AKTUALITATEA

EH Bilduk Lehentasunezko Osasun Txartela ezartzea proposatu du, adimen edo garapen desgaitasuna duten pertsonentzat

| 2024-07-24 10:30:00

EH Bilduk legez besteko proposamen bat aurkeztu du Legebiltzarrean Osasun Sailari eskatzeko sei hilabeteko epean Lehentasunezko Osasun Txartela ezar dezala adimen edo garapen desgaitasuna  duten pertsonentzat. Txartel horrek, azaldu du Ayem Oskoz legebiltzarkideak, “pertsona horien osasun zerbitzurako sarbidea bermatuko luke, berdintasunez eta diskriminaziorik gabe”.

Oskozen proposamena bat dator Desgaitasuna duten Pertsonen Eskubideei buruzko Nazio Batuen Konbentzioaren 25. artikuluarekin, osasunerako eskubidea aitortu eta babesten duenarekin, eta, baita ere, Euskadiko Arreta Soziosanitariorako Estrategia 2021-2024 dokumentuarekin. Azken honek, gogorarazi du Oskozek, azpimarratzen du garrantzitsua dela “desparekotasun-ardatzek bereziki eragiten dieten kolektiboen behar soziosanitarioei arreta ematea, ardatz horiek diskriminazio-egoeretan edo gizarte-kalteberatasun handiagoko egoeretan jartzen baitituzte. Horrela egoten dira, besteak beste, mendekotasuna edo desgaitasuna duten pertsonak”.

Bizitza guztian zehar osasunaren arloan herritar guztien ekitatea sustatzea helburu, EH Bilduko legebiltzarkideak azaldu du Lehentasunezko Osasun Txartelak ondorengo hobekuntzak ekarriko lizkiekeela adimen edo garapen desgaitasuna  duten pertsonei, osasun zerbitzuetara jo behar dutenean:

  • Senideen edo erreferentziazko pertsonen laguntza iraunkorra izatea, itxaronaldiak, kontsultak edo ekintza medikoak irauten duen bitartean.
  • Ospitaleratzeetan senide edo erreferentziako pertsonen etengabeko akonpainamendua bermatzeko aukera ematea.
  • Beren beharretarako ordurik egokiena aukeratu ahal izatea, errutinetan aldaketak eragozteko.
  • Itxaron geletan ahalik eta denbora laburrenean egotea eta egokitutako itxaron gelak eskaintzea.
  • Komunikazio arinagoa eta zehatzagoa sustatzen duen arreta jasotzea, haien eta senideen edo erreferentziazko pertsonen eta osasun-langileen artean.
  • Beren ezaugarrietara egokitutako hizkuntza erabiltzen duten profesionalek arreta eskaintzea, baita euskarri piktografikoekin ere.
  • Medikuek agindutako jarraibideak eta tratamenduak behar bezala bete ahal izateko baldintzak bermatzea.
  • Kontsultan arreta ematea balorazioa egiteko behar diren laguntzekin (garabiak, ohatila bereziak, etab.) ahalbidetzea.