EH Bilduk, PSNk eta Geroa Baik Udal Gobernu taldearen ezintasuna eta utzikeria salatu dute, bonu kulturalen kanpaina martxan ez jartzeagatik
| 2020-11-02 13:55:00
Taldeek eskatu dute Merkataritza eta Turismo Arloak, Kultura Arloarekin elkarlanean, kultura-sektoreari zuzendutako bonu-kanpaina bat sustatzea, bonu-kanpainen soberakinekin finantzatuta
EH Bilduk, PSNk eta Geroa Baik "Gobernu Estrategikoko, Merkataritzako eta Turismoko zinegotziaren eta kultura zinegotziaren ezintasuna eta utzikeria" salatu dute, "kultur sektoreari zuzendutako kanpaina ez egiteagatik". Era berean, udal-taldeek "Merkataritza eta Turismo arloari eskatzen diote, Kultura Sailarekin koordinatuta, kultura-sektoreari zuzendutako bonu-kanpaina bat landu eta sustatzeko, bonu-kanpainen soberakinekin eta/edo establezimendu seguruak sustatzeko diru-laguntzen aurrekontuarekin finantzatuta".
Udal taldeek azpimarratu dute merkataritza, ostalaritza eta kultura sektoreak bortizki kolpatuak izaten ari diela egungo krisian, eta kultur arloa dela pandemia honen biktima nagusienetako bat. Hori dela eta udal taldeek "kultur sektorea babesteko" konpromisoa hartu dute eta irmoki baieztatu dute: "Kultura, gizartearen garapenerako ezinbestekoa izateaz gain, lan gabe geratu diren pertsona askori lana emateko motor ekonomikoa da".
Udal taldeek gogorarazi dutenez, "joan den maiatzeko osoko bilkuran merkataritzari laguntzeko ezohiko neurri eta inbertsio sorta bat onartu zen, 1,8 milioi euroko kostuarekin, krisiak tokiko ekonomian izan zituen ondorioak arintzeko". Gaineratu dute "merkatariek, Merkataritza alorreko zinegotziak eta oposizio taldeek egindako bilera teknikoan, salbuespenezko neurri-sorta hori onartu zenean merkataritza, ostalaritza, turismo eta kultura sektoreei babesa emateko konpromisoa hartu zen”.
Udal taldeek adierazi dutenez, "kultur sektoreak pertsona askori ematen die lana eta Iruñeko herritarrei kohesio soziala, ezagutza eta aisialdia bermatzen dizkie". Hori dela eta, "ulertezina" da "partida ekonomikoak egonda, zinegotziek utzikeria horrekin jokatu izana", adierazi dute.
EH Bilduk Labriteko Pasabidearen kostua berehala erreklamatzea eta diru horrekin berri bat eraikitzea eskatu du. Nafarroako Administrazio Auzitegiak eskuineko hirukoaren estrategia "legez kanpokoa" dela esan ondoren
| 2020-10-30 13:35:00
“Mayaren kudeaketa, gai honetan ere, oso traketsa da eta enpresa pribatu eta aseguratzaileen interesei egiten die men, herritarren interesei baino", salatu du koalizioak
Iruñeko Udaleko EH Bildu taldeak eskatu du Labriteko Pasabideko diseinatzaile eta eraikitzaileei obraren kostuaren 813.000 euroak erreklamatzea ahalik eta azkarren. Izan ere, Nafarroako Administrazio Auzitegiak legez kanpokotzat jo du eskuineko hirukoak Ingeniarien Elkargoari hatzez emandako kontratua, pasabidearen egiturari buruzko entsegu-lanak egiteko. "Ebazpenak dioenez, kontratua lizitaziora atera behar zen eta salbuespenezkoa ez zen prozedura batera deitu behar zen, eta horrek esan nahi du kontratazio hori legez kanpokoa izan zela, ez zuelako errespetatu Kontratu Publikoei buruzko Foru Legean ezarritako prozedura", azaldu du koalizioak.
"Esan genuen Mayaren kudeaketa, baita gai honetan ere, oso traketsa izan dela, eta enpresa pribatuen eta aseguru-etxeen interesei erantzuten diela herritarren interesei baino. Ebazpen horren ondoren, premiazkoa da erantzukizunak garbitzeko espedientea betetzea, udal honi zor zaion dirua bildu eta pasabide berri bat eraiki ahal izateko", azaldu du EH Bilduk. "Aski da gai hau politizatzeaz, Navarra Sumako jaun andreei arduraz jokatzeko eskatzen diegu", adierazi du alderdi subiranistak. Gogoratu behar da aurreko legegintzaldian erantzukizunak garbitzeko espediente bat izapidetu zela. Espediente horretan, Udaleko teknikariek ondorioztatu zuten egitura aurri-egoeran zegoela, arduradunak diseinatzaileak eta eraikitzaileak zirela eta eraikuntzaren zenbateko osoa (813.000 euro) zuzenean eskatu behar zitzaiela. "Ulertezina da Mayak espedientea bertan behera uztea, eta ulertezina da, gobernura sartu eta 16 hilabetera, gai hau geldirik jarraitzea", esan du EH Bilduk.
Kontratu ilegala
Gaur ezagutu den ebazpenaren arabera, espedientea oso traketsa izan zen, "lizitaziorik gabe, zuzeneko kontratazioaren egokitasuna defendatzen du baina espedientean ez da balizko arrazoirik ematen kontratazio mota hori justifikatzeko. Hau da, inork ez du baieztatzen Ingeniarien Elkargoko Nafarroako Atala denik lan hori egin dezakeen enpresa edo profesional bakarra ", azaldu du koalizioak irizpena aipatuz. "Hori horrela izanik, guztiz irregularra izango litzateke esleipendun berari konponketa proiektu bat enkargatzea, legez kanpoko lizitazio batean oinarrituta, Enrique Maya alkateak egin nahi duen bezala", esan du EH Bilduk.
"Ebazpen honekin kontratu hau bertan beher geratu da, Ingeniarien Elkargoaren txostenak ez du baliorik eta haiera puntura itzuli gara", azaldu du koalizioak: "Bidean 62.000 euro galdu ditugu eskuineko hirukoak egindako hanka sartzeagatik, hau da, aldaketaren gobernuak erantzukizunak garbitzeko egindako espedientea mespretxatzeagatik". "Hasierako puntura itzuli beharko genuke, eta kaltea, erantzuleak eta kalte-ordainaren zenbatekoa zehaztu zituen erantzukizun-espediente horretan oinarrituta, lehiaketa bat deitu beharko litzateke pasabide berri baterako proiektuak aurkez daitezen", eskatu du EH Bilduk. "16 hilabete galdu ditugu Mayaren hanka sartze berri honekin. Ez dezagun denbora gehiago gal ", gaineratu du.
EH Bilduk salatu du Mayak haur eta gazteentzako zerbitzu berri bat inposatu nahi duela prebentzio-taldeen aurkako "mendeku politikoa" gauzatzeko
| 2020-10-29 20:45:00
Koalizioak zalantzan jarri du espedientearen inpartzialtasuna, "lardaskeria berri" horren ondorioez ohartarazi du, eta zerbitzu berri hau onartzeko duten presa "susmagarria" salatu du
Iruñeko Udaleko EH Bildu taldeak gaitzetsi egin du gaur eskuineko hirukoak egin duen iragarpena, Iruñeko zortzi auzotan prebentzio-taldeekin kontratuak ez luzatzekoa, haur eta gazteen prebentziorako zerbitzua "munizipalizatzeko aitzakia faltsuarekin". Koalizio soberanistaren ustez, erabaki horrek ezkutatzen duena prebentiboen aurkako "mendekua" da, talde hauek Navarra Sumaren estrategia zalantzan jarri dutelako: "Duela 25 urtetik hirian indarrean dagoen prebentzio arloko esku-hartze sozialaren eredua iraultzea, asistentzialismoan oinarritutako dinamika bat inposatzeko".
EH Bilduk bi gai azpimarratu ditu: lehenik eta behin, eskuineko hirukoak "gastua areagotuz" inposatu nahi duela erabaki hau, eta, bestetik, "lardaskeria berri" horrek "milaka txiki eta gazte" babes gabe utziko dituela. Izan ere, Enrique Mayaren planak betez gero, beren erreferenterik gabe geratuko baitira gazte hauek beraien garapenerako hain garrantzitsua den gai batean: gizarteratzea. "Prebentzio taldeek artatzen dituzten milaka txikien etorkizuna kili kolo egongo da urtarrilaren 1etik aurrera. Nork hartuko ditu? Zer trantsizio aurreikusten da haientzat? Nola ordezkatuko dute 17 teknikarik orain 30 teknikarik eta 400 boluntariok ematen duten zerbitzua?", salatu du koalizioak. "Plan honek mendeku politikoa baino ez du bilatzen, eta horretarako berdin dio milaka txikik eta gaztek jasotzen duten zerbitzuaren kalitatea nabarmen murriztea", laburbildu du EH Bilduk.
Ez gaude zerbitzuak udalak berak kudeatzearen aurka, aitzitik, pribatizazio posible guztiak iraultzearen aldeko apustua egiten dugu, baina kasu hau ezberdina da, izan ere, Prebentzio Taldeak ez dira enpresa pribatuak, irabazi asmorik gabeko gazte-elkarteak baizik", azaldu du EH Bilduk.
Koalizioaren arabera, "Zerbitzuaren kalitatea jaitsi eta langileak murriztuz gastua handitzen duen plan bat nekez justifika daiteke", eta Caballero zinegotziak gaur azaldutakoari buruz honakoa gehitu du: "bere asmakizun honek 100.000 euroan handituko du urteroko kostua, lan hori egiten ari diren profesionalen kopurua 30etik 17ra jmurriztuko ditu, ez da lehenetsiko langile horiek auzoko errealitatearen parte izatea, eta ez da bermatuko boluntariotza-sistema auzoetako gazteekin aritzeko”.
Izendapen libreko karguek egindako espedientea
Bestalde, eta administrazioari dagokionez, EH Bilduk hain gaizki osatutako espediente honek Udalarentzat izan ditzakeen ondorio legal eta ekonomikoez ohartarazi du. Izan ere, espedienteak ez du zerbitzu berriaren proiektu teknikoa, ez dago arloko funtzionarioen txostenik (izendapen askeko karguen txostenak soilik), ez da erantsi ordeztu nahi diren prebentzio-taldeen jardueraren garapenari buruzko ebaluaziorik, eta ez zaio dagokion batzordeari jakinarazi. "Espedienteari erreparatzen badiogu, ohartzen gara txostenetako lehenak urriaren 18ko data duela, eta azkenak atzoko data; beraz, ondorioztatzen dugu 10 egunetan egin dutela espedientea, COVID testuingurua aprobetxatuz, eta konfiantzazko kargudun pertsonetaz baliatuz eta aldez aurretik inori jakinarazi gabe", laburbildu du koalizioak. "Gainera, proiektu berri hau astebeteko epean onartzea nahi dute, balizko auzi legal batek Udalarentzat izan ditzakeen ondorioak aztertu gabe", gaineratu du.
"Mendeku politikoa eta sektarismoak gidatuta, hanka sartze politiko izugarria egingo dutela aurreikusten dugu. Joan den udan Prebentzio Zerbitzuek helegitea aurkeztu zuten Udalaren aurka, udako hiri kanpamenduak beraiek kudeatzea inposatu nahi zietelako, eta auzia irabazi zuten. María Caballerok ez die hori barkatu", adierazi du EH Bilduk. Koalizioak salatu du eskuineko hirukoak betidanik deuseztatu nahi izan duela ekintza komunitarioko zerbitzu hau, eta ohartarazi du: "ez da kudeaketa-eredua soilik aldatu nahi dutena, haurrekin lan egiteko eredua baizik. Oso gai serioa da eta ez litzateke presa eta iluntasun horrekin tratatu beharko".
EH Bilduk Javier Labairu Herritarren Segurtasunerako zinegotziaren premiazko agerraldia eskatu du garabi zerbitzuaren pribatizazioa baliogabetzat jotzen duen epaiaren ondorioak azal ditzan
| 2020-10-26 12:50:00
Arrotxapea Iparraldean, Txantrean eta San Jorgen gune urdina ezarri aurretik auzokideei galdetzea eskatzen du koalizioak
EH Bildu udal taldeak Javier Labairu Herritarren Segurtasunerako zinegotzi delegatuaren premiazko agerraldia eskatu du, duela urtebete eskuineko hirukoak onartutako garabi zerbitzuaren pribatizazioa baliogabetzat jotzen duen epaiaren ondorioak azal ditzan. Presidentzia Batzordean egin behar den agerraldian, koalizio subiranistak "epaiaren edukiaren ondorioak eta garabi zerbitzuan, orain arte jarritako isunetan eta etorkizunean gerta daitezkeen beste edozein gorabehera" zehaztea eskatu du.
"Agerikoa da epai berri honek zalantzan jartzen duela zerbitzu honen inguruan arloak hartu dituen erabakien legezkotasuna, baita zerbitzua pribatizatu zenetik egin diren ekintzen legezkotasuna ere", azaldu du EH Bilduk.
Joan den ostiralean jakin zenez, Administrazioarekiko Auzien Epaitegiak baliogabetzat jo du Udaltzaingoaren garabi unitatea eraisteko erabakia; izan ere, Udaltzaingoko sindikatuetako batek salaketa jarri zuen, eta emandako epaiak “plantilla organikoaren aldaketa desegitera eta langileei beren destinoa eta eginkizunak berrezartzera behartzen du Udala". Iazko urritik, zerbitzua Dornierren esku dago erabat, baina Herritarren Segurtasunerako zinegotziak esan duenez, beti egon da pribatizatua pribatizatuta egon da, eta epaia "ziurrenik formari erreparatuko dio, edukiari baino". EH Bilduren ustez, ordea, Navarra Sumaren kudeaketaren kontrako epai judizial berri horrek zalantza ugari sortzen ditu aurten enpresa pribatuak garabiaren inguruan egin dituen ekintzen inguruan. "Hori da Labairuk azaldu beharko duena", adierazi du koalizioak.
Eragindako auzoei galdetu gune urdina zabaldu aurretik
Bestalde, Presidentzia batzordean EH Bilduren beste adierazpen proposamen bat eztabaidatuko da bihar. Proposamen horretan, Arrotxapea Iparraldean, Txantrean eta San Jorgen gune urdina ezartzeko erabakia hartu aurretik herritarren, gizarte-sarearen eta auzoetako elkarteen artean kontsulta bat egitea eskatzen da. "Oinarrizkoa iruditzen zaigu era honetako ekimenak planteatu aurretik, eragiten dien pertsonen iritzia jasotzea", adierazi du alderdi subiranistak, Arrotxapea Hegoaldean gune urdina ezarri zenean prozedura hori jarraitu zela gogoraraziz.
Aitorpen-proposamenak, halaber, eskatzen du araututako aparkalekuen edozein aldaketa edo hedapen egiterakoan "auzoaren mugikortasunaren estrategia integral baten baitan" planteatzea, besteak beste, eskola-ibilbide seguruen diseinua edo merkataritza-ardatz estrategikoen gaineko eraginen azterketa aintzat hartuta. "Aparkaleku berrien beharra ezin da izan lehentasun edo helburu bakarra", esan du EH Bilduk, "arazoaren zati garrantzitsu bat da, baina ez da bakarra".
EH Bilduk pozgarritzat jo du Udal Idazkariaren txostenak Tokiko Merkataritza Babesteko Ordenantzaren tramitazioa desblokeatzea, "Covidaren krisiari aurre egiteko funtsezko tresna baita"
| 2020-10-23 14:37:00
Txostenak eskatzen du arau-proposamen hori berriro izapidetzea, baina, era berean, neutraltasuna eskatzen dio eskuineko hirukoari, eta ez dezala "asmatu" oposizioaren ekimenak luzatzeko edo geldiarazteko prozedurarik
EH Bildu udal taldeak pozgarritzat jo du Udal Idazkariaren txosten batek Tokiko Merkataritza Babesteko Ordenantza berehala tramitatzeko agintzea, zortzi hilabeteko etenaldiaren ondoren, eta eskuineko hirukoari neutraltasuna eskatzea oposizioaren ekimenak aurrera ateratzeko, proiektu horiek atzeratzeko prozedurarik "asmatu" gabe. “Oso garrantzitsua da zortzi hilabeteren ostean Tokiko Merkataritza Bultzatzeko eta Babesteko Ordenantza desblokeatzea, krisi betean oso beharrezkoa baita", nabarmendu du EH Bilduk. "Pandemia eta horrekin batera datorren krisia hasi zenetik esaten ari gara hori; tresna eraginkorrak behar ditugu okerren dauden sektoreei eta familiei laguntzeko, eta Ordenantza hau horretarako erabilgarria izango dela uste dugu", adierazi du alderdiak.
Ordenantzak honako hauek proposatzen ditu, besteak beste: tokiko merkataritzari laguntza eta prestakuntza emateko bulego bat sortzea; tokiko merkataritzaren behatoki bat, establezimenduei buruzko inbentario bat egin eta sektorearen errealitatearen jarraipena egingo duena; merkataritza-ardatz estrategikoen eta bereziki landu beharreko eremu ahulen mapa bat egitea; merkataritza-lokalen poltsa bat bultzatzea ekintzailetza bultzatzeko; kale berean frankiziak ezartzeko aukera mugatzea eta establezimendu enblematikoen babesa arautzea. "Argi dago ordenantza honek, onartuz gero, aukera emango diola Udalari egoera diagnostikatzeko, merkataritzaren beharrak definitzeko, laguntzak izapidetzeko eta, azken batean, gure herriko merkataritza babesteko", esan du EH Bilduk.
Eskuineko hirukoaren autoritarismoari aurre egitea
Irakurketa administratiboari dagokionez, EH Bilduren irudikoz "idazkariaren txostenak arrazoia ematen dio gure taldeari Mayaren gobernuaren jarrera oztopatzailea salatzen dugunean, eta bi ideia argiki nabarmentzen ditu: eskuineko hirukoak jarrera ez oso demokratikoarekin funtzionatzen duela eta gure hiriaren alde planteatzen ditugun ekimenak modu irregularrean blokeatzen saiatzen direla batetik, eta bestetik, eskuinak tokiko merkataritza babesten duela esaten duenean itxurakeria hutsa dela. Hala frogatzen dute Arrosadian azalera handi bat sortzeko espedienteak edo "bonu komertzialen kanpainaren" kudeaketa negargarriak.
Alderdi soberanistak txosten horren ondorioak ere nabarmendu ditu; izan ere, "Gobernu taldeari neutraltasuna eskatzen dio oposizioaren ekimenak izapidetzeari dagokionez, horiek modu artifizialean ez blokeatzeko eskatzen du eta agerian uzten ditu eskuineko hirukoak eta, zehazki, Presidentzia Batzordeko presidenteak (Ana Elizalde) egindako gehiegikeriak oposizioaren lana indargabetzeko”.
