Gasteiz

Albisteak

EH Bilduk inbertsio plan bat diseinatzeko eskatu dio Udalari jantoki zerbitzua Bizan zentro guztietara zabaltzeko


Alberto Porras: «Beharrezkoa da jantoki eredu arinago eta malguago baterantz aurrera egitea, hurbileko kontsumoa sustatuko duena, eta udalerriari gero eta irekiagoa izango dena. Auzo bakoitzean elikaduraren arreta-zerbitzuak emango dituen eredu baten alde egiten dugu».

| 2021-12-14 09:42:00

EH Bilduk hurrengo udalbatzan lan eta inbertsio plan bat diseinatzea eskatuko du, udal taldeekin eta sektoreko eragileekin elkarlanean, jantoki-zerbitzuak udalerriko Bizan zentro guztietara zabaltzeko. Alberto Porras EH Bilduko zinegotziak adierazi duenez, «beharrezkoa da jangela eredu arinago eta malguago baterantz aurrera egitea, hurbileko kontsumoa sustatuko duena eta udalerriari gero eta irekiagoa izango dena. Auzo bakoitzean elikadura-arreta zerbitzuak izango dituen eredu baten alde egiten dugu».

Adinekoentzako Zentro Soziokulturalak, orain Bizan
izenekoak, funtsezko tresna dira adinekoen ongizaterako, eta oinarrizko beharrizanak asetzeko gune bat, hala nola elikadura, sozializazioa eta komunitateko kide izatea. Gasteizen 16 Bizan Zentroko sarea dugu, adinekoei arreta emateko. «16 Bizan espazioetatik, 9k jantoki-zerbitzua dute dagoeneko, eta 7k ez. Hori dela eta, aurre egin beharreko erronka bat dugu: Bizan Zentro guztietan, eta, hortaz, gure hiriko auzo guztietan, gertuko eta kalitatezko jantoki-zerbitzua izan dezaten pausoak ematea. Asmoa auzo bakoitzean jantoki-zerbitzuak izatea da, gero eta handiagoa den zahartzearen erronkari aurre egiteko», ziurtatu du Alberto Porrasek.

Adinekoei arreta emateko zerbitzuen helburu nagusia kalitatezko arreta ematea izan behar da, eskubideetan oinarritua eta haien interes eta beharretara egokitua. Adinekoak beren etxean eta inguruan ahalik eta denbora gehien eta baldintza egokietan egon ahal izatea da helburua, betiere beren borondatea hori bada. Adinekoak beren etxeetan mantentzeko funtsezko zerbitzuetako bat adinekoentzako jantokiak dira. Adineko pertsonentzako jantokiek o
tordu oso eta egokia baino gehiago eskaintzen dute nutrizioaren ikuspegitik, gune horietara joaten diren pertsonen bizikidetza eta integrazioa bultzatzen dute. Espazio horietan elikadura estaltzea dieta orekatu bat baino gehiago da, sozializatzeko, beste pertsona batzuekin kontaktua izateko, bilatua ez den bakardadea murrizteko eta narriadura prebenitzeko espazio bat da. Adineko pertsona askori beren etxean egoteko aukera eman diezaiokeen laguntza da, egoitza batera joateko beharrik gabe.

«Bizi-itxaropena handitzeak lotura zuzena izan behar du zaintza sarean baliabideak sortzearekin, eta erronka horri gaurdanik aurre egin behar diogu», adierazi du zinegotziak, eta gaineratu du udalerri gisa sustatu behar dela hiriaren ongizatea sustatzeko baliabideekin zainduak izateko aukera. Horretarako, bizi-kalitate hori posible eta eraginkor egiteko beharrezkoak diren bitartekoak, zerbitzuak eta laguntzak programatu eta inplementatu beharko dira. Beharrezkoa da egoera berri baterantz aurrera egitea, non zaintzak gizarte-ekintzaren erdigunean egongo diren.