzarkideak azpimarratu du Diru-Sarrerak Bermatzeko Errentaren (DSBE) sistemarekin lotura zuzena duten hainbat datu. “Jaitsi da sistema publikoaren babesa jasotzen duten herritarren kopurua eta, aldiz, handitu da sisteman egonik pobreziatik ateratzen ez direnen kopurua, hirutik bat baino gehiago ez baita pobreziatik ateratzen sisteman egonda ere; hau da, jende gutxiago sartzen da babes publikoaren sisteman eta horien artean gehiago dira pobreziatik ateratzen ez direnak”.
Horren haritik, Kortajarenak ondorioztatu du “DSBEren erreformak babes sistema publikoa sendotu eta zabaltzea izan behar duela helburu, ikuspegi murriztaile batetik oso urrun, eta horrek esan nahi du erreforma hori ezin daitekeela PPren eskutik egin, hori murrizketa gehiagoren eta pobrezia handiago baten sinonimo litzatekeelako”.
Halaber, “kalitatezko enplegua sustatu beharra” ezinbestekotzat jo du, eta iragarri du EH Bilduk berriz helduko diela helburu horrekin egin dituen proposamenei, “besteak beste, 1.200 euroko gutxieneko soldata ezartzeko, kontratazio publikoetan klausula sozialak txertatzeko, gazteen emantzipazio politikak indartzeko eta, noski, ikuspegi feminista politika publikoen erdigunera ekartzeko”.
 

Ebazpen Batzordeak bide eman dio Ustelkeriaren Aurkako Bulegoa sortzeari, EH Bilduk proposatu bezala

Foru Aldundiek helegite bana aurkeztu zuten Legebiltzarra tramitatzen ari zen lege proposamena bertan behera uzteko, baina Ebazpen Batzordeak dio orain Ustelkeriaren Aurkako Bulegoa legezkoa litzatekeela. “Nahiz eta artikulu batzuk moldatu beharko diren, organo hori sortzetik gertuago gaude gaur atzo baino”, esan du Larraitz Ugartek.

| 2019-07-09 14:35:00

Ebazpen Batzordeak bide eman dio EH Bilduk proposatu zuen jardunbide egokien aldeko eta ustelkeriaren aurkako bulegoa sortzeari eta koalizioaren jatorrizko lege proposamena –puntu gutxi batzuk moldatuta– Legebiltzarrean tramitatzeari. Osoko Bilkurak tramitera onartu zuen EH Bilduren proposamena 2018ko abenduan, baina Foru Aldundiek tramitazioa etetea erdietsi zuten otsailean, Ebazpen Batzordean eskumen-arazo bana aurkeztuta. Larraitz Ugartek EAJri leporatu zion orduan “aldundiak erabiltzea bulego hori sortzea galarazteko” eta orain Ebazpen Batzordea bera da lege proposamena tramitatzea ahalbidetzen duena, behin artikulu batzuk moldatuta. Batzordearen ebazpenaren ostean, Legebiltzarreko Osoko Bilkurak erabaki beharko du nola tramitatu lege proposamena.
Edonola ere, Ugartek aintzat hartu du Ebazpen Batzordearen erabakia, “argi eta garbi geratzen delako posible eta legala dela Ustelkeriaren Aurkako Bulegoa sortzea eta, beraz, gaur atzo baino gertuago gaudela eszenatoki horretatik”. Horren haritik, nabarmendu du ustelkeriaren aurka adostasun politiko eta soziala erabatekoa dela. “Legebiltzarrean PP ez beste talde parlamentario guztiok bat egin genuen lege proposamena tramitatzearen alde eta, zentzu horretan ere, ezinbestean nabarmendu behar da Ebazpen Batzordeak eginiko prozesuan Jaurlaritzak aurre egin diela Foru Aldundien alegazioei, bera ere Ustelkeriaren Aurkako Bulegoa sortzearen alde”.
EH Bilduko legebiltzarkideak azaldu duenez, Ebazpen Batzordearen erabakiaren arabera, lege proposamenaren artikulu batzuk aldatu edo moldatu beharko dira, Aldundien eskumenak urratzen dituztelakoan, baina, haren iritziz, horrek ez du proposamenaren muina desitxuratzen. “Lege proposamenak 53 artikulu eta sei xedapen ditu eta, Ebazpen Batzordearen arabera, zazpi artikulu baino ez dira Aldundien eskumenekin talka egiten dutenak. Beraz, egia izanda artikulu horiek aldatu edo moldatu beharko ditugula, arazoa ez da konpondu ezina, borondate politikoa baldin badago, Ustelkeriaren Aurkako Bulegoaren eta Aldundien arteko harremana erraz bideratu ahal izango delako hitzarmen edo formula interinstituzionalen bitartez, tokiko administrazioekin aurreikusita dagoen bezala”.
 

EH Bilduk Antzuolako Herri Eskolaren proiektuaren jarraikortasuna bermatzeko proposamena egin du

Hezkuntza munduan Antzuolako eskola erreferentzia bilakatu dela azpimarratu du Rebeka Uberak, eta funtsezkotzat jo du irakasleriaren egonkortasuna ziurtatzea proiektuak aurrera egin dezan.

| 2019-07-08 14:00:00

EH Bilduk legez besteko proposamena aurkeztu du Legebiltzarrean Antzuolako Herri Eskolaren proiektuaren jarraikortasuna bermatzeko, “hezkuntza munduan eredu eta erreferentzia bilakatu den proiektu hori sortu eta urteetan garatu duen belaunaldia jubilatzear dagoelako eta horrek proiektua bera kolokan jar dezakeelako”, Rebeka Uberak ohartarazi duenez. EH Bilduko legebiltzarkideak funtsezkotzat jo du irakasleen egonkortasuna ziurtatzea proiektuak aurrera egin dezan eta, hortaz, eskari zehatza egin dio Hezkuntza Sailari, “Antzuolako ikastetxean bertan prestatu diren irakasleek aukera izan dezatela ikastetxean geratzeko”, hain zuzen ere.
Uberak azaldu duenez, “lanpostuak betetzeko sistemaren ondorioz, irakasleak ikastetxez ikastetxe ibiltzen dira urtero, eta behin-behinekotasun hori hondamendia da Antzuolakoa bezalako eskola batentzat, ia ezinezko egiten duelako bertako hezkuntza proiektuari jarraikortasuna ematea, irakasleen aldetik ere etengabeko prestakuntza eskatzen duelako. Antzuolakoak bezala, proiektu aitzindari eta berritzailea duten ikastetxeetan, edota errealitate sozial konplexuei aurre egin behar dietenetan, irakasleen egonkortasuna ezinbesteko baldintza da hezkuntza proiektuak sendotzeko, eta kasu horietan jarraikortasun hori bermatzea dagokio Hezkuntza Sailari”.
Horren ildotik, EH Bilduko legebiltzarkideak gogora ekarri du “Hezkuntza Sailak ere erreferentziatzat daukala Antzuolako Herri Eskola eta makina bat eragile, nazioartekoak ere, bideratzen dituela bertara haren metodologia berritzaile eta aitzindaria ezagutzera eman eta partekatzeko”. Hori dela eta, “proiektu horren biziraupena bermatzea derrigorrezkoa da, ezin dugu onartu hainbeste urtetako esfortzua eta dedikazioa zakarrontzira botatzea”.
 

AHT Gasteizen sartzeak kostatzen duenarekin 32 ospitale eraiki litezke

Mikel Oterok proiektua etengabe garestitzen ari dela salatu du, beharrezkoa denik ukatu du eta iruzurtzat jo du.

| 2019-07-05 14:59:00

Espainiako Sustapen Ministerioak gaur argitara eman duen txostenaren arabera, Abiadura Handiko Trena (AHT) Gasteizen sartzearen kostea 872 milioi eurokoa izango da, iragana urtarrilean esandakoa (724 milioi) baino askoz gehiago. Hori dela eta, Mikel Otero EH Bilduko legebiltzarkideak proiektuaren garestitze etengabea salatu du –hasieran 400 milioi aurreikusten ziren– eta kritikatu du diru publikoa beharrezkoa ez den horrelako proiektu batean gastatzea, askoz kontu garrantzitsu eta premiazkoetan inbertitu beharrean. “EAEn inauguratu den azken ospitaleak, Eibarkoak, 27 milioiko kostua izan zuen; hortaz, 32 ospitale eraiki litezke AHT Gasteizen sartzeak kostatuko zaigunarekin. Ordua da esateko zer nahiago dugun, Madrilera ordubete lehenago iristea edo gur dirua ospitaleetan, hezkuntzan eta abarretan inbertitzea”.
AHT eraikitzeko proiektuaren atzeratze etengabea ere salatu du Oterok, eta ohartarazi du instituzioak milioiak gastatzen ari direla hormigoian 15-20 urtetan inolako erabilera izan ez dezaten. “Biaduktu batzuk 2010erako bukatuta zeuden jada eta, diotenez, AHT 2025-2030ean martxan jartzen bada, azpiegitura horiek 15-20 urtetan alferrik eginda egongo dira eta euren bizitza 15-20 urtetan behera etorriko da AHT martxan dagoenean. Sekulako iruzurra da”.
 

Legebiltzarrak Larrialdi Klimatiko egoera deklaratzea proposatu du EH Bilduk

Mikel Oterok esan duenez, “larrialdi klimatikoa mehatxu nagusienetariko bat bilakatu da gure ongizatearentzat eta horrek politika publikoak egokitzea eskatzen du, klima aldaketaren efektu bortitzenak saihesteko”. Azterketa-batzordea sortzea proposatu du politika publikoak zehazteko.

| 2019-07-02 15:17:00

Europako hainbat parlamentuk eta gobernuk jada egin duten bezala, Gasteizko Legebiltzarrak Araba, Bizkaia eta Gipuzkoan Larrialdi Klimatiko egoera deklaratzea proposatu du gaur EH Bilduk mozio baten bitartez, bai eta adierazpen horretatik eratorri beharko liratekeen politika publikoak zehazten hastea ere, “larrialdi klimatikoa datozen urte eta hamarkadetako agenda baldintzatzera etorri delako eta gure ongizatearentzako mehatxu nagusienetarikoa bilakatu delako, benetako zibilizazio erronka bat”, Mikel Oterok ohartarazi duenez. Hori horrela, erantsi du, “Jaurlaritzak Larrialdi Klimatiko egoera abiapuntu gisa hartu behar du politika publiko guztietan eta bere aurrekontuetan ere halaxe islatu behar du”. Horren haritik, mozioarekin batera, EH Bilduk azterketa-batzorde berezia sortzea proposatu du Legebiltzarrean, “Larrialdi Klimatiko egoerari aurre egiteko beharrezkoak diren politika publikoak zehaztu eta bideratzeko”.
Oterok komunitate zientifikoak azken urteotan eginiko ohartarazpenak gogorarazi ditu: “Aldaketa klimatikoa Berotegi Efektuzko Gasen isuri masibo baten ondorio da eta isuri horien arrazoi nagusia, bakarra ez bada ere, gure metabolismo sozioekonomikoa mantentzeko erretzen ditugun baliabide fosilen erabilpenean datza. Aldaketa klimatikoa, beraz, guk eragiten dugu nagusiki eta, txosten guztien arabera, gero eta argiago dago klima eta energia politiketan eta, ondorioz, gure egunerokotasunean eraldaketa sakona bat, iraultza bat, eman behar dela, baldin eta egoerari aurre egin nahi badiogu eta aldaketa klimatikoaren efektu bortitzenak pairatu nahi ez baditugu”.
Hala ere, orain arte emandako pausoak ez dira nahikoa izan, EAEn ere ez, Berotegi Efektuzko Gasen isurketak ez duelako beherantz egin, gorantz baizik, 20 milioi tonako langa gainditzeraino, 2012az geroztik gertatzen ez zena. Oteroren irudiko, “datu hauek oso kezkagarriak dira, helburua 2050. urterako karbono neutraltasuna lortzea delako eta eszenatoki horretara hurbildu beharrean, urruntzen ari garelako”. Are gehiago, EH Bilduko legebiltzarkideak beharrezkotzat jo du –hala proposatu du bere mozioan– karbonogabetze prozesua 2040era aurreratzea eta horretarako plangintza eta politika publikoak abiatzea dagoeneko. “Ahalik eta azkarren karbono isurietan neutroa izango den Euskal Herri baterantz begira jarri beharrean gaude, eta horretarako ezinbestekoa da eraldaketa azkar eta eraginkorrak egitea, jakinda prozesu horrek gure jendartean inplikazio anitz eta sakonak ekarriko dituela, bai ehun produktiboan, bai mugikortasunean, bai lurralde antolamenduan; horregatik deritzogu pausu azkar eta eraginkorrak ematea ezinbestekoa dela”.
 

ALBISTEAK

Txertaketa irregularren afera argitzeari uko eginez EAJk eta PSEk zerbait ezkutatu nahi dutela erakutsi dute

2021-05-05 13:18:00

EAJ eta PSE gehiengo osoaz baliatu dira Santa Marina eta Basurtuko ospitaleetako txertaketa irregularrak ikertzea eta argitzea saihesteko, afera horretaz entzuten den ahots bakarra auzitan dagoen Gotzone Sagardui Osasun sailburuarena izan dadin.

EH Bilduren ekimenez, Legebiltzarrak Arabar Errioxako upategi txikiei laguntzeko eskatu dio Jaurlaritzari

2021-04-29 14:41:00

Itxaso Etxebarriak adierazi duenez, ezinbestekoa da diru-laguntzak banatzeko irizpidea aldatzea, bost enpresa handik laguntzen %62 eskuratzea ez delako zilegi.

Sestaoko labe garaia babestu eta balioan jartzea eskatu du Legebiltzarrak, EH Bilduren ekimenez

2021-04-21 12:56:00

Euskal Kultura Ondareari buruzko Legearen arabera Sestaoko labea babes bereziko ondasun kulturala dela gogorarazi du Iker Casanovak. Labearen historia jendeari ezagutzera ematearen garrantzia azpimarratu du.

Mikel Otero: “SHESAren itxiera aurreratzen dugun egun bakoitzeko, dirua aurreztuko dugu norabide egokian inbertitzeko”

2021-04-16 17:02:00

EH Bilduk Hidrokarburoen Sozietatea desegiteko eskatu dio Jaurlaritzari, behin gasaren esplorazioa eta ustiapena behin betiko baztertu duenean.