AKTUALITATEA

| 2025-07-03 09:48:00

Hiriaren egoerari buruzko eztabaidaren lehen saioaren ostean, EH Bilduk Gasteizen duen bozeramaile Rocio Viterok defendatu du bere alderdia izan dela Gasteizi egonkortasuna eta aurrerapena eman diona. «Erantzukizunez jokatu dugu eta herritarrak lehenetsi ditugu, Gasteizi egonkortasun instituzionala eta aurrerapena eman dion indarra izan gara, besteak beste, aurrekontu- eta zerga-akordio garrantzitsuen bidez», ziurtatu du Viterok.

Horrela, Euskal Herria Bilduk abian jarri dituen proiektu eta neurri garrantzitsuak zerrendatu ditu arloka bozeramaileak, besteak beste, gure adinekoak babestea, etxebizitza, merkataritza, enpresentzako laguntzak eta trantsizio ekosoziala bultzatzea.

Hala ere, Viterok esan du «azkarrago eta gehiago» egin ahal izatea gustatuko litzaiekeela, baina aurrez aurre bi alderdi aurkitu dituztela gobernu batean,  «proiektu eta norabide partekaturik ez dutenak, eta horrek eztabaida eta polemika arduragabeak sartzera bultzatzen ditu, kasu askotan interes alderdikoiei erantzuten dietenak».

Horregatik, EH Bilduko bozeramaileak adierazi du bere alderdiak erantzukizunez jokatzen jarraituko duela. «Guk argi daukagu: Zarataren aurrean, liskarraren aurrean, ikuspegi zabala izan dugu elkarrizketarako. Pertsonentzat eta gure sare sozioekonomikoarentzat neurri eta politika berritzaileak eta onuragarriak sartzeko gai izan gara. Legealdi asko geratzen da, eta Euskal Herria Bilduk proposamenak eta ideiak mahai gainean jartzen jarraituko du, Gasteizek aurrera egiten jarrai dezan eta jendearen bizi-kalitatea hobetzen jarrai dezan. Herritarrak beti gure lehentasunezko bazkidetzat hartuta, hori da Euskal Herria Bilduren konpromisoa: gehiago egitea hobeto bizitzeko».