AKTUALITATEA

| 2026-06-18 09:15:00

Vitoria-Gasteizko Udalak Potentzial Handiko Sektoreetako Enplegu Planaren bigarren edizioa jarri zuen abian iaz. Plan horrek, dirulaguntzen lerroaren bidez, eraikuntzaren eta birgaitze jasangarriaren sektoreko eta informazioaren eta komunikazioaren teknologien sektoreko langabeen kontratazioa sustatzen du. Horretarako, 350.000 euroko aurrekontua du, EH Bilduk eta Gobernu Taldeak adostutako aurrekontu-akordioari esker.

Aitziber Salazar zinegotziak azpimarratu duenez, “langabeen kontratazioari bultzada ematea lortu dugu, pertsona horiekin lan-kontratua formalizatzen duten enpresei kontrataziorako laguntza integrala eta laguntzak eskainiz. Guztira, EH Bilduk aurrekontu-akordioen barruan bultzatutako neurri horren bidez, 57 pertsona enplegatu dira dagoeneko”.

“Programa amaitzeko, 30 langabe kontratatu dira, 25 eraikuntza eta birgaitze jasangarriaren arloan, eta 5 diseinu grafikoaren eta informatikaren arloan. Egindako kontratazioen % 70 lanaldi osoan formalizatu dira, kalitatezko enplegua sustatzeko gure apustuaren ildotik”, iragarri du María Nanclares Ekonomia Sustapen, Enplegu, Merkataritza eta Turismoko zinegotziak.

Kontratatutako pertsonak, 25 gizon eta 5 emakume, langabezia-egoeran zeuden eta Ignacio Ellacuría Zentroan eraikuntza eta birgaitze jasangarriaren arloan edo CETIC Zentroan diseinu grafiko edo informatikoaren arloan emandako prestakuntza-ekintzak egin eta amaitu dituzte. Kontratuak 2025eko martxoaren 11tik 2026ko maiatzaren 8ra bitartean formalizatu dira.

Dirulaguntza horiek 269.000 euro bideratzen zituzten kontrataziorako zuzeneko laguntzetara, eta guztizkoaren % 99,48 erabili da; hau da, 267.619,38 euro, eta horrek erakusten du bai enpresek bai proiektuan parte hartu duten pertsonek ekimen horren aldeko erantzuna eman dutela.

Udalak gehienez 10.520 euro jarri ditu enpresa bakoitzeko eta borondatezko tutoretza osagarrietarako. Gutxienez 6 hilabeteko iraupena duten kontratuak diruz lagundu dira. Kontratu horiek lanaldi osokoak edo partzialekoak izan dira, eta jardunaldiaren % 75 errespetatu beharko dute gutxienez.

Laguntza-lerroak 81.000 euro biltzen zituen, bideratzaile bat kontratatzeko. Figura hori funtsezko eta ezinbesteko elementua da proiektua garatzeko. Izan ere, bere eginkizunen artean honako hauek nabarmentzen dira: enpresa-prospekzioa egitea, errazte laborala, parte-hartzaileen banakako orientazioa, hautaketa- eta kontratazio-prozesuetan laguntzea, eta laguntzen kudeaketan eta egindako kontratazio berrien jarraipenean laguntza teknikoa ematea.

2025eko Potentzial Handiko Sektoreetako Enplegu Planak Ignacio Ellacuría eta CETIC Udal Zentroetako prestakuntza ibilbideetan parte hartzen duten langabeen kontratazioa errazten du. Ignacio Ellacuría Udal Zentroa erreferentziazko baliabidea da iturgintza, elektrizitate, igeltserotza, pintura, soldadura eta arotzeria metaliko edo zurgintzan, besteak beste. Bestalde, Informazioaren eta Komunikazioaren Teknologien Zentroak (CETIC) informatikaren eta diseinu grafikoaren arloko prestakuntza ematen du.

Plan horren bidez, 320 enpresarekin ere jarri dira harremanetan, eta, horrela, udalerriko ehun ekonomikoarekin zubiak eraikitzen jarraitzea lortu da. Gainera, Ignacio Ellacuria Udal Zentroaren posizionamendua hobetzea lortu da sektoreko ETEen artean.

Balantzea

Udalak plan horren proiektu pilotua abian jarri zuen urtean, 27 kontratazio egin zituen eraikuntza jasangarriaren arloan; horietatik 17 iraupen luzeko langabezian dauden pertsonenak. Laguntza horiek, gainera, 17 migratzaileri lana aurkitzea erraztu zieten, eta horietako 10i beren egoera erregularizatzen lagundu.

Programa honen balantze globalaren arabera, zifrak oso onak dira. Bi deialdietan, 57 pertsonak lortu dute lana, eta horietako 28 iraupen luzeko langabeak ziren. Laguntza horiei esker, gainera, 34 migratzailek lana aurkitu ahal izan dute, eta horietako 18ri beren egoera erregularizatzen lagundu diete.