AKTUALITATEA

| 2024-12-09 09:18:00

EH Bildu udal taldeak Gasteizko Udal Gobernuari obren edo birgaitzeen finantzazio edo kofinantzazio publikoko hitzarmenetan klausula espezifiko bat sartzea eskatu dio, eraberritu beharreko espazioaren etorkizuneko erabilera kulturalak arautzeko. EH Bilduk etorkizunean «bermatu beharra» dagoela finantzaketa publikoa inbertitzen den ondare eta espazioetan inbertsio hori herritarrengana itzuliko dela azpimarratu du, interes orokorreko beste alderdi batzuen artean, erabilera kulturalaren bidez.

Talde politikoak Gasteizek duen historia luze eta aberatsa nabarmendu nahi izan du, baita historia hori islatzen duen ondare guztia ere. Horrela, bada, kudeaketa horrek dakarren «erronka» ere baloratu duten arren, uste dute gaur egun adostasun orokorra dagoela ondare osoaren garrantzia zaindu eta nabarmenduko duen kontserbazio-politika baten inguruan, haien ustez «ondare horren defentsa interes orokorreko eremua baita».

Aitziber Salazar EH Bildu taldeko zinegotziak adierazi duenez, «Araba eta Gasteiz gure lurraldearen erabilera kulturala sustatzen ari dira diru publikoaren inbertsio garrantzitsu baten bidez. Erakundeen ahalegin horren aurrean, ez dago lekurik inolako beto, xantaia edo zentsurarako. Herritarren dirua berriro itzuli behar da herritarrengana, eta hori ziurtatzeko aukera bakarra finantzaketa publikoa duten birgaitze-proiektuetan klausula bat jartzea da».

Ondasun horien guztien artean, erlijio-kultuko tenpluak nabarmentzen dira, bai balio historiko eta arkitektonikoagatik, bai narriadura gelditzeko eta birgaitzea gauzatzeko finantzaketa publikoa jasotzen duten gune nagusiak izateagatik. Santa Maria Katedrala da adibiderik argienetako bat: 1999an hasi zen zaharberritzeko proiektua, 10 urteko hasierako epearekin, baina 25 urtera arte luzatu da, eta 50 milioi euro inguru jaso ditu finantzaketa publikotik. Hala eta guztiz ere, duela gutxi jakin dugu Apezpikutzak uko egin ziola Sacamantecas filma grabatzeari, eta horrek are gehiago erakusten du diru publikoz birgaitutako espazioen erabilera kulturalerako etorkizuneko aukerak zehazteko beharra.