Albisteak
Ingurumen Administrazioaren lege-proiektuari buruzko irizpena baliogabetzea eskatu du EH Bilduk
Lurralde Antolamenduaren Legea aldatzen duen EAJ eta PSEren zuzenketa tramitera onartuz, Legebiltzarreko Mahaiak legegintza-prozedura urratu du. Interes Publiko Goreneko Proiektuen figura berria sortzeko, Lakuak lege proiektu bat aurkeztu behar zuen, legean ezarritako baldintzak bete eta udalek horren inguruan iritzia eman ahal zezaten.
| 2021-11-29 16:34:00
Espero bezala, EAJk eta PSEk Ingurumen Administrazioaren lege-proiektuari buruzko irizpena onartu dute gaur arratsaldean Jasangarritasun, Ingurumen eta Ingurune Naturalaren Batzordean. EH Bilduk, baina, irizpenaren deuseztasuna deklaratzea eskatu du, tramitazioan legegintza-prozedura urratu delakoan. Mikel Oterok hala eskatu dio ofizialki Legebiltzarreko Mahaiari, lege-prozeduran atzera egin eta zuzenketak kalifikatzeko unera itzultzeko, hortik aurrera izapidetza berme guztiekin errepikatzeko.
Arazoa, azaldu du EH Bilduko legebiltzarkideak, EAJk eta PSEk aurkeztu zuten 61. zuzenketan dago. Izan ere, zuzenketa horren bitartez, gobernukideek beste lege bat, Lurralde Antolamenduari buruzkoa, hain zuzen ere, aldatzea dute helburu, Interes Publiko Goreneko Proiektuen figura berria sortzeko eta, hori baliatuta, udalei proiektu eta azpiegitura handiak inposatu ahal izateko, udalek hirigintzan dituzten eskumenen gainetik. “Zuzenketa horren bidez, EAJk eta PSEk nabarmen aldatu nahi dute Ingurumen Administrazioaren Legearen edukiarekin loturarik ez duen beste lege bat; ondorioz, Legebiltzarreko Mahaiak uko egin beharko zion zuzenketa hori izapidetzeari, Lurralde Antolamenduaren Legea aldatzeko Jaurlaritzak lege proiektu bat aurkeztu behar zuelako espresuki, ez bere talde parlamentarioen zuzenketa bat”.
Oterok salatu duenez, “lege proiektu edo lege proposamen gisa izapidetu behar zena zuzenketa partzial baten bidez egin dute, zuzenketa partzialen figuraz abusatuz, Legebiltzarraren erabateko esku-hartzerik gabe eta aurretiazko kontrol mekanismorik gabe”. Interes Publiko Goreneko Proiektuen figura zuzenketa bidez sortuz, EAJk eta PSEk lege proiektuetan derrigorrezkoak diren hainbat txosten egitea saihestu dute. Horri dagokionez, bereziki larria da Euskadiko Tokiko Gobernuen Batzordeari Interes Publiko Goreneko Proiektuei buruzko iritzia ez eskatzea, figura horrekin jokoan –eta arriskuan– dagoena, hain justu, udal autonomia den arren.
Albisteak
Kudeaketa soilik ez, Bizitzeko Gutxieneko Errentaren transferentziak integrala izan behar du, ohartarazi du EH Bilduk
| 2022-01-21 13:04:00
Nerea Kortajarenak transferentzia behingoz burutzeko eskatu die Lakua eta Madrili, Bizitzeko Gutxieneko Errenta euskal babes sisteman integratzeko. Eskualdaketa integrala ez bada, gure sistema sukurtsal bilakatuko litzateke, eta EH Bilduk ez du hori onartuko.
Pentsiodunei eta 18.000 eurotik beherako errenta duten herritarrei antigeno testak doan ematea proposatu du EH Bilduk
| 2022-01-14 12:41:00
Rebeka Uberak testak farmazietan eRezetaren bidez banatzeko eskatu dio Osasun Sailari, birusaren kutsadura eteteko funtsezkoak direlakoan. Ezinbestekotzat jo du positibo guztiak Osakidetzari komunikatzea, osasun egoera behar bezala ebaluatu eta dagozkion neurriak hartu ahal izateko.
Legebiltzarra habilitatzeari EAJk eta PSEk emandako ezezkoa oposizioaren proposamenak onartzeko gai ez den Gobernu ahul baten seinale da
| 2022-01-11 13:04:00
Mahaiak atzera bota du EH Bildu eta Elkarrekin Podemos-IUren habilitazio eskaria eta, beraz, Parlamentuak itxita segituko du otsailera arte. Egoera larria den arren, ezin izango ditu urtarrilean eztabaidatu hezkuntza, osasun, kontziliazio eta enpresentzako laguntzei buruzko proposamenak.
Urtarrilean Legebiltzarra habilitatu behar da osasun larrialdiak premiaz hartu beharreko neurriak eztabaidatu eta hartu ahal izateko
| 2022-01-05 13:45:00
EH Bilduk eta Elkarrekin Podemos-IUk Legebiltzarra hilabete honetan ere biltzea eskatu dute. Egoera konplikatua da eta premiazkoa da adostea zein neurri hartu Lehen Arretan eta Hezkuntzan eta diru-laguntzak bideratzea kontziliazioa errazteko eta sektore ekonomiko kaltetuak babesteko.