Eh Bilduk inbertsio plan bat proposatu du Iruñeko eskola publikoak Covid osteko errealitatera egokitzeko, zentro bakoitzaren ekarpen eta eskaeretan oinarrituta
| 2020-06-22 12:40:00
Halaber, koalizioak Berdintasunerako diru-laguntzak mantentzea eta duela hilabete Presidenzia Batzordean onartu zen udal langileentzako telelanaren plana aurkeztea defendatuko du
Iruñeko Udaleko EH Bilduren taldeak bihar eskatuko dio Hezkuntza Sailari, Herritarren Aferetako Batzordean aurkeztutako adierazpen proposamen baten bidez, Iruñeko ikastetxe publiko bakoitzari zirkular bat bidaltzeko, "ikastetxe barneko eta kanpoaldeko esparruak pandemiaren ondorioz sortutako segurtasun neurrietara egokitzeko dauden beharrak eta sor daitezkeenak" antzemate aldera. Eskaera horrek bat egiten du koalizio subiranistaren eskaerarekin, hots, eskuineko hirukoak eskola publikoetan inbertitzeko plan bat idaztea, ikastetxe bakoitzak 2020/2021 ikasturteari begira dituen beharren arabera.
"Toki erakundeek Nafar Gobernuak eskuordetutako eskumenak ditugu eskola publikoen mantentze, garbiketa eta atezaintza arloetan. Gure erantzukizuna da eskola publikoen azpiegiturak egoera onean mantentzeko udal aurrekontuak bermatzea eta urtero eskoletarako diru partidak egongo direla bermatzea", dio koalizioak. Datorren ikasturteari begira, EH Bilduren ustez lehentasuna azpiegiturak "pandemiaren ondorioetara" egokitzea da. "Ziurrenik, inbertsioak egin beharko dira barne eta kanpo espazioak distantzia-arau berrietara egokitzeko”. Koalizio subiranistaren proposamena da "hurrengo IFSen" eztabaidan edo "beste administrazio batzuetatik datozen diru sarreekin egingo diren aurrekontu moldaketetan" eskoletarako inbertsio plan bat aurreikustea.
Bestalde, EH Bilduk beste proposamen bat aurkeztu du Herritarren Aferetarako Batzordean "berdintasunera bideratutako diru-laguntzen zenbatekoari eusteko” eskaerarekin. Zehazki, Berdintasun arloari eskatuko dio Emakumearen Kontseiluan Diru Laguntzen Plan Orokorra lehenbailehen aurkezteko, COVID-19ak sortutako egoerari egokitutako diru-laguntza ildoak azalduz eta 2020ko uztailaren 3a baino lehen NAOn (Nafarroako Aldizkari Ofizialean) argitaratzeko konpromisoa hartuz". Proposamen honen helburua da pandemiaren ondorioz egon den geldialdi administratiboak ez ditzala arriskuan jarri elkarte-sare feminista eta berdintasunaren alde lan egiten duten kolektiboak. "Gure ustez beharrezkoa da diru-laguntzen zenbatekoari eustea eta, nolanahi ere, irizpideak egokitzea, elkarteek eta kolektiboek biziraun dezaten eta hirian kontzientzia hartzeko, sentsibilizatzeko eta mobilizazio feminista sustatzeko funtsezkoa den lana egiten jarrai dezaten", argudiatu du koalizioak.
Azkenik, Lehendakaritzako batzordeari dagokionez, EH Bilduk Udal Langileei zuzendutako Telelanerako Plana datorren astean aurkeztea eskatuko du, maiatzaren 12an Batzordeak hartutako erabakiari jarraiki. Helburua plana ezagutu eta udal taldeen artean eztabaidatzea da, udal-sindikatuekin osatutako Negoziazio Kolektiboko Mahaira eramateko gero.
EH Bilduk uste du "arduragabekeria" dela Na+ koalizioak hiri-kolonien programa bat iragartzea nork artatuko dituen jakin gabe
| 2020-06-17 12:51:00
Zerbitzu berri honek murrziketa bat dakarrela Prebentzio Zerbitzuek eskaintzen duten zerbitzuarekin alderatuz, eta haien kontratuak bertan behera utzi nahi izana salatu dute
"Benetako arduragabekeria da udarako hiri-kolonien programa bat iragartzea koloniak nork artatuko dituen jakin gabe, programa hori hartuko duten ikastetxeak inprobisatuz eta prebentzio-taldeekin gatazka sortuz. Erabaki politiko bat da hau, ez baitu oinarri teknikorik, eta auzoetako dotazioak murriztea du helburu". Hala mintzatu da EH Bildu eskuineko hirukoak Iruñeko lau ikastetxetan hiri udalekuak martxan jartzeko egin duen iragarpenari buruz. Maria Caballero Gizarte Zerbitzuetako zinegotziaren arabera, auzoetako Prebentzio Ekintza Komunitarioko zerbitzuetako kideek artatuko dute zerbitzu hau.
"Prebentzio talde guztiek publikoki iragarri dute ez dutela onartzen eskuineko hirukoak ezarri nahi dien kontratu aldaketa, eta ez dituztela kanpalekuak bere gain hartuko", gogorarazi du koalizioak, eta aipatu du Gizarte Zerbitzuek "arduragabekeria onartezinarekin jokatu dutela, arazoa konpondu gabe eta herritarrei egiazkoak ez diren itxaropenak sortuz".
Urtero eskaintzen den kontziliazio zerbitzua udaleku hauekin ordezkatzea "erabaki politikoa da, izendapen askeko kargu batek egindako txosten batean oinarritua. Ez ditu irizpide teknikoak errespetatzen, zeinak prebentzio-zerbitzuek haurrak beren auzoetan geratzeko egin duten lana babesten duen". "Aldaketaren gobernuak auzoak indartzeko egindako apustua iraultzeko saiakera berri bat da, eta, gainera, haurren arretan murrizketa ikaragarria dakar", esan du EH Bilduk. "Izan ere, aurten arte lizitatzen zen zerbitzuak eta prebentzio-taldeek auzoetan egiten zituzten ekintzek 1.000 adingabe baino gehiago bateratzea bermatzen bazuten, oraingo eskaintza 400 inguru dira", salatu du.
Azkenik, koloniak hartuko dituzten zentroen inguruko "inprobisazioa" ere salatu du koalizioak. "Hasieran, 4 ikastetxe iragarri ziren, haiekin egiaztatu gabe; azkenean, kokalekua aldatu behar izan dute, eta beste 4 ikastetxe proposatu, ustez egokiak izateagatik aukeratutako ikastetxeak obretan zeudelako edo egokiak ez zirelako".
EH Bilduren ustez "tamalgarria" da eskuineko hirukoak berriro ere Comiruñako dietak defendatzea eta kobratutakoa itzultzeko eta gehiengoaren agindua betetzea eskatuko du
| 2020-06-16 12:29:00
"Iruñea beren kortijo partikular gisa gobernatzea, aldebakartasuna, beraien onurarako eta gehiengoaren aurka aritzea eta hiria paralisian sartzea” leporatu die koalizioak
EH Bilduk bere eskura dauden baliabide guztiak erabiliko ditu eskuineko hirukoak osoko bilkuraren gehiengoaren agindua bete dezan eta Enrique Maya alkateak Comiruñako lau goi-kargudunek kobratutako dietak itzultzea eskatu dezan. Hala iragarri du koalizioak Presidentzia batzordearen gehiengoak ordainketa horiek "berehala itzultzea" eskatzen duen adierazpena onartu ostean. "Korporazioaren gehiengoaren aginduaren aurka" aritu dira, korporazioa baita "erabaki hori hartzeko eskumena duen Batzar Orokorra izendatzen duena".
"Navarra Sumak adierazpen horren aurka bozkatu izana oso esanguratsua da, agerian uzten baitu, beste behin ere, hiri hau bere kortijo partikularra bezala gobernatu nahi duela, aldebakartasunetik, gehiengoaren irizpidearen aurka eta bere onurarako, Iruñea paralisi egoeran utziz. Hori da gobernu honen ezaugarria", adierazi du koalizio soberanistak. "Agerikoa da dieten gaia, kargu publikoen soldata igoerarena bezalaxe, eskuineko hirukoaren DNAn dagoela, baina ez da onargarria gutxiengoa izanik herritarren gehiengoa ordezkatzen dutenei inposatu nahi izatea", adierazi du koalizio subiranistak. "EH Bilduk ez du onartuko", gaineratu du.
Baina ez da hori "gaur egun hiria desgobernatzen dutenen benetako izaera" agerian utzi duen gai bakarra, koalizioak salatu duenez. Billy el Niñori kondekorazioak kentzeko Diputatuen Kongresuak hartutako erabakiaren aldeko adierazpenean, eskuineko hirukoak zuzenketa bat jarri du mahai gainean eta proposamena egin duten alderdiek zuzenketa hori onartu egin dute. Aldiz, bozkatzeko orduan, testu osoa babestu beharrean, beraien zuzenketa baino ez dute onartu. "Hori da eskuinaren jokabidea: egindako akatsak onartu ez, nahas mahasean aritu eta publikoari begira eginiko jarrera faltsuak agertu", salatu du EH Bilduk. "Azken aste hauetan, Coviden krisiaren aitzakia faltan, oso esanguratsuak izaten ari dira Enrique Mayaren taldearen gobernatzeko modu larderiatsua, aldebakarrekoa, proiekturik eza eta inposaketa. Amaya kalean edo Aita Moreten gertatutakoa, bizikleten gaineko zergaren proposamena, Sanferminak auzoetan nola kudeatzen diren eta udan lana eta familia bateragarri egiteko programaren kudeaketa negargarria horren adibide garbiak dira ", ondorioztatu du EH Bilduk
Eh Bilduk Mugikortasun Batzordea berehala deitzea eskatu du, eskuineko hirukoak azalpenak eman ditzan Amaya kaleko lanetan sortutako kaosaren inguruan
| 2020-06-15 14:36:00
Koalizioak, halaber, adierazpen bana aurkeztu du biharko batzordeetan, Comiruñako dietak itzultzeko eta "PPk eta Voxek M-8a kriminalizatzeko egindako saiakera" gaitzesteko
EH Bilduk Mugikortasun Batzordea berehala deitzea eskatu du, Eskuineko hirukoak eta, zehazkiago, Fermin Alonso mugikortasun-arduradunak abian jarritako lanen ondorioz Amaya kalean sortutako kaosaren inguruko beharrezko azalpenak emateko. Eskaera hau Hirigintza Batzordera aurkeztuko duen presazko adierazpen baten bidez egin du koalizkoak: "ohartarazi genuen ezin dela etxea teilatutik hasi. Amaya kalean bizikleta eta oinezkoentzako lekua handitzeko lanak abiatu, aldez aurretik Labriteko igoera eta Gorte kalea behar bezala prestatu gabe suizidioa zen, lardaskeria hutsa", adierazi du koalizio subiranistak.
EH Bilduk gogora ekarri du aurreko legealdian jarduketa-plan bat diseinatu zela hain zuzen Labriteko igoera eta Amaya eta Olite kaleak bizikleta-sarearen ekialde-mendebalde ardatzaren bigarren faseko muina bihurtzeko". Proiektu hori Alonsok bertan behera utzi nahi izan zuen, Na+ek aurreko proiektuak zapuzteko duen joerarekin jarraituz. Ondoren, proiektua berreskuratu behar izan zuen konponbiderik onena zela ikusita, baina proiektua azken urratsetik hasteko tematu da. Argi zegoen aldez aurretik Labriteko igoera ez bazen moldatzen inbutu kaotiko bat sortuko zela, eta halaxe gertatu da", argudiatu du koalizioak. Era berean, koalizioak gogorarazi du horrelako ekimen batek informazio kanpaina bat ere eskatzen duela, aurreko legealdian Amabilizazio Plana edo Pio XII bezalako proiektuekin egin zen bezala.
"Agerian geratu da berriz ere gobernu talde honen kudeaketa negargarria. Aurreko legegintzaldian oposizioan zeudelarik hiria hankaz gora jartzen saiatu ziren planifikatutako eta behar bezala azaldutako ekimenak kritikatuz. Baina joan den legealdiko kudeaketa oraingo kudeaketarekin alderatuz oso egoera traketsean geratzen da egungo gobernua", dio koalizio subiranistak. Aita Moreten berrirekitzeak, hiriaren erdigunean berriz 14.000 ibilgailu sartuz, edo Pio XII.ean ordeztu ez diren 302 bolardoak, Amaya kalean gertatutakoaren "desastreari" gehitzen zaizkio. "Eskuineko hirukoak erakutsi du berriz ere ez dagoela prestaturik mugikortasun berriaren erronkari aurre egiteko, eta baliabide publikoak kudeatzeko arazo larriak dituela".
Dietak eta M-8ari babesa
Bestalde, EH Bilduk adierazpen bat aurkeztuko du bihar Presidentzia batzordean Enrique Mayak Comiruñan dituen lau goi-kargudunek jasotako dietak itzultzea eskatzeko. Halaber, Herritarren Aferetarako Batzordean, koalizio abertzaleak testu proposamen bat aurkeztuko du Iruñeko Udalak "PPk eta Voxek M-8a kriminalizatzeko egindako ahalegina eta efemeride hori koronabirusaren ondorioekin lotzeko estrategia" salatu eta errefusatzeko.
Adierazpen horretan, Udalak "COVID-19ren biktimen sufrimenduaren instrumentalizazioarekiko kezka" agertzea eskatu dute, "mugimendu feministaren urteroko hitzordu garrantzitsu, unibertsal eta arrakastatsuenaren aurkako jarrerak areagotzeko asmoz".
Azkenik, "Guardia Zibilak auzia ikertzen ari den epaileari bidalitako txostenean lekuko baten bertsioa ustez manipulatu izanaren inguruan argitara emandako salaketa" dela-eta kezka adieraztea eskatzen du testuak.
EH Bilduk eskatu du Comiruñako aurrekontutik Navarra Sumako konfiantzazko karguei ordaindu zitzaizkien dietak altxor publikoari berehala itzultzea
| 2020-06-11 13:54:00
EH Bilduren udal taldeak Lehendakaritzako Batzorderako proposamen bat aurkeztu du non Enrique Maya alkateari eskatzen dion Comiruñako dietak ordaindu zitzaizkien izendapen askeko kargudunek berehala itzul dezatela jasotako dirua, ordainketa hori "Udalbatzaren gehiengoaren aginduaren aurka egin baitzen, eta Udabatza da erabaki hori hartzeko gaitasuna duen bakarra". Proposamen berean azaltzen da ordainketa hori merkataritza epaitegian salatzeko prozesutik eratorritako kostuak ordaindu behar izanez gero, "egungo gobernu-taldea osatzen duen koalizioa izango dela gastu horiek bere gain hartuko dituena".
Adierazpen honen oinarria eskuineko hirukoak erreklamazio hori martxan jartzeari uko egin izana da, nahiz eta Udalaren gehiengoak erreklamazio hori egitea eskatu zuen, batzordean lehenbizi (urriaren 15ean) eta Osoko Bilkuran ondoren (azaroaren 11n). Halaber, martxoaren 16an, Comiruñako legezko ordezkariak, enpresa publikoa zuzentzen dutenen aginduari jarraituz, idatziz erantzun zion Merkataritza Arloko Epaitegiari, ordainketak defendatuz, ordainketak egiteko erabakia berretsiz eta dietak itzultzea eskatzen dutenei "formaltasunaren abusua" egitea leporatuz. Idazki horrek berak argudiatzen du Osoko Bilkuraren gehiengoak gai honetan egindako gastu publikoaren fiskalizazio- eta kontrol-lana "udal-gobernu talde berriaren aurka egiteko asmo edo asmo politiko hutsaren ondorio" dela, eta helburu hori ez dela jasotako babes judizialaren duin.
"Agerikoa da dietak jasotzea, kargu publikoen soldatak igotzea bezalaxe, eskuineko hirukoaren izaeraren baitan dagoela, baina ez da onargarria gutxiengoa izanik erabaki hori herriterren ordezkaritzaren gehiengoa duten alderdiei inposatu nahi izana", adierazi du koalizio subiranistak. "Gobernura iritsi bezain laster dieten ordainketak berrezarri zituzten eta horiek bertan behera uztera behartu behar izan genituen. Orain gauza bera egin beharko dugu diru hori altxor publikoari itzultzera behartzeko", salatu du. "Horrela gobernatzen du eskuinak, eta EH Bilduk ez du etsiko Iruñea UPNren eta bere kideen kortijoa izan ez dadin", esan du koalizioak
