AKTUALITATEA

| 2024-11-29 09:01:00

EH Bilduk legez besteko proposamena aurkeztu du Kongresuan, Europako Batzordeak berriki egindako eskaerarekin bat eginez, kaleratze bidegabeen kalte-ordainak handitzeko. Ezkerreko talde subiranistaren helburua da kalte-ordain horiek langileen babesa bermatzea eta enpresentzat disuasiozkoa izatea, 2012ko Lan Erreformaren aurreko egoera berreskuratuz, kaleratzeen arloko legedia aldatuta. "Lan Erreformatik kanpo geratu ziren kaleratze bidegabeen kalte-ordainak berreskuratzea eta handitzea nahi dugu, Europako Batzordeak duela gutxi gomendatu duen bezala", nabarmendu du Oskar Matutek, EH Bilduren Kongresuko bozeramaileordeak.

Joan den azaroaren 27an, Europako Batzordeko ministroen batzordeak Espainiako Estatuari gomendio bat helaraztea erabaki zuen, kaleratze bidegabeen kalte-ordainen sistema egoki bat ezar zezan, enpresentzat disuasioa eragingo lukeena. "Kalte-ordainen sistema horrek kontuan hartu behar du langileek jasandako benetako kaltea, eta gaur egun ulertzen da ez dela halakorik aurreikusten", zehaztu du EH Bilduk aurkeztutako egitasmoak. Ildo horretan, ebazpen horren helburua da legez kanpoko kaleratzeen kasuan  kalte-ordain duin bat bermatzea, langileak jasandako kaltea kontuan hartuko duena.

Kontrako norabidean

EH Bilduk gogorarazi du gomendio hori UGT sindikatuak, 2022ko martxoan, egindako salaketaren ondorio zuzena dela. Salaketaren arabera, 1980ko maiatzaren 6an berretsi eta urte horretako ekainaren 5ean indarrean jarritako Europako Gutun Sozialaren 24. artikulua urratu zuen Espainiako Estatuak. Sindikatuaren salaketaren eraginez, Gizarte Eskubideen Europako Batzordeak txostena argitaratu zuen uztailaren 29an, eta horren ostean iritsi da Europako Batzordearen gomendioa, azaroaren 27an.

Ezkerreko talde subiranistak nabarmendu du ebazpen hori Espainiako Gobernuek azken 30 urteotan lan arloan egin dituzten erreformen kontrako norabidean doala. "2012ko Lan Erreformak kaleratzeen kalte-ordainak murriztu zituen. 2022an onartutako Lan Erreformak ere ez zituen berreskuratu ezta aldatu ere 2012a baino lehen zeuden kalte-ordainak", ohartarazi du Matutek.

Espainiako Estatuan jurisprudentzia eragin duen gomendio horri men egin behar zaiola uste du EH Bilduk. Euskal Herriko, Estatuko eta gainerako lurraldeetako sindikatuen artean kaleratzeei lotutako kalte-ordainak erreformatzeko beharra ahobatekoa dela egiaztatuta, EH Bilduk egitasmo bat aurkeztu du Kongresuan langileen eskubideak bermatuko dituen legedia sendotzeko eta kalte-ordainak berreskuratzeko; proposamena datozen asteotan eztabaidatuko da Kongresuko osoko bilkuran EH Bilduren ekimenez.