Oso egoera larriak ari dira bizitzen Eibarko bi pertsona nagusien egoitzetan. Segurtasun material eta protokolo faltan, langileria gutxiago egoiliar gehiago hartatzeko… Une latz hauetan, gure elkartasunik beroena helarazi nahi diegu bi egoitzetako langile, egoiliar eta senideei.

| 2020-04-14 17:55:00

Covid-19 osasun krisiaren foko nagusienetarikoak pertsona nagusien egoitzak izaten ari dira. Gipuzkoan, Covid-19ak eragindako 10 pertsona hildakoetatik, 7, egoitza hauetako nagusiak dira. Oso zenbaki gordinak. Errealitate are gordinago bat azalaratzen dutenak. Gipuzkoako Foru Aldundiko eskumeneko pertsona nagusien egoitzek hainbat murrizketa pairatu dituzte azken urteotan. Ratioen handitzea, azpikontratazioa, prekarietatea… Zaintza lanak gutxietsi ditu Aldundiak eta orain ari gara guzti horren ondorio latzak gure begi ikusten. Aspaldi salatu dituzte langileen sindikatoek egoitzetan jasaten ari diren murrizketak, baita EH Bilduk ere. Egun hauetan, ohikoa bilakatu da sare sozialen bitartez egoitzetako langileak segurtasun material eta laguntza eske ikustea. Non dago Gipuzkoako Aldundia? Egoera hau jasanezina da.

Osasun krisialdi honetan konfinatuta hilebete baino gehiago daramagun honetan, ez Egogain ez San Andresen ez dute segurtasun material nahikorik eta herritarren elkartasunera jo behar izan dute, Aldundiak ez dielako material nahikorik bermatzen. Gaur bertan, hilebete beranduago, egingo dizkiete test azkarrak Egogaingo langile eta egoiliarrei. Oso berandu dator neurria, baina hau izan behar da bidea, segurtasun protokoloak ondo betetze aldera.

Gipuzkoako Batzar Nagusietako EH Bildu lehen unetik ari da pertsona nagusien egoitzek bizitzen ari diren krisi latz honen jarraipen estua egiten eta behar diren baliabide guztiak exijitzen.

Gure nagusiek zaintza askoz duinago bat merezi dute, eta zaintza lanetan dabiltzaten profesionalek gizarte eta instituzioen babes osoa izan behar dute. Egoera hauek ezin dira errepikatu gizarte aurreratu batetan eta krisialdi honek paradigma aldaketa bat suposatu beharko luke. Ikasiko ote dute batzuk honetatik?

Aurrera egoitzak. Aurrera San Andres eta Egogain!

COVID-19 krisia: Eibarko EH Bilduk egindako proposamenak

Konfinamendua hasi zenetik eta larrialdi egoera honetan, Eibarko EH Bilduk hainbat proposamen egin ditu eibartar guztien osasuna bermatu eta krisialdi honek sortutako ondorioak txikitzeko.

| 2020-04-08 13:05:00

• Bakarrik bizi diren eibartar nagusienei jarraipena egitea: Lehen unetik, kolektibo zaurgarri honen ezibesteko jarraipena egitea eskatu genuen. Horretarako, bakarrik bizi diren 65 urtetik gorako eibartarrei telefonoz dei egitea proposatu genuen. Beharren diagnostiko bat egite aldera. Proposamena aintzat hartu eta deiak egin dituzte Gizartekintzatik eta nagusi askok eskertu dute gerturatze ariketa hau.
• Tasak eta udal zergak aztertzea: Asko izango dira krisialdi honetan kaltetuak. ERTE batetan sartutakoak, komertzioa itxi behar izan duten dendariak, ostalariak eta hainbat familia eta herritar. Tasa guztiak aztertu beharra daude eta alderdi guztiak ados gaude honetan.
• Udaleko eta patronatoen zerbitzu kontratuetako langileriaren soldatak bermatzea: Krisialdi honek hainbat azpikontratatutako zerbitzuen etetea ekarri du. Lehen unetik, langileria guzti horren soldatak bermatzea eskatu dugu.
• Herritar zaurgarrienen zaintza beharrak asetzea: Udalak Gurutze Gorriarekin bermatuta utzi du zaintza asistentzialena. Aldiz, herritik sortutako bolondres taldea alboratua utzi da. Zaintza kontzeptua ere askoz zabalagoa da eta beharrak handiagoak.
• Eibartar gazteenei omenaldi txikia: Konfinamenduan dauden haurrei zuzendutako marrazki erakusketa egitea ere proposatu dugu. Online momentuz, fisikoa konfinamendua bukatu ondoren. Itxialdian etxean egindako marrazkiak erakusteko aukera eskaini diegu omenaldi xume modura.
• Etxeko langileen egoerari buruzko lanketa: Kolektibo zaurgarrienetariko bat da etxeko langileen kolektiboa. Krisialdi honek lan egoeran eragin handia suposatu die. Udalak egoera honetara gerturatzea eskatu dugu.
• Arrakala digitala eta teknologikoa ekiditzeko internetera sarbidea eskaintzea: Eskola orduak jarraitzeko zailtasunak dituzten haurrak eta familiak daude herrian. Askok internetera sartzeko aukerarik ere ez dutelarik. Udalak USB bitartez arrakala teknologikoaren bukatzeko internetera sarbidea eskaintzea proposatu dugu. Udalak momentuz, ikasgaiak banatu dizkie etxez etxe 50 bat familiei.
• Etxekolanak online zerbitzua: Jakin badakigu ere badaudela hamaika familia arazoak dituztenak haurrei etxekolanekin lagundu eta jarraipena egiteko. Bergarako adibidea jarraituz, etxekolanetan laguntzeko online zerbitzua ere martxan jartzea eskatu dugu.
• 2020ko udal aurrekontua guztiz berraztertzea krisialdiak ekarriko dituen ondorioei erantzuteko behar haina baliabide ekonomiko izateko: familia eta herritar askok ondorio larriak pairatzen ari dira eta beste askok pairatuko dituzte, osasun krisialdi honen ondorioz. Ondo daude gainontzeko instituzioetatik etorriko zaizkien laguntzak, baina Eibarko Udala eibatarren ondoan egon behar du. Aurrekontua goitik behera berraztertzea eskatu dugu. Premiazkoak ez diren ekintza guztiak 2021era mugitu eta horrela, behar guzti horiek asetzeko baliabide ekonomikoak izango genituzke. Ez ohiko uneetan, ez ohiko eta premiazko erabakiak hartu behar ditugu. EH Bildu prest dago horretarako.

• «
• 1
• 2
• 3
• 4
• 5
• 6
• 7
• 8
• 9
• »