Iruñea

EH Bilduk eskatu du eskuineko hirukoak bete eta aurkez dezala hilabeteko epean eskola-bide seguruak garatzeko plan bat, hiriko ikastetxe guztiak barne hartuko dituena

| 2020-09-04 13:39:00

Pandemiak kultur sektorean dituen ondorioak arintzeko, Kulturako diru-laguntza lerroak sustatzeko eskatu dio koalizioak Mayaren taldeari

 

Iruñeko Udaleko EH Bildu taldeak Presidentzia Batzordean adierazpen proposamen bat aurkeztuko du, ikastetxe ezberdinetako hezkuntza komunitateekin elkarlanean, eskola bide seguruak garatzeko plan bat egitea eskatzeko. Proposamen horretan eskatzen da, halaber, lan hori Mugikortasuneko eta Herritarren Segurtasuneko Arloekin koordinatuta egitea, eta inbertsioen eta gauzatzeko epeen aurreikuspena jasotzea, hiriko ikastetxe guztiek sarbide-ibilbide seguruak izan ditzaten.

"Eskola-bideak apustu sozial eta hezitzailea dira, eta bertan parte hartu behar dute irakasleek, gurasoek, inguruko bizilagunek, merkatariek eta udaltzainek, baina, batez ere, Udalak gidatutako apustua izan behar du. Zoritxarrez, ikusten ari gara beste behin ere eskuineko hirukoak utzikeria egiten duela gai horrekin", hausnartu du koalizio subiranistak. Covidaren egungo krisian, ikastetxeetarako sarbide seguruak bermatu behar dira, ikasleek, langileek eta irakasleek segurtasun-tarteak gorde ditzaten, eta, ondorioz, Udalak, erakunde gisa, proiektu horiek gidatu behar ditu eta hori da lortu nahi duguna ", argitu du EH Bilduk. "Ibilbide horiekin mugikortasun jasangarria bultzatzen da, kutsadura gutxitzen da eta gazteenen arteko istripu-tasa murrizten da, eta, gainera, haurren autonomia, osasuna eta garapena sustatzen dira", esan du koalizioak.

Herritarren Segurtasunerako eta Mugikortasunerako zinegotziaren esku-hartzeen ondorioz, agerian geratu da eskuineko hirukoak ez duela horrelako planik, eta hori da EH Bilduk adierazpen hori aurkeztera bultzatu duen arrazoia. "Eskola bide seguruen dinamika hau babesteko adostasun zabala egotea nahi genuke, eta hori apustu politiko eta instituzional argi eta bateratua baldin badago bakarrik izango da posible", esan du koalizioak.

Herritarren Aferetarako batzordean ere aurkeztuko du beste adierazpen bat EH Bilduk. Kultur Sailari eskatuko dio "bi asteko epean Nafarroako Aldizkari Ofizialean aurkeztu eta eta argitaratzeko 2020rako Kultura Diru-laguntzen Plan Orokorrean jasotako diru-laguntza lerro guztiak". Koalizio subiranistaren arabera, "pandemiak aurrera egin ahala, pandemiaren ondorioak eremu guztietan nabaritzen dira, eta, bereziki, kulturan eta diziplina artistikoetan"; beraz, funtsezkoa da "Administrazioek eraginkortasunez eta gardentasunez kudeatzea baliabide eta bitartekoen banaketa, krisiak sektore hauetan izan dezakeen eragina minimizatzeko".

EH Bilduk Nafarroako Administrazio Auzitegian salatu du Enrique Mayak frankismoko krimenen aurkako kereila Nazio Batuen Giza Eskubideen Batzordera eramateari uko egin diola

| 2020-09-02 14:54:00

2019ko abenduan Osoko Bilkuraren gehiengoak erreklamazio horri babesa eman zion arren, zortzi hilabete geroago ez da izapidetu

 

Eskuineko hirukoak ez du bete frankismoaren krimenen aurkako udal-kereilari jarraipena eman eta Nazio Batuen Giza Eskubideen Batzorden aurkezteko Osoko Bilkuraren agindua (2019ko abenduaren 12koa), eta horregatik erabaki du EH Bilduk gora jotzeko errekurtsoa aurkeztea Nafarroako Administrazio Auzitegian. Zehazki, 3 dira helegite honen arrazoiak, koalizio subiranistak jakinarazi duenez: osoko bilkuraren agindua 8 hilabete baino gehiago atzeratu dela justifikaziorik gabe, gobernu-taldeak uko egin diola oposizioaren eskakizunei erantzuteari (lau galdera egin dira beste hainbeste osoko bilkuratan), eta erreklamatutako prozeduraren azterketa juridikoari buruzko txostena aurkeztu ez dutela.

NAAri aurkeztutako idazkian, lehenik eta behin, aipatzen da oposizioko zinegotziek eskubidea dutela gobernu-taldeari eskatutako informazioa eskuratzeko, gobernu-ekintzaren kontrol- eta fiskalizazio-funtzioak bete ahal izan ditzan. "Nazio Batuen aurrean salaketa tramitatzeko 8 hilabete baino gehiagoko atzerapenak ez ezik, gure zinegotziek gai honen inguruan egindako lau informazio-eskaerei emandako erantzunak ere argi eta garbi uzten du helegite honen egokitasuna, oposizio-lanak oinarri izan behar dituen funtsezko oinarriak urratzen ari baitira", azaldu du EH Bilduk. Helegitean, koalizioak gogorarazi du, araudiaren arabera, osoko bilkuran egindako galderei organo horren hurrengo hitzorduan erantzun behar zaiela, eta epe hori "sistematikoki urratu du Enrique Maya alkateak, aurtengo otsailean prozedura horri buruzko informazioa eskatzeko lehen galdera egin zitzaionetik".

 

Osoko Bilkuraren agintaldia oztopatzeko saiakera

Auzitegian aurkeztutako helegitearen hirugarren argudioa honakoa da: eskatutako ekintza (salaketa NBEko Giza Eskubideen Batzordeari helaraztea) eta behin eta berriz eskatutako informazioa (espediente honen bilakaerari buruzko lau galdera, gehienez) udal-gobernuaren ekintza politikoari dagozkion gaiak dira, "ez die herritarren oinarrizko eskubideei eragiten eta, beraz, alkateak ezin du inolaz justifikatu bere erantzun falta, salbu eta oposizioaren jarduna oztopatzeko saiakera politiko hutsa ez bada”.

"Gogoratu behar da lehenik UPNk eta geroago Navarra Sumak beti bozkatu dutela prozedura honen aurka, Frankismoak Iruñeko herritarren aurka urteetan egindako krimenak ikertzea bilatzen baita", azaldu du EH Bilduk. "Eskuin erregionalistak eta bere kideek jakingo dute zer justifikazio ematen duten isiltasun mantu hau inposatzeko, baina ezin da inolaz ere onartu jarrera alderdikoi horrek justizia eskatzen duen Osoko Bilkuraren agindu espresua ez betetzea", gogorarazi du koalizioak. Hori dela eta, Administrazio Auzitegiari eskatzen zaio babes ditzala oposizioko zinegotzien eskubideak, eta erabaki dezala alkateak "ahalik eta lasterren" erantzun behar diela egindako errekerimenduei, "Kontuan hartuta epea aspaldi gainditua zela".

EH Bilduk Iruñeko ikastetxe eta eskola publikoak Covid osteko errealitatera egokitzeko inbertsio planik ez dagoela salatu du eta eskuineko hirukoari premiazko plan bat egiteko eskatu dio

| 2020-09-01 13:07:00

Koalizioak gogorarazi du ekainean onartu zutela plan bat egiteko adierazpen bat eta, bi hilabete geroago, Mayaren taldeak "ez duela ezer egin"

 

Iruñeko Udaleko EH Bildu taldeak Herritarren Aferetarako Batzordean adirazpen bat aurkeztuko du honakoa salatzeko: Iruñeak, "Gobernu taldearen utzikeriagatik", gaur egun ez duela obra eta inbertsio planik hiriko ikastetxe eta eskola publikoen sarea Covid ondorengo errealitatera egokitzeko. Koalizioak bere idatzian salatu duenez, ekainean osoko bilkuraren gehiengoak onartu zuen plan hori egin ahal izateko ikastetxeetan informazioa biltzeko proposamena, baina eskuineko hirukoak ez du bete Osoko Bilkuraren agindu hori. Horregatik EH Bilduk eskatu du prozesu hori premiaz abian jartzea, erakundeak, hezkuntza-komunitatearekin lankidetzan, ahal bai lehen izan dezan ikastetxeak egokitzeko plan bat. Plan horretan eskoletako "barne eta kanpoko espazioak egokitzeko inbertsioak jasoko dira", ikasturtea ahalik eta modu seguruenean hasten dela bermatzeko.

"Egun gutxi barru ziurgabetasunez betetako ikasturtea hasiko da, eta erakundeen ardura da, bakoitzak bere eskumenetan baitan, etorriko diren erronkei aurre egitea", gogorarazi du koalizioak. "Iruñeko eskola publikoek, Hezkuntzako protokoloak bete ahal izateko, barneko eta kanpoko espazioak egokitu behar dituzte, ahalik eta ongizate eta segurtasun gehien bermatzeko, eta hori da eskuineko hirukoak bete ez duena", gaineratu du EH Bilduk. Koalizioak gogorarazi du ekainean plan bat egiteko adierazpen bat onartu zela baina "bi hilabete geroago ez da ezer egin, eta horrek agerian uzten du eskuineko hirukoak ez duela gai horretan interesik. "Ezaguna da gobernu talde honek udal gehiengoari jaramonik ez egiteko duen joera, baina ulertezina da, egoera honetan, gobernu taldeak interes falta hori erakustea", deitoratu du koalizio subiranistak.

Inbertsio proiekturik ez urte eta erdiko epean

Ostiralean eskuineko hirukoak iragarri zuen 72.000 euro inbertituko dituela hiriko 27 ikastetxe publikoen artean. EH Bilduren esanetan iragarpen hori "gustu txarreko txantxa" bat da, "ez bakarrik diru kopurua barregarria delako, baizik eta gure adierazpena indargabetzeko ahalegin maltzurra delako. Izan ere, ez baitute ekainean osoko bilkuran onartu zen hezkuntza zentroekin egin beharreko kontsulta prozesua egin". "Afera ez da espedientea betetzera mugatzea, eskola-komunitateari laguntzeko saiakera serioa egitea baizik, baina atera dezakegun ondorioa oso bestelakoa da: eskuinaren gobernuak urte eta erdian ez du proiektu edo plan bakar bat ere aurkeztu hiriko ikastetxeak mantentzeko eta egokitzeko, aldaketaren gobernuaren legealdian 3,5 milioiko inbertsioak onartu ziren bitartean", argudiatu du EH Bilduk. "Orain 72.000 euro iragartzea (urtero banatzen den partida) ikastetxeei zer behar duten galdetu gabe barregarria eta iraingarria da", gaineratu du.

"Kalitatezko eskola publikoa funtsezkoa da gizarte kritiko, jantzi eta parekidea bermatzeko, aurrean ditugun erronkei erantzun ahal izango diena, hala nola  osasun-arloko krisia edo edo klima-aldaketa. Horretarako, administrazioek baliabideak inbertitzen eta berritzen jarraitu behar dugu, herritar guztiei ahalik eta kalitate handieneko hezkuntza zerbitzuak eskaini ahal izateko ", esan du EH Bilduk.

EH Bilduk hizkuntza eskubideen defentsa indartuko du, eskuineko hirukoak euskararekiko duen legez kontrako jarrera agerian uzten duen Nafarroako Administrazio Auzitegiaren ebazpena jaso ondoren

| 2020-08-27 12:08:00

Koalizioaren ustez, "lotsagarriak" dira Enrique Mayaren zuzendaritza juridikoaren argudioak, aurten bi egutegi ezberdin argitaratzeko eta ordaintzeko agindua justifikatzeko

 

Enrique Mayaren gobernu taldeak ezarritako euskararen diskriminazioa (kasu honetan udal egutegiaren edizioari dagokionez) zuzenbidearen aurkakotzat eta legez kanpokotzat jotzen duen Nafarroako Administrazio Auzitegiaren ebazpen berriak argi uzten du, EH Bilduren ustez, eskuineko hirukoa ilegaltasunetik aritzen dela euskarari eraso egiten liskar identitarioa pizteko helburuz. Gainera, kasu honetan, antzina entzutetsuak ziren baliabide publikoak, hala nola udal-zerbitzu juridikoak, era interesatuan erabiltzen ari dira izendapen askeko kargudunen gidaritzapean, ilegaltasun horiek justifikatzeko".

Nafarroako Administrazio Auzitegiak udal-egutegiari buruz emandako ebazpena hilabete bateko epean Udalaren euskararekiko politika zuzenbidearen aurkakotzat jotzen duen bigarren ebazpena da, sare sozialetako udal profilarenarekin batera. "Politika horren helburua ez da soilik gizartean liskarrak sortzea eskuina boterean berriro finkatzeko, baizik eta herritarren arreta desbideratzea beraien kudeaketa kaskarra eta Udalaren paralisia ezkutatzeko”. "Berriz ere, Erregimenaren garairik onenetan bezala, Enrique Maya euskal hiztunak bigarren mailako herritar gisa tratatzen dituen politikak inposatzen saiatzen da", salatu du EH Bilduk. Koalizioak aurreratu du ebazpen hau eta bere aurrekoa osorik betearaztea eskatuko duela, eta Navarra Sumak ordain ditzala  sor daitezkeen kostu judizialak. "Euskara hiri honen altxor kulturala da eta beti defendatuko ditugu herritarren hizkuntza eskubideak", adierazi du koalizioak.

Aste honetan ezagutu den ebazpenak irmoki arbuiatzen ditu udal zerbitzu juridikoek emandako argudioak udal egutegia hizkuntzaren arabera bereizitako euskarrietan banatzeko (horrek dakarren kostuen igoerarekin). Egutegia santorala begiratzeko edo agenda gisa erabiltzen duten adinekoentzat bakarrik dela esateak agerian uzten du gobernu talde honek duen ikuspegia eta bere ekintzen izaera diskriminatzailea, bere argudioen sendotasun falta lotsagarria agerian uzteaz gain", adierazi du koalizio subiranistak. "EH Bilduk bere esku dagoen guztia egingo du herritar guztien hizkuntza eskubideak errespetatzen direla bermatzeko, hala nola zerbitzu juridikoen zuzendaritzak egindako txostenen independentzia eta prestigioa berrezartzea eskatzeko ere", gaineratu du.

EH Bilduk exijitu du eskuineko hirukoak Txantrearekin hartutako konpromisoak bete ditzala, Hegoaldeko Parkeko obrek zuhaitzetan eta Irubideko parkearen hedapenean dituzten eraginak murrizteko

| 2020-08-26 14:34:00

Partaidetza-prozesu batetik ateratako konpromisoen artean, zuhaitzak birlandatzeko proiektu bat eta urbanizazio-obrak hasi aurretik Josefinen eraikineko baratzea irekitzea daude

 

EH Bilduk Txantrea-hegoaldeko parkearen lehen faseko lanen plangintza betetzeko eskatu dio eskuineko hirukoari eta Irubideko parkea handitu eta Josefinen baratze zaharra berreskuratzeko konpromisoa hartzeko. Era berean, koalizioak eskatu du parkearen proiektuko partaidetza-prozesuan Udalak auzoarekin hartutako konpromisoa bete dezala eta azterketa bat egin dezala institutuaren ondoan egingo den biribilguneko zuhaitzei ahalik eta kalte gutxien eragiteko eta ahalik eta zuhaitz gehien berreskuratzeko. "Funtsezkoa da erakundeak auzoari emandako hitza betetzea, partaidetza-prozesua errespetatzea eta Udala arduratzea herritarrek lan hauen inguruan, bereziki baso-masari eragingo zaion kalteen gaineko kezkak argitzeaz", adierazi du EH Bilduk.

Lanak berehala hasiko dira, eta hartara, koalizio subiranistak eskatu du udal gobernuak hartutako konpromisoak "garaiz eta behar bezala" egikaritzeko. Era berean gogoraratu du eskuinak hiriko eremu horretarako zuen proiektua etxebizitzak egitea zela, babes ofizialeko oso etxebizitza gutxi aurreikusiz, eta lau erreiko bide bat eraikitzea". Auzoak gogor kritikatu zuen azken proiektu hori eragin zezakeen muga-efektua dela eta. Aurreko legealdian, proiektu hori eraldatu egin zen, eta auzoarekin partaidetzarekin Hegoaldeko Parkearen proiektua diseinatu zen, zeinak ingurumen-estandar berritzaileak aintzat hartzen zituen, eta bide hori 30 kalea bihurtzen zuen, noranzko bakoitzeko errei bakar batekin. Gainera, auzoarekin egindako akordioen ondorioz, bi proiektuak (parkea eta urbanizazioa) aldi berean abiaraztea eta modu koordinatuan gauzatzea erabaki zen. "Obrak egiterakoan, auzoak esandakoa errespetatzen dela eta eskuinaren ibilbide-orria inposatzen ez dela bermatu nahi dugu", argitu du EH Bilduk.

Koalizioak, zehazki, bi gairen inguruko informazioa eskatu dio gobernu taldeari: "Obrak Magdalena zubiaren ondoko eremutik eta Josefinen komentuko baratze zaharrari dagokion eremutik hasteko aurreikuspenik dagoen" batetik, eta, bestetik, "Irubide eremuko zuhaitzei ahalik eta kalte gutxien eragiteko aurreikuspenik dagoen eta Udalaren lorategi-zerbitzuari zuhaitzak transplante bidez berreskuratzeko azterketa eskatuko zaion”.