AKTUALITATEA

| 2025-02-18 10:30:00

EH Bilduk agerraldia egin du Jundizko Zerbitzu Zentroaren kasuari buruzko azalpenak eskatzeko Udal Gobernuari, izan ere, kasu hau duela 20 urte esleitu zen eta Jundizko industrialdeko 3 lursailetan Zerbitzu Eremua sortzea aurreikusten zuen arren oraindik ez da gauzatu. EH Bilduk azaldu duenez, 2005ean 4,59 milioi euroko esleipena egin zen, eta 30 hilabeteko exekuzio-epea ezarri zen, hau da, 2007rako amaitzea aurreikusi zen; 20 urte geroago eta obra amaitu gabe zegoela, Udalak kalte-ordain espedientea hasi zuen, eta ez-betetzea 3,36 milioi eurotan kuantifikatu zuen, baina, hilabete eskas geroago, erreklamazioa kendu du.

EH Bilduk gertakariak kronologikoki errepasatu ditu, tramaren xehetasunak eta birak ezagutzera emateko. Alderdi politikoak adierazitakoaren arabera, 2004. urtean hasi zen kasu hau, Udalak konkurtsora atera baitzuen kirol-, merkataritza- eta gizarte-erabilerarako hiru lursailen transferentzia; hurrengo urtean, 2005ean, esleipena egin zen, eta 30 hilabete aurreikusten ziren obrak gauzatzeko. 5 urte igaro ziren 2010ean Udalak obrak behin betiko jaso zituen arte, eta beste 5 urte igaro behar izan ziren 2015ean Udalak txosten bat aurkeztu zuen arte, enpresak agindutako guztia egin ez zuela egiaztatzeko. Beste 5 urte gehiago behar izan ziren Ekonomia Sustapen Sailak txostena bere gain hartzeko, eta, ez da 2023ra arte, hau da, ez-betetzea detektatu eta 8 urtera arte, ez-betetzearen kostua 3,36 milioitan tasatzen.

Azkenean, 2024ko abenduan, Gobernu Batzarrak, aldeko txosten juridiko guztiekin, Udalari kalte-galerengatiko kalte-ordainen espedientea abiaraztea ebatzi zuen. Hala ere, handik hilabete eskasera, otsailaren hasieran, Udalak abenduko erabakia ezeztatu eta horren ordez «kontratua betetzeko errekerimendua» ezartzen du. Aitziber Salazar EH Bilduko zinegotziak ez du harridura ezkutatu «udal gobernuak bere buruari egindako zuzenketa» eta bat-bateko iritzi aldaketa horren aurrean. Salazarrek adierazi duenez, «jatorrizko promotoreek 3,36 milioi euro zor dizkiete Udalari eta Gasteizko herritarrei. Ezin dugu onartu administrazioak berdin ez funtzionatzea herritar guztientzat, eta interes ekonomikoak interes orokorraren gainetik jartzea».

Amaitzeko, EH Bilduk zehaztu duenez, ez-betetzeagatiko kalte-ordaina bermatzen duen txostenak hasierako akordioari dagokionez arau-hausteak jasotzen ditu, izan ere, enpresa esleipendunak ez ditu aurrera eraman eraikin sanitario bat, ardoaren museo bat, partzialki kirol instalazioak eta lursail baten urbanizazioa, hasierako proiektuan hala jasotzen zen arren.