AKTUALITATEA

| 2022-09-08 12:02:00

EH Bilduk iraileko udalbatzara eramango du Gasteizko kultur ondarearen kontserbazioa eta babesa hobetzeko beharra. Horrela, Xabier Ruiz de Larramendi koalizioko zinegotziaren ustez, «beharrezkoa da udal-babeseko katalogoak berrikustea, bereziki XX. mendean egindako obra eta elementu batzuetarako». Izan ere, EH Bilduk uste du babesa bermatu behar dela udalerriko espazio publikoa bete duten obra eta elementu guztietarako, baita beste garai batzuetako obretarako ere. «Ez da mozio honen asmoa zer lanek merezi duten babesa eta zeitzuk ez ezartzea, baina bai merezi dutenen babes-maila ezartzeko bideari ekitea», adierazi du Ruiz de Larramendik.

Joan den maiatzean, Andaluzia kaleko fatxada baten birgaitze energetikoko lanetan, Joaquin Lucarini eskultore gasteiztarraren «eraikuntza» lana kendu eta suntsitu zen. Lan eskultorikoa zen, baina ez zeukan salba zezakeen babes-maila eraginkorrik. Hala ere, egia da, obraren desagerpena albiste txarra dela, eta gure ondare historikoa pobretzen duela. Beraz, gertatutakoak espazio publikoan dauden erabilera publiko eta pribatuei eta elementu artistikoei buruzko hausnarketa merezi du.

«Lucariniren eskulturarekin gertatu zenak ez du konponbiderik, baina agerian uzten du beharrezkoa dela udal-katalogoak berrikustea, espazio publikoan kultura-ondarea kontserbatzeko eta babesteko», ziurtatu du Ruiz de Larramendik. Horregatik guztiagatik, EH Bilduk mozioan eskatuko du obra proiekturen batek elementu artistiko edo eskultorikoei eragin badiezaieke, Lurralde Sailak Kultura Sailari jakinaraz diezaiola, elementu horiek suntsitzeko dauden alternatibak baloratu ahal izateko.

Era berean, espazio publikoan dauden baina titulartasun pribatukoak diren interes kultural, arkitektoniko edo eskultorikoko elementuen kasuan, Udalak kontserbazioari buruz duen interesa jabeei jakinaraztea eskatuko du EH Bilduk, eta beraiekin harremanetan jar dadila elementuen etorkizunari buruzko edozein zalantza argitzeko.