Gasteiz

EH Bilduk bide orria aurkeztu du Gasteiz karbonoan neutroa izateko 2040. urtean eta 20.000 enplegu berde sortzeko

Lehen legealdiko helburua izango da Gasteizko udalaren argindar kontsumoaren %100 iturri erabat berriztagarrien bidez eskuratzea

| 2019-05-15 12:37:00

Gasteizko EH Bilduko alkategaiak, Miren Larrionek, Gasteiz Zero Carbon 2040 dokumentua aurkeztu du gaur. Agiriak jasotzen du koalizioak proposatu duen bide orria klima aldaketaren aurka borrokatzeko eta trantsizio ekologiko osoa egiteko, karbono isurketetan neutroa den hiri bat lortu arte. Larrionekin batera, aurkezpenean parte-hartu du Ulrik S. Kohl-ek, urbanista berde eta Kopenhageko Udaleko zinegotzi ohiak. Kopenhage Karbonoan Neutroa 2025 planaren eta trantsizio berdearen proiektuaren arduradunetako bat izan da Kohl.

Mundu guztiak klima aldaketari buruz hitz egiten duenean, pausu irmoak ematea ezinbestekoa da. Hamarkada honetan ez badugu energia politikan aldaketa erradikal bat egiten, planeta osoa eta geure hiria biziezinak bihurtuko dira. «Zientzialariek ohartarazi digute, eta Europa osoko gazteei entzun diegu kaleetan: aldatzeko unea da. Erronka globala da, baina tokian tokikoa ere bai. Geurea epe ertain-luzerako proiektua da, eronkari heltzeko handinahitsua, ezin dugulako denbora gehiago itxaron», zehaztu du Larrionek.

Gasteizek baditu baldintzak trantsizio energetikoari aurre egiteko, eta lortzeko hiriaren energia hornidura %100 berriztagarri nahiz karbono isurketa kutsagarrietan neutroa izatea. «Trantsizioaren oinarriak dira autokontsumoa, energiaren kudeaketa publikoa, eta hiritarren parte-hartzea. Berriztagarrien gordailu bat dugu aurrez aurre», alkategaiaren hitzetan. Energia berriztagarria lortzeko tresna nagusia teilatuetan kokatutako panel fotovoltaikoak izango dira.

Bide orriak hainbat mugarri ezarri ditu. Lehenbiziko legealdian, hain zuzen ere, Energia Berriztagarrien Udal Agentzia sortuko da, eta 2023. urterako lortu nahi da udalaren argindar kontsumoaren %100 autokontsumo berriztagarriaren bidez eskuratzea. Tokiko biomasaren bidez beroa banatzen duten lehen sistemak (District Heating) zabalduko dira, Koroatze eta Ariznabarra auzoetan.

2030. urterako xedea da Gasteizko argindar kontsumoaren %100 beriztagarria izatea, eta auzoen erdiek izatea District Heating sistemak martxan. Gainera, 20.000 etxebizitzetan zaharberritze energetikoak egitea aurreikusita dago. Azkenik, 2040. urtean lortuko litzateke hiriaren energia kontsumo guztia iturri berriztagarrien bidez betetzea, eta karbonoan neutroa den hiria, District Heating sistemak auzo guztietan barreiatuta, eta 30.000 etxebizitza zaharberrituta.

«Proiektua aukera sozioekonomiko argia da. Inbertsioak erabat errentagarriak dira, eta amortizazio garbiak dituzte laburrera begira eta epe ertainera», azaldu du Larrionek. Lehenbiziko legealdian asmoa da 125 milioi euroko inbertsioak mugiaraztea, eta 3.000 milioi eurotik gora 20 urtetan. EH Bilduk kalkulatu du posible dela 20.000 enplegu berde sortzea datozen bi hamarkadetan: «Orain da unea. Bada garaia Gasteizek berriro ere begira dezan Europako ingurumen abangoardian dauden hirien ispiluan. Hiriaren Green espiritua biziberritzeko unea da».

Kopenhageko adibidea

Koalizioak trantsizio energetikoari ekin dioten herrialde aurreratuetako hainbat eredu aztertu ditu. Bereziki, Kopenhagen garatu dutena. Aliantza Gorriko zinegotzi ohi Ulrik Kohl-ek bere esperientzia azaldu du Gasteizen. «Kopenhageko adibideak agerian uzten du eredu energetikoan aldaketa erradikal bat egitea errealista eta beharrezkoa dela. Trantsizio berdeak ahalegin handiak eskatzen ditu, baina itzelak dira osasunean eta ingurumenean lortzen diren etekinak, eta milaka milioi euro aurreztea ahalbidetzen dute».

Kohlen aburuz, Gasteiz Zero Carbon 2040 planak «bisio egokia du eta handinahitsua da, eta Gasteizek enplegu berdeak sortzeko eta energia berriztagarrietan buruaskia izateko daukan potentzial erraldoia islatzen du».

Estrategia agroalimentarioa

Bestalde, EH Bilduren ordezkariak Arespaldizako San Isidroko azokan egon dira gaur. Bertan, Arabako Ahaldun Nagusia izateko EH Bilduren hautagaiak estrategia agroalimentarioa defendatu. «Gaur bezalako egun batean, EH Bilduren bertan ekoiztu eta transformatutako elikagaiak defendatu nahi ditugu osasuntsuak izatez gain, lehen sektoreko etorkizuna hortik etorriko delako», azpimarratu du Kike Fdez. De Pinedok.

Berarekin batera, Aiarako eta Lur Jareetako Zerrendaburuak egon dira, Ainhize Solaun eta Eva Lopz de Arroyabe egon dira. «Natura zainduz, kalitatezko elikagaiak eskuratzeko eskubidea eta baserritarren bizi- zein lan-baldintza duinak bermatzeko xedea duten politikak. Instituzioetatik nekazaritza sektorea bera indartzea eta eraldaketarako aukerak eskaintzea sekula baino garrantzitsuagoa dela uste dugu», gaineratu dute.

Hamarkada luzeotan lurrak suntsitu dituztela gogoratu dute. Zentzu horretan, nekazaritza eta kalitatezko elikagaien sorreraren defentsan apustu garbia egin dute. «Bertako beharrak asetzeko, herriz herri eta eskualdez eskualde nekazaritza iraunkorra eta elikadura burujabetza sustatzea da gure helburua», esan du Kike Fdez. De Pinedok.

 

 

Larrionek bere apustua berretsi du Gasteizen lehen galdeketa hiritarra egiteko, mugikortasun jasangarriaren inguruan

Kike Fernandez de Pinedo: herrialdean mugikortasun jasangarria garraio publikoaren bidez helduko da, tren sozialaren eskutik

| 2019-05-13 13:09:00

Miren Larrion Gasteizko EH Bilduko alkategaiak berretsi du bere konpromisoa udalerrian lehenbiziko galdeketa hiritarra egiteko, gobernatzeko aukeratzen badute. Hain zuzen ere, Larrionek herritarren esku utzi nahi du hiriko ekialdea eta mendebaldea, Salburua etaZabalgana, lotu beharko dituen edukiera handiko garraio publiko sistemari buruzko erabakia. Mugikortasun jasangarria bezalako gai estrategiko batean ahotsa eman nahi zaie hiriko auzotarrei.


Hirian inoiz egin den lehen galdeketa hiritarra litzateke, eta izaera positiboa izango luke beti. Gasteiztarrek bi garraiobideren artean aukeratu beharko dute: Azkarbus autobus elektriko adimenduna edo tranbia. «Oraingo honetan, ez da Bai edo Ez esateko galdeketa izango, ez dago blokeo aukerarik, aurrera egiteko borondatea baizik. Bai edo Bai esateko galdeketa bat da», azaldu du alkategaiak.


Asmoa da galdeketari legezko berme guztiak ematea, «bi aukerek alde eta kontrako argudioak azal ditzaten, eztabaida sakon eta informatua egotea ahalbidetu, eta ezagutzarekin botoa eman dadin». EH Bilduk Azkarbus elektrikoaren aukera defendatuko du, baina bozketaren emaitzak bere egingo ditu, eta gasteiztarrek aukeratutako proiektuarekin aurrera egingo du.


Hiritarren parte-hartzearekin aurreko legealdian gertatu dena bereziki kezkagarria da. Udalak, EH Bilduren bultzadari esker, herritarren parte-hartzea sustatzeko araudi aurreratu bat onartu du. Hobetu daitekeena, baina aurreratua edonola ere. Hala ere, ez da galdeketa bat bera ere egin. «Urtaran eta bere gobernua pareta bat izan dira parte-hartzearen aurrean. Ez dute ulertzen parte-hartzea ez bada beraiei arrazoia emateko. Ez dute gustuko euren hiritarren iritzia, euren auzotarrena», nabarmendu du Larrionek.


EH Bilduren aburuz, beharrezkoa da erakundeen demokratizazioan sakontzea. Beldurra galdu behar zaio hiritarrei zuzenean eragiten dizkieten gaiei buruz galdetzeari. Bereziki, hiriaren etorkizuna baldintzatuko duten kontuak direnean. Araudiak berak jaso zuen, koalizioak eskatuta, gai estrategikoek eta 5 milioi eurotik gorako inbertsioa aurreikusita dutenek lehentasuna edukitzea galdeketa hiritarrak planteatzerako orduan. EH Bilduk Gasteiz gobernatzen badu, legezko eperik laburrenean, galdeketa hiritar hau deitu erta antolatuko du.

Tren sozialaren alde

Bestalde, Arabako Ahaldun Nagusia izateko hautagaia Kike Fdez de Pinedok azpimarratu du herrialdean mugikortasun jasangarria garraio publikoaren bidez helduko dela, Miranda eta Altsasu lotuko dituen tren soziala baten bidez. Horretarako, egungo trenbidearen modernizazioa planteatzen da –hirugarren hariajarriz-nazioarteko garraioa eta goi mailako prestaziotakoa ahalbideratzeko, hau da, tren azkarrak, garraioa eta tren soziala jasoko dituena.


"Ez dugu ezer asmatu, badugu mahai gainean azterketa bat eta horren arabera, plantatzen da hamar maiztasun gehiago ezartzea, eskaeraren araberako geltokiak egitea, bost geldiune berri sortzea, salneurria batzea eta txartel bakar bat egitea. Proiektu honen ezarpenak 25 milioiko aurrekontua dulehen faseaneta, ondorioz, bideragarria da ikuspuntu ekonomikotik eta sozialetik ere bai", azaldu du Fdez de Pinedok.
Tren honek 130.000 lagunei eskainiko die zerbitzua eta agerian uzten du AHTren aurrean askoz bideragarriagoa dela. Abiadura Handiko plataforma beri horiek Madrilek inposatzen ditu baina EAJren Foru Gobernuak begi onez ikusten ditu.

Larrionek laguntza programa proposatu du kultur jarduerak programatzen dituzten aforo txikiko aretoentzako

Kike Fernandez de Pinedok pentsiodunen borroka txalotu du, eta gogoratu du EH Bilduren apustu irmoa 1.080 euroko gutxieneko pentsio baten alde

| 2019-05-11 14:24:00

EH Bilduko alkategaiak, Miren Larrionek, defendatu du beharrezkoa dela Gasteizen araudi bat prestatzea aforo txikia duten aretoetan kultur jarduerak programatzea errazteko eta sustatzeko, tokiko kultur sorkuntzari bultzada emateko helburuarekin. «Kultura hiri aurreratuen seinale bat da. Kultura sustatzen duten hiriek jendarte askeak eta pentsamendu kritikoa dute», azaldu du.

Sorkuntza da kultur eremu osasuntsu bat izateko lehen oinarria, garratzitsuena, baina aurrera egiteko behar du non antzeztu, abestu, dantzatu edo artelanak erakutsi. EH Bildutik kezka handiz jarraitu dira tabernetan eta aforo txikiko aretoetan musika emanaldiak mugatzeko orain dela gutxi egon diren saiakerak. «Geure apustua kontrakoa da. Kultura bizirik mantentzen dituzten espazio horiek sustatu eta lagundu behar ditugu. Oso pozik gaude musikariek egin duten erreakzioarekin. Ez dira konformatu muga horrekin eta gelditzeko borrokatu dira», alkategaiaren hitzetan.

Pontevedrako Cabos Soltos edo Bartzelonako Espais de Cultura Viva bezalako programetan inspiratuta, EH Bilduk araudi bat adostu nahi du sektore kultural eta artistikoarekin areto txiki hauetan, batzuk hogei urtez halako jarduerak bultzatzen aritu direnak, ikuskizunak programatzen jarraitzea posible egiteko, berme guztiekin. «Udalaren ardura da kultura babestea eta butzatzea. Sortzailerik gabeko hiri bat ez da sekula hiri bizi bat izango».

Larrionek espero du araudiaren bidez udalerriko kultur espazio bizien sarea indartuko dela, eta ateak irekiko zaizkiola aretoen eta udalaren arteko lankidetza estuago bati. Halako jarduerak programatzea errazte aldera, laguntza programa bat sortuko da, bereziki tokiko sortzaile eta artistei espazioa eta aukerak bermatzeko balioko duena. Programaren baldintzak eta oinarriak onartuko lirateke sektorearekin eztabaida prozesu bati ekin ondoren, baina emakumeen sorkuntzaren ikusgarritasuna handitzea eta auzoetara hedatzea dira helburuetako batzuk.

Pentsiodunen borroka

Lehenago, EH Bilduk pentsiodunek antolatutako manifestazioan parte hartu du, Gasteizen. Arabako Ahaldun Nagusia izateko hautagaiak, Kike Fernandez de Pinedok, pentsiodunek bizitza duin baten defentsan egindako lana eta borroka txalotu ditu. Ildo horretan, gogoratu du EH Bilduk, pentsiodunek aldarrikatzen duten bezala, 1.080 euroko gutxieneko pentsioa defendatzen duela, baita ere sistema hori publikoa izatea, finantaketa nahikoarekin.

Bestalde, EH Bilduk Azazetan aurkeztu du datorren maiatzaren 26ko udal hauteskundeetarako Arraia-Maeztuko hautagaitza. Ruth Ibisate alkategaiak azpimarratu du «talde prestatua dela, gogotsu eta ilusioz beterikoa eta adin zein herri ezberdinetako gizon eta emakumeek osatuta».

«Arraia-Maeztu aldatzen ari da eta gure helburua da aldaketa hori eremu instituzionalera eramatea. Beste modu batean kudeatu daiteke, erakundeak zabalduz eta parte-hartzea sustatuz, hau da, Arraia-Maeztuko pertsona guztientzako gobernatzea», nabarmendu du. Arraia-Maezturako EH Bilduk dituen proiektuen artean aipatu ditu etxebizitza plan integrala, TeleKlubeko etorkizuna definitzeko prozesu partehartzailea, lehen sektorerako plan estrategikoa, udaletxe zaharraren erreforma Gazte Kluba hartzeko eta emakumeen etxea.

Garbiketari eta zaborraren bilketari dagozkion erabaki guztiak hurrengo legealdian hartzeko mozioa

| 2019-04-08 10:24:00

Miren Larrion: «Udalaren kontratu garrantzitsuena da garbiketari eta zaborren bilketari dagokiona. Hurrengo udal gobernua zeharo baldintzatuko duen erabaki bat da. Arduragabekeria litzateke orain baldintza-orria argitaratzea eta konkurtsoa martxan jartzea, hauteskundeak egiteko hilabete eta erdi baino falta ez denean»

Hondakin taldearen azken bileran, udal gobernuak talde politikoei azaldu zien bere asmoa dela garbiketa eta hondakin bilketa egiteko kontratu berriaren baldintzak argitaratzea hauteskundeak egin baino lehen, heldu den maiatzaren 26an. EH Bilduk uste du erabaki horrek ondorio erraldoiak dituela, eta ezin dela inolaz ere korrika eta presaka hartu. Hori dela eta, koalizioak mozio bat aurkeztu du. Testu horretan udalbatzari eskatzen zaio garbiketari eta zaborrei dagozkien erabaki esanguratsu guztiak hurrengo legealdian hartzea, udal gobernu berri bat agintean dagoela.

Zabor bilketarena da Gasteizko Udalak duen kontratu garestiena. Urtero ia 23 milioi euro gastatzen ditu horretan. Azken kontratua aurreko alkate Javier Marotoren agintaldiaren amaieran adjudikatu zen, eta gogotik ordaindu dugu erabaki hura legealdi osoaren joanean. «Arazoak, arau-hausteak, lan gatazkak… erabaki hura sekulako akatsa izan zen, eta argi geratu da FCCk egin duen lan negargarriarekin», azpimarratu du EH Bilduko udal bozeramaile eta alkategai Miren Larrionek.

Larrionen aburuz, zalantza ugari daude udalak hurrengo urratsak zehazteko martxan jarri duen bide-orriari buruz. Lehenik eta behin, ez dago inolaz ere bermatuta azken lau urteetako lardaskeria ez dela errepikatuko. «Asko kezkatzen gaitu ez dugula inolako ondoriorik aterako gertatutakoaren inguruan. Ezin da ulertu egin dugun bide guzti honen ondoren aukera egotea FCCk berriro ere kontratua lortzeko, eta trukean diru gehiago irabazita, gainera», ohartarazi du Larrionek.

Erabakia atzeratzeko beste arrazoi bat da gaur-gaurkoz ez daudela eguneratuta hondakin kudeaketan udalerriak dituen helburuak eta planifikazioa. Uneotan, Hondakinak Kudeatzeko Udal Plan Zuzentzailea ez dago onartuta. Dokumentu hori ezinbestekoa da erabakitzeko nora doan Gasteiz hondakinen kudeaketan, eta ez du logikarik baldintza zehatz batzuk ezartzea zabor bilketaren kontraturako, deus jakin gabe epe ertainean lortu nahi diren emaitzei eta helburuei buruz.

Azkenik, FCCrekin harremanak moztea beharrezkoa bazen ere, zalantzak daude udal gobernuak multinazionalarekin zeukan egungo garbiketa kontratua bertan behera uzteko erabili duen prozeduraren inguruan.

Guzti horri gehitu behar zaio ez dela egin benetako eztabaida bat udalerriak garbiketari aurre egiteko dituen aukera ezberdinen inguruan. «Arazoak baino ez dizkigu ekarri zaborraren multinazionalekin azpikontratatzen duen ereduak. Berriro ere akats berdina egin baino lehen, gogoeta egin behar dugu eta alternatiba ezberdinak aztertu. EH Bilduren ustez, aukerarik onena da zaborra biltzeko eta garbitzeko zerbitzua berriro ere udalaren eskuetan geratzea, bermunizipalizazioa alegia, eta merezi du aukera hori sakonean aztertzea», amaitu du Larrionek.

ALBISTEAK

Txosten juridiko batek zalantzan jartzen du Urtaranen kudeaketa Lurralde Sailean interes-gatazkengatik

2021-07-27 11:10:00

Udalbatzako Idazkari Nagusiaren txostenaren arabera, zudendaria abstenitu ez ezik, ezin duelako gauzatu “garrantzi gutxieneko jarduera esanguratsurik” interes-gatazka dagoen prozedura horietan.

EH Bilduk hospizio zaharreko eraikinaren «berehalako» lagapena eskatu dio Urtaranen gobernuari, Alde Zaharreko Osasun Zentro berria har dezan

2021-07-15 09:38:00

Iratxe Lopez de Aberasturi: «Gasteizko udalbatzak hospizio zaharraren eraikina Eusko Jaurlaritzari lagatzea onartu zuen ahobatez, bertan Osasun Etxea ireki zedin. Baina bi urte geroago, Udalak ez du eraikin horren lagapena egin».

EH Bilduk udal langileei telelana egiteko aukera zabaltzeko «anbizio handiko araudia» eskatu du

2021-07-13 10:21:00

Alberto Porras: «Helburua da lan-sistema publiko aurreratuagoa izatea, lan presentzialean soilik oinarritzen ez dena, malgutasuna ekarriko duena eta lanaldia zerbitzuaren eta langileen beharretara egokitzeko aukera emango duena»

Felix Gonzalez: «Lanean jarraituko dugu gehiengoaren baloreek, esaterako, parekidetasunak, feminismoak, ekologismoak eta justizia sozialak, isla izan dezaten etorkizuneko Gasteizean»

2021-07-13 10:19:00

Hamar kide baino gehiago eta Endika Saez de Adana Gasteizko arduradun politiko berri gisa izango dituen udalerriko Mahai Politiko berria berretsi du Gasteizko asanbladak.