Iruñea

Eh Bilduk Mayari leporatu dio “legez kanpo” aritu zela Udala Corpuseko prozesioko gastuen zati bat ordaintzera behartu zuenean

| 2020-07-01 12:36:00

Nafarroako Administrazio Auzitegian aurkeztutako helegitean, koalizioak argudiatu du ez zela espedienterik egin, ez zela belarrak zabaltzeko gastua arrazoitu eta aurretik hartutako erabakia urratu zela

 

2019ko Corpus Christiaren prozesioan Alde Zaharreko kaleetan belarrak eta petaloak barreiatzearen zenbatekoa Udalak ordaindu izana legez kanpoko ekintza izan zen, ez baitzuen txostenik, ez baitzegoen justifikatuta eta aurreko urteetan baztertu zen jarduera bat baitzen. Hala dio Nafarroako Administrazio Auzitegian EH Bilduk aurkeztu duen errekurtsoak. Izan ere, Udalak berak egindako txostenek adierazten dute erabat deusezak direla bai prozesio horren kontratua eta faktura, bai eta gerora Udalak "legez kontrako" ekintza hori justifikatzeko abian jarri nahi izan zuen baliozkotze-espedientea. "Ez da onargarria alkateak eta bere alderdiak diru publikoa nahierara erabiltzea, Elizaren ekitaldi pribatuen fakturak ordaintzeko, justifikaziorik gabe eta zerbitzu teknikoek argudiatutakoaren aurka", azaldu du koalizio subiranistak.

 

Halaber, Proiektu Estrategikoetako zinegotziak arazo legalik ez zegolea esan zuen arren, Udaletxeko Zerbitzu Jurdikioen zuzendariak (izendapen askeko kartua) egindako txostenak aitortzen du kaleak petaloz estaltzeko ordainketa txosten teknikorik gabe egin zela, ez zela Artzapezpikutzarekin hitzarmenik egin, eta faktura eta kreditu-erreserbaren ordainketa baliozkotzeko "administrazio-egintza" egiterik badagoela. "Hau da, berariaz aitortzen da belar eta petaloak ezartzeko ordainketa arau-hauste administratiboa izan zela", adierazi du. Txosten juridiko horrek berak legez kontrako akats horiek baliozkotzea aholkatu zuen, eta halaxe egin zen 2020ko martxoaren 12an. Hala ere, orain aurkezten dugun errekurtso honetan ohartarazten dugu legezkotasun-akatsak askoz larriagoak direla eta ezin direla gerora legeztatu.

"Ekitaldi hau guztion diruarekin ordaintzea oso larria da, baina are larriagoa da gerora justifikatu eta normalizatu nahi izatea ilegaltasun argia dena. Alkatea da ilegaltasun horren erantzulea, bere erabakia izan baitzen", adierazi du EH Bilduk. "Alkateak ezagutzen zuen Udalak jardunbide horri 2016an amaiera emateko egin zuen aurrekaria", dio errekurtsoak, eta, hala eta guztiz ere, aurrekonturik eta txostenik gabe ordainketa egitea agindu zuen, "Udalak hirian gertatzen diren gauzak ordaintzen dituela" argudiatuz. "Badirudi Udalak alkateari pertsonalki garrantzitsuak iruditzen zaizkion gauzak edo alkatearen lori politikorako egindakoak soilik ordaintzen dituela", salatu du helegiteak.

"Zalantzarik gabe ekintza arbitrario baten aurrean gaude, arau juridikorik jarraitzen ez duena eta diru publikoaren erabilera arautzen duten prozesu legalak mespretxatzen dituena”.

EH Bilduk Covid-19aren krisitik sortutako sare solidarioak aitortzea proposatu du eta horiek mantentzeko babesa eskatu du

| 2020-06-29 11:35:00

Koalizioak Kulturaren sektoreari laguntzak eta babesa emateko foro bat berehala martxan jartzea eskatu du

 

EH Bildu udal taldeak bihar Herritarren Aferetarako Batzordean eskatuko du Iruñeko Udalak "aitortza eta esker ona" adieraz diezaiela hiriko auzoetan antolatu diren zaintza-sare solidarioei, "koronabirusaren konfinamenduan zehar zaintza beharrak izan dituzten herritarrei eman dieten arretarengatik". Hala ere, koalizio subiranistak aitortza hutsa egitetik haratago joan nahi du eta Udalak sare horiek mantentzea "ezinbestekoa" dela eta horiekin elkarlanean aritzeko konpromisoa hartzea proposatu du.

Adierazpenaren testuak erakundeetatik osasun-krisiari aurre egiteko lanean ari diren langile publiko eta pribatuen lana aitortzen du berez, baina aipamen berezia egiten die herritarren sare solidarioei "gizartetik bertatik sortutako ekimena delako, inguratzen gaituen bakardade eta behar egoera larrienei elkartasunez eta komunitate-zentzuarekin erantzutea ahalbidetu duena". "Sare horiek funtsezko papera bete dute, Gizarte Zerbitzuetako eta Gizarte Ekintzako zinegotziak berak aitortu duenez. Hala ere, gure ustez, erantzun sozial horrek udal honen aitorpen ofiziala merezi du, eta, gainera, udal-erakundearen apustua ere bai, auzo-sare horiek indartu eta dinamizatu daitezen, Ekintza Komunitarioaren arloaren bidez ", dio adierazpenak.

Bestalde, Herritarren Aferetako Batzordean ere, EH Bilduk bigarren adierazpen bat aurkeztuko du kultur arloan eskuineko hirukoak izandako utzikeria salatuz. Udalaren gehiengoak honakoa adostu zuen: kultur sektoreari laguntzeko eta laguntzak bideratzeko foro bat sortzea. Hala ere, kultur arloak oraino ez du "elkarrizketarako eta adostasunerako konfiantza-gunerik sortu". Hori dela eta, testuak gobernu-taldeari eskatzen dio "kultura-mahaiaren antolakuntza berrikus dezala, eta hiriko kultur sektoreetan parte-hartzea bermatuko duen beste planteamendu bat egin dezala benetako konpromiso politokoarekin".

Asiron: "Iruñearentzat urte galdua izan da, ez Covidaren eraginez, eskuineko hirukoaren paralisiarengatik baizik: dena lehengoratzeko obsesioa, aldebakartasuna, gehiengoarekiko mespretxua eta kudeaketa negargarria izan dira ezaugarri nagusiak"

| 2020-06-26 12:49:00

EH bilduko bozeramaileak koalizioaren lana goraipatu du; lehen hilabeteetan batzorde-ekimenen % 67 sinatu zituen, eta Covidaren krisian Berreraikuntza Plana osatzen duten zazpi ekimen aurkeztu zituen.

 

"Proiektuen lehengoratzea, euskarafobia, paralisia, aldebakartasuna eta gehiengoaren mespretxua. Bost hitz horiekin definitu dugu Navarra Suma Iruñeko gobernuan egon den lehen urtea. Urte galdua izan da, ez Covid-19aren eraginez, baizik eta haien hautesleak bakarrik asetzeko helburua duen eskuineko hirukoaren kudeaketa negargarriaren eraginez. Ez dute hiri honen aniztasuna errespetatu, betiko akats eta gehiegikeria berberak errepikatu dituzte eta kudeaketa lardatsa eginez Iruñea atzerapenean murgildu dute. Hitz horiekin, Joseba Asironek, EH Bilduk Iruñeko Udalean duen bozeramaileak, legegintzaldiaren lehen urtea laburbildu du, eta Covidaren pandemiak jotako  aurrekaririk gabeko egoeran, EH Bilduk zuhurtziaz, erantzukizunez eta egoerak eskatzen zuen heldutasunez jokatu duela azaldu du, datozen garai latzei ahalik eta ondoen aurre egiteko prestatzen saiatuz.

"2019ko ekainean Enrique Mayak ekonomikoki osasuntsua zen udal bat eta konfrontazioaren garaiak gainditzeko bidean zen hiri bat eskuratu zituen. Bada, urtebetean, foralistak, antiforalistak, zentralistak eta ultrak batzen dituen koalizioak berriz ere herritarrak aurrez aurre jartzea lortu du, administrazioaren oinarrizko zerbitzuak hankaz gora jarri ditu eta jasotako kreditu ekonomikoaren zati handi bat xahutu du", laburbildu du Asironek. "EH Bildu buru duen oposizioaren erantzukizunak bakarrik ahalbidetu du Iruñea 2011ra ez itzultzea", gaineratu du.

Covidaren krisia; NA+en akatsak eta inprobisazioak gainditzeko elkarlanean

Covid-19aren krisiaren kudeaketari dagokionez, EH bilduko bozeramaileak, Maider Belokirekin eta Endika Alonsorekin batera, koalizioak egindako lana goraipatu du, "hiri akordioak lortzeko helburuz eta proposamenez betea, oinarri argi batetik abiatuta: gure lehentasuna beti izan da eta izango da ahulenak babestea, ez bakarrik osasun-krisian, baita datorren krisi ekonomikoan ere". Helburua argia da: inor ez dadila atzean geratu".

Koalizio subiranistak zazpi ekimen aurkeztu zituen krisiaren lehen bi hilabeteetan. Ekimen horietako batzuk hauexek: gizarte-larrialdietarako poltsa bat sortzea (funtsean, gero Berreraikuntza Plana izan zenaren finantzaketa-esparrua eta lehentasunezko helburuak finkatzen zituena), mugikortasun jasangarria errealitate berrira egokitzeko jarduera katalogoa, tokiko merkataritzari laguntzeko bonuak edo kultur arlorako plan bat. (Atxikitako gehigarrian daude 7 proposamenak).

"Ekintza instituzionalaren batasun printzipioa errespetatu dugu, baina gobernua kontrolatzeko betebeharrari uko egin gabe", azaldu du Asironek. Eta, horren harira, honako hau iragarri zuen: "Azalpenak eskatu ditugu, eta, ziur asko, erantzukizunak eskatu beharko ditugu eskuineko hirukoak hainbat akats eta inprobisazio egin dituelako, besteak beste, Mekaren kudeaketa iluna, udal-langileen kudeaketa okerra, osasunerako babes ekipamenduak eta norbera babesteko ekipamenduak berandu eman izana, laguntzen ukazioa eta prebentzio-zerbitzuekin hasi duen gatazka". Azken gai horren inguruan, EH bilduko bozeramaileak salatu duenez, "Kudeaketa gatazkatsu horren atzean ezkutatzen dena zera da: eskuinak atzera egiteko duen nahia, auzoek beren baliabideak izatea oztopatu nahi dute".

Proposamen ugari lehenengo bederatzi hilabeteetan

Osasun krisiaren aurreko 9 hilabeteak aztertzen ere jardun du Asironek prentsaurrekoan. Horren harira, "EH Bilduk legealdi honen hasieran proposatu genituen hiru helburuei jarraitu die, eta horiek izango dira hemendik aurrera ere gidatuko gaituztenak: Gobernu taldea kontrolatzeko ariketan eraginkorrak izan gara; arduratsuak eta eraginkorrak izan gara oposizioko gainerako taldeekin akordioak lortzeko gai garrantzitsuenetan, hala nola mugikortasunean, kulturan, gizarte-laguntzetan, berdintasunean edo merkataritzan, baina baita gobernu taldearekin hiri-itunak hala nola krisiari aurre egiteko neurriak sustatzeko orduan. Eta oposizio konstruktiboa egin dugu, proiektuak berriak proposatuz ".

"Legegintzaldiaren hasieratik argi genuen ez ginela besoak gurutzatu eta gobernuaren ekintza kritikatzera mugatuko. Indar bizia izan nahi dugu, eraikitzen duena eta lan egiten duena, gobernuan gaudela edo oposizioan", laburbildu du. Lan hori irudikatzeko, EH Bilduren bozeramaileak zifra batzuk eman ditu (eranskina): 2019ko ekainetik 2020ko martxoaren 14ra bitartean ohiko 7 osoko bilkuretan oposiziotik etorritako 19 mozio eztabaidatu ziren, eta horietatik % 57.8 koalizio subiranistak sinatu zituen. Epe berean, EH Bilduk 78 proposamen aurkeztu zituen Udalak dituen hiru batzordeetako baten aurrean; guztira eztabaidatu ziren ekimenen (117) %66,6a alegia. "Aldi horretan ere, Udalak hiru araudi berri egiten hasi zen, Apustuen Lokalak Arautzeko Ordenantza berria, Protokoloaren Ordenantzaren berrikuspena eta Tokiko Merkataritzarako Ordenantza Proposamena eta hirurak EH Bilduren proposamenak izan dira”, gaineratu du Asironek. Denbora horretan bertan aldaketaren legealditik zetozenez gain, proiektu berri bat soilik planteatu dela gogorarazi du: Errautsen Lorategia alegia, eta hori ere EH Bilduren proposamena izan da".

Euskarafobia, sektarismoa eta akordioetara iristeko ezintasuna, Mayaren gobernuaren ezaugarriak

Eta EH Bilduren jarduera horren aurrean, Asironek bost oztopo handi aipatu ditu Enrique Mayaren gobernuan. Lehenik eta behin, "ez dute gehiengoak agintzen duena onartzen, aldebakartasunetik eta hauteskunde promesak interes orokorraren gainetik jarriz". Pio XII.a, Aita Moret, Erorien Monumentua edo Haur Eskolen afera horren adierazgarri dira, baita "gehiengoak hartutako erabakiak sistematikoki urratu dituztela ere, adibidez ondare immateriala babesteko planaren kasuan edo txirrindulan aritzen diren udaltzainak berriz ezartzean, Mugikortasun Elektrikoko Planean edo emakumeen aurkako indarkeriari buruzko prestakuntza-planean ere".

Bigarren akatsa aldaketaren gobernuak egindakoa iraultzeko duten "obsesioa" da: "Mugikortasun arloan atzera egin dute eta auto pribatuari mesede egin diote; Kulturan ere atzera egin dute Hiriartea proiektua bertan behera utziz; memoria historikoan ere atzera,  Armada etorbidea izena edo erregeen koadroak berrezarriz; partaidetzan eta berdintasunean, bitartekoak eta langileak murriztuz, auzo mailan prebentzio-ekipoak deusezten ari dira, eta jasangarritasunaren eremuan ere energia merkaturatzeko enpresa desegin dute". Opakutasuna eta gezurrak dira Na+en kudeaketaren hirugarren ezaugarria, adibideak adibide: "Comiruñako dietak, alkatearen soldataren igoera, izendapen askeko karguen gehitzea edo Labriteko Pasabidearen eta Haur Eskolen inkestaren inguruko gezurrak".

Euskarafobia Mayaren gobernuaren laugarren ezaugarri nagusia da. "Haur Eskoletan lehengo egoera itzultzea, Euskararen Ordenantzari murrizketak egitea, hizkuntza-eskakizuna duten lanpostuak kentzea, Pirritx eta Porrotxen jarduna debekatzea, kultur programazioan murrizketak egitea edo Partaidetza Ordenantza euskarazko 4 hitz zituelako baztertzea" dira horren adibide. "Herritarren zati handi bat baztertzen ari dira eta hainbeste urtez boterean egotea ahalbidetu zien liskar girora itzultzea", laburbildu du Asironek.

Azkenik, "paralisia, inprobisazioa eta ideia-falta ere bere nortasun-ezaugarriak dira. Amaya kalean gertatutakoa adibide argi bat besterik ez da, baina udal langileen kudeaketaz ere hitz egin genezake, baita prebentiboekin egindako kontratuez, Sanferminen kudeaketaz, autobus geltokiko eski pistaz edo bizikleten gaineko zerga proposamenaz ere". “Paradoxikoa da paralisi horrek Aldaketaren Gobernuaren proiektuak usurpatzera behartu dituela, proiektu horien aurka bozkatu bazuten ere: Argal eraistea, Amabilizazioa, Emakumeen Etxea edo Txantreako hegoaldeko parkea dira horren adibide".

"Jarduteko modu honek ondorio nabaria du: akordioak lortzeko gaitasun eza, eta hori herritarren kalterako da. Maya, alkate izan den bost urteetan, ez da aurrekontu bakar bat onartzeko gai izan, eta eskuinaren obsesioen eta jarrera sektarioaren preso izan da ", laburbildu du Asironek.

Legegintzaldiko bigarren urterako bost lan ildo

Legegintzaldiko bigarren urterako EH Bilduren lan ildoen laburpenarekin amaitu du agerraldia Asironek. Etxebizitza, berdintasuna eta justizia soziala; auzo-plana; Enplegu soziala-Jasangarritasuna; Mugikortasuna - Klima Aldaketa; kultura-hezkuntza-hizkuntzanormalizazioa eta memoria historikoa izango dira EH Bilduren bost jarduera-ardatzak, helburu nagusi batekin: "Eskuineko hirukoaren alternatiba izateko estrategia politikoan jarraitu eta sakontzea".

Horretarako, koalizioak lau helburu nagusi hartu ditu hizpide: hirian inbertsio sozial eta aurrerakoiak gauzatzeko itunak eta gehiengoak bilatzea; kaleko eztabaidak udaletxera eramatea hiroei irtenbidea eman ahal izateko; berrikuntzaren aldeko apustua gidatzea eta hiria dinamizatzen duten erakunde eta pertsonekin elkarlana sakontzea, betiere agenda soziala eta ingurumena lehenetsiz.

"Garai gogorrak eta ezegonkorrak datoz, baina, gure hiria hobetzeko eta geure burua hobetzeko aukera ere badugu. Eta hori egiteko bitarteko ezin hobeak ditugu. Hiri dinamikoagoa, solidarioagoa, berdeagoa, eskuzabalagoa, pausatuagoa izateko aukera dugu. Eta EH Bildun aukera hori gidatuko duen  indarra izan nahi dugu. Hori lortzeko lanean jarraituko dugu, gogo eta ilusio berarekin ", esan du Asironek.

EH Bilduk, PSNk eta Geroa Baik milioi bat euroko Etxebizitza Plan bat aurkeztuko dute Osoko Bilkuran, larrialdietarako etxebitzitzak, babes ofizialeko alokairuko 350 etxebizitza eta elkarlaneko etxebizitzak sustatzeko

| 2020-06-25 13:55:00

Hiru taldeen ustez gobernu-taldearen "paralisiaren" eta Covid osteko krisiaren ziurgabetasunaren aurrean "premiazkoa" da plan zehatz eta zabal bat izatea, eta "berehala" martxan jartzea

 

EH Bildu, PSN eta Geroa Bai udal taldeek elkarrekin defendatuko dute datorren uztailaren 2ko Osoko Bilkuran Krisiaren Aurkako Etxebizitza Plana. Plan horretan, besteak beste, honako konpromiso hauek hartzen dira: etxebizitza birgaitzeko programarekin jarraitzeko Finantza Inbertsio Iraunkorretan milioi bat euro bideratzeko konpromisoa, eta etxebizitza hori larrialdi egoeretarako erabiltzea; babes ofizialeko alokairuko 350 etxebizitza  proiektua bultzatzea,zaurgarritasun egoeran dauden gazte eta familientzat, eta elkarlaneko etxebizitzak sustatzeko partzelak ateratzeko konpromisoa. Horrela jasotzen da hiru taldeek sinatu eta datorren Osoko Bilkuran aurkeztuko duten mozio batean. Bertan, neurri horiez gain, Enrique Maya alkateari "arduraz" jokatzeko eta plana "berehala" martxan jartzeko eskatzen zaio.

Larrialdi egoeretarako etxebizitzari dagokionez, zaurgarritasun egoeran dauden familientzako etxebizitzak alegia, honako konpromiso hau hartu da: "1.000.000 euro aurreikustea Finantza Inbertsio Iraunkorretan, etxebizitzak eta udal-eraikinak birgaitzen jarraitzeko". Horretarako, bi kokaleku nagusi proposatu dira: San Pedro auzoa eta II. Zabalguneko merkatuaren gaineko eraikina.

Alokairuko etxebizitza sozialari dagokionez, oposizioko hiru taldeek honako hau defendatu dute: "errenta baxuko gazteen emantzipazioa batetik, eta bestetik errenta oso baxua duten baina alokairu handixeagoa hartzeko aukera duten familia zaurgarrien emantzipazioa bultzatzea". Proposamenak berreskuratu egiten du Nafarroako Gobernuari egin zitzaion udal-partzelen eskaintza 350 etxebizitza inguru sustatzeko, eta etxebizitza horiek bi kolektibo horien artean banatuko lirateke %50ean. "Funts putreen aurkako klausula" aurreikusiko luke proiektu horrek, eta Udalari 1.500.000 euroko diru-sarrera ekarriko lioke lursailak lagatzeagatik. Lagapena amaitzean (50/75 urte), lurzatiak eta eraikinak Udalaren jabetzakoak izango lirateke berriro.

Hirugarrenik, eta elkarlanerako etxebizitzei zein kooperatiba erregimenean dauden adinekoen egoitzei dagokienez, EH Bilduk, PSNk eta Geroa Baik adostutako proposamenak hauxe eskatzen dio gobernu-taldeari: "Ahalik eta lasterren" zuzkidura-lurzatien lehiaketa deitzea, "aurreko agintaldian aurreikusita zegoen eta udal-talde guztiek aho batez babesten zuten proiektu izanik". “Adinekoen zaintza hobetzen eta zahartze aktiboa sustatuko duten bizileku-irtenbideak bultzatzea da helburua".

Covid osteko krisiaren ondorioei aurre egiteko beharra

“Agintaldi honen hasieratik adierazi dugu etxebizitzaren gaia lehentasunetako bat dela gure udal-taldeen agenda sozialean, aurreko agintaldian izan zen bezala”, adierazi dute hiru alderdiek, eta gogorarazi dute azken urte honetan etxebizitza-plan integral eta eraginkor bat eskatu dutela, "baina ez dugu aldeko erantzunik jaso Maya alkatearen eta bertako arduradunen aldetik. EH Bildu, PSN eta Geroa Bairen ustez gobernu taldeak gai horri buruz egindako iragarpenak "gaur egun dauden lursailen errepaso soila da, zehaztasunik eta programarik gabea, eta, hartara, inolaz ere benetako etxebizitza plan bat egiteko asmorik gabea. Izan ere, Udalarenak diren lur sailak dirua lortzeko irizpide bakarrarekin saltzen dituzte”. 

"Berez Etxebizitzaren gaiari ekitea premiazkoa bazen, udal gobernuaren paralisia eta ziurgabetasuna ikusita are beharrezkoagoa da,  kontuan hartuta jada itxita eta adostuta dagoen plan batek ibilbide luzea behar duela benetako etxebizitzak eraiki arte. Honelako krisialdi egoera batek eskatzen duen erantzukizun politikotik abiatuta, proposamen zehatza, eraginkorra eta gauzagarria ekarri dugu Osoko Bilkura honetara, dagoeneko baduelako Nafar Gobernuaren adostasuna finantziazioari dagokionez.

Pio XII.ean egunero ibiltzen diren ehunka txirrindularien segurtasunerako "egin beharrekoak" bete ditzala eskatu dio EH Bilduk alkateari

| 2020-06-23 17:19:00

Koalizioak “nahita egindako utzikeria” leporatu dio eskuineko hirukoari, segurtasuna baino interes alderdikoiak lehenesten dituztela salatuz

 

Iruñeko Udaleko EH Bildu taldeak adierazpen proposamen bat aurkeztu du premiaz, bihar Hirigintza Batzordean eztabaidatzeko.  Adierazpen honen bitartez eskuineko hirukoa  behartu nahi du Pio XII.eko korridore jasangarrian txirrindularien segurtasuna bermatzeko Udalbatzak hartutako erabakiak betetzera. Zehazki, adierazpenaren testuak Enrique Maya alkateari eskatzen dio "bete ditzala txirrindularien segurtasunarekiko dituen betebeharrak, Pio XII.aren etorbidean falta diren 302 bolardoak berrezarriz eta, era berean, ordena jar dezala bere udal-gobernuaren mugikortasun-politika ankerretan".

Bigarrenik, adierazpen-proposamenak eskatzen du gobernu-taldeak "Mugikortasuneko Batzordea deitzea, ekainaren 17ko batzordean erabaki zen bezala, alde batetik Iruñeko bizikleta-bideetako puntu beltz guztien jarduera-plana eta/edo seinaleztapena aurkezteko eta, bestetik, Amaya kaleko aldaketei buruzko azalpenak emateko".

EH Bilduk Pio XII. eko korridorean gobernuak izan duen “utzikeria” salatu du. "Eskuineko hirukoak bere hauteskunde interesak defendatzeko darabilen estrategiak arriskuan jartzen ditu Pio XII.ean egunero ibiltzen diren ehunka txirrindulari". Era berean, "Proiektu Estrategikoen arloa eta Herritarren Segurtasunerako arloaren arteko deskoordinazioa" salatu du koalizio subiranistak; izan ere, "korridore jasangarri honetan dauden gabezien erantzukizunari eta horiek konpontzeko eskumenei dagokienez, pilotea batetik bestera pasatzen diote arazoei aurre egin beharrean". Azkenik, EH Bilduk azpimarratu du Hirigintza Batzordearen aginduak ez betetzea "oposizioko taldeak mespretxatzea" dela, duela 15 egun beste ebazpen bat onartu baitzen gauza bera eskatuz. "Horrela gobernatzen du Navarra Sumak, herritarren gehiengoaren ordezkaritzari bizkarra emanda", salatu du.

Ostadar koloreko eserlekuak LGTBI+ kolektiboaren aitorpen gisa

Bestalde, EH Bilduk bigarren adierazpen bat defendatuko du bihar. Adierazpen horretan, Hirigintza arloak, LGTBI+ kolektiboaren elkarlanean, "LGTBI+ kolektiboaren askatasunaren, duintasunaren eta errespetuaren aldeko borrokaren sinbolo gisa ostadarren koloreko eserlekuak margotzeko lekurik egokienak aukera ditzala" eskatuko dio gobernu-taldeari. "Iruñeak aniztasuna errespetatzen duen hiria izan behar du, eta aldarrikapen, hezkuntza eta gizarte kontzientzia ildo horretan lan egiteko apustua egin behar da", argudiatu du EH Bilduk. "Eserlekuak jendea elkartzeko hiri altzariaren zati dira, sozializaziorako gune bihurtzen dira. Hori dela eta, eserleku horiek ostadar koloreekin margotzea lesbianen, gayen, transexualen, bisexualen eta intersexualen eskubideak aitortu, errespetatu eta aniztasuna sustatzeko ekimen ona dela uste dugu ", gaineratu du.