AKTUALITATEA

| 2026-06-24 10:04:00

Gasteizko Udalak laguntza lerro berri bat onartuko du euskararen sustapenean lan egiten duten erakundeen modernizazioa eta garapena bultzatzeko. Deialdia Euskararen Udal Zerbitzuaren bidez finantzatuko da, eta ekonomikoki lagunduko ditu egoitza Arabako hiriburuan duten erakundeek bultzatutako eraldaketa digitalerako, antolaketa indartzeko eta komunikazio-berrikuntzarako proiektuak. Halaber, egoitza Gasteizen ez duten kolektiboek ere parte hartuko dute, baldin eta urte osoan zehar modu iraunkorrean eta jarraituan udalerrian lan egiten badute.

Bi urtez behingo izaera duen eta 250.000 euroko zuzkidura duen dirulaguntza lerro hori Udal Gobernuaren eta EH Bilduren arteko aurrekontu akordioaren parte da. Finantzaketa 125.000 euroko bi urtetan banatuko da, lehena oraingo ekitaldiko aurrekontuaren kargura eta bigarrena 2027koaren kargura, eta diruz lagundu daitekeen gehieneko zenbatekoa 20.000 eurokoa izango da proiektu bakoitzeko.

EH Bilduko zinegotzi Maider Uriartek adierazi duenez, “aurrekontu akordioaren barruan EH Bilduk bultzatutako ekimen honen bidez, Gasteiz, euskara sustatzea helburu duten entitateen eraldaketa digitala, antolakuntza indartzea eta komunikazio berrikuntzarako proiektuak bultzatzeko diru gehien bideratzen duen euskal udalerria bihurtu dugu. Euskararen kontrako oldarraldiaren aurrean, guk gure hizkuntza defendatzearen eta sustatzearen aldeko apustua egiten dugu, euskara zabaltzeaz arduratzen diren eragileen sarea indartzeko 250.000 euroko dirulaguntza lerroaren bidez. Gure herriaren eta gure hizkuntzaren defentsa ezinbestekoa da”.

Bestalde, María Nanclares Euskara zinegotziak azaldu duenez, “laguntza berri horien bidez, Udal Gobernuak euskara sustatzeko dugun konpromisoa berresten du, euskararen erabilera bultzatzeko egunero lan egiten duten kolektiboei eta erakundeei lagunduz. Beste urrats bat eman dugu, modernizatzen, digitalizatzen eta antolaketa hobetzen lagunduko duten baliabideak eta tresnak emanez, beren ekintzarako gaitasuna indartzeko eta gizartearen hainbat eremutan duten eragina handitzeko”.

Ekintza-lerroak

Deialdia euskara sustatzeko erakundeak modernizatzen eta indartzen lagunduko duten ekimenei laguntzera bideratuta dago. Horretarako, 5 jarduera-lerro nagusi ezarri dira:

• Eraldaketa digitala: barne prozesuen digitalizazioa, kudeaketa tresnak (CRM/ERP), zibersegurtasuna eta hodeiko lankidetza.
• Antolaketa indartzea: aholkularitza estrategikoa, errelebo planak, harrera protokoloak eta idazkaritza teknikoaren kanpo zerbitzuak.
• Komunikazioa eta ikusgarritasuna: auditoriak, sare sozialak berritzea, edukiak sortzea (podcastak, bideoak) eta hiriguneetan euskara sustatzeko ekintzak.
• Talde-zainketak: lidergoko eta talde-kudeaketako prestakuntza eta talde-kohesioko saioak.

Finantzaketa jaso dezaketen proiektuak 2026ko urtarrilaren 1etik 2027ko abenduaren 31ra bitartean garatu beharko dira. Laguntzaren gehieneko zenbatekoa 20.000 eurokoa izango da proiektu bakoitzeko, eta diruz lagundu daitezkeen gastuen % 100 estali ahal izango du.

Bateragarritasuna eta ordainketa

Deialdi honetan jasotako laguntzak bateragarriak izango dira administrazio publikoek edo erakunde pribatuek helburu bererako emandako beste diru-laguntza batzuekin, baldin eta ekarpenen baturak ez badu gainditzen diruz lagundutako jardueraren kostu osoa.

Dirulaguntzen ordainketa hiru fasetan egingo da: lehen ordainketa (% 50) laguntzak emateko ebazpenaren ondoren egingo da; bigarren ordainketa (% 30) 2027ko maiatzean egingo da; eta gainerako % 20a proiektuaren azken justifikazioa aurkeztu eta baliozkotu ondoren ordainduko da.

Eskaerak, eskatutako dokumentazioarekin batera, deialdia ALHAOn argitaratu eta biharamunetik 2026ko irailaren 30era arte aurkeztu ahal izango dira. Izapideak udalaren egoitza elektronikoaren bidez, herritarren arretarako bulegoetan edo posta-bulegoetan egin ahal izango dira.