AKTUALITATEA

| 2025-01-14 10:29:00

EH Bilduk Udal Gobernuak abenduaren 10ean aurkeztutako aurrekontuen zuzenketen proiektua aurkeztu du, aurrekontu horiek -nahiz eta azpimarratu eurenak ez direla- «aurrerakoiagoak, eraldatzaileagoak eta pertsonen benetako beharrei eta hiriaren erronkei erantzuteko modukoak» izatea lortuko dutelakoan. Guztira 25 zuzenketa partzial aurkeztu dituzte 5 bloke handitan banatuta: babes soziala, etxebizitza, dinamizazio ekonomikoa, trantsizio ekosoziala eta aisialdia (espazio publikoa, kirolak eta bizitza soziala). Guztira, 25 partidak 9.350.000 eurokoak dira.

EH Bildutik 2025erako ordenantza fiskalak onartzearen garrantzia azpimarratu nahi izan dute; izan ere, OOFFen akordioa aurrera atera izan ez balitz, 2025erako aurrekontua izoztu eta murriztu egingo zen. Era berean, azaldu dute erakundeek nahitaez bermatu behar dutela herritarrek egiten duten ahalegina gasteiztarren bizitza hobetuko duten udal proposamen eta politiken bidez itzuliko dela.

Adierazi nahi izan dute, halaber, aurrekontu-proiektu hau ez dela hutsetik abiatzen; izan ere, 9.350.000 euroen guztizko baturatik 3.050.000€ 2024ko aurrekontu-akordioan sartutako konpromiso-kredituak dira. Kopuru horrek jarraipena eman nahi die aurreko ikasturtean abian jarritako 4 proiekturi; izan ere, partidak etxebizitza komunitario berrietan gauzatzeko, alokairuko etxebizitza babestuetan inbertitzeko, energia-komunitateen bidez energia berriztagarria sortzeko eta tokiko merkataritza dinamizatzen jarraitzeko balioko dute, denda eta negozio berriak irekitzeko erraztasunak emanez.  Gainera, aurreko aurrekontu-akordioko proiektu batzuk izapidetze eta/edo gauzatze bidean daude, eta, beraz, ez da beharrezkoa izan berriro proiektuan sartzea: belaunaldien arteko erreleboa, bizikletak mailegatzeko zerbitzua, Monthermoso suspertzea... besteak beste.

Gainerako 6.300.000 euroak 5 bloke handitan banatzen dira. Horien artean, etxebizitzarena nabarmentzen da. Bertan, EH Bilduk 750.000 euroko partida bat sartu du, eta horri, konpromiso kredituetarako aurrez adostutako 1.000.000€ gehituta, 1.750.000 euroko partida bat geratuko litzateke guztira; 2024ko aurrekontu akordioan helburu horretarako bideratutakoaren bikoitza baino gehiago. Kopuru hori etxebizitza publikoaren eskaintza handitzeko izango litzateke, parke propioa birgaitzearen edo etxebizitzak eraikitzearen bidez, Barnekale Berriko kalean gazteentzako aurreikusitako proiektuan bezala.

Gizarte-babesari dagokionez, planteatutako zuzenketek 1.475.000 euro egiten dute guztira. Honek erantzuna emango lioke etxebizitza komunitarioko plaza berriak sortzeari, Gasteizen kalean bizi diren pertsonei zerbitzua emango dien larrialdi-egoeretarako baliabide bat sortzeari eta auzoetako harrera eta bizikidetza hobetzeko neurri eta ekintzei.

Dinamizazio ekonomikoari dagokionez, partiden batura 1.600.000 eurokoa da. Diru hori zuzenean inbertituko litzateke dagoeneko arrakasta frogatu duten planetan, hala nola enplegu emergentean, hainbat kontratazio erraztu baitituzte, edo merkataritza-lokalak dinamizatzeko planetan. Azken horiek Gasteizko erdiguneko hainbat saltokiri lagundu badiete, orain beste auzo batzuetara zabaltzea izango da helburua. Dinamizazio ekonomikoaren blokeak enpresa-hazitegi berrien eskaintza indartzeko neurriak ere jasotzen ditu, jarduera ekonomikoa hasi nahi duten ekintzaileei aukera gehiago emateko. Azkenik, lehen sektoreari banaketan eta merkaturatzean laguntzeko zuzenketak ere sartu dira, kontsumo iraunkorrago baten aldeko apustua eginez.

Trantsizio ekosozialak, laugarren blokeak, 1.625.000 euroko zuzenketak jasotzen ditu, gauzatzea bizkortze aldera. Udal-mailan energia-komunitateak sortzen jarraitzea bilatuko dute, Gasteiz energia-komunitateetan gehien inbertitzen duen Euskal Herriko hiri gisa sendotuz. Gainera, multzo honek zuzenketak izango ditu taxiak eta banaketa-furgonetak elektrifikatzen laguntzeko, enpresentzako eta pertsonentzako aholkularitza energetikoa planteatzeko, eta deskarbonizazio-proiektuetarako eta hondakinak murriztearen aldeko apustua egiten duten enpresa txikientzako laguntza-lerroak ere emateko.

Azkenik, bosgarren blokea Gasteiz hiri erakargarriagoa egiteko erabiliko da, kirolean, kulturan, aisialdian... 850.000 euroko balioa duten zuzenketak eginez. Neurri horiek, besteak beste, Euskararen Hiria eguna errepikatzea, 2026rako jarduerak prestatzea martxoaren 3aren 50. urteurrena dela eta, Zabalgana auzoari eta kirol arloan dituen eskaerei erantzuteko parte-hartze prozesu bat irekitzea, pergolak jartzea hainbat auzotan haurrentzako jolas guneak estaltzeko eta, azkenik, Otazuko aterpetxea berreskuratzea izango dira.

Bost bloke handi horiez gain, EH Bilduk azaldu du bere proiektuak 9,75 milioi euro aurreikusten dituela konpromiso kredituetan 2026 eta 2027 urteetarako. Horrela, arazoei modu «estrategikoan» helduko diete eta proiektuei «jarraipena» ematea lortuko dute.