Osasun ministroaren agerraldi eskaera bateratua aurkeztu dute gaur Kongresuan EH Bilduk, ERCk, Juntsek, Pdecatek, CUPek eta BNGk, berriki onartutako osasun neurriak «gobernu eta parlamentuen burujabetzaren aurkako erasoa» direla iritzita. Eskumen inbasioa salatu dute alderdi subiranistek.

| 2021-06-04 15:10:00

Joan den ekainaren 2an Espainiako Lurralde Arteko Osasun Kontseiluan hartutako neurrien inguruan azalpenak eman ditzan, Carolina Darias Osasun ministroaren presazko agerraldia eskatu dute gaur elkarrekin EH Bilduk, ERCk, Juntsek, Pdecatek, CUPek eta BNGk.

Kexu mintzatu dira Diputatuen Kongresuan ordezkaritza duten indar subiranistak. «Inposizioa» salatu dute, bilera horren ostean jakinarazitako osasun neurriak «aldebakarrez eta adostu gabe» onartu zirela iritzita; are gehiago, COVID-19ari aurre egiteko hartutako erabakiak derrigorrez betebeharrekoak direla kontuan izanda.

Azaldu dute, halaber, Osasun ministroak publikoki igorritako ohartarazpenak «eskumen inbasio onartezina» direla eta «gobernu zein parlamentuetako erabaki demokratikoen aurkako eraso zuzena» direla. Neurriok lurralde bakoitzari dagozkion eskumenak errespetatzen ez dituztela deritzote. Hori dela eta, Darias ministroari eskatu diote ezinbesteko azalpen eta xehetasunak eman ditzala ahalik eta azkarren Kongresuan, eta orain arteko inposizioa eten dezala.

Txertoen patenteak aldi baterako altxatzea onartu du Senatuak, EH Bilduren ekimenez

Europako Batasunean liberalizazioaren alde jarrera bateratua adosteko asmoz EH Bilduk bultzatutako egitasmoak senatarien gehiengoaren sostengua jaso du: «Helburu nagusia baliabide gehien dituzten herrialdeek ekarpen handiagoa egitea da». EH Bildu, PSOE, ERC, PNV, Junts eta Izquierda Confederal taldearen aldeko botoekin aurrera atera da egitasmoa.

| 2021-05-26 15:42:00

Txertoen patenteak aldi baterako altxa daitezela formalki eta gehiengoz eskatzen duen Espainiako Estatuko lehen erakundea bihurtu da Senatua, EH Bilduk bultzatutako mozio bati esker. PSOEk, ERCk, EAJk, Juntsek eta Izquierda Confederal taldea osatzen duten alderdiek babestu dute Gorka Elejabarrieta senatariak defendatu duen egitasmoa, Espainiako Gobernuari eskatuz bai Europako Batasunean eta baita Munduko Merkataritza Erakundean ere liberalizazioaren aldeko jarrera sustatu eta adostu dezala. Zertarako? Txertoen banaketa, eskuragarritasuna, irisgarritasuna eta doakotasuna bizkortzeko asmoz. «Helburu nagusia baliabide gehien dituzten herrialdeek ekarpen handiagoa egitea da. Gaur bide horri ekiteko aukera dugu. Ez dezagun aukera alferrik galdu», ziurtatu du Elejabarrietak. Egitasmoak aldeko 153 botorekin, 9 abstentzio eta 103 kontrako boto jaso ditu.

Ildo horretan, COVAX mekanismoa indartzeko eskaera ere badakar gaur Senatuan onartutako mozioak, txertoak eskuratzeko aukera handiagoa duten herrialdeek ekarpen handiagoa egin dezaten baliabide gutxiago dituzten herrialdeen mesedetan; horrek aukera emango luke mekanismo horrek helburu duen «berdintasuna» lortzeko eta txertaketa prozesuaren egungo desoreka hausteko. Honela azaldu du EH Bilduren senatari eta ekimenaren bultzatzaileak: «Badakigu patenteak aldi baterako kentzea eta COVAX mekanismoa indartzea ez dela aski izango COVID-19ak eragindako ondorioei aurre egiteko. Hori bai, bi neurri horiek martxan jarri gabe oso konplikatua izango dela, ezinezkoa ez esatearren, pandemiaren epe labur, ertain eta luzeko erronkak konpontzea». 

Nafarroako eta Europako Parlamentuen ostean

Nafarroako Parlamentuak eta Europako Parlamentuak patenteak askatzeko egitasmoei argi berdea eman ostean iritsi da Senatuko mozioaren onarpena, EH Bilduren ekimenez. «Ez gara salbu egongo, guztiok salbu egon arte. Txertaketa prozesua modu parekidean eta diskriminaziorik gabe egin ezean, eta munduko txoko guztietara iristea lortzen ez badugu, herritarrentzako arriskua ez da desagertuko; bere horretan jarraituko du», adierazi du Elejabarrietak. 

EH Bilduk positiboki baloratu du mozioa onartu izana, salbuespen egoeren aurrean salbuespenezko neurriak behar direla iritzita. «Egungo osasun krisi globalak konponbide globalak eta ezohikoak behar ditu». Senatariak uste du txertoen egungo banaketa desorekatua bidegabea eta solidarioa izateaz gain, guztiontzat oso arriskutsua ere badela, erritmo mantsoak txertaketa prozesuan eragin ditzakeen ondorioak handiak direlako. Hala ohartarazi du Elejabarrietak. «Errenta ertain-altuko herrialdeetan, lau pertsonatik batek jada txertoa jaso du; errenta baxuko herrialdeetan, ordea, 500 biztanletik bakarrak».

EBn prozesua azkartzeko eskaera

EH Bildurentzat ez da nahikoa patenteak kentzea. Uste du neurri horiekin batera beste egitasmo batzuk hartu behar liratekeela, txertoen ekoizpen globala bultzatuz eta txertoen banaketa bizkortuz. «Haratago joan behar dugu». Txertoen eskuragarritasun «mugatua eta eskasa» dela aintzat hartuta, Europako Batasunean erabakiak hartzeko prozesua «azkartzeko» eskatu du, ekainaren 8an Munduko Merkataritza Erakundeak egingo duen goi-bilera baino lehen liberalizazioaren aldeko jarrera hitzartzeko.

EH Bilduren Senatuko bozeramailearen hitzetan, txertoen patenteen altxatzea «teknologiaren transferentziaren» eskutik egin beharko litzateke txertoen ekoizpena handitzeko. Horri esker, posible izango litzateke txertoen banaketa mugarik gabe egitea mundu osoan eta, garrantzitsuena, herritar guztien immunizazioa ahalik eta lasterren lortzea. «Txertoak guztion ondasun bihurtzea ekarriko luke erabaki horrek, kutsatze gehiago, heriotza gehiago eta pandemia gogortuko luketen aldaera berriak saihestuz. Funtsezkoa da txertoen ezagutza eta teknologia partekatzea».

«Mezu zuzena une egokian»

Azkenik, Indiak eta Hegoafrikak, beste 60 herrialderekin batera, patenteen liberalizazioa hiru urtez luzatzeko MMEren aurrean bultzatu berri duten egitasmoa nabarmendu du EH Bilduko senatariak. Epe hori berrikusi eta luzatzea proposatu dute, eta duela zortzi hilabete aurkeztutako ekimenean baino babes gehiago lortu dituzte. «Onartua izateko aukera gehiagorekin, beraz», txalotu du Elejabarrietak.

Egitasmo horrek are garrantzia handiagoa ematen dio EH Bilduren mozioaren onarpenari, «une egokian mezu zuzena igortzen diolako gizarteari», Elejabarrietaren hitzetan. Ezkerreko subiraniston Senatuko bozeramaileak norabide horretan lanean jarraitzeko konpromisoa hitzeman du, mozioa babestu duten indar politikoen babesa eskertzeaz gain. «Ordezkatzen dudan alderdiaren eta taldearen izenean, eskerrak eman nahi dizkiet aldeko botoekin mozio honen onarpena posible egin duten guztiei», amaitu du.

Agenda aurrerakoia martxan jartzeko eta hitzemandako konpromisoak betetzeko eskatu dio Aizpuruak Sanchezi

Hitzemandako agenda aurrerakoiaren ezarpena gehiago ez atzeratzea galdegin dio EH Bilduren Kongresuko bozeramaileak Espainiako Gobernuko presidenteari, eta orain arte hartu ez dituen erabakiak hartzearen premiaz ohartarazi dio: lan erreforma bertan behera uztea, Mozal Legea indargabetzea, alokairuen prezioak mugatzea, pentsioak duintzea, bidezko fiskalitatearen alde egitea eta nazioaniztasuna elkarrizketaren eta akordioaren bidez jorratzea. "Neurri horiek guztiak martxan jartzeko gehiengo sozial, sindikal eta politikoa dauka gobernuak", ziurtatu du Aizpuruak.

| 2021-05-26 09:34:00

Agindu zenuen agenda ezkertiar eta aurrerakoia garatuko duzu legealdian zehar? Kongresuko kontrol saioa probestu du EH Bilduk, asteazken honetan, Espainiako Gobernuari eskaera zuzena helarazteko: ezkerreko politikak bizkortzeko eta legealdi hasieran hitzemandako konpromiso eta agenda aurrerakoia atzerapenik gabe hedatzeko eskatu dio. Pedro Sanchez presidenteari zuzendutako galdera baten bidez, Mertxe Aizpurua bozeramaileak mahai gainean jarri ditu Espainiako Gobernuak oraindik onartzeke dituen neurriak, eta azken hilabeteotan hartu ez dituen erabakiak hartzeko eskatu dio. "Lan erreforma bertan behera uzteko, Mozal Legearekin amaitzeko, alokairuen gehiegizko prezioak arautzeko, pentsioak duintzeko, fiskalitate justuaren alde egiteko eta nazioaniztasuna elkarrizketaren eta akordioaren bidez jorratzeko eskatzen dizugu. Hori da egin behar dena, Sanchez jauna, Kongresu honetako gehiengo aurrerakoiaren eskutik".

Bidegurutze historiko batean gaudela jakinda, EH Bilduk uste du bi aukera besterik ez daudela: desberdintasun handiagoa sortzen duten ereduetan sakontzea edo desberdintasun hori desagerrarazi dezaketen ereduetarantz jotzea. Horren harira, EH Bilduko bozeramaileak eskuin muturraren agenda atzerakoiari men egitearen arriskuez ohartarazi dio Sanchezi, eta "prekarietatearen eta murrizketen paradigma errotik aldatuko duten" neurri sakonagoak hartzeko deia egin dio, eskubideak eta duintasuna berreskuratzeko bidean. "Hori da jokoan dugun guztia, Sanchez jauna. Ezkerrak eskubide eta askatasunetan galtzen duen eremu bakoitza eskuin autoritarioak irabazten du", gaztigatu du.

Halaber, Aizpuruak Espainiako Gobernuko presidenteari gogorarazi dio gehiengo sozial, sindikal eta politikoa daukala gisa horretako neurrian indarrean sartzeko. "Egizu, Sanchez jauna, presazkoa da. Bestela, eskuinak jan egingo zaitu eta urteetako borroka luzeen ostean lortutako eskubide eta askatasunak aurretik eramango dituzte", gaineratu du.

"Agenda aurrerakoia ez da iristen"

Legegintzaldia hasi eta urte eta erdira, Aizpuruaren hitzetan, "inoiz baino beharrezkoagoa da" inbestidura saioan proposatutako agenda aurrerakoi eta ezkertiarra martxan jartzea. "Gaur, eskuin erreakzionarioaren goraldiaren aurrean, kontrarreforma antidemokratiko eta zentralizatzailea nahi duten horien aurrean, agenda hori ezartzea inoiz baino beharrezkoagoa da. Baina, tamalez, oraindik ez da iritsi. Herritarrek ezin dute gehiago itxaron".

Aizpuruak, hala ere, ontzat jo ditu Sanchezek bere erantzunean zehaztutako neurriak, baina horrek "egiteko asko zegoela" erakusten duela esan du, "oraindik ere egiteko asko" dagoela nabarmenduz. "Badakigu pandemiak zailtasun bereziak jarri dizkigula, baina badakigu orain arte hartutako neurriek ez dituztela herritarren itxaropenak bete. Zergatik? Esandako guztia egiten ez delako eta hitzemandako guztia betetzen ez delako", amaitu du diputatuak.

Txertoen patenteak altxatzeko EH Bilduren egitasmoa eztabaidatuko du aste honetan Senatuak

Txertoen patenteak altxatzeko jarrera bateratua adostea du helburu Gorka Elejabarrieta senatariak aurkeztuko duen egitasmoak. Europako Batasunak eta Munduko Merkataritza Erakundeak (MME) liberalizazioaren aldeko neurriak bizkortu ditzatela eta txertaketa erritmoaren desorekarekin amai dezatela eskatuko du.

| 2021-05-24 09:47:00

Espainiako Senatuak asteazken honetan eztabaidatuko du COVID-19aren kontrako txertoen patenteen aldi baterako liberalizazioa sustatzeko EH Bilduk aurkeztutako mozioa. Gorka Elejabarrieta bozeramaileak defendatuko duen egitasmoaren helburu nagusia Europako Batasunaren eta Munduko Merkataritza Erakundearen (MME) aurrean jarrera bateratua adostea da, eta hala eskatuko dio Senatuari, "txertoen banaketa, eskuragarritasuna, irisgarritasuna eta doakotasuna bizkortzeko asmoz".

Txertoen eskuragarritasun "mugatua eta eskasa" dela kontuan hartuta, ezkerreko indar subiranistak uste du premiazkoa dela txertoen patenteak altxatzeko erabakiak bizkortzea Europako Batasuneko erakundeetan; bereziki, Munduko Merkataritza Erakundearen ekaineko eztabaidari begira. Era berean, EH Bilduren mozioak COVAX mekanismoa indartzeko deia egiten du, txertoak eskuratzeko aukera handiagoa duten herrialdeek ekarpen handiagoa egin dezaten baliabide gutxiago dituzten herrialdeen mesedetan; horrek aukera emango luke mekanismo horrek helburu duen "berdintasuna" lortzeko eta txertaketa prozesuaren egungo desoreka hausteko.
 

India eta Hegoafrika, egitasmoaren bultzatzaile

EH Bilduren Senatuko bozeramailearen hitzetan, txertoen patenteen altxatzea "teknologiaren transferentziaren" eskutik egin beharko litzateke txertoen ekoizpena handitzeko. Horri esker, posible izango litzateke txertoen banaketa mugarik gabe egiteko mundu osoan eta, garrantzitsuena, herritar guztien immunizazioa ahalik eta lasterren lortzeko. "Txertoak guztion ondasun bihurtzea ekarriko luke erabaki horrek, kutsatze gehiago, heriotza gehiago eta pandemia gogortuko luketen aldaera berriak saihestuz. Funtsezkoa da txertoen ezagutza eta teknologia partekatzea".

EH Bilduk uste du salbuespen egoeren aurrean salbuespenezko neurriak behar direla. "Egungo osasun krisi globalak konponbide globalak eta ezohikoak behar ditu". Elejabarrietaren arabera, Espainiako Estatuak bat egin beharko luke hainbat herrialdek txertoen patenteak askatzearen alde hasitako bidearekin. Munduko Merkataritza Erakundearen aurrean liberalizazioa eskatzen lehen herrialdeak India eta Hegoafrika izan ziren, joan den urteko urrian; dagoeneko 100 estatu, erakunde humanitario, zientzia arloko eragile eta gobernuz kanpoko erakunde ugarik babestu dute Indiak eta Hegoafrikak bultzatutako ekimena. Berriki, EH Bilduren Kongresu eta Senatuko bozeramaileak Espainiako Estatuko Indiako enbaxadorearekin bildu dira Madrilen, txertoen patenteak altxatzearen alde martxan jarritako egitasmoaren inguruko xehetasun guztiak bertatik bertara ezagutzeko.

Txertaketa erritmoaren desoreka

Egungo erritmo desorekatuak txertaketa prozesuan eragin ditzakeen ondorio eta arriskuez ohartarazi du Elejabarrietak. "Errenta ertain-altuko herrialdeetan, lau pertsonatik batek jada txertoa jaso du; errenta baxuko herrialdeetan, ordea, 500 biztanletik bakarrak. Oxfam erakundeak gogorarazten digu txertoen %51 munduko biztanleriaren %13 osatzen duten herrialdeen esku dagoela", nabarmendu du, gaineratuz Hegoaldeko herrialdeek txertoak azkar eskuratzeak "mutazioak saihestuko lituzkeela". Aldiz, txertoak herrialde aberatsenek soilik bere gain hartzen badituzte, txertoek eraginkortasuna galduko lukete, herritar guztiak arriskuan jarriz.

Osasunaren Munduko Erakundearen arabera, egungo txertaketa erritmo desorekatua mantenduz gero, Europak 2021ean amaituko luke herritarren gehiengoaren txertaketa, eta Hegoaldeko herrialdeek, berriz, 2022an edo 2023an egingo lukete. Farmazia enpresa handien monopolioari amaiera emateko deia egin du EH Bilduk Senatuan duen bozeramaileak: "Txertoen ekoizpena enpresa farmazeutiko gutxi batzuen menpe dago, eta horien banaketa herrialde aberatsek bereganatzen dute, produkzioaren monopolioa duten farmazeutiken espekulazioei bide emanez".

Lan erreforma urtea amaitu aurretik indargabetuko duela baieztatu dio Espainiako Gobernuak EH Bilduri

PSOE eta Unidas Podemosek duela urtebete EH Bildurekin sinatutako akordioa betetzeko asmoa adierazi du Yolanda Diaz presidenteorde eta Lan ministroak, gaur, Oskar Matute diputatuak Kongresuko kontrol saioan eginiko galderaren ostean.

| 2021-05-19 10:35:00

Lan erreforma urtea amaitu aurretik indargabetuko duela baieztatu dio gaur Espainiako Gobernuak EH Bilduri, duela urtebete izenpetutako akordioa indarrean dagoela berretsita. Hala ziurtatu du Yolanda Diaz hirugarren presidenteorde eta Lan ministroak, Oskar Matute diputatuak lan erreforma bertan behera uzteko xehetasun eta epe zehatzak jasotzeko eginiko galdera bati erantzunez. Bihar, hain justu, urtebete beteko da EH Bilduk lan erreforma indargebetzeko akordioa sinatu zuenetik PSOE eta Unidas Podemosekin.

"Hitza betetzeko unea da orain". Matutek 2020ko maiatzaren 20an Espainiako Gobernuarekin lortutako akordioa gogoratuz hasi du Kongresuko kontrol saioan eginiko interpelazioa, eta maiatzaren 1eko mobilizazioetan sindikatuek egindako aldarrikapenak eta leloak bere egin ditu. Matuteren hitzetan, bada garaia lan erreforma behingoz indargabetzeko: "Elkarrizketa sozialeko mahaia baztertu gabe, lan erreforma indargabetzeko unea da. Indargabetu gabe pasatzen den egun bakoitza galdutako egun bat gehiago da Estatuko osoko langileentzat, are gehiago aurrean dugun lan etorkizuna ziurgabetasunez eta prekaritatez betea dagoela jakinda". Yolanda Diazen erantzuna argia izan da: "Matute jauna, lan erreforma indargabetuko dugula aurreratzen dizut. Abenduaren amaierarako indargabetze lanak amaituta ez badaude, nik neuk men egin eta azalpenak emango ditut ganbera honetan".

Premiazko neurri zehatzak

EH Bilduren bozeramaileordeak haratago joan nahi izan du, premiaz hartu beharreko neurri zehatzak proposatuz. Ultraaktibitatea mugarik gabe luzatzea, itunen estatalizazioa amaitzea, enpresako hitzarmenen gaineko lehentasuna indargabetzea, lan espedienteak aplikatzeko administrazio publikoen baimenak berreskuratzea eta lan erreformaren aurreko kalte ordainak berreskuratzea galdegin du Matutek. "Azken boladan, justifikaziorik gabeko lan espedienteak etengabeak izaten ari dira Euskal Herrian, epaitegiek adierazi duten bezala", salatu du, PCB-ITP eta Tubacex-en kasuak gogora ekarriz.

Bere erantzunean, Diaz ministroak arrazoia eman dio Matute diputatuak egindako hitzartzeari, eta proposatutako neurriak bere egin ditu, praktikara eramateko konpromisoarekin. "PPk hautsi zuen oreka irauliko dugu negoziazioetan, egun dagoen desorekari aurre eginez. Kontratuen egonkortasuna bermatuko dugu", ziurtatu du gobernuko hirugarren presidenteordeak.

Elkarlanean aritzeko konpromiso irmoa

Matutek, halaber, indarrak batzeko deia egin du eta ezker subiraniston eskua luzatu dio Espainiako Gobernuari emakumeen eta gizonen arteko soldata arrakalari amaiera emateko, gazteen prekarietateari aurre egiteko eta lana eta etxebizitza galtzeko beldurrarekin bukatzeko. "PPren lan erreformak langileria pobretu besterik ez du egin. Ados gaude esaten duzunarekin: aberastasuna sortzen dutenak langileak dira. Horregatik, argi eta garbi diogu errealitate berri baterako igarobide hori ezin dutela betikoek, langileek, ordaindu, jakin badakigulako lan merkatuan eta ekoizpenean eragin zuzena izango duten aldaketak datozela", nabarmendu du Matutek.

Iragarpenaren ostean, Lan ministroaren konpromiso eta ahaleginak goraipatu ditu EH Bilduko diputatuak, eta indargabetzea ahalik eta lasterren eta elkarlanean gauzatzeko konpromiso irmoa berretsi du. "Zuk zeuk adierazi zenuen duela astebete txio errazek bultzatutako politikak alboratzeko eta jendearen eguneroko arazoei irtenbidea emateko beharra. Bat gatoz. Eta ez zaigu ezer garrantzitsuagorik bururatzen langileen lan baldintzak aldatzea baino". Diaz presidenteordeak eskerrak eman dizkio Matuteri egindako proposamenengatik, eta EH Bilduren "ekarpen guztiak" jasotzeko prest dagoela ziurtatu du.

• «
• 1
• 2
• 3
• 4
• 5
• 6
• 7
• »