EH Bilduk IGIko zuzendariaren agerraldia eskatu du Gasteizen eta Araba Erdialdean Biosfera Erreserbaren sorrera baloratzeko


| 2023-11-16 13:10:00

EH Bilduk Aitor Zulueta Ingurugiro Gaietarako Ikastegiko zuzendariaren agerraldia eskatu du, "Biosferaren Erreserben" inguruko balorazioa egin dezan eta Gasteizerako eta Araba Erdialderako aplikatzeko aukerak azter ditzan. Proposamen hori, Arabako Lautadan biosferaren erreserba sortzea, EH Bilduk duela hilabete batzuk egindako proposamena da, eta koalizioak bultzatu nahi duena. «Arabako biosferaren lehen erreserba izango litzateke, zehazki, Zadorraren goi-arroan. Guztira 950 km2 ditu, eta 14 udalerri eta 275.000 biztanle biltzen ditu. Estatu mailan biztanle gehien dituen biosfera-erreserba izango litzateke, eta ezaugarri horietako bakarretakoa, erreserbaren eremuaren barruan Gasteiz bezalako tamaina ertaineko hiri bat sartzen baitu», adierazi du EH Bilduko zinegotzi Amancay Villalbak.

Horregatik, EH Bilduk Aitor Zulueta Ingurugiro Gaietarako Ikastegiko zuzendariaren iritzia ezagutu nahi du, esperientzia baitu Biosferaren Erreserbetan, izan ere, Urdaibaiko Biosferaren Patronatuaren zuzendaritzan egon zen. Gainera, IGIren egitekoa da Gasteizen jasangarritasuna bermatzea, udalerriaren garapen jasangarria bultzatuz, eta ez udalerri hori erakunde isolatu gisa ulertuz, baizik eta haren bioeskualdeari lotuta, Arabako Lautadari, alegia. Gogoratu behar da, gainera, 2005. urtean IGIk berak jasangarritasun figura batek Gasteizi eta bere inguruneari ekarri ahal zizkion aukeren eta onuren lehen azterketa egin zuela. Harrezkero, figura hori mundu mailan hazi baino ez da egin, baina Gasteizen ez da finkatu.

«EH Bilduk uste du horrelako guneen helburua giza jardueren eta lurraldearen kontserbazio naturalaren arteko oreka bilatzea dela. Gaur egun, horrelako 700 gune baino gehiago daude munduan, eta horietako bi Euskal Herrian daude», gogorarazi du Villalbak. Gaineratu duenez, «Nazio Batuek askotan onartu dute jasangarritasunaren erronka hirietan jokatzen dela, eta, horregatik, larrialdi klimatikoaren erronkari aurre egiteko, tresnak egokitu behar dira, hala nola biosferaren erreserbak, erronka horietara».


EH Bilduren proposamenaren arabera kontserbatu beharreko eremua ez dago erdigunean, baizik eta periferian. Izan ere, haren mugak ingurumen-balio handikoak dira: Gasteizko mendiak, Arrato, Urkiola eta Entzia mendilerroak, Gorbeia eta Aizkorri-Aratz parke naturalak eta Iturrietako mendiak. Erreserbaren barruan dauden intereseko leku naturalen artean, honako hauek nabarmendu behar dira: Gasteizko eraztun berdea, Salburuako hezeguneak eta Zadorrako eta bertako urtegietako kontserbazio bereziko eremuak, Arabako lautadako hariztiak eta Aldaiako mendiak. «Formula horri esker, modu integralean heldu ahalko zaio lekuaren jasangarritasunari, eta ekosistemak eta biodibertsitatea kontserbatzearen eta mantentzearen ikuspegitik zein ikuspegi sozioekonomikotik landuko da; izan ere, gai horretan ez dira aintzat hartzen natura-balioak ezartzera mugatzen diren beste figura batzuk. Gainera, ikerketa zientifikoa erakarriko du, turismo jasangarria sustatuko du, nazioarteko proiekzio izango du eta bertan lantzen eta sortzen diren produktuak identifikatzeko marka propio bat sortzea ahalbidetuko du», ziurtatu du Villalbak.

Era berean, EH Bilduk proposatu du Erreserbaren kudeaketa patronatu baten bidez egitea, eta patronatua osatzen duten udal guztien parte-hartzea eta erabakitzeko gaitasuna bermatzea, baita tokiko interesa duten beste eragile batzuena ere. Funtzionamendurako, kudeaketa-plan bat eduki beharko da, epe labur, ertain eta luzerako plangintza integratua emango duena eta garapenaren tokiko j
asangarritasun globala handitzeko neurri zehatzak jasoko dituena.