AKTUALITATEA

Tokiko Gobernu Batzarrak zuntz optikoa Erdi Aroko Hirigunera eramateko espedientea onartuko du bihar

| 2025-05-15 12:24:00

Tokiko Gobernu Batzarrak zuntz optikoa Erdi Aroko Hirigunera eramateko beharrezkoak diren kanalizazio-obrak lizitatzeko espedientea onartuko du bihar. Helburua eremu horretako bizilagunek 2022tik, Gasteizen kobrezko zentralak ixtearen ondorioz ADSL zerbitzua desagertu zenetik, 300 etxebizitza eta denda inguru estaldurarik gabe utzita, Interneterako konexioan dituzten arazoak behin betiko konpontzea da.

“Erdi Aroko hirigunea duela bi urte baino gehiagotik jasaten ari den itzalaldi digitalarekin amaitu nahi dugu”, adierazi du Beatriz Artolazabal alkateorde eta arloko arduradunak, eta azaldu duenez, “jarduketa honi esker azpiegitura modernoz hornitu ahal izango da araudiak soluzio errazagoak, hala nola aireko kableak, eragozten dituen eremuan”.

Era berean, Xabier Ruiz de Larramendi EH Bilduko zinegotziak ziurtatu duenez, “Erdi Aroko hirigunean zuntz optikorik ez egotea traba izaten ari zen, bai bertako bizilagunen bizitza garatzeko, bai inguruko jarduera ekonomikorako. EH Bilduren eta gobernu taldearen artean lortutako aurrekontu akordioak Udalak bizilagunekin zuen zor hori konponduko du. Erdi Aroko hiriguneak bizitzeko eta gozatzeko lekua izan behar du, zerbitzu guztiekin eskura. Horretan lanean jarraituko dugu”.

Zuntz optikorako sarbidea errazteko, Udalak 150.000 euroko partida bat erreserbatu du telekomunikazio-hartuneak egiteko gaur egun halakorik ez duten atarietaraino. Obra horien finantzaketa 2025eko udal aurrekontuan konprometituta dago, gobernu taldearen, PSE-EEren eta EAJren, eta EH Bilduren arteko akordioaren esparruan.

Inbertsio horri esker, hirigune historikoko 30 kokaleku zehatzetan esku hartu ahal izango da, abiadura handiko kableak eraikinen sarreraraino iritsiko direla bermatuz. Kokapen horiek, besteak beste, San Bizente Paulekoaren kalea, Hedegile kalea, Eskola kalea, Errementari kalea, Zapatari kalea, Pintore kalea, Diputazio kalea, Pedro Egaña kalea, Probintzia plaza eta Aiztogile kalean daude. Esku hartzeko hurrenkera irizpide teknikoen arabera zehaztuko da, puntu bakoitzaren bideragarritasunaren eta premiaren arabera.

“Eskuragarri dauden funtsekin, 30 kokapen horietan obrak egin ahal izatea ziurtatuko dugu. Bizilagunek edo merkatariek eskaera berriak egiten badituzte, aztertu egingo ditugu, eta aurrekontuen bideragarritasuna aztertuko dugu”, gaineratu du Artolazabalek.

Eskaera berri horiek identifikatzeko ekainaren 30era arteko epea irekiko da, eta interesa duten pertsonak Erdi Aroko Hiriguneko Auzo Arretarako Bulegora hurbildu ahal izango dira, zuntza instalatzea eskatzeko.

Bloke bakoitzeko batez besteko inbertsioa 4.000 eta 4.500 euro bitartekoa da, eta Hirigune Historikoko eremu kaltetuenetan konektibitatea berrezartzea ahalbidetuko du. Epeak betetzen badira eta eragozpenik ez badago, lanak iraila eta urria bitartean hasi ahal izango dira.

KOKAPENEN ZERRENDA (30)

  • San Bizente Paulekoaren kalea 19
  • San Bizente Paulekoaren kalea 21
  • San Bizente Paulekoaren kalea 23
  • Hedegile kalea 6
  • Hedegile kalea 61
  • Hedegile kalea 137
  • Eskola kalea 7
  • Eskola kalea 20
  • Eskola kalea 22
  • Santa Maria kalea 6
  • Santa Maria kalea 8
  • Errementari kalea 13
  • Errementari kalea 56
  • Frai Zacarias Martínez kalea 9 (bat dator Frai Zacarias Martínez kale 91-92-93- 94-95-96 atariek osatutako lurzatiarekin)
  • Zapatari kalea 69
  • Zapatari kalea 86
  • Pintore kalea 76
  • San Frantzisko Xabierkoaren kantoia 6
  • Santa Ana kantoia 1
  • Santa Ana kantoia 7
  • Diputazio kalea 8
  • Diputazio kalea 10
  • Diputazio kalea 12
  • Probintzia plaza 7
  • Probintzia plaza 10
  • Probintzia plaza 12
  • Pedro Egaña 2
  • Pedro Egaña 4
  • Aiztogile kalea 92
  • Txikita kalea 14