Iruñea

EH Bilduk kalez kaleko salmenta berpizteko plan bat eskatu du eta, arriskuak murrizteko, Landabengo azoka hiru lekutan sakabanatzea proposatu du: Landaben, Runa parkea eta Lezkairu

Koalizioak "ahalik eta lasterren" eskatu du deseskaladaren faseetara egokitutako programazio kulturalaren egutegi bat, sektoreari laguntzeko eta zuzeneko kultura herritarrei hurbiltzeko

| 2020-04-30 14:21:00

EH Bilduren Udal Taldeak adierazpen proposamen bat aurkeztuko du asteartean Iruñeko Udaleko Presidentetza Batzordean eztabaidatzeko, Gobernu Estrategikoaren eta Herritarren Segurtasunaren alorrei premiaz egin dezaten eta Iruñean kaleko salmenta berraktibatzeko plan bat aurkez dezaten eskatzeko. Plan horrek proposamen bat beharko luke, honako hauek jasoko dituena: kokapena, postu-motak eta -kopurua; langileen antolaketa; perimetroaren, sarbideen eta irteeren seinaleztapena; salmenta-postuak artatzen dituzten pertsonentzako segurtasun-neurriak; azokaren barne-funtzionamendua; edukiera; salmenta-postuen datak, ordutegia eta tamaina.

"Herri eta hirietako azoka txikiek ere funtzio soziala betetzen dute, bai ekoizleentzat, bai erabiltzaile edo saltzaileentzat. Merkatu ibiltariak merkataritzarako bide garrantzitsuak dira nekazarientzat, eta gehienak tokiko ekoizleak eta hurbilekoak dira", argudiatu du EH Bilduren testuak, Zizur, Altsasu, Aoiz eta Atarrabia bezalako herriek azoka txikiak ireki dituztela gogorarazi ostean. Koalizio soberanistak, Landabengo azoka txikiari dagokionez, hiriko hiru lekutan banatzea proposatu du, jende-pilaketen aurrean arriskuak murrizteko. EH Bilduk, txosten tekniko baten zain, Landabengo bera proposatu du hiriaren mendebaldean, Lezkairu hego-ekialdean eta Runako parkea, Rotxapean, iparraldean.

Koalizioak, lan-proposamen gisa, proposatu du lanpostuak, beste udalerri batzuetan bezala, elikadurara eta salmenta baimenduta duten funtsezko gaietara mugatzea, eta hori instalatu nahi dutenak ez etortzea urrutiko eremuetatik, "Kutsaduragatik une honetan komeni ez diren eta mugikortasun-araudietan oraindik jasota ez dauden joan-etorriak saihesteko". Azkenik, "beste familia batzuk edo nekazaritzako enpresa txiki batzuk merkatu horietan sartu ahal izateko" epea irekitzea ere proposatu du eh Bilduk.

Bete nahi diren helburuak, "betiere osasun-protokoloak zorrotz kontuan hartuta", honako hauek dira: "ekoizle txikia hurbiltasunetik babestea; ekonomia bidezkoagoa eta hurbilagokoa sustatzen jarraitzea; gure ingurumena zaintzea; erosketetan osasun-bermeak eskaintzea; eta salmenta-espazioen kudeaketa publikoa mantentzea".

Kultura-programazioaren egutegia

Bestalde, eta eztabaidarako, kasu honetan Herritar Gaien arloan, EH Bilduk adierazpen bat aurkeztu du eskuineko hirukoari eskatuz "ahalik eta lasterren" eraman dezala kultur arloko krisi-mahai sektorialera "programazio-egutegiaren proposamen bat, fase bakoitzean kultura eta arte sarea kontuan hartuta, eta horrekin batera, deseskalada aldi bakoitzera egokitutako osasun-protokoloak egitea".

"EH Bilduk, eztabaida irekitzean aldagai eta ideia berriak gehitzeari kalterik egin gabe, uste dugu aire zabaleko dinamikak, formatu dinamikoetan edo mugimenduan, eta tokiko kultur sarearen proposamenak kontuan hartuta, abian jar daitezkeen aukerak direla, eta, aldi berean, espazio kultural itxiak (antzokiak, erakusketa-aretoak eta bestelako azpiegitura kulturalak) irekitzeko modua azter daitekeela". Koalizio subiranistaren esanetan, Iruñeko Udalak, gai honetan, helburu bikoitza bilatu behar du: "Hiriko kultur sektoreari laguntzea, ikusgai egin eta balioa eman diezaion, eta zuzeneko kultura herritarrengana hurbiltzea".

 

EH Bilduk, PSN-PSOEk eta Geroa Baik Sarasate pasealekuko udal etxebizitza Plena Inclusión Navarrari uztea eskatu dute

Udalak aukera emango lioke federazio horri adimen- edo garapen-urritasuna duten pertsonen alde erabiltzeko; Nafarroako Gobernuak, berriz, kudeaketa- eta langile-gastuak bere gain hartuko lituzke

| 2020-04-30 13:25:00

EH Bildu, PSN-PSOE eta Geroa Bai udal taldeek adierazpen bateratua aurkeztuko dute Herritarren Gaietarako Batzordeari maiatzaren 5ean, Iruñeko Udalak Sarasate pasealekuko udal etxebizitza komunitarioan, gaur egun erabiltzen ez dena, Plena Inclusión Navarrak sartzeko aukera izan dezan, egoitzetan edo erakunde espezializatuetan bizi diren adimen urritasuna duten gazteentzat.

Horrela, Udalak aukera emango lioke elkarte eta entitate nafarren federazio horri adimen- edo garapen-urritasuna duten pertsonen eta haien familien alde erabiltzeko, eta Nafarroako Gobernuak bere gain hartuko lituzke horrek eragingo lituzkeen kudeaketa-gastuak eta langile-gastuak. Hori guztia, pertsona horien gizarteratzea hobetzeko.

Halaber, adierazi dute erakunde horrek 12 erakunde biltzen dituela, besteak beste, Anfas, Bidean, Atena, Fundación Ciganda Ferrer, Futuna, Javier Egoitza, Apamo Monjardín, AVR Roncal eta Apymas Andrés Muñoz, El Molino, Isterria eta Oncineda, eta adimen- edo garapen-urritasuna duten 2091 pertsona, 4.000 senide, 200 profesional eta 850 boluntario ordezkatzen dituztela.

Lagapen horrekin, etxebizitzaren arazoa arintzeko neurri garrantzitsu bat hartuko litzateke, erabilera sozialerako eskaintza zabalduz. Lehen mailako premia hori areagotu baita koronabirusaren krisiaren ondorioz.

Testuan, Iruñeko Udalak titulartasun propioko etxebizitzen parke garrantzitsu bat duela gogorarazi dute talde sinatzaileek, eta "duela urte batzuk hasitako birgaitze prozesuarekin jarraitzeko" konpromisoa hartu dute.

 

ALBISTEAK