AKTUALITATEA

| 2025-02-05 10:34:00

EH Bildu Gasteizko Hiri Antolamendurako Plan Orokorraren (HAPO) onarpenerako behin-behineko bozketan abstenitu egin da. Alderdi politikoaren arabera, 2003ko Plan Orokorra (EAJk, PSEk eta PPk egindako azkenengo Plana, espekulazioaren eta higiezinen burbuilaren balioen adierazle handia zena) atzean uztearen aldeko hasierako fasearen ondoren, aurkeztutako dokumentuak akatsak mantendu edo gehitu ditu, eta, azkenean, Gasteizentzat «aukera galdua» izan da.

EH Bilduk adierazi duen bezala, HAPO berria lurzoru gehiago ez kontsumitzeko eta «barrurantz hazteko» ideiatik urrundu egin da; izan ere, sektore batzuk desklasifikatu arren, Olarango 14. sektorea (3.186 etxebizitza) mantentzea ere erabaki da eta, ondorioz, bertan eraikitzea ahalbidetuko da. Xabier Ruiz de Larramendiren hitzetan, «horrek ez du zerikusirik ez barrurantz haztearekin, ez hiri trinko batekin, ez lurzoru gehiago ez kontsumitzearekin»; izan ere, talde politikotik aurreikusitako 6.000 etxebizitzetatik erdiak bakarrik desklasifikatzearekin eta lurzoruaren kontsumoa beste erdian gaitzearekin ados ez daudela adierazi dute.

EH Bilduk HAPO berria ez babestera bultzatu duen beste akatsetako bat baxu komertzialeko lokalak etxebizitza gisa gaitzeko aukera izan da.  Gure hirian gero eta denda gehiago ateak ixtera behartuta dauden egoera honetan, aukera berri honek auzoko dendak errentagarriak ez diren ideian sakonduko du. Neurri honi dagokionez, Xabier Ruiz de Larramendik adierazi duenez, «lokalak etxebizitza bihurtu ahal izatea ahalbidetzen duen txostenik gabe, merkataritza-lokal huts bat duenarentzat sari bat iragartzea bezala da; bereziki harekin espekulatu nahi duenarentzat, jarduera erraztu beharrean».

Gainera, EH Bilduk «defendaezintzat» jo du, alde batetik, Plan berriak, 2025ean, uholde-arriskua duten lurretan eraikitzeko akatsa jasotzea; kasu batzuetan, gainera, ingurumen-aberrazioen bidez, hala nola Zaia ibaian dike bat eraikiz. Eta, bestetik, Planak erabilerarik gabeko lurzoru industriala berreskuratzearen aldeko apustua egin beharrean, guztiz kontrakoa egin izana.

Azken batean, Ruiz de Larramendik gogorarazi du proposamena diseinatu duten taldeek, PSEk eta EAJk, ez dutela inolako borondaterik izan EH Bildurekin prozesu osoan zehar negoziatzeko, irizpideak eta helburuak onartu aurretik bilera bakarra eginda. Era berean, PSEk eta EAJk plana onartu ondoren goitik behera aldatzeko ideia azpimarratu izana deitoratu dute baita ere, horrek «prozesuari seriotasuna kentzen diolako eta bozkatzen dena baliorik ez duela ikusarazten duelako».