AKTUALITATEA

| 2025-07-06 14:20:00

Martxoaren 3aren 50. urteurrena dela eta, Vitoria-Gasteizeko Udalak jarduera- programa bat antolatuko du, egun horretan erail zituztenak oroitzeko eta haien familiak omentzeko ekitaldi handi bat egingo dira. Aurreikusitako agendan zine-forum bat eta 1976ko martxoaren 3ko gertakarien inguruko literatur lehiaketa bat daude. Zine-forumak lan-eremuan giza eskubideen defentsari eta urraketari buruz hausnartzeko, sentsibilizatzeko eta eztabaidatzeko aukera emango du.

Bizikidetza eta Aniztasun Zerbitzuak jarduera horiek antolatzeko kontratua lizitatu du, 61.983,47 euroko aurrekontua duena, BEZa gehituta. Programa 2025eko irailaren 1etik 2026ko abuztuaren 30era bitartean garatu ahal izango da.

“1976ko martxoaren 3a Espainiako Trantsizioko sarraskirik handiena izan zen Gasteizen. 2026an tragedia horren 50. urteurrena beteko da, eta Gasteizko Udaletik haren oroitzapena bizirik mantendu nahi dugu, urratutako kaltea aitortzeko eta biktimei, haien familiei eta gure hiri osoari eragindako sufrimendua erreparatzeko beharra ikusten baita. Ez ahazteko eta horrelako gertaerak berriro ez gertatzeko gogoratu nahi dugu Martxoaren 3a”, adierazi du Pascual Borja Bizikidetza eta Aniztasuneko zinegotziak.

“1976ko martxoaren 3an, polizia armatuak Zaramagako elizan lan-baldintza duinen aldeko borrokan ari ziren langileen batzarra lehertu zuen. Langileen eta sindikatuen arteko borroka horri zor dizkiogu oinarrizko lan-baldintzak hobetzea eta bizi-kalitatearen eta enpleguaren egungo parametroak. Gaur, EH Bildutik lan baldintza eta soldata duinak defendatzen jarraitzen dugu, eta 76ko martxoaren 3an hildako 5 langileen eta poliziaren eskuetan zauritutako ehunka pertsonen borrokaren balioa erdigunean jartzea beharrezkoa dela uste dugu. 50 urte bete dira sarraski hartatik, eta martxoaren 3ko memoria bizirik mantendu nahi dugu, eta aprobetxatu egia, justizia eta aitortza eskatzen jarraitzeko”, nabarmendu du Alberto Porras EH Bilduko zinegotziak.

Helburuak

Berrogeita hamargarren urteurrenean antolatutako jardueren programaren ardatza 1976ko martxoaren 3an, 5 langileren erailketa tragikoen memoria berreskuratzea eta transmititzea izango da, bizikidetza sustatzeko, eta betiere giza eskubideekiko eta indarkeriarik ezarekiko konpromisoari eutsiz.

Ekimen honen helburuak 1976ko martxoaren 3an Zaramagako San Frantzisko elizan izandako gertaeren memoria berreskuratzea eta transmititzea, biktimak (Pedro María Martínez Ocio, Francisco Aznar Clemente, Romualdo Barroso Chaparro, José Castillo García eta Bienvenido Pereda Moral) eta horien kausak aitortzea eta duintasuna ematea dira, baina baita oroimena bizirik mantentzea ere.

Era berean, egungo memoria historikoa berreskuratu nahi da, gertatutakoaren ezagutza eta memoria kolektiboa zabaldu, zurrumurruei, aurreiritziei, jarrera intoleranteei eta gorroto-diskurtsoei aurre egiteko.

Programazioa irekia izango da herritarrentzat eta publiko guztientzat. Gainera, parte hartzailea eta askotarikoa izango da, hiriko ahalik eta elkarte, entitate, kolektibo sozial eta kultural gehienak eta, oro har, ahalik eta pertsona gehien inplikatzeko.

Jarduera horiek osatzeko, proposamen osagarriak ere egin ahal izango dira, herritarrentzat irekiak.