Gipuzkoa

Herritarren bizitza hobetzeko EH Bilduren prestutasuna erakusten du Eibarko aurrekontu akordioak

Neurri sozialak indartzen dituen aurrekontu akordioa lortu du EH Bilduk PSErekin Eibarren. Akordioak, batetik, elkarrizketarako eta akordioetara iritsi ahal izateko EH Bilduk duen gaitasuna berresten du. Eta, bestetik, EH Bilduk akordio bat sinatzen duenean, herritarren bizi kalitatea hobetzen duela.

| 2021-01-07 16:48:00

EH Bilduk PSErekin lortutako aurrekontu akordioren ondorioz, herriko ostalaritzak, merkataritza txikiak eta pandemiak kaltetutako sektoreak babesteko Txoke Plana izango dute. Gainera, Andretxea berria behingoz gauzatuko da EH Bilduk bultzatuta.

EH Bildu datorren urtarrilaren 15eko udalbatzan abstenitu egingo da. Hauek dira aurrekontu akordioan EH Bilduk eta PSEk adostutako neurriak:

- 500.000 € adostu ditugu ostalaritzan, gertuko denda txikietan eta industrian enplegua mantentzeko dirulaguntzarako: krisi honen ondorioz okerren pasatzen ari diren sektoreei zuzeneko laguntzak ematearen aldekoak bagara ere, eta orain arte horrela bultzatu eta babestu ditugu, oraingoan laguntza horiek pertsonengan eragin zuzena izatea nahi genuen. Beraien lanpostuei eusteko laguntza izatea nahi genuen. Argi geneukan beste talka-plan bat baldin bazegoen, EH Bildu eta bere ikuspegi soziala hor egon behar zela.

- Gainera, bi alderdien artean adostuko dira talka-planari egin dizkiogun proposamenen oinarriak eta zehaztapenak. Hauek 1.400.000€ko balioa dute. Beraz, Talka Planean EH Bilduk izango duen eragina, 1.400.000€koa izango da.

- Andreetxeak leku ikusgarri eta zabala izango du, egiten duen lanak benetan merezi duen leku ikusgarria. Emakumearen mahaiaren eta mugimendu feministaren eskaria une oro izan dugu buruan. Hemendik gure zorionak, Andretxea berria laster errealitate bihurtuko delako. EH Bilduren marra gorrietako bat zen, Andretxea ahalik eta lasterren gauzatu behar zen. Eta azkenean, horrela izango da.

- Azkenik, eta ez horregatik garrantzi gutxiagokoa. Herriko basoak etengabe kudeatzeko plan bat egitea ere adostu dugu. Dagokion kronogramarekin. Gure mendien konfigurazioa aldatzen ari da, gure begien aurrean eta martxa azkarrean. Horregatik uste dugu kudeaketa-plan bat garrantzitsua dela, Udalak lur pribatuak erosteko edo lur horien jabeekin etorkizunean erabilera-hitzarmenak egiteko atarikoa izango den plan bat.

Juankar Izagirre: “Osasun eta zaintza sistema publiko sendoa da Aiton-Etxekoa bezalako gertaerak saihesteko bermea”

Oiartzungo Aiton-Etxe eguneko zentroko zuzendaritzak COVID19-aren aurkako txertoa ez jartzeko agertutako asmoaren aurrean, harridura azaldu du Juankar Izagirre EH Bilduren Gipuzkoako bozeramaileak. Eta EAJri eta PSEri eskatu die publifikazioaren aldeko urratsak egin ditzatela.

| 2021-01-02 16:24:00

Eguneko zentroetan COVID19-aren aurkako txertoa noiz eta nola jarriko den zehaztu gabe dagoenean, Oiartzungo Aiton-Etxe zentro pribatuko zuzendaritza bertako erabiltzaileei COVID-19aren aurkako txertoa jartzearen kontra agertu da. Juankar Izagirre EH Bilduren Gipuzkoako bozeramailearen hitzetan, jarrera hori arrazoitzeko emandako argudioak “zienzia eta medikuntza komunitateak emandakoen aurkakoak dira”.

Gipuzkoako Foru Aldundiak larunbat eguerdian jakinarazi du Aiton-Etxeko erabiltzaileek txertoa jasotzeko “beharrezko neurriak” hartuko dituela. Edonola ere, eta hori gutxieneko pausoa da, Izagirreren arabera: “Herritar guztiek dute txertatzeko eskubidea, eta eguneko zentroetako azken arduradunari dagokio hori bermatzea, kasu honetan, aldundiari”. Ondorioz, eskubide hori inork zalantzan jarriz gero, aldundiari esku hartu eta neurriak hartzea dagokio.

Edonola ere, harago jotzea beharrezkoa dela adierazi du Izagirrek: “Gipuzkoarako eta Euskal Herrirako nahi dugun osasun eta zaintza sistema publikoan ezin dira onartu horrelako jarrerak; eta garbi dago sistema publiko sendoa dela halakoak saihesteko bermerik egokiena”. Aldundiko arduradunek ezin dute beste aldera begiratu, ezta horrelako gertaerak errazten dituzten politika pribatizatzaileak bultzatu ere.

Izan ere, EAJ eta PSEk gobernatutako aldundiak zaintza arloan bultzatu duen pribatizazioak zerikusi zuzena dauka Aiton-Etxen gertatu denarekin. “Horregatik eskatzen diegu bi alderdi politiko horiei pribatizazio bideari uko egin diezaiotela, eta zaintzarako sistema publiko baten alde lanean has daitezela. Bidea elkarrekin egiteko prest gaude”.

Azkenik, “arduragabekerien aurrean”, Gipuzkoako EH Bilduren konpromisoa berretsi du Izagirrek: “Herritar guztien eskubideen defentsan lanean jarraituko dugu”.

Gertuko liburu dendak, gertuko kultura

Gertuko liburu denden alde egitea ez da soilik gertuko merkataritza babestea; horrez gain, bada kultur ekosistemaren gertuko eredua aldarrikatzea ere. - JOXE MARI CARRERE -

| 2020-12-28 11:00:00

Gipuzkoako Batzar Nagusietan, onartu berri da gertuko liburu denden aldeko ebazpena, EH Bilduren iniziatibaz eta talde guztien onarpenarekin. Gutxieneko akordio bat lortuta, Gipuzkoako Foru Aldundiari zuzendutako lau eskaera onartu ziren:

  1. Kultur Bonoa mantentzea, gertuko merkataritzaren aldeko diskriminazio positiboa eginda bonoen banaketan.
  2. Gipuzkoako liburu denden mapa osatzea, herrietako kultur ekosisteman duten garrantzia aztertuta.
  3. Irakurketaren aldeko kanpaina egitea, bertan sortzen den literaturari eta egileei balioa emanez.
  4. Udalekin elkarlanean lurraldeko liburu dendak sustatzea, gertuko liburu dendek eskaintzen duten aurrez aurreko harremanari balioa emanez.

Jendartearen eremu sozial, humano eta ekonomiko guztiak erasotzen ari den pandemiak eskatzen du instituzio publikoen aldetik ezinbesteko neurriak hartzea egoerari aurre egiteko, eta horren ondorioak ahalik eta gehien arintzeko. Liburu denden egoerak bi eremutako zaurgarritasuna jartzen du agerian. Alde batetik, gertuko merkataritzaren egoera kezkagarria, zeina eremu handiko merkatalguneen eta Internet bidezko plataforma multinazionalen mehatxupean dagoen. Bestetik, liburu dendak kultur ekosistemaren parte diren neurrian, kulturgintzaren egoera kezkagarria ere jasaten dute, liburuaren arlokoa batez ere.

Izan ere, liburu dendak liburugintzaren balio-kateko katebegia dira: idazlearekin hasi, editorearekin jarraitu, banatzailearekin segitu, eta liburu dendak irakurlearen eskuetan jartzen du liburua, azkenik. Hori eskema tradizionala litzateke, gaur egun, aldaerak dituena, baina oinarrian bere horretan jarraitzen duena. Libururik ez legoke sortzaile batek hamaika ordu eta gehiago sortzen pasatuko ez balitu; edota liburu hori editatu, banatu eta salgai jarriko ez balitz. Kate hori ez da aldatu, kontua da noren esku gelditzen den prozesu hori, eta nolako eragina duen modu batean edo bestean antolatzeak.

Balio-kate horretan, liburu denden garrantzia ez dago liburuen salmentan soilik, herri baten kultur ekosistemaren parte izateak euren garrantzia nabarmentzen du. Aurrez aurreko harremana eskaintzeaz gain, horrek dakarren humanizazioarekin, liburu denda batean idazle bat ezagutzeko aukera dago bere liburua aurkezten duenean; literaturarekin zerikusia duten ekintzak antola daitezke; liburuak ukitu, ikusi, sentitu daitezke; eta, askotan, baita oihartzun txikiko idazlanak deskubritu ere.

Liburu dendak, irakurtzeak bezala, denbora eskatzen du. Presaren kontrako espazioa da. Remedios Zafra idazlearen hitzetan, “presa kapitalismoaren asmakizuna da”, eta ez zaio arrazoirik falta. Merkatu kapitalistak ezin du denbora galdu: “Denborak urrea balio du”. Gertuko merkataritzako liburu denden ereduak bizimodu sozialago eta humano bati lotua izan behar du. Eta eredu hori arriskuan jartzen duten merkatu ere kapitalista hutseko plataformek presa dute: presa saltzeko, presa erosleak lortzeko, presa etekinak handitzeko, presa lehenengoak izateko. Merkatuak agintzen du txikiak ez duela lekurik, eta zazpi lekutako botak behar ditu urrats handiagoak egin ditzan, axola gabe nor harrapatzen duen azpian.

Gipuzkoan zenbat liburu denda ditugu? Gipuzkoarrok ze aukera dugu gertuko liburu denda batean liburuak eskuratzeko? Kulturaren ekosisteman kontuan hartzeko gaia da. Eta instituzio publikoek eragileekin batera heldu behar diote horri. Gertuko liburu denden alde egitea ez da soilik gertuko merkataritza babestea; horrez gain, bada kultur ekosistemaren gertuko eredua aldarrikatzea ere. Balio merkantilistetan oinarritu ordez, balio humano zein sozialetan oinarritzen den kulturgintza eredua bultzatzeak bestelako jendarte bat irudikatzea eskatzen du, pertsonak erdigunean jarriko dituena. Liburuak auzoko liburu dendan eskuratzea urrats bat da bide horretan.

EH Bilduk 100 milioi proposatu ditu zaintza eta babes sozialerako eta 50 milioi gehien kaltetutako sektoreen berreskurapenerako

Aurrekontuek pandemiak eragindako ezberdintasunei aurre egin behar diela nabarmendu du EH Bilduk. Aberastasuna modu egokiagoan banatzeko, krisi garaian gerakina erabiltzea eta zorpetzea ezinbestekotzat jotzeaz gain, Covid tasa bat proposatu du.

| 2020-12-16 11:48:00

Gipuzkoako EH Bilduk 2021erako aurrekontuen proposamena egin du gaur Batzar Nagusietan. Estitxu Elduaienek eta Juan Karlos Izagirrek nabarmendu dute norabide aldaketa bat behar-beharrezkoa dela krisi garai honi aurre egiteko. Horregatik, zaintza eta babes soziala indartzeko inbertsioa eta baliabideak nabarmen igotzea proposatu dute, 100 milioi gehiagotan, hain zuzen. “Izurrite hau erakusten ari da egun Gipuzkoan dugun adinekoen eta mendeko pertsonen zaintza ereduak ez duela bermatzen pertsona horiek behar bezala zainduta egotea”, adierazi du Elduaienek.

 

Horregatik, 100 milioiko proposamena egin du EH Bilduk zaintza eta babes sozialerako: egoitzetako egungo eredua eraldatzeko, 32 milioi; egoitzetako langileen lan baldintzak hobetzeko, 7 milioi; egungo eraikinak birmoldatzeko, 37 milioi; adineko eta menpekoak etxean zaintzeko ematen diren diru-laguntzak 10 milioi igotzea; etxez etxeko laguntza hobetzeko, 4 milioi gehiago; eta bukatzeko, babes sozialerako, egungo diru-laguntza sistematik kanpo gelditzen diren pertsonentzako gutxieneko sarrera bat bermatzeko laguntza berezi bat sortzea, 10 milioiko partidarekin.

 

Horrez gain, Aldundiaren eskumenekoak diren arloetan eta eskumen horietatik kanpo egon daitezkeenetan ere, pandemiak gehien kaltetu dituen sektoreei laguntza ekonomikoa bideratzea beharrezkoa ikusten du EH Bilduk eta horretarako 50 milioiko errekuperazio funts berri bat proposatu du.

 

Izagirrek nabarmendu du krisiari aurre egiteko Aldundiak zorpetu eta daukan gerakina erabili behar duela, “benetako premia duten sektoretarako”. Pandemiak eta bere ondorioek irauten duten bitarterako Covid tasa berezi bat ezartzea ere proposatu du. Horrez gain, egoerari aurre egiteko diru bilketan aldaketak egin behar direla berretsi du eta fiskalitate progresibo eta justuago baterako aldaketak proposatu ditu. Besteak beste, sozietateen gaineko zergan, ondarearen gaineko zergan eta iruzur fiskalari aurre egiteko neurri zehatzetan.

 

Amaitzeko, trantsizio ekologikorako proposamenetan, mugikortasunean eta lehen sektorean egin beharreko inbertsioak azpiegitura handien moratoriatik aurreztutako baliabideen bitartez egin behar direla esan du eta Europako funtsak irizpide ekologiko eta partehartzaileen arabera, udalen parte hartzearekin eta talde guztiek batera adostuta izatearen garrantzia nabarmendu du.

Argibideak eta gardentasuna eskatu ditu EH Bilduk GHKren ezohiko batzarrean

GHKren ezohiko batzarrean gardentasun falta salatu dute EH Bilduko ordezkariek, hartutako hainbat erabakiren zergatia ulergaitza delako eman diren datu gutxiak kontutan izanda.

| 2020-12-15 18:11:00

GHKk Bizkaiako Aldundiarekin duen hondakinak bidaltzen jarraitzeko hitzarmena luzatzea erabaki du gaur egindako ezohiko batzarrean. EH Bildurentzat ulergaitza da erabaki hori eta berriro ere gardentasun falta salatu du. Izan ere, pasa den astean erraustegia inauguratu zenetik, teorian behintzat, Gipuzkoak ez bailuke beste herrialdeetara hondakinik bideratu behar. “Zergatik berritu da 2019ko abenduaren 31n iraungi behar zen hitzarmen hori beste urtebetez? Ez al ginen autonomoak? Gipuzkoako erraustegiak ez al du gaitasunik Gipuzkoako hondakinak erretzeko?”. Argibide gehiago behar-beharrezkoak direla nabarmendu dute EH Bilduko ordezkariek.

 

Bestalde, erraustegiak urte honetan egingo duen 20 eguneko jardunagatik (abenduaren 11an jarri zen martxan), enpresa pribatuari 23 milioitik gora ordaintzea onartu dute EAJ-PSEk. “Ezin da onartu 20 eguneko jardunagatik urte osoa ordaintzea. Eta hemen ere gardentasun falta salatu behar dugu, ez baitakigu zer sinatu den enpresarekin, tamaina horretako ordainketa egin behar izateko”.

ALBISTEAK

Herritarren bizitza hobetzeko EH Bilduren prestutasuna erakusten du Eibarko aurrekontu akordioak

2021-01-07 16:48:00

Neurri sozialak indartzen dituen aurrekontu akordioa lortu du EH Bilduk PSErekin Eibarren. Akordioak, batetik, elkarrizketarako eta akordioetara iritsi ahal izateko EH Bilduk duen gaitasuna berresten du. Eta, bestetik, EH Bilduk akordio bat sinatzen duenean, herritarren bizi kalitatea hobetzen duela.

Juankar Izagirre: “Osasun eta zaintza sistema publiko sendoa da Aiton-Etxekoa bezalako gertaerak saihesteko bermea”

2021-01-02 16:24:00

Oiartzungo Aiton-Etxe eguneko zentroko zuzendaritzak COVID19-aren aurkako txertoa ez jartzeko agertutako asmoaren aurrean, harridura azaldu du Juankar Izagirre EH Bilduren Gipuzkoako bozeramaileak. Eta EAJri eta PSEri eskatu die publifikazioaren aldeko urratsak egin ditzatela.

Gertuko liburu dendak, gertuko kultura

2020-12-28 11:00:00

Gertuko liburu denden alde egitea ez da soilik gertuko merkataritza babestea; horrez gain, bada kultur ekosistemaren gertuko eredua aldarrikatzea ere. - JOXE MARI CARRERE -

EH Bilduk 100 milioi proposatu ditu zaintza eta babes sozialerako eta 50 milioi gehien kaltetutako sektoreen berreskurapenerako

2020-12-16 11:48:00

Aurrekontuek pandemiak eragindako ezberdintasunei aurre egin behar diela nabarmendu du EH Bilduk. Aberastasuna modu egokiagoan banatzeko, krisi garaian gerakina erabiltzea eta zorpetzea ezinbestekotzat jotzeaz gain, Covid tasa bat proposatu du.