AKTUALITATEA

| 2025-12-17 10:37:00

EH Bildu pozik agertu da azkenean Eusko Jaurlaritzak iritzia aldatu duelako eta Gasteizko hegoaldeari zerbitzua eskainiko dion osasun-zentro berri bat martxan jartzeko beharra onartu duelako. Era berean, Osasun Sailak eta Osakidetzak aurreratutako epeak deitoratu ditu; izan ere, auzoak duela urte asko eskatzen ari den konponbide bat martxan jartzeko epea beste sei urtez atzeratzea suposatzen dute.

Formazio honek azken urteetan behin eta berriz defendatu du hegoaldeko osasun-zentro berri baten beharra. EH Bilduk Olarizun anbulategi berri bat eraikitzea eskatu eta proposatu du Gasteizko osoko bilkuran behin baino gehiagotan, eta Eusko Jaurlaritza sostengatzen duten talde politikoak, EAJ eta PSE-EE, kontra agertu dira beti.

«Pozten gaitu EAJk eta PSEk atzera egin izanak eta herritarren eta EH Bilduren jarreretara hurbildu izanak, azken urteotan osasun-azpiegitura berri hau eskatzen zutenak. Orain, beharrezkoa da Osasun Zentro berri honi lehenbailehen ekitea, eta iraganeko akatsak ez errepikatzea, esaterako, Gasteizko Alde Zaharrean anbulatorio berri bat martxan jartzeko atzerapen tamalgarria, urteetan atzeratu egin dena. Eusko Jaurlaritzak ezarritako epeak ez dira onargarriak», adierazi du Xabier Ruiz de Larramendi EH Bilduren bozeramaileak.

Gasteizko hegoaldean anbulategi berria eraikitzea Osakidetzak gaur aurkeztu duen Azpiegitura Planaren parte da, 2025-2032 aldirako. EH Bildu Gasteizek tramitazioa azkartzeko eskatu die Osakidetzari eta Gasteizko Udalari, osasun-azpiegitura horri lehenbailehen ekin ahal izateko, eta iraganeko akatsak saihesteko, hala nola Gasteizko Alde Zaharrean anbulategi berri bat martxan jartzeko atzerapen tamalgarria, urteetan berandututa egon dena. Osasun Sailak eta Osakidetzak iragarri dutenez, 2031ra arte atzeratu nahi dute eraikuntza-proiektu bat egiteko prozesua, eta horrek ia hamarkada bat galtzea dakar, gaur egun dagoen arazo bat konpontzeko.

EH Bilduk, halaber, anbulategi bat diseinatzeko eskatu du, behar soziosanitarioei eta osasun-zentroan lan egiten duten profesionalek egindako eskaerei erantzuteko, arreta hurbila eta kalitatezkoa ahalbidetzeko, eta antzemandako espezialitateen falta zuzentzeko.

Izan ere, gogoratu behar da aurtengo apirilean, EH Bilduk Eusko Legebiltzarrean egindako galderei erantzunez, Osasun Sailak argi eta garbi baztertu zuela Gasteizko hegoaldean anbulatorio berri baten beharra, eta ziurtatu zuen "gaur egun ez dagoela osasun-arreta desegokia eragiten duen arazorik". Are gehiago, Gasteizko Udalarekin ez zela gaia aztertu eta ez zela kokapenik aztertu ziurtatu zen. «Ongi etorriak izan daitezela Osasun Saila eta Osakidetza jarrera aldaketa honetara, nahiz eta deigarria eta eznahikoa  izan», adierazi du EH Bilduko zinegotziak.

Olarizuko egungo Osasun Zentroak denbora darama gainezka: 20.000 bizilagun baino gehiago artatzen ditu eta ez du handitzeko aukerarik. Muga horien ondorioz, zerbitzuak okerrera egin du, espezialitate mediko batzuetan eskaintzarik ez dagoelako. Gasteizko hegoaldea osatzen duten auzoetako elkarteek eta eragileek egin duten eskaria da. 2022an, bai Hegoaldeko Auzoguneak bai Udalbatzak eskatu zioten Osakidetzari inguru horretako egungo eta etorkizuneko osasun-premien azterketa diagnostiko bat egiteko, baina ez zen egin.

Osasun-zentroak 65 urtetik gorako 5.600 pertsonari baino gehiagori ematen die zerbitzua gaur egun. Eta 3.000-4.000 paziente inguruk gaitz kronikoak dituzte eta/edo pluripatologia dute. Balantzaren beste aldean, pediatriaren arloko gabeziak ditugu, Goikolarra auzo gaztearen beharrak asetzeko. Arreta-ratioei dagokienez, kalkulatzen da mediku/pediatra bakoitzak 1.500 pertsona inguru artatzen dituela, eta hori lan egiten duten profesionalek salatu duten lan-karga da. «EH Bilduk beti defendatu du Osasun Zentro berri baten beharra, baita espezialitate berriak ezartzeko ere, hala nola fisioterapia, osasun mentala, geriatria edo ginekologia, adibide batzuk jartzeagatik», esan du zinegotziak.