Eh Bilduk merkataritzari laguntzeko bonuak martxan jartzea eskatu du Na+en ezintasunaren aurrean, udal gobernuak ez baitu aurreikusten kanpaina hasiera irailera arte, proposamena onartu zenetik hiru hilabetera
| 2020-07-31 12:58:00
Koalizioak gogorarazi du ehunka pertsona ari direla sektore horretako lanpostuak galtzen eta atzerapena justifikaziorik gabekoa dela, Logroñon edo Donostian antzeko kanpainak amaitu direnean
"Covid 19aren pandemiaren ondorioz dozenaka denda txiki ateak ixten ari diren honetan, sektoreko ehunka langile lanpostuak galtzen ari direnean, eta krisi ekonomikoak gure hiriko aberastasun gune tradizional hori suntsitzeko mehatxua egiten ari denean, eskuineko hirukoak beste behin ere bere eraginkortasun eza eta kudeaketa txarra erakutsi ditu, 800.000 euroko laguntza bonuak geldirik mantendu ditu eta egoera horri aurre egiteko ezgai ageri da. Egoera honek dinamismoa, ausardia eta azkartasuna behar ditu, ez autokonplazentzia”. Horrela baloratu du EH Bilduk merkataritza txikiari laguntzeko bonuen kanpainaren atzerapena; izan ere, koalizioak apirilaren 17an planteatu zuen neurri hori Bozeramaileen Batzordean, eta lau hilabete geroago, maiatzaren 28an onartutako Berreraikitze Planean sartu zen arren, ez du oraindik argia ikusi. "Are okerrago, merkataritzako mahai teknikoaren uztailaren 27ko bileratik ondorioztatzen denez, irailera arte ez dira jarriko martxan, hau da, proposatu eta bost hilabetera eta onartu eta hiru hilabetera", salatu du koalizioak. "Tresna hori martxan jartzeari lehentasuna ematea eskatzen dugu, eta eskuineko hirukoa behingoz lanean hastea, krisi honekin okerren daudenei laguntzeko", eskatu du EH Bilduk.
"Logroño edo Donostia, esaterako, antzeko laguntza-kanpainak jarri dituzte martxan, eta arrakasta handiz amaitu dute. Hemen, ordea, arloko arduradunak behin eta berriz atzeratu du tramitazioa, besoak gurutzaturik egon da eta edukirik gabeko irudi kanpainak egitera mugatu da, ehunka pertsonen bizimodua arriskuan dagoen bitartean. Aski da" eskatu du koalizio subiranistak. "Iruñeak ez du merezi gobernu-talde honen gaitasun eza, tokiko merkataritzak ezin du itxaron eskuinak nagiak ateratzen dituen arte edota Iruñea azalera handiko merkataritzaz josita egon arte. Herritarren ordezkariak behartuta gaude gobernatzen dutenak behingoz martxan jartzeko eskatzera", gaineratu du EH Bilduk, eta gogorarazi du Merkataritza eta Turismo arloak bi zinegotzi dituela (zinegotzi delegatu bat eta zinegotzi berezi bat), zuzendaritza eta guzti. "Izendapen askeko lanpostuen gainegiturak erabateko ezgaitasuna erakutsi du".
Baina bonuen kanpaina martxan jartzeko atzerapenaz gain, merkataritza arloko beste zenbait ekimenetan (udazkeneko kanpaina, esaterako) eskuineko hirukoak sortu dituen oztopo eta ziurgabetasuna ere salatu ditu EH Bilduk. "Zalantza berriak sortu dituzte merkataritzarentzat, eskolara itzultzeko kanpainaren baitako diru laguntzak ezabatu dituzte, bonuen kanpainaren hasierarekin bat egingo duelako denboran, eta hori sektorarentzako beste arazo bat gehiago da praktikan", azaldu du koalizioak, eta "hurrengo ikasturterako elkarteekin izango duten lankidetza ekonomikoa ere ez dute argitzen", gaineratu du. "Itxaroteko denbora amaitu da, pazientzia agortu da eta ahalik eta modu argienean eta irmoenean exijitzen diogu, behingoz, udal gobernua suspertzea eta herritarrei laguntzen hastea", esan du koalizio subiranistak.
Udaleko sare sozialetan elebitasuna bermatzeko agintzen duen Nafarroako Administrazio Auzitegiaren epaiak agerian utzi ditu eskuineko hirukoaren euskarafobia eta kudeaketa traketsa, EH Bilduren ustez
| 2020-07-29 14:46:00
Koalizioak ebazpena berehala betearazteko eskatu dio Mayari, eta liskarra piztu eta bere “kudeaketa kaskarra” estaltzeko helburuarekin euskarari egiten dizkion erasoak bertan behera utz ditzala exijitu dio
EH Bilduren ustez, Iruñeko Udaleko sare sozialak hizkuntzaren arabera banatzeko erabakia bertan behera uzten duen Nafarroako Administrazio Auzitegiaren epaiak hiru alderdi uzten ditu agerian: "Lehenik eta behin, eskuineko hirukoak euskarari arrazoirik gabe eta legedia urratuz erasotzeko duen obsesioa; bigarrenik, Enrique Mayaren gobernu-taldearen kudeaketa larderiatsua, erabakiak aldebakartasunez hartzeko joera dela eta; azkenik, eskuineko hirukoaren kudeaketaren aurkako erabaki judizial sorta bat aurreikusten du, eta horrek Udalaren irudiari kalte egiteaz gain, iruindarren artean identitate liskarrak sortzeko obsesioak eragindako txapuzak konpontzeak kostu ekonomikoa ekarriko duela.
Koalizio subiranistak Iruñeko Udaleko profil instituzionalak elebitasuna bermatzeko lehen zeuden erara itzultzeko eskatuko dio eskuineko hirukoari, izan ere, Nafarroako Administrazio Auzitegiak adierazten duen moduan, elebitasuna bermatzeko Iruñeko bi hizkuntza koofizialak (euskara eta gaztelania) euskarri berean berdintasunez tratatu behar dira. "Gaitzesgarria da eskuina 30 urtez boterean mantendu zuten identitate liskarrak berpizteko euskara erabili nahi izatea, baina are larriagoa da estrategia hori erabiltzea beraien kudeaketa kaskarra eta hirian eragin duten paralisia estaltzeko", salatu du EH Bilduk. "Euskarafobia, atzerapausuak, aldebakartasuna, gezurrak eta paralisia, bost hitz horiek definitzen dute eskuineko hirukoaren kudeaketa legealdiaren lehen urte honetan, eta hori da estali nahi dutena", gaineratu du.
Udalarentzat ere oso larriak dira jokabide horren ondorioak, koalizioak gogorarazi duenez. "Bi adibide bakarrik jartzearren, gogora ekarri nahi dugu Pirritx, Porrotx eta Marimotots pailazoen jarduna justifikaziorik gabe zentsuratu zela, eta zentsura hori zalantzatan jarri zuela epaileak, horrek Udalari ekarriko dion kalte-ordainarekin; bestetik gobernu-taldeak hiriko zortzi auzotako prebentzio-taldeen kontratuak aldatzeko erabakiak ekari ditzakeen ondorioak. Erabaki hori bertan behera utzi zuen Nafarroako Kontratu Publikoen Administrazio Auzitegiak duela astebete".
Eskuineko hirukoaren gobernatzeko modu "lardaskari eta sektarioaren" aurrean, EH Bilduk baieztatu du "erne jarraituko" duela, eta "herritarren interes orokorra defendatzeko gure esku dauden tresna administratibo eta juridiko guztiak” erabiliko dituela, baldin eta Navarra Sumak gehiengoen irizpidea mespretxatzen jarraitzen badu.
EH Bilduk Sarasateko terraza berrietan hondakinei eta ur-hornidurari buruzko araudia betetzea eskatu du, eta instalazio horiek Iruñeko ostalaritza sektorearentzat “diskriminatzaileak” direla salatu du
| 2020-07-27 14:31:00
Koalizioak berraztertzeko errekurtsoa aurkeztu du Udalean bertan, baimenak ematea ahalbidetu duen espedienteak Osasun arloaren nahitaezko txostenik ez duela salatuz
Eh Bildu udal taldeak berraztertzeko errekurtsoa aurkeztu du Iruñeko Udalean, Sarasate pasealekuan baimendutako bost terrazetan hondakinei buruzko foru araudia eta ur hornikuntzari eta elikadura higieneari buruzko tokiko araudia betetzeko eskatuz. Koalizio subiranistaren helegiteak, halaber, salatu du baimenak emateko oinarritzat hartu den Herritarren Segurtasunerako espedienteak ez duela Osasun arloko nahitaezko txostenik, eta hori "Navarra Suma Udalean egiten ari den kudeaketa larderiatsuaren adibide berri bat" dela.
Lizentziak emateari dagokionez, EH Bilduk uste du erabaki hori "diskriminatzailea" dela, izan ere, eremu jakin bateko lokal batzuei (Alde Zaharreko lau kale) baino ez die eskaintzen negozio-aukera hori, eta ez du beste aukerarik eskaintzen hiriko beste gune batzuetan dauden lokaletarako. "Sektoreak berak salatu du eskuineko hirukoaren jarrera hori; izan ere, jatorrizko proposamena ostalaritza elkarte batetik heldu zen hiriko hainbat gunetan ezartzeko, eta gobernu taldeak, inolako argudiorik gabe, Sarasaten bakarrik eraman du aurrera", argudiatu du koalizioak. EH Bilduk gogorarazi duenez, ANAPEHk berak publikoki salatu zuen neurri horrekin "12 ostalariri egiten zaiela mesede, baina terraza berri hauetara doazen bezeroekin kaltea eragiten zaie beste ostalari guztiei". "Eskuineko hirukoaren arbitrariotasunaren, aldebakartasunaren eta planifikazio txarraren erakusgarri da hau; izan ere, haien gobernu-ekintzak gehiengoaren aurrean gutxi batzuei egiten die mesede", salatu du EH Bilduk.
Espedientearen gabezia teknikoei dagokionez, berraztertze-errekurtsoak argudiatzen du deialdiaren baldintza-agiriak Hondakinei buruzko Foru Legea urratzen duela, erabilera bakarreko baxera, manteleria eta mahai-tresnak eskatzen dituelako. "Udalak, beharrik gabe, justifikaziorik gabe eta 5 lokalen alde egiteko soilik, ez dio jaramonik egin foru-araudiari, hain zuzen ere kontrakoa eskatzen baitu, eta ez du kontuan hartzen lege honek egiten duen ahalegina toki-erakundeek hondakinen murrizketa bultzatzeko", gogorarazi du EH Bilduk, eta gaineratu du "Ekonomia zirkularraren kontzeptuari ere muzin egiten dio, zeinak ahalik eta bizitza baliagarririk luzeena duten elementuen erabilera bultzatzen duen".
Bestalde, errekurtsoaren arabera, espedienteak ez du nahitaezko osasun-txostenik, eta terrazetan ez da eskatzen elikagai-higieneari buruzko araudia betetzen dela bermatzen duen ur-horniketarik. Izan ere, araudi horrek 51.4 artikuluan hau ezartzen baitu: "Instalazioek langileen higienarako eta ontziak garbitzeko behar beste ur edangarri eduki beharko dute konketa eta harrasketetara konektaturik, baita saneamendu sareari konektatutao isurbideak ere”. Kasu honetan, EH Bilduk salatu duenez, esleipen prozesu horren pleguak dio terrazak "energia izango duela, baina ez duela ur hornidurarik izango, ezta hustubiderik ere". "Akats larri hori ur kitak ezarriz konpontzen saiatu dira, baina Osasun Sailak ez du instalazioa aztertu, eta, beraz, udaltzainek soilik homologatzen dituzte instalazio horiek", esan du koalizioak.
PEKZen kontratuak berehala leheneratzea eskatu du EH Bilduk, eta haurren defentsarako eta zaintzarako sarearen aurkako jazarpen kanpaina "arduragabea" bertan behera uzteko eskatu dio eskuineko hirukoari
| 2020-07-24 13:37:00
“Kontratu Publikoen Auzitegiaren ebazpenak agerian uzten ditu eskuineko hirukoaren ilegaltasuna eta fede txarra, bere obsesio politikoak inposatzeko Covid 19a erabiltzean
Nafarroako Kontratu Publikoen Administrazio Auzitegiak Iruñeko auzoetako Prebentzio Ekintza Komunitarioko Zerbitzua (PEKZ) babestuz emandako ebazpena eskuineko hirukoak gizarte arloan egiten duen kudeaketa "negargarriaren” aurkako zigor galanta da EH Bilduren ustez. Are gehiago, talde horiek 8 auzoetan egiten duten prebentzio lanaren aitortza esanguratsua da. "Agerikoa da eskuineko hirukoak azpilana egin duela talde horiek zapuzten saiatzeko, bere kudeaketarekiko kritikoak direlakoan, baina azpilan hori agerian geratu da, auzitegiaren irizpena oso gogorra baita zentzu horretan, eta argi uzten du eskuineko hirukoaren kudeaketa zakarra eta eraso onartezina eta justifikaezina egin diola haurrak babesteko eskubideari", salatu du koalizio subiranistak.
Ebazpenak Udalaren sinesgarritasuna kolokan jartzen du, agerian uzten baitu hain gaizki oinarritutako espedientea. Baina gainera, PEKZei, kontratu bidez dagokien haurrak babesteko lana egitea eragozten ari dira. Ez zegoen inolako beharreik horrelako lardaskeria bat egiteko", nabarmendu du EH Bilduk. "Prebentiboen kontratuak deuseztea justifikatzeko COVID-19a argudio gisa erabiltzea, arduragabekeria, asmo txarra eta pandemia beraien helburu politikoak inposatzeko erabili dutela erakusten du", gaineratu du koalizioak.
EH Bilduk ohartarazi du eskuineko hirukoak PEKZak hiri-kolonien kargu egitera behartu nahia herritarren interes orokorraren kalterako zela: "azken urteotan, auzoetako prebentiboen programazioak mila txiki baino gehiagori ematen zien zerbitzua, eta horiei udalekuetako plazak gehitzen zitzaizkien, baina aurten Navarra Sumak gastuak murriztu nahi zituen, zerbitzu bakarra eskaintzeko. Kontziliazio-zerbitzu horrek 400 adingabe baino ez zituen artatzen, eta, azkenean, gobernu-taldeak berak emandako behin-behineko datuen arabera, ehun inguru baino ez dira izan. "Hori onartezina da eta erantzukizunak eskatuko ditugu", aurreratu du koalizioak.
Legez kontrakoa den auzi honek hiriaren irudiari egin diezaiokeen kaltea da eskuineko hirukoaren jarduera "negargarriaren" beste ondorio bat, aurreko legegintzaldian, Joseba Asironen gobernupean, Haurren Laguna Den Hiria izendatu baitzuten Iruñea. UNICEF buru duen erakunde eta instituzioen sare batek 2018an emandako aitorpen hori, hain zuzen ere, Udalak haurren arloan egindako lan "trinko eta parte-hartzailean oinarritzen zen, eta lan hori, besteak beste, prebentzio-taldeek ere egiten zuten". Urte honen erdialdean ziren Iruñearen egoera berriz baloratzekoak, eta auzi hau izendapen horren kontrako norabidean doa. Beldur gara izendapen hori arriskuan egotea orain” ohartarazi du.
"Laburbilduz, EH Bildutik eskuineko hirukoak egindako legez kanpoko ekintza berri hau salatzen dugu, adingabeen eskubideen aurka doalako eta lardaskeria izugarria delako; gainera, Navarra Sumari exijitzen diogu kontratu horiek bere normaltasunera itzultzeko eta, behingoz, lanean hasteko, adingabeen babesarekiko konpromisoa eta horrek eskatzen duen lan komunitarioa indartzeko helburuz", amaitu du koalizioak.
Armadaren etorbidea eta Baiona etorbidea lotzeko bidegorrian egindako "lardaskeriak" eskuineko hirukoaren "aldebakartasuna eta planifikazio txarra" agerian uzten duela salatu du EH Bilduk
| 2020-07-23 13:02:00
Koalizio subiranistak mugikortasunaren alorrean hiri-itun bat egiteko eskaintza berretsi du, "batasuna, adostasuna eta erantzukizuna" oinarri hartuta
"Inprobisazioa, planifikazio txarra, kalitate tekniko falta eta aldebakartasuna”. Lau hitz horiek definitzen dute eskuineko hirukoaren mugikortasun-politika. Politika horrek funtsezko proiektu batzuk geldiarazi eta atzeratu ditu, Labriteko aldapa kasu, eta beste batzuk korrika eta presaka egitera behartu ditu, hala nola Amaya kaleko bizikleta-erreia, bizikleta-tarte berriak aldebarkatasunez lehenestea, eta, orain, Barcinaren bizikleta-erreien politikara itzultzea, ez soilik erreiak espaloietara igoz, baizik eta bereguneak hautsiz. Horrela baloratu du EH Bilduk Armadaren etorbidea eta Baiona etorbidea bidegorri batez lotzeko proiektuaren aldaketa. Aldaketa horrek, taldeei aldez aurretik galdetu gabe eta Mugikortasun Batzordean eztabaidatu gabe, aurreikusita zegoen galtzadako bizikleta-erreia Antoniuttiko zuhaizti-eremura lekualdatzen du. "Lardaskeria berri bat, eta honekin lau lardaskeria jarraian egin dituzte”, laburbildu du koalizio subiranistak.
Proiektu Estrategikoetako Mugikortasuneko eta Jasangarritasunako alorretik eman den azalpenak agerian uzten du, batetik, Fermin Alonso zinegotziak zuzentzen duen arloak inprobisazioaren bidez funtzionantzen duela, eta bestetik, eskuineko hirukoaren diskurtsoak ez duela inolako sinesgarritasunik mugikortasun lanei dagokionean" esan du EH Bilduk. Izan ere, koalizio subiranistak gogora ekarri ditu eskuin erregionalistak joan den legegintzaldian egindako kritikak: "Erdigunea atsegin egiteko lehenego faseko lanak goitik behera deskalifikatu zituzten behin behinekoak zirelako, eta orain haiek behin behineko lanak egiten dituzte, beraien txapuzak estali nahian”.
Hala eta guztiz ere, EH Bilduk berriro egin dio eskaintza eskuineko hirukoari mugikortasunaren eta jasangarritasunaren arloan hiri-akordioak lortzeko. Akordio horien oinarria honakoa izango litzateke: erabakiak hartzeko orduan aldebakartasuna ekiditea, adostasunak bilatzea eta Mugikortasun Batzordea eztabaidarako foro gisa erabiltzea. "Talde guztiok dugu biharko Iruñea hiri jasangarri eta eredugarria izateko ardura, eta lan hori batasunetik, adostasunetik eta erantzukizunetik soilik egin daiteke. Eskuineko hirukoa egiten ari den guztiz kontrakoa eginez, alegia”.
