AKTUALITATEA

| 2025-04-03 10:03:00

EH Bilduk akordio zabala sustatu du gaur Legebiltzarrean, EAJ eta PSErekin, migratzaileak kriminalizatu eta gorrotoa zabaltzen duten eskuin eta eskuin muturraren diskurtsoen gorakadaren aurrean. Alde horretatik, akordioaren sinatzaileek Migraziorako Euskal Itun Sozialaren balioa aldarrikatu dute, bai eta bertan jasotako giza eskubideen defentsaren, kohesio sozialaren eta integrazioaren printzipioak ere.

Diana Urreak une kritiko batean bizi garela ohartarazi du, nazioartean eskuin muturra indartzen eta gorrotoa, xenofobia eta giza eskubideen ukazioa zabaltzen ari delako. “Diskurtso politikoan gorrotoa eta intolerantzia normalizatzen direnean, ondorioak ikaragarriak direla irakatsi digu historiak; horregatik da hain garrantzitsua irmo eta ozen esatea ez direla pasako”. Hori dela eta, EH Bilduko legebiltzarkideak erronka historiko horren mailan egotera deitu die alderdi politiko demokratikoei. “Euskal Herria harrera herria izan da beti, elkartasuna eman dezagun, ez gorrotoa”.

Urreak migratzeko eskubidea aldarrikatu du, historian zehar beti gertatu dena, gerretatik, jazarpen politikotik, muturreko pobreziatik ihes egiteko, euskal herritarrek ere egin duten bezalaxe. “Inork ez du kapritxo batengatik bere etxea uzten, beharrak bultzatuta baizik. Nola begiratu diezaiekegu mespretxuz gure arbasoek egin zuten gauza bera egiten ari direnei?”.

Migrazioari buruzko debatea ikuspegi ekonomiko eta utilitarista batera murriztea akatsa dela ere gogorarazi du EH Bilduko legebiltzarkideak, oinarrian “justizia soziala, giza eskubideak eta pertsonen duintasuna” daudelako, baina, hori esanda ere, azaldu du sektore ekonomiko asko, migratzailerik gabe, oso egoera zail batean egongo liratekeela. “Funtsezko zereginak betetzeaz gain, gure sistemek funtzionatzen jarraitzea bermatzen ari dira. Errealitate hori ukatzea bidegabea da justizia sozialaren ikuspegitik, baina suizidio estrategiko bat ere bada Euskal Herriaren etorkizunerako”.

Norabide horretan, Urreak Migraziorako Euskal Itun Soziala aldarrikatu du, “pertsona guztientzako eskubideak bermatu eta gizarte eredu inklusiboa defendatzen duten eragile sozial eta politikoen babesa izan zuena”. Halaber, justizia sozialean oinarritutako harrera eredu propio baten beharra azpimarratu du, instituzioen arteko koordinazioa ahalbidetuko duena, inklusioa sustatuko duena eta, besteak beste, euskararen garrantzia aitortuko duena, bizikidetzarako eta integraziorako tresna gisa. Horri helduz, EH Bilduko legebiltzarkideak azaldu du bere kasu pertsonala bera horren adibide dela. “Ni neu naiz migratzaile, nire familiarekin batera iritsi nintzelako etorkizun hobe baten bila, eta euskarak eman zidan errealitate berri batekin konektatzeko aukera, hori baita hizkuntza guztiek duten balio nagusiena. Euskarak mundu zabala, euskal kultura eta gizartea beste begirada baten bitartez ikusi eta bizitzeko aukera eman zidan, bai eta ate asko ireki ere”.