AKTUALITATEA

| 2021-10-19 11:58:00

EH Bilduk proposamen integral bat aurkeztu du Etxez Etxeko Laguntza Zerbitzua 10 urteko epean progresiboki publiko egiteko. Hori burutu ahal izateko egungo aurrekontua 2,5 milioi euro handitu beharko litzateke (16 milioi euro baino gehiago guztira), behintzat, martxan jartzeko prozesuan. Proposamen hori EH Bilduren BiziOn Zaintza Plan Estrategikoaren barruan dago, eta bi arlo nagusi jorratzen ditu: zerbitzuaren kalitatea hobetzea eta profesionalen lan-baldintzak hobetzea. «Zerbitzu hori pribatizatu eta prekarizatu egin da hasieratik, eta zerbitzu publiko eta kalitatezko bihurtzeko prozesuari ekin behar dio, eskumena duen erakundeak bere gain hartuta. Badakigu ezinezkoa dela zerbitzua egun batetik bestera publiko bihurtzea, eta horregatik diseinatu dugu publifikatzeko prozesu progresibo hau, langileen baldintzak eta zerbitzuaren kalitatea hobetuko dituena», adierazi du Alberto Porras EH Bilduko zinegotziak.

Horrela, 24 orduko arreta eskaintzen duen zerbitzua hobetzea eskatu du EH Bilduk, erabiltzaileei egokitutako laguntza malgu batekin. Era berean, Etxez Etxeko Laguntza Zerbitzuaren orduak gehitzea proposatu du, astean 10 ordutik 14 ordura pasatuz 1. graduan, 16 ordutik 20ra 2. graduan eta 20 ordutik 30era 3. graduan. Horrez gain, astean 6 ordu gehituko dira menpekotasunean erortzeko arriskuan dauden edo autonomia pertsonalean laguntza behar duten pertsonentzat. EH Bilduren proposamenak, gainera, arreta-profil berriak sartzea (psikologia, gerontologia, geriatria) eta kasu bakoitzaren jarraipen indibidualizatua egitea aurreikusten du, arretarekin zerikusia duten eragile guztiekin (gizarte-langilea, kasu-koordinatzailea, erabiltzaileak eta haien ingurukoak eta ELZko langilea). Gainera, zerbitzua eskatzen den unetik hastea eskatzen du EH Bilduk, menpekotasunaren balorazioaren zain egon gabe, itxaron-zerrenda luzea baitu (200 egun baino gehiago).

 

EH Bilduren ustez, Etxez Etxeko Laguntza Zerbitzua oinarrizko tresna da arretarako eta prebentziorako, eta, hala ere, uste du ez dela halakotzat hartzen ari. «Zerbitzura sarbidea eskatzeko menpekotasun balorazioaren itxaron-zerrenda 200 egun baino gehiagokoa da; azken hamarkadan, 28tik 17ra murriztu dira arreta-orduak, eta arreta ez da egokitzen erabiltzaileen beharretara. Horrek guztiak agerian uzten du ELZ bezalako funtsezko zerbitzu batek gabezia handiak dituela», ziurtatu du Viterok, eta pertsonen beharretan oinarritutako ereduaren aldaketaren beharra berretsi du.

Baina ukaezina da zerbitzu baten funtzionamendu egokirako ezinbestekoa dela lan-baldintza duinak izatea zerbitzu horretan diharduten profesionalentzat. Horregatik, EH Bilduk langileen soldata igotzea proposatu du, funtzionarioen baldintza ekonomikoekin parekatu arte eta Udalaren bereizgarriekin lan-uniformeetan, egun ere ez dituztenak.

Era berean, ordutegiak eta zereginak berriz definitzea eskatu du EH Bilduko zinegotziak, zerbitzuak bilduko dituen antolaketa-eredu berri baten bidez, lanaldiak eskuragarriagoak eta bidezkoagoak izan daitezen, goizeko edo arratsaldeko txandak hartzeko aukera emanez, adibidez. «Eta koordinazio-denborak eta -espazioak dira funtsezko elementuetako bat. Ezinbestekoa da langileen beraien arteko koordinazioa ezartzea, baita beste profesional batzuekin ere, hala nola gizarte-langileekin, etab. Horretarako, beharrezkoa izango da koordinazio-lana egiteko udal-espazioa eskaintzea», ziurtatu du Porrasek.

Datozen hilabeteetan, EH Bilduk proposamen hori helaraziko die sektoreko eragileei, eta bilerak egingo ditu eragileekin, proposamena bera eztabaidatzeko.