AKTUALITATEA

| 2024-10-15 09:11:00

EH Bilduk Gasteizko Ordenantza Fiskalak PSErekin eta EAJrekin adostu ditu. Rocio Vitero EH Bilduren Gasteizko bozeramailearen hitzetan, akordio hori udal gobernuaren proposamena baino «bidezkoagoa eta progresiboagoa» da. Izan ere, EH Bilduk zerga handien, tasen eta prezio publikoen igoeran %4ari eustea lortu du, baita enpresa handiei EJZa %7 igotzea ere (2,1era iritsita), etxebizitza hutsei %50eko errekargua ezartzea OHZn, eta pertsona zaurgarrienak babesten dituzten hobariak hobetzea. Baina, horrez gain, akordio honen bitartez, zerbitzuaren kostu osoa estaltzeko zabor-tasaren nahitaezko igoera betetzeaz gain, PSEren eta EAJren planteamendua baino proposamen bidezkoagoa, orekatuagoa eta progresiboagoa lortu du.

«Akordio honekin, zabor-tasari buruzko lege-agindua betetzen dugu, eta PSE-EAJk proposatutako zerga-igoera %4ra jaisten dugu. Azken finean, akordio justuago eta progresiboago bat lortu dugu, zerbitzu publikoak indartzeko, herritarren ongizatea handitzeko eta udalerriko birziklatze tasak hobetzeko balioko duena», ziurtatu du EH Bilduko bozeramaileak.

Koalizio soberanistak lortutako akordio horrek 15 milioi euro gehiago utziko lituzke Gasteizko Udalean, horietatik 10 zabor tasatik eta 5 milioi inguru gainerako zergetatik. Baina akordio horri esker, 5 milioi inguru horien kasuan, %40 enpresa handien gaineko zergaren igoeratik, ezaugarri berezien Ondasun Higiezinen gaineko Zergaren igoeratik eta EH Bilduk proposatzen duen etxebizitza hutsen %50eko errekargutik etorriko litzateke.

Izan ere, zaborren tasari dagokionez, nabarmentzekoa da EH Bilduk progresibotasun handiagoa lortu duela. Jarduera-epigrafe guztietan, tarte gehiago sartu dira etxebizitzen eta lokalen azaleran oinarrituta, eta beherapen nabarmena eman da lokal eta etxebizitza txikienetan, gobernuaren hasierako proposamenarekin alderatuta.

Etxebizitzen kasuan, Gasteizen 57.000 etxebizitza baino gehiago dira 90 m²-tik beherakoak, udalerriko etxebizitza-parkearen ia erdia. Horientzako guztientzako, EH Bilduk beherapena aplikatzen die zabor-tasan. Era berean, 120m²-tik gorako etxebizitzen ekarpen ekonomikoa hazi egingo da, PSE-PNVren hasierako proposamenarekin kuota ia ez baitzen handitzen.

Lokalen kasuan, kuotaren tarteak ere handitu dira, eta kostuaren banaketa orekatuagoa adostu da, lokal txikienetan neurriz kanpo kargatzen baitzen. Adibidez, 300m² baino gutxiagoko dendek hasierako proposamenarekiko %50 murriztuko dute kuota. Gauza bera gertatzen da 200m² arteko tabernekin edo 250m² arteko jatetxeekin, %75eko beherapena izango baitute txikienek. Tamaina txikiagoko janari-denden kuota ere nabarmen murriztu da, formatu guztietan. Aldiz, handitu egin da tamaina handiagoko negozio eta jardueren ekarpena.

«Argi dago legez ezarritako nahitaezko igoerarekin mundu guztiak gehiago ordaindu beharko duela zaborren tasagatik. Hala ere, EH Bildutik, hori onartuta, progresibotasuna aplikatu dugu, eta lokal txikienentzako eta pertsona zaurgarrienentzako igoerei ahalik eta gehien eustea lortu dugu. Gainera, tasaren karga arintzera datozen hobari batzuk sartu ditugu, eta birziklapen handiagoa eta hobea sustatu dugu», adierazi du Viterok.

Hobariak

EH Bilduk lortutako akordioak hobari batzuk ditu zaborren tasan. Udal gobernuak proposatutako edukiontzi organikoaren irekiera-kopuruaren araberako %10eko hobariari, aparteko %10eko hobaria gehitu zaio akordioaren bitartez bilketa-sistemarako datuak ematen dituzten etxebizitza guztientzat. Era berean, konpostaje-programetarako hobariak %5 igo dira akordioari esker, %20ra arte. Zabor-tasari loturiko hobari sozialak ere %5 handituko dira tarte guztietan, hasierako proposamenarekin alderatuta.

Zabor-tasari lotutako hobariez gain, EH Bilduk pertsonen eta, zehazki, zaurgarrienen babesean sakonduko duten neurriak sartzea ere lortu du, hala nola OHZri lotutakoak LGStik beherako errentetarako. Horrela, herritarrei 1,8 milioi eurorainoko hobariak itzuliko litzaizkieke (orain arte baino ia %25 gehiago). Gainera, EH Bilduk energia komunitate berrientzako hobariak hiru urtetik bost urtera igotzea, EIOZen hobariak hobetzea eta zabaltzea (bereziki, adineko pertsonentzako, irisgarritasun eta efizientzia energetikoko obrak burutu ahal izateko) eta, kirol tasen arloan, gazteen adin-tartea 25 urtetik 30era handitzea lortu du.