EH Bilduk diru laguntza eta inbertsio gehiago eskatu ditu Covid-ak gehien kolpatu dituen auzoentzat, eta ez soilik erantzun poliziala, Mayak egin bezala
| 2020-10-14 13:40:00
Koalizioak ekimen bat aurkeztuko du Covid batzorde berezian, Arrosadia edo Sanduzelai auzoentzako jarduera sozialerako plan berezi bat eskatzeko
"Baliabide faltaren ondorioz pilaketak ematen diren errealitate sozioekonomikoetan erakundeek hartu beharreko neurriak sozialak eta laguntzakoak dira, ez neurri polizialak soilik. Are gehiago Udalaren kasuan, herritarrengandik hurbilen dagoen erakundea izanik". Argudio horretan oinarrituta EH Bilduk eskatu du baliabide gehiago inbertitzeko pandemiaren ondorioak bortitzen jasaten ari diren auzoetan. Auzo horiek, hain zuzen, erosteko ahalmen murritzena dutenak dira eta Udalak laguntza zerbitzuak handitu beharko lituzke auzo horietan koalizioaren ustez. "Zergatik mugatuko gara polizia bidaltzera babesa eta laguntza behar duenari?", galdetu du koalizio subiranistak; "zergatik ez diogu lehentasuna ematen aniztasunari arreta ematen dion eta okerren dagoenari laguntza ematen dion langile kopurua handitzeari, polizia-patruilen orduak bikoiztu beharrean?", gaineratu du. Horren harira, Arrosadia eta Sanduzelai auzoetan baliabide sozialak handitzeko beharra defendatuko duen ekimena prestatzen ari da EH Bildu; izan ere, "oraingoz, eskuineko hirukoak egin duen gauza bakarra poliziaren presentzia areagotzea da".
Ekimen hori Covid batzorde bereziaren hurrengo bileran eztabaidatuko da. Koalizio subiranistak, Iruñeko pandemiaren bilakaera kezkagarriaren aurrean, hitzordua astebete aurreratzea eskatu du, hasiera batean urriaren 23an egitekoa baitzen. "Espero dugu gobernu taldeak ulertzea, guk bezala, egoerak jarraipen eta hausnarketa sakona egitera behartzen duela", esan du EH Bilduk.
Pandemiak ez du hedapen bera izan hiriko auzo ezberdinetan, besteak beste auzo bakoitzeko biztanleriaren batazbesteko erosteko ahalmenaren eta etxebizitza moten ondorioz, eta hori dela eta koalizio subiranistaren ustez Udalaren lehentasuna “inor atzean ez uztea” izan behar da. "Onartuko al dugu Iruñean lehen mailako eta bigarren mailako auzoak egotea?", galdetu du EH Bilduk. "Gehiago inbertitu behar da etxebizitza-baliabideetan, gizarte-zerbitzuetan eta laguntzetan, polizia interbentzioetan baino. Zoritxarrez, eskuinaren erantzun bakarra auzo pobreenentzat erantzun poliziala izaten ohi da". Zentzu horretan, koalizio subiranistak gizarte plan baten beharra defendatu du auzo horietan eta lan hori auzo bakoitzeko elkarteekin lankidetzan egin behar dela, ; izan ere, haiek ezagutzen baitute hobekien auzoko errealitatea". "Herritarrak inplikatu behar dira, auzoetako sare sozial eta ekonomikoarekin batera informazio eta kontzientziazio estrategia bat garatu, eta prebentzioa eta jarduera komunitarioa landu", esan du EH Bilduk. Proiektu horietan parte hartu beharko lukete osasun-zentroek, gizarte-zerbitzuek, ikastetxeek, kolektiboek eta auzo-elkarteek, adinekoek, gazteek, migratzaileek, sozialek eta kulturalek, edo merkataritzak eta ostalaritzak.
EH Bilduk haurrentzako parkeak zabalik mantentzea eskatu du, edukiera % 30era mugatuz, Enrique Mayak parkeak ixteko hartutako erabakiaren aurrean
| 2020-10-13 14:57:00
Koalizioak ere eskatu du kaleak oro har desinfektatu ordez, haurrentzako parkeetako eta erabilera komuneko beste espazio batzuetako desinfekzioa indartzea, eta aste honetan Covid batzorde berezia berriro biltzeko
Iruñeko Udaleko EH Bildu taldeak hiriko haur-parkeak irekita mantentzea defendatu du, % 30eko edukiera mugatuarekin. Enrique Maya buru duen gobernu-taldeak erabakitakoaren aurka, koalizio subiranistak bi argudiotan oinarritu du bere eskaria: alde batetik, komunitate zientifikoaren gehiengoak defendatzen du koronabirusaren hedapena geldiarazteko kanpoko jarduerak sustatu behar direla, eta, bestetik, txikienen oinarrizko aisialdi-beharrak errespetatu behar direla, eskola-eremuetan eta espazio pribatuetan muga handiak baitituzte.
"Olatu berri honen aurrean Iruñeko Udalak hartu duen neurri bakarra haur-parkeak ixtea da, eta hori ez da oso logikoa; izan ere, espazio irekietan hobeto kontrola daiteke pandemiaren hedapena espazio itxietan baino, beti ere desinfekzio lan egokiak eta edukieraren kontrol zehatza bermatzen bada", hausnartu du EH Bilduk. Horregatik koalizio subiranistak hurrengo Covid batzordean proposatuko du gobernu-taldeak ezarritako haur parkeen itxiera birpentsatzea eta % 30eko edukiera mugatuarekin irekitzeko konpromisoa hartzea.
Ildo beretik, EH Bilduk ere defendatuko du diru publikoa kaleen garbiketa eta desinfekzio orokortuan inbertitu beharrean haur-parkeetako, adinekoentzako kirol-espazioetako eta parke publikoetako erabilera komuneko eremuen garbiketa indartzea. "Kaleen desinfekzio orokortuaren kostua handia da eta bere eraginkortasuna ez dago zientifikoki frogatua, efektua denboran mugatua baita eta are gehiago bide publikotik jende asko igarotzen dela kontuan hartuta", hausnartu du koalizioak. "Askoz ere logikoagoa izango litzateke inbertsio hori aire zabaleko espazioak egunero desinfektatzeko erabiltzea, hain zuzen ere, beste tokirik ez dutenen aisialdirako balio baitute", esan du EH Bilduk.
Era berean koalizio soberanistak urriaren 23an ospatzekoa zen Covid Batzorde berezia aste bete aurreratzea eskatuko du, Iruñeko pandemiaren bilakaera kezkagarriaren aurrean. "Espero dugu gobernu taldeak ulertzea, guk bezala, egoera honek datuen azterketa sakona egitea eskatzen duela, hartzen diren erabakiek hasunarketan oinarrituta egon behar dutela eta egiten denaren eraginkortasuna, neurri handi batean, akordioak lortzeko eta azkar jarduteko gaitasunaren araberakoa izango dela", adierazi du EH Bilduk.
EH Bilduk Mayaren estrategia ezkutua salatu du Iruñea sarreretan dauden indarkeria sexistaren aurkako kartelak kentzeko
| 2020-10-08 14:14:00
Koalizioak eskatu du Udalak irmoki gaitzestea Alkatetzatik adierazitako asmoa, zeina Berdintasunerako Ordenantzaren oinarrizko helburuen aurka doan
Iruñeko Udaleko EH Bildu taldeak adierazpen proposamen bat aurkeztuko du Herritarren Aferetarako Batzordean eztabaidatzeko. Proposamen horretan eskuineko hirukoari eskatzen dio errespetatu eta manten ditzala hiri sarrera eta irteeran dauden “Iruñea no tolera las agresiones sexistas/Iruñeak ez ditu eraso sexistarik onartzen" kartelak. Era berean, koalizioak Udalbatzaren gaitzespen irmoa eskatu du Alkatetzatik kartel horiek kentzeko agertutako asmoaren aurrean.
Adierazpen proposamen hau Enrique Mayaren bulegoak hiritar baten eskaera anonimoari emandako erantzunean oinarritzen da. Alkatetzan jasotako idatziak adierazten zuen kartelak jartzea “batasunoen ergelkeria” eta “paletokeria” izan zela eta kartel horiek lehenbailehen kentzeko eskatzen zuen. Larria dena zera da, Enrique Mayak buru duen Alkatetza arloak eskaera legitimo horri eman dion erantzuna: "Argi dago kartel horiek ez dutela zentzurik. Eta, beraz, kentzea litzateke egokiena. Horretarako aukera eta unea bilatuko dugu, polemika interesatuak ez sortzeko ". Erantzun hori "oso larria" dela uste du EH Bilduk; izan ere, Navarra Sumako alkateak Berdintasun Ordenantzan ezarritako helburuak "urratu" ditu eta "onartezina" da, Iruñeak genero indarkeriaren aurka hartu duen jarrera aintzat hartuta.
"Lehenik eta behin, oso larria iruditzen zaigu hai gai sentibera eta larriari horrelako erantzuna ematea. Udal honek azken urteotan eraso sexista guztien eta indarkeria matxistaren aurrean salaketa eta tolerantzia eza adierazteko konpromiso politiko eta publikoa hartu du", adierazi du koalizio subiranistak. "Erantzun hau, herritarrari modu ofizialean bidalia, genero-indarkeria desagerrarazteko borrokan udal erakunde gisa ezarri ditugun oinarrizko helburuei aurrez aurreko erasoa dela uste dugu, eta Berdintasunerako Udal Ordenantzaren eta berdintasunaren arloko gainerako araudiaren aurka egiten du", gaineratu du EH Bilduren testuak. Hirugarrenik, koalizioak Enrique Mayaren jarrera horrek dakarren "moral bikoitza" salatu du; izan ere, batetik, eskaera anonimo bati erantzun esplizitua ematen dio, eta, bestetik, "Genero indarkeriaren aurkako kanpaina instituzional" bat egitea onartu du, Berdintasun Sailak "premiaz" izapidetu beharko lukeena. "Bistan denez, eta ezkutatu nahi duen arren, eskuineko hirukoaren benetako jarrera Enrique Mayaren bulegoak hain modu esplizituan adierazitakoa da; izan ere, asteartean onartutako kanpaina oposiziotik abiatutako ekimena izan zen, EH Bildutik, hain zuzen ere, eta eskuinak bat egin zuen horrekin".
Erantzun horren larritasunaren aurrean, zeina emakume guztiei, mugimendu feministari eta hiriak indarkeria matxistaren aurka duen konpromisoa modu publiko eta garbian ikusarazteko egindako ahalegin kolektiboari" errespetu falta garbia den, Udalak honako bi puntu hauek adostea proposatzen du koalizio subiranistak:
- Herritarrei emandako erantzunean islatzen den Alkatetzaren planteamendua gaitzestea, hiriak indarkeria matxistaren aurka duen konpromiso kolektiboa islatzen duen "Iruñeak ez du eraso sexistarik onartzen" kanpaina mespretxatzen duelako.
- Berdintasun-arloari eta gobernu-taldeari eskatzea errespeta eta manten ditzatela "Iruñea no tolera agresiones sexistas/Iruñeak ez ditu eraso sexistarik onartzen" leloa duten kartelak hiriko sarreran eta irteeran.
Eh Bildu udal-langileen ordezkariekin bildu da, haien eskaerak entzuteko eta Na+en kudeaketak Giza Baliabideen arloan sortutako tentsio-egoera aztertzeko
| 2020-10-07 14:41:00
Iruñeko Udaleko EH Bildu udal taldea Iruñeko Udaleko plantillaren sindikatu gehienetako ordezkariekin bildu zen ostiralean, haien eskaerak entzuteko eta eskuineko hirukoaren kudeaketaren ondorioz sortzen ari den egoera kaxkarra aztertzeko. Udaletxeko batzorde-aretoan egin zen hitzordu horretan, udal-langileen ordezkariek azaldu zuten "une kritikoa" bizitzen ari direla, bai Covid-arekin sortutako egoeragatik, bai "langileen eta giza baliabideen arduradunen arteko ulermen ezagatik".
"Egungo krisiari aurre egiteko langileei % 110 emateko eskatzen ari garenean, erakunde gisa eredugarri izan behar dugu", adierazi du koalizio subiranistak. "Sindikatuek uste dute Covidaren egoeraren ondorioz planteatzen ari diren eskakizunek langileen eskubideak murrizten dituztela, eta eskubide horiek berreskuratzen saiatzeko borrokan, EH Bilduk erabateko babesa eman zien", laburbildu du.
Maria Echavarri Giza Baliabideetako zinegotzi ordezkariak negoziazio-mahaietara joan nahi ez zuenez, koalizio subiranistak konpromisoa hartu zuen langileen eta Udaleko kudeaketa politikoaren arduradunen arteko komunikazio-bideak irekitzeko. "Argi dago ez dagoela elkar ulertzeko esparrurik langileen ordezkarien eta Giza Baliabideen arloko arduradunen artean. Egoera horrek ez du udal zerbitzuen kalitatean eragin langileen profesionaltasunari esker, baina ezin da onartu arloko arduradun politikoak sindikatuen ordezkaritzarekin elkartu nahi ez izana", laburbildu du koalizioak. Tentsio horren adibide da Udaltzaingoaren ordezkaritzak atzo Segurtasun eta Osasun Batzordearen bileran Giza Baliabideetako zuzendariari eman zion plantoa, eskuineko hirukoak Covid planaren aplikazioaren ondorioak negoziatu nahi ez duela salatzeko.
EH Bilduk Tokiko Merkataritza Babesteko Ordenantza ahalik azkarren tramitatzea eskatu du eta bestela araudi aldaketa bat proposatuko du Maya hori egitera behartzeko
| 2020-10-05 14:51:00
Koalizioak ostalaritzarako lan-mahai bat eskatu du, sektore osoa erreskatatzeko, ez bakarrik terrazak dituzten lokalak
Iruñeko Udaleko EH Bildu taldeak adierazpen bat aurkeztu du Presidentzia Batzordean Udal Gobernuaru Tokiko Merkataritza Bultzatu eta Babesteko Ordenantza "berehala" kontsulta publikora jar dezala eskatuz, hala agintzen baitu Osoko Bilkuraren araudi organikoak. Urgentziaz izapidetu den adierazpenean EH Bilduk gogorarazi du eskakizun hori arloaren beraren txosten juridiko batek bermatzen duela, eta azaldu du Udal Gobernuak ordenantza hori geldiriarazten jarraitzen badu dagozkion izapideak hasiko dituela erregelamendu organikoan aldaketa egin eta arau proposamenak izapidetzeko epeak eta pausuak hobeto zehazteko". "Ezin dugu onartu Navarra Sumak araudia nahieran interpretatzea oposizioaren ekimenak estaltzeko", azaldu du EH Bilduk.
Koalizio subiranistak gogorarazi du urtarrilean aurkeztu zutela Ordenantza proposamena eta Gobernu Estrategikoaren sailak txosten teknikoak eta juridikoak bost hilabeteko atzerapenarekin egin zituela. "Txosten horien arabera, gure taldeak ordenantzaren testua partzialki aldatu zuen eta irailaren 14an aurkeztu zuen Udal Idazkaritzan, kontsulta publikoa egiteko eta ondoren eztabaidatu eta zuzenketak aurkezteko, eta oraindik ez dugu erantzunik jaso". "Txostenak egiteko bost hilabete baino gehiago behar izan zituzten, eta orain proposamena geldirik dago", laburbildu du EH Bilduk. Egoera horren aurrean, koalizioaren eskaria argia da: "Gobernu Estrategikoaren, Merkataritzaren eta Turismoaren arloak ezin ditu bere eskumenak erabili oposizioaren proposamenak atzeratzeko; erabat neutrala izan behar du eta izapideak erregelamenduak ezartzen duen bezala eta ahalik eta epe laburrenetan garatu behar ditu". Horrela ez balitz, irtenbide bakarra Araudi Organikoa aldatzera behartzea izango litzateke: "ezin dugu onartu eskuineko hirukoak araudia ez jarraitzea".
"Saltoki txikiek urteak daramatzate maldan behera, saltoki handiak ugaritu direlako eta on line erosketak ugaritu direlako, baina Covid19aren pandemiak egoera larriagotu du. Orain inoiz baino gehigao, tokiko merkataritzak neurri eta tresna eraginkorrak behar ditu", esan du EH Bilduk. "Tokiko merkataritza funtsezkoa da hiriko harreman ekonomiko eta sozialetan, eta berebiziko garrantzia du tokiko enplegua eta aberastasuna sortu eta mantentzeko eta Iruñean bizi diren pertsonei bizi-kalitatea bermatzeko".
Ostalaritzaren sektorearekin bilera, bere egoerari irtenbideak bilatzeko
Bestalde, EH Bilduk bigarren adierazpen bat aurkeztuko du batzorde berean, eta Gobernu Estrategikoaren eta Herritarren Segurtasunaren arloei eskatu die 15 eguneko epean lan-mahai bat eratzeko ostalaritza-sektorearekin, Udaleko talde teknikoekin eta talde politikoekin, "sektorearen egoera aztertu eta pandemiaren testuinguruan jarduera horri irtenbidea emateko estrategia integral bat lantzeko".
"Egoeraren azterketa ez da erraza, ostalaritza establezimendu mota ezberdin ugarik pairatzen dutelako krisia, baina helburua sektore osoaren erreskatea bermatzea da", azaldu du koalizio subiranistak. Ostalaritza-elkarteen ordezkariek helarazitako neurrien artean, honako hauek daude: terrazarik gabeko establezimenduei laguntzea, establezimenduaren kanpoko erradioa zabalduz; neguari begira, terrazako aldi baterako itxituren azterketa; kaleak ordu batzuz trafikora itxi terrazak handitzeko; kaleak toldeatzea, neguaren eragina murrizteko; edo establezimenduen ondoko espazioak erabiltzea zerbitzua zabaltzeko. "EH Bildu Udal Taldeak uste du, egoeraren konplexutasuna eta pandemiaren hedapena kontuan hartuta, egoera zehatz-mehatz aztertu behar dela, eta neurriak ezarri behar direla establezimendu guztiei laguntzeko, irizpide argiekin eta gardentasunarekin, eta partekatutako lan baten bidez", laburbildu du.
