AKTUALITATEA

| 2025-10-14 10:52:00

EH Bilduk aurre-akordioa aurkeztu du gaur PSErekin eta EAJrekin, 2026rako Ordenantza Fiskaletan. Aurre-akordio horren arabera,
zergak, tasak eta prezio publikoak %2,5 eguneratuko dira 2026. urterako, salbuespen batzuekin. Rocio Vitero EH Bilduko bozeramaileak adierazi duenez, «akordio on bat lortu dugu, herritar guztientzako politika publikoak garatzen jarraituko duena eta 2025ean egindako igoera fiskalak kontuan hartzeko sentsibilitatea izango duena. Pertsonei, familiei eta enpresei laguntzeko neurri berriak sartuz, dagoen araudia egokitu eta hobetzeko».

EH Bilduk hitzartutakoak pertsona eta familientzako hobarietan hobekuntzak jasotzen dituela azpimarratu du, bai OHZn bai zaborren tasan, errekargua etxebizitza hutsera egokitzen araudia hobetuz eta salbuespen berriak sartuz eta EIOZ %65 arte jaisten enplegua sortzeagatik.

Gainera, EH Bilduk %25eko kenketa berri bat egin du %33 eta %65 arteko minusbaliotasuna duten pertsonentzako kirol jardueretan (gaur egun %65etik gorako minusbaliotasuna duten pertsonek bakarrik zituzten kenkariak).

«Akordio honekin datorren urterako zaborren tasaren aparteko igoerarik ez egotea lortu dugu, ezta tarte berririk eta %65era arteko igoerarik ere Etxez Etxeko Laguntza Zerbitzuan eta Gizarte Politiketako beste arlo batzuetan, udal gobernuak proposatzen zuen bezala. Aurreko urtean herritarrek egindako ahalegin fiskalari balioa ematen diogu eta horregatik EH Bildutik tematu egin gara eta gobernu taldeak proposatzen zituen igoera ezohiko eta justifikaezinak geldiaraztea lortu dugu», azaldu du Rocio Viterok.

Hala, Euskal Herria Bilduko bozeramaileak azaldu duenez, akordio berriarekin ez da Udaltzaingoaren hedapenagatik ekitaldietarako tasa berririk egongo, momentuz mahai gainean utziz eta etorkizunean landu ahal izateko aukera mantenduz. Era berean, garrantzitsua da Folklore Eskolako egungo ikasleek ez dutela 70€ko prezio-igoerarik izango Musika Etxearekin bat egitearen ondorioz, 2026/2027 ikasturtetik aurrera matrikulazio-sistema berri bat ezarriko baita ikasle berrientzat.

Azkenik, TAOan eta autokarabanen Aparkalekuen Ordenantzan ere ez da prezioa igoko, EH Bilduk proposatu zuen bezala. TAOren kasuan, 8 orduko tiketa gehitzen da, eta urteko txartelak %2,5ean eguneratuko dira.

Ondasun Higiezinen gaineko Zerga (OHZ)
Iaz, EH Bilduk 0 tartea martxan jartzea lortu zuen LGStik beherako dirusarrerak dituztenentzat. Aurten, gainera, pertsona horientzat hobaria lortu duen ehunekoa handitzea lortu du: %50etik %95era iritsi da 1-2 pertsonako bizikidetza-unitateetan, eta %95era lau pertsonatik aurrera.
Etxebizitzari egindako errekarguari dagokionez, etxebizitzaren erabilera justifikatu ahal izango da etxean egindako kontsumoak gehituz. Iaz planteatu genuen, baina ez zen posible izan. Zehazki, salbuespen izango dira urtean 750 kilowatteko elektrizitatea eta 30m3-ko ura kontsumitzen duten etxebizitzak. Jabetzaz aldatzen diren etxebizitzetarako epea ere luzatu egin da, eta zerga kobratu baino lau hilabete lehenago (urtarrilaren batean) eta ondorengo bietara zabalduko litzateke epea. Eta alokatutako etxebizitzei dagokienez, 9 hilabetetik 6ra jaitsiko da aurreko urtean etxebizitza alokatua izateko beharra.

Gainera, beste bi salbuespen gehitu dira, bai lan-arrazoiengatik Arabatik kanpoko beste udalerri batera nahitaez joan behar duten pertsonentzat, bai etxebizitzaren erabilera ezinezkoa den kasuetarako, ebazteke dagoen kausa judizial baten parte delako.

Etxebizitza hutsen kanonari lotuta geratzen diren etxebizitzak ere araudian sartzea lortu dugu, EH Bildurentzat etxebizitza hutsak mobilizatzen laguntzen duten tresna guztiak beharrezkoak direlako.

Zaborren tasa
EH Bilduk organikoko edukiontziaren irekierak murriztea lortu du hobariak lortzeko: 10 irekiera gutxiago 90 m²-rainoko etxebizitzetan hobaria lortzeko, 60 irekiera 75m²-rainoko etxebizitzetan eta 90 irekiera 75 eta 90m²-rainoko etxebizitzetan. Eta 90m² baino gehiagokoetan, 120tik 108ra murrizten dira irekierak hobaria jasotzeko.

Gainera, hobari sozialak handituko dira diru-sarrerak lanbide arteko gutxieneko soldataren azpitik dituzten pertsonentzat, eta %50era ere irits
daitezke.

Eraikuntza, Instalazio eta Obren gaineko Zerga (EIOZ)
EH Bilduk hobari orokorra lortu du enplegua sortzeagatik, %65 artekoa enpresa berrien kasuan. Lekualdaketa, gehikuntza edo hobekuntzaren
kasuan, %40rainokoak izango dira.
ETEen kasuan, hasieran planteatutakoak baino hobari handiagoak jarriko dira martxan, eta %35eraino iritsiko dira (gobernu-taldeak hasieran
aurkeztutako proiektua baino 10 puntu gehiago).