AKTUALITATEA

| 2024-02-12 11:31:00

EH Bilduk eskatu du Zaramagako eraikinak eta fatxadak zaharberritzen direnean, bertan dauden mural parte-hartzaileak mantentzea. Zehazki, Unai Fernandez de Betoño EH Bilduko zinegotziak aipatu ditu, gaur, Hirigintza Batzordean, obra horiek eragin ditzaketen bi mural: "Zimurraren Gailurrean" (Mendozako Koadrila kalea 59) eta "Memoriarik gabe ez dago ez orainik ez etorkizunik” (Nafarroako Errege-erreginak kalea 28). «Zaramaga auzoko bizilagunek agerian utzi duten bezala, kezka dago orain birgaituko diren eraikinen fatxadetan marraztutako muralen etorkizunagatik. EH Bilduk eraberritze lan integralak egitea eta muralak babestea eta mantentzea nahi du, balio artistikoagatik ez ezik, auzoarentzat berarentzat duten balio sinbolikoagatik ere», ziurtatu du EH Bilduko zinegotziak.

Fernandez de Betoñok Zaramagako 24 eraikinen birgaitzea babestu du, eta, horren bidez, besteak beste, eraikin horien energia-eraginkortasuna hobetuko baita, etxebizitza horietan bizi direnen bizi-kalitatea hobetuz. 24 horietatik, aurrez aipatutako bi eraikinek dituzte muralak, eta horiengan izan ditzakete eragina obrek. Bi muralak dira EH Bilduk batzordean balioan jarri duen Gasteizko Ibilbide Muralistikoaren parte. Bizigarri Zaramaga bizilagunen auzo elkarteak bi mural horiek galtzeko arriskua dagoela salatu du.

Ildo horretan, Fernandez de Betoñok defendatu du, batez ere Nafarroako Errege-Erreginen kaleko muralaren kasuan, 1976ko martxoaren 3ko gertakariekin zerikusia duen gaia dela eta, aztertu egin beharko litzatekeela, eraikina birgaitu ondoren, horma fatxada berean berriro jartzeko aukera. Izan ere, Asisko San Frantzisko elizaren aurrean kokatuta dago, Poliziak 76ko martxoaren 3an egindako sarraskia gertatu zen lekuan. «Ezin dugu onartu mural horiek galtzea. Udalak mural parte-hartzaile horiek babesteko eta gal ez daitezen aktiboki laguntzea eskatzen dugu», eskatu du EH Bilduko zinegotziak. Gaineratu duenez, «leku berean mantentzeak eta beste eraikin batean ez berreraikitzeak etorkizunean eraikina birgaitu nahi dutenak baldintzatzea saihestuko luke. Horregatik guztiagatik, uste dugu ezin ditugula mural horiek galdu. Udalak aktiboki lagundu beharko luke mural parte-hartzaile horien mantentze eta babesean».