AKTUALITATEA

| 2025-04-03 12:37:00

Banketxeen hipoteka-maileguen klausula jakin batzuk abusukotzat jo dituzten erabaki judizialak betearazteko klausula horien ondoriozko gastuak ordaindu zituzten herritarrak topatzen ari diren arazoei erreparatuz, EH Bilduk Jaurlaritzaren esku-hartzea adostu du EAJ eta PSErekin, pertsona horien guztien eskubideen babesa indartzeko asmoz.

Lehenik eta behin, hiru taldeok hala adostuta, Legebiltzarrak banketxeei eskatu die hipoteka-maileguen abusuzko klausula horien kontrako epaiak bete ditzatela eta, ondorioz, euren bezeroei itzul diezaietela bere garaian behar legalik gabe ordaindu zuten dirua. Itxaso Etxebarria EH Bilduko legebiltzarkideak azaldu duenez, iaz, urtarriletik ekainera bitartean, ia 22.000 erreklamazio aurkeztu ziren Araban, Bizkaian eta Gipuzkoan arrazoi horregatik, eta, zenbatekoa hain handia izanik, epaitegiak kolapsaturik daude. “Milaka familiek hainbat urtez banketxeen abusuzko praktika horiek jasan dituzte; ez zuten hipotekatik eratorritako zenbait gastu ordaintzeko inolako obligaziorik, baina, hala ere, finantza-erakundeen iruzurrezko eta abusuzko jardun argi baten ondorioz, gastu horiek guztiak inposatu zaizkie”. Orain, legeak argi eta garbi ezarrita, banketxeek diru hori itzuli behar diete, baina, trikimailuak erabiliz, itzulketa-prozesu hori oztopatu eta atzeratzeari ekin diote ia sistematikoki urte askotan zehar.

Horren aurrean, Etxebarriak berak Legebiltzarrean sustatu duen akordioaren arabera, Jaurlaritzak  ikuspen, zaintza eta kontrol kanpaina bat egingo du banketxeen zerbitzuei buruz eta, Kontsumobideren bitartez, lankidetzan jardungo du erakunde egokiekin abusuzko jardunbideak saihesteko, kontsumitzaileen eskubideak behar bezala bermatze aldera. Halaber, Kontsumobideren bitartez ere, hipoteka-zerbitzuekin lotutako erreklamazioei erantzuteko prozedura eraginkorrenak bilatuko ditu.

Etxebarriaren esanetan, “gaurko akordioak hipoteka-zerbitzuen eremuan kontsumitzaile eta erabiltzaileen babesean aurrera egiteko beharrezko premisa guztiak islatzen ditu: gastu horiek abusuzkotzat jo dituzten epaiak betetzeko eskakizuna, erreklamazioei garaiz eta behar bezala erantzuteko araudia betetzeko eskakizuna, zerbitzu horien zaintza eta kontrola areagotzeko ikuskaritza-kanpaina espezifiko bat egitea eta, hala badagokio, dagozkion zehapen-espedienteak bideratzea. Bestalde, arlo honetan eskumena duten beste erakunde eta instantzia batzuekiko lankidetza indartzea, eta kontsumoko hurbiltasuna, irisgarritasuna eta bitartekaritza sustatzea eskatzen dugu, horrelako erreklamazioak ebazteko prozesu eraginkorragoak bilatzeko”.