AKTUALITATEA

| 2025-04-23 09:38:00

EH Bilduk hainbat neurri proposatu ditu Emakumeen Etxeak etxeko eta zaintzako langileei eskaintzen dien aholkularitza soziolaboraleko zerbitzua sendotzeko eta zabaltzeko. Enarak elkarteak aurkeztu zuen proiektua da, eta azken 5 urteetan garatu du, funtsezko zerbitzu gisa sendotzea lortuz. Hain zuzen ere, 2025ean aterako dira berriro aholkularitza soziolaboraleko zerbitzuaren pleguak, eta, horregatik, Maider Uriarte EH Bilduko zinegotziak azpimarratu du «une egokia» dela zerbitzua sendotu eta zabaltzeko «berrikuntzak eta neurriak» ezarriz.

«Zerbitzu honetan egiten ari den lan handia aitortu eta balioetsi nahi dugu, eta eskaintzen jarraitzeaz gain, zerbitzua indartzea eta hobetzea proposatzen dugu», ziurtatu du Uriartek. Hala, EH Bilduko zinegotziak adierazi du hobekuntza horien helburua zerbitzua zabaltzea dela, emakume gehiagorengana iristeko. «Aholkularitzak oso ondo funtzionatzen du, erabiltzaile asko ditu, baina jakin badakigu, zoritxarrez, pertsona askorengana ez dela iristen, ez dakitelako existitzen denik. Horregatik, Berdintasun Zerbitzuak hedapen handiagoa ematea nahi dugu, etxeko eta zaintzako langileen komunitate osoari zerbitzua ezagutarazteko».

Izan ere, aholkularitza hori zaintzaren eta etxeko enpleguaren sektoreko emakume langileek pairatzen duten zaurgarritasun eta prekarietate egoeratik sortzen da, bai eta eskubideak eta baliabideak eskuratzeko orduan pairatzen duten zailtasunetatik ere. Horrela, gaur egun zerbitzuaz arduratzen den Enarak kooperatibak eskubideetan ahalduntzeko prozesu oso bat eskaintzen du, baita lanaz haratago doan aholkularitza bat ere, metodologia integral batean oinarritua, ikuspegi feminista duena eta gizarte-ekonomia eraldatzailea oinarri duena.

Metodologia horren barruan, talde-aholkularitzak daude, prestakuntza-tailer bihurtuta, gai praktikoagoei aurre egiteko, hala nola nomina bat interpretatzeko. Oso ondo baloratutako ikastaroak, tailerrak edo prestakuntzak dira, baina ez dute bertaratze-ziurtagiririk, eta horrek zaildu egiten du, gerora, emakume migratuen (sektoreko gehienak emakume migratuak dira) kasuan sustraitzea frogatzea. Horregatik guztiagatik, EH Bilduk tailerretara joaten diren emakumeei bertaratze-ziurtagiri bat ematea eskatzen du, UPV/EHU edo Caritas bezalako beste erakunde edo entitate batzuek ematen dituzten prestakuntzetan egiten den bezala.

Azkenik, EH Bilduk aholkularitzaren ebaluazio bat sartzea ere eskatu du, zerbitzua jasotzen duten emakumeek jasotako arreta baloratu eta ebaluatu dezaten. «Emakume horiek baino hobeto inork ez daki zer premia dituzten, eta horregatik, aholkularitzak euren beharrak zenbateraino asetzen dituen ebaluatu dezakete. Hori litzateke zerbitzua etorkizunean eta etengabe hobetzen joateko modurik onena», esan du Uriartek, eta EH Bilduk egindako proposamen guztiak zerbitzuko langilearekin kontrastatu eta partekatu direla ziurtatu du ere.

«Azken batean, EH Bildutik aholkularitzak egiten duen lana balioesten dugu, ezinbestekotzat eta kalitatezkotzat jotzen dugu eta sendotu eta indartzearen aldeko apustua egiten dugu, emakume gehiagorengana iritsi ahal izateko eta espazio horretan sortzen den komunitatea zabaltzeko», amaitu du zinegotziak.