Gipuzkoa

Iriarte: “Urkulluk Ibarretxe Plana alfonbra azpian ezkutatu du, erabakitzeko eskubidearen etsaiek belarriekin txalo egiten duten bitartean”

Erabakitzeko eskubidea gauzatzeko oztopo izatea eta hitza ez betetzea egotzi dio Iriartek EAJko hautagaiari, eta burujabetzaren aldeko botoa eskatu du. “Norbaitek uste al du Urkullu eta Mendiaren gobernu batek gure etorkizuna erabakitzeko eskubidea defendatuko duela?”.

| 2020-06-30 13:32:00

Maddalen Iriartek Araba, Bizkai eta Gipuzkoako estatus politiko berria adostu eta onartzeko amaitu gabeko prozesua izan du hizpide gaur arratsaldean Arrasaten. Azaldu duenez, burujabetzaren bidean ez da aurrerapausorik eman Urkullu duela zortzi urte Lehendakaritzara helduz geroztik, EAJk Ibarretxeren espiritua bazterrean utzi du eta haren errenuntziak etengabeak izan dira. “Non dago Lizarraren ilusioa, non erabakitzeko eskubidearen aldeko manifestazio handiak? Urkulluk Ibarretxe Plana alfonbra azpian ezkutatu du, hautsa ezkutatzen den bezala, eta erabakitzeko eskubidearen etsaiak belarriekin txalo egiten ari dira”.

“Erabakitzeko eskubideak Gasteizko Legebiltzarraren bi heren baino gehiagoren bermea” duela azpimarratu ostean, Iriartek “erabakitzeko eskubide hori egia bihurtzeko oztopo izatea” leporatu dio Urkulluri. “Autogobernuaz ari garenean, haren hitzak ez du ezer balio, ez du hitzik”. Izan ere, “bederatzi urte daramatza galdeketa bat hitzematen. Non daude kontsulta horiek? Non dago estatus berria? EH Bilduk estatus berri baterako akordioa izenpetu zuen EAJrekin, baina Urkulluk tiradera batean sartu du, PSEren ondora joateko. Non dago Urkulluren euskaldun hitza? Bederatzi urte daramatza epela zorabiatzen, euskal herritarrak zorabiatzen, hamsterraren gurpilean bueltaka. Urkulluk armairu bat dauka bi jantzirekin: subiranista jantzia Alderdi Egunerako eta koristarena urte osorako. Madrilek abestu eta berak koruak egiten ditu”.

Kanpainan autogobernuaz asko hitz egin arren, “zein autogobernutaz ari da Urkullu?”, galdetu du Maddalen Iriartek. Bere esanetan, pandemiak agerian utzi du “gurea beste batzuek kendu eta jartzen duten autogobernua dela, Madrilek jarri eta Madrilek kentzen baitu; Sanchezek erabakitzen du eta Urkulluk burua makurtu”. Hori horrela, “norbaitek uste du Urkullu eta Mendiaren gobernu batek defendatuko duela gure herriak bere etorkizuna aukeratzeko duen eskubidea? Benetan?”.

Horren aurrean, Iriartek hautestontziak boto subiranistez betetzeko deia egin du. “Inor ez dadila etxean geratu, galdutako boto subiranista bakoitza Abascal eta Cayetanaren aldeko boto bat delako. EH Bilduren aldeko boto bakoitzak gure etorkizuna hemen erabakitzeko balio du, eta ez Madrilen. EH Bilduk herri honetako gehiengoarekin konpromisoa du, eta gehiengo horrek gure etorkizuna hautestontzietan erabakitzea nahi du, ez Madrilgo bulego ilun batean. Burujabetza ez da gutizia bat, pertsonen bizitza hobetzeko beharra baizik, hezkuntza eta osasun publikoa defendatzeko, gure pentsioak defendatzeko, enplegu osoa bermatzeko”.

Arkaitz Rodriguez: “Frankismoaren semeek sorpresa hartuko dute”

Maddalen Iriartek bezala, Arkaitz Rodriguezek ere “hautestontziak boto subiranista eta ezkertiarrez betetzera” deitu du eta “uztailaren 12an frankismoaren semeek sorpresa hartuko” dutela ziurtatu du. “Cayetanari entzutea gomendatzen dizuegu, boto soberanista eta ezkertiarrez bete ditzagun hautestontziak; etxean geratzen den boto soberanista eta ezkertiar bakoitza poz handi bat da ‘Cara el sol’ abesten dutenentzat”.

Urkulluren agintaldia hizpide, Rodriguezek zortzi urte “zaborretara botata” ikusi ditu, “esku-frenoa jarrita, inolako aurrerapenik gabe, ez sozialik, ez nazionalik”. Bere hitzetan “Urkulluksubiranotasunaren trena galdu du”, eta berdin jarraitzeko arriskua bistakoa da, PSEk jada argi adierazi baitu bere helburua Espainiako Gobernuarekin euskal gobernu leial bat osatzea dela. “Horiek dira zure bazkideak, Urkullu jauna? Hori da zure gobernua?”, galdetu dio EAJkoari. Eta argi esan dio: “EH Bilduk subiranotasunaren lokomotora izateko konpromisoa hartu du, EH Bildu gabe ez dagoelako ez gehiengo subiranista posiblerik, ez tren subiranistarik”.

Nerea Kortajarena: “EH Bilduk 1.080 euroko gutxieneko pentsioak bermatzeko konpromisoa du”

Gipuzkoako zerrendakideak euskal instituzioek eskura dituzten tresna guztiak erabiltzeko borondatea erakutsi du miseriazko pentsioak amaitzeko.

| 2020-06-29 19:23:00

“Euskal pentsiodunei bizitza duinak bermatzeko EH Bilduren konpromisoa” berretsi du Nerea Kortajarena Gipuzkoako hautagaiak gaur Lazkaon. 1.080 euroko gutxieneko pentsioak bermatzera konprometitu da, “milaka pentsiodunek jasotzen dituzten miseriazko pentsioak amaitzeko”, eta, euskal pentsio sistema publikoa sortzea helburu, koalizioak Gizarte Segurantzaren kudeaketaren transferentzia atsedenik gabe eskatuko duela ziurtatu du.

Pentsiodunen kezkak eta kexak guztiz justifikaturik daude, Kortajarenaren iritziz, “gurea bezalako herri batek, gure potentziala duen herri batek, ezin dituelako onartu, duintasun eta justizia sozialagatik, milaka pentsiodunek, batez ere emakumeek, kobratzen dituzten miseriazko pentsioak”. Azaldu duenez, “Araban, Bizkaian eta Gipuzkoan 15.000 pentsiodunek osatu behar dute pentsioa Diru-Sarrerak Bermatzeko Errentarekin, errenta hori jasotzen dutenen %25, eta oso datu adierazgarria: pentsiodun horien bi heren emakumeak dira. Gainera, legeak aitortzen diena baino 300 € gutxiago jasotzen dute, Urkullu eta Mendiak pentsioen osagarria murriztu dietelako”.

“Euskal pentsiodunek pentsio duinak merezi dituzte, ez miseriazko pentsioak”, aldarrikatu du EH Bilduko hautagaiak, eta ziurtatu du “pentsio duinak bermatzeko eskumen eta ahalmen nahikoak ditugula, bai eta 1.080 euroko gutxieneko pentsioa bermatzeko aukera ere, Jaurlaritzak pentsio txikienak osatuta”. Adierazi duenez, “borondate politiko kontua da, ez du balio ustezko eskumen faltan ezkutatzea”. Izan ere, Jaurlaritzak tresnak izan baditu pentsio txikienak osatzeko Gizarte Segurantzaren transferentzia osoa gauzatu bitartean, baina borondatea behar da tresna horiek baliatzeko, “eta EH Bilduk badu”. Zentzu horretan, “euskal herritarrei bizitza duinak bermatzea ekarriko duten tresna burujabe guztiak aldarrikatzen ditu EH Bilduk gure herriarentzat, eta dagokiguna eskatzen jarraitu behar dugu, besteak beste, Gizarte Segurantzaren kudeaketa zuzenaren transferentzia osoa. Atsedenik gabe eskatuko duen gobernu bat behar du herri honek, baina hori lortu bitartean, euskal pentsiodunen benetako arazoei irtenbidea bilatzeko borondatea izango duen gobernua ere behar dugu”.

Iriarte: “Urkulluk zintzoa izan behar du eta jendeari esan behar dio guraizea noraino sartuko duen”

EAJk irabaziz gero, murrizketak seguruak direla ohartarazi du Iriartek, eta alternatiba egon badagoela azpimarratu du, zerga erreforma baten bidez krisiaren faktura langileriak berriz ordaindu behar izan ez dezan.

| 2020-06-29 19:20:00

Maddalen Iriartek segurutzat jo du gaur Irunen EAJk murrizketak egingo dituela uztailaren 12an irabaziz gero, eta zintzotasuna eskatu dio horregatik Urkulluri. “Jendeari lehenbailehen esan behar dio murrizketak noiz egingo dituen eta guraizea noraino sartuko duen; herritarrok jarraibideak irakurri nahi ditugu hautsitako jostailu bat erosi aurretik”.

Araba, Bizkai eta Gipuzkoako herritarrei “murrizketak saihestezinak direla eta alternatibarik ez dagoela sinestarazi nahi dieten arren”, Iriartek esan du alternatiba egon badagoela. “Langileen ahaleginari esker oparoaldian milioiak irabazten aritu diren horiei laguntzea eskatzen diegu orain, eta hori erreforma fiskal baten bidez baino ez da posible, gehien dutenek gehiago ordain dezaten. Ezin dugu onartu langileek berriro ordaintzea krisi honen faktura”.

EH Bilduren lehendakarigaiaren irudiko, “galdera ez da Urkulluk murrizketak egingo dituen ala ez, noiz eta non egingo dituen baizik”. Berez, murrizketak martxan daude jada, 2008ko krisialdian erabilitako errezeta bera errepikatuz, funtsezkoak diren zerbitzu publikoetan gainera. “Asko hitz egin dugu hezkuntza eta osasuneko profesionalekin, eta kezkatuta daude, badakitelako Urkulluk murrizketak egin nahi dituela. Dagoeneko egiten ari da. Atzo irakasle kopurua murriztu zuten eta gaur osasun arloko sindikatu guztiak kalera atera dira Urkulluri murrizketak bertan behera uzteko eskatzeko. Gure osasun-langileak akituta daude, lagun bat hil da eta 2.000 profesional baino gehiago kutsatuta daude. Ez du balio egun batean txalotzera irteteak eta hurrengo egunean bazterrean uzteak”.

Horren haritik, pandemian ezer ez ikastea egotzi dio Iriartek EAJko hautagaiari. “Esaten genuen pandemiatik hainbat ikasgai atera behar genituela. Horietako bat da zerbitzu publiko askoz indartsuagoak behar ditugula jendearen beharrei erantzuteko eta haiek babesteko, baina Urkulluk ez du ezer ikasi ez duelako ikasi nahi”. Bestelako lehendakari bat behar eta merezi du herri honek, “jendeari entzungo diona, jendea ulertuko duena eta akordioak lortzen jakingo duena”.

Otegi: Lau urte galduta ez abertzale, ez sozialista ez den gobernu batekin

EH Bilduko koordinatzaile nagusiak ere hartu du hitza Irunen salatzeko Araba, Bizkai eta Gipuzkoan lau urte alferrik galdu ditugula “ez abertzale, ez sozialista” ez den Urkulluren Gobernuaren eskutik. Arnaldo Otegiren ustez, amaitu berri den legealdiak erakutsi du, besteak beste, ez EAJ ez PSE ez direla gai herri honek aurrean dituen erronka handiei aurre egiteko. “Nork ekingo dio trantsizio ekologikoari? Erraustegiak eta AHT egiten ari diren horiek? Nork ekingo dio trantsizio digitalari? Euskaltel saldu zuten horiek? Nork ekingo dio zaintza eskubideak babesteari? Zaintza merkantilizatu dutenek? Nork bermatuko du Osakidetza edo hezkuntza indartsu bat? Murrizketak egin dituztenek eta berriz egitea planteatzen dutenek? Nork bermatuko du aberastasunaren birbanaketa? Zerga politika Iberdrolaren esku dutenek? Nork bermatuko du gure nortasuna eta erabakitzeko eskubidea? Horiei etengabean uko egiten diotenek?”.

Oskar Matute: “Bi bide baino ez, edo murrizketak edo langileen duintasuna”

Maddalen Iriartek bezala, Oskar Matute diputatuak ere azaldu du “bidegurutze historiko honetan bi bide baino ez daudela, edo murrizketen bidea edo langileen duintasunaren bidea”, eta ahotsa altxatzera dei egin die herritarrei, orain hala egin ezean, “krisia berriro ordainaraziko digutelako”. Adierazi duenez, “horregatik eskatzen dugu erreforma fiskal bat aberastasunaren gaineko zerga batekin eta aberastasun handientzako Covid tasa batekin; horregatik eskatzen dugu bankuek itzul ditzatela erreskatearen 60.000 milioiak; horregatik eskatzen dugu PPren lan erreforma bertan behera uztea, eta horregatik esaten diogu Urkulluri zementuaren politikan osasun eta hezkuntzaren baliabideak xahutzeari uzteko, lehentasuna, beti, jendea delako”.

Prekarietatea amaitzea, gazte eta emakumeei begira bereziki, lehentasuntzat izango duen gobernu bat osatzeko konpromisoa hartu du Iriartek

Maddalen Iriarteren ustez, uztailaren 12an hautatu behar da: edo EAJren eredua, prekarietatera kondenatzen gaituena, edo EH Bildurena, segurtasuna ematen duena. 33.000 lanpostu sortu, 1.200 euroko gutxieneko soldata ezarri eta alokairu publikoko 11.000 etxebizitza eskaintzeko plana azaldu du.

| 2020-06-29 19:13:00

“Merezi dugun herria eraikiko duen eta, gazteei eta emakumeei arreta berezia eskainiz, prekarietateari amaiera emango dion gobernua osatzeko konpromisoa” hartu du Maddalen Iriartek gaur goizean Donostian. “Gurea bezalako herri aurreratu batek ezin du onartu Europako lan-prekarietate tasarik altuenetako bat izatea”, erantsi du, “jendearen oinarrizko eskubide guztiak babesteko konpromisoa ere” hartu aitzin.

EH Bilduren lehendakarigaiak berretsi du uztailaren 12an bi aukera egongo direla mahai gainean: prekarietatera kondenatzen gaituen EAJren eredua eta herritar gehienei segurtasuna eta ziurtasunak ematen dizkien EH Bildurena. Horri jarraituz, koalizioak prekarietatea desagerrarazteko eta herritarren eskubideak bermatzeko plan bat eta borondate politiko osoa duela adierazi du, bai eta neurriak zehaztu ere: 33.000 lanpostu berri sortu eta arriskuan dauden 100.000 lanpostuei eustea, 1.200 euroko gutxieneko soldata, lan erreforma ez aplikatzea, 35 orduko lan astea enplegua banatzeko eta, etxebizitza eskubidea bermatzeko, alokairu publikoko 11.000 etxebizitza herritarren eskura jarri eta alokairuaren prezioa mugatzea”.

Iriartek konpromiso horiek guztiak zehaztu ditu bere auzoan, Antiguan, gazte ugarirekin egindako ekitaldi batean. Izan ere, toki horretan “oso ondo irudikatzen da batzuek haientzat prestatu duten etorkizun iluna, segurtasunik eta eskubiderik gabea, prekarietatean oinarritutakoa”. Salatu duenez, Donostiako auzo horretan “familia askok, 500 baino gehiagok, beren etxebizitzak gal ditzakete putre-funts batek espekulatzeko erosi dituelako, eta familia horiek bota nahi ditu negozioa egiteko”, baina instituzioek ez dute operazioa galarazi. “Hau da merezi dugun herria? Erakundeetatik ezin dugu ezer egin hori saihesteko?”.

Horren aurrean, EH Bilduren lehendakarigaiak azpimarratu du “erakunde publikoen lehenengo eta funtsezko eginkizuna jendea babestea izan behar dela, gure jendeak etorkizun duina ziurtatuta izateko politikak indarrean jartzea”. Ziurtatu duenez, “egin daiteke, borondate politiko kontua da, Urkulluren Gobernuak urrunetik ere izan ez duen borondate politikoa, alegia, bere lehentasunak beste batzuk direlako”.

Epaia irmoa izan bitartean AT bidesarietan kobratzeari utzi eta orain arte bildutakoarekin funts bat sortzeko eskatuko dio EH Bilduk Aldundiari

Horrela ez egitea arduragabekeria izugarria da; kontrako epaia berresten bada, orain arte bildutako diru guztia bueltatu beharko du Aldundiak eta bitartean zuloa handitzen ari da.

| 2020-06-16 16:36:00

Bihar, asteazkena, Aintzane Oiarbide diputatuak agerraldia deitu du Bide-Azpiegitura batzordean, bidesarien 6/2018 Foru Arauaren aurkako epaiaren inguruan argibideak emateko. Dagoeneko, kontrako epaia jaso duen bigarren Foru Araua da honakoa. Egoeraren aurrean, EH Bilduk hiru eskaera egingo dizkio Oiarbideri:

- Auzitegi Gorenaren balizko aurkako epaiari aurre egiteko, AT sistemaren bitartez orain arte jaso den dirua funts-hornidura ekonomikoa martxan jartzeko erabil dezala Aldundiak.

- Era berean, Gorenaren epai irmoa iritsi bitartean, kobrantza geldiarazteko, balizko kontrako epai baten aurrean, orain arte kobratutako zenbatekoak itzuli behar izango balira, zulo ekonomikoa handitzen baino ez delako ari Aldundia.

- Alternatibak aztertu eta landu ditzala, behin betiko ixteko Gipuzkoako gaitasun handiko errepideen finantzazioaren afera.

ALBISTEAK

Iriarte: “Urkulluk Ibarretxe Plana alfonbra azpian ezkutatu du, erabakitzeko eskubidearen etsaiek belarriekin txalo egiten duten bitartean”

2020-06-30 13:32:00

Erabakitzeko eskubidea gauzatzeko oztopo izatea eta hitza ez betetzea egotzi dio Iriartek EAJko hautagaiari, eta burujabetzaren aldeko botoa eskatu du. “Norbaitek uste al du Urkullu eta Mendiaren gobernu batek gure etorkizuna erabakitzeko eskubidea defendatuko duela?”.

Nerea Kortajarena: “EH Bilduk 1.080 euroko gutxieneko pentsioak bermatzeko konpromisoa du”

2020-06-29 19:23:00

Gipuzkoako zerrendakideak euskal instituzioek eskura dituzten tresna guztiak erabiltzeko borondatea erakutsi du miseriazko pentsioak amaitzeko.

Iriarte: “Urkulluk zintzoa izan behar du eta jendeari esan behar dio guraizea noraino sartuko duen”

2020-06-29 19:20:00

EAJk irabaziz gero, murrizketak seguruak direla ohartarazi du Iriartek, eta alternatiba egon badagoela azpimarratu du, zerga erreforma baten bidez krisiaren faktura langileriak berriz ordaindu behar izan ez dezan.

Prekarietatea amaitzea, gazte eta emakumeei begira bereziki, lehentasuntzat izango duen gobernu bat osatzeko konpromisoa hartu du Iriartek

2020-06-29 19:13:00

Maddalen Iriarteren ustez, uztailaren 12an hautatu behar da: edo EAJren eredua, prekarietatera kondenatzen gaituena, edo EH Bildurena, segurtasuna ematen duena. 33.000 lanpostu sortu, 1.200 euroko gutxieneko soldata ezarri eta alokairu publikoko 11.000 etxebizitza eskaintzeko plana azaldu du.