AKTUALITATEA

| 2025-01-09 09:50:00

2025erako aurrekontu-akordioetan parte hartzeko prest agertu da EH Bildu, betiere 2024ko lorpenetan sakontzen badute, norabide aurrerakoia proiektatzen badute eta ikuspegi eraldatzailea badute. EH Bilduren arabera, funtsezkoa da bizi-kalitatea eta herritarren babesa hobetuko duten proposamen berrien beharra erdigunean mantentzea eta, horrela, epe labur, ertain eta luzean izango diren erronka handien aurrean Gasteiz indartzea.

Joan den abenduaren 10ean, Udal Gobernuak 2025 aurrekontu-proiektua aurkeztu zuen, 475,6 milioi euroko aurrekontuarekin, aurreko urtean baino % 3,5 gehiago; hau da, beste erakunde publiko batzuekin alderatuta, igoera neurtua. Izan ere, aurrekontuko sarreren partida nagusia, gasteiztarrek Arabako Foru Aldundiari ordaindu eta Udalak Fofel bidez jasotzen dituen zergei dagokiena, ez da handituko praktikan, ekitaldi honetan Aldundiari itzuli behar zaizkion 7,5 milioi euroak direla eta. Bestalde, Ordenantza Fiskaletan beharrezkoa zen akordioari esker -EH Bilduren eta PSE-EAJren artean lortutakoa-, Udalak baliabide propio gehiago izango ditu. EH Bilduren arabera, egoera hau «zerbitzu publikoak mantendu eta zabaltzeko orduan baliabide propioak izateko beharraren adibide argia da».

Rocio Vitero EH Bilduko bozeramaileak adierazi duenez, «gobernuaren aurrekontu proiektua lasaitasunez aztertu eta haren agerraldiak entzun ondoren, prest gaude parte izateko eta proiektuari ekarpenak egiteko, EH Bildu akordioan badago, herritarrek irabaziko dutelako konbentzimenduarekin. Udalean lehen indar politiko gisa dagokigun erantzukizunarekin, hiriaren arazoei irtenbidea ematea lehenetsiko dugu, alderdikerien aurrean».

Aurrekontuen negoziazio berri honen aurreko testuingurua EH Bilduk, PSEk eta EAJk 2024rako aurrekontuetan lortutako akordioa da. Akordio hori «positibotzat» jo du EH Bilduk, «betetze maila eta gako aurrerakoia» direla eta. Hala ere, alderdi politikoak azpimarratu nahi izan du «beharrezkoa dela 2024an jaio diren proiektuetan lanean jarraitzea eta, aldi berean, jendearen bizitza hobetuko duten neurri eraldatzaileak gehitzen jarraitzea». Horretarako, azpimarratu dute arreta berezia jarri behar zaiela babes sozialari, etxebizitzari, dinamizazio ekonomikoari eta merkataritzakoari, trantsizio ekosozialak ekarriko duen erronkari eta, azken batean, Gasteiz eta bere auzoak bizirik mantentzeari.