Osasun krisialdia dela eta aurrekontuan doikuntza ausartak egin beharko ditu Eibarko Udalak. Baita lehentasun berriak markatu ere. Gutxienez berdina egitea eskatzen diogu eskualdeko Garapen Agentziari. Kudeaketa plana berraztertu eta lehentasunezko ekintzak burutzea.

| 2020-05-19 11:30:00

Krisialdi larria pairatuko dugu Eibarren eta Debabarrenan. Eragile guztien elkarlana inoiz baino beharrezkoagoa izango da. Eibarko egoera sozioekonomikoari buruz asko dauka esateko Debegesa Garapen Agentziak. Baina Udalak egin duen bezela, lehentasun berriak markatu eta kudeaketa plana lehenbailehen eguneratzea eskatzen dio EH Bilduk.

Debegesak krisialdi garai honetan eskualdeko garapen ekonomikoa bermatzeko txostena helarazi digu Udalei. Bertan hainbat ekintza martxan jartzea planteatzen ditu. Baina kudeaketa planean jasota ez dauden ekintzek gainkostua dute. Ez da bidezkoa eta Eibarko EH Bilduk ez du horrelakorik onartuko. Denok markatu behar izan ditugu lehentasun berriak, Debegesak ere berdina egin beharko luke. Jar ditzala martxan Eibarko garapen sozioekonomikoa bermatuko dituzten ekintzak, baina EH Bilduk ez du inolako gainkosturik onartuko. Norabide berdinean ekiteko ordua da.

Lan orientazio zerbitzua Udalean eskaintzea

Krisialdi honi aurre egiteko Talka Plana adostu berri dugu Eibarko Udalean. Talka Planeko neurri asko, EH Bilduk proposatutako mahai sektorialetan kontrastatu genituen hainbat eragilerekin. Gizarte Ekintza Mahaian, lan orientazio zerbitzua udalean eskaintzea proposatu zuen EH Bilduk. Harrera oso ona izan zuen proposamenak eragileen artean. Gaur egun, Garapen Agentzian eskaintzea da zerbitzua, Azitaingo industrialdean.

Enplegua, pertsonen ongizatea eta garapen sozioekonomikoa erdigunean jartzeko ordua da. Eta Eibarko erdigunean egon beharko luke berebiziko garrantzia duen zerbitzu hau. Lanbidek ez du gaitasunik lan orientazio zerbitzu duin bat aurrera eramateko, hain zuzen ere, Eibarko langabetuen perfilak behar duen zerbitzu garrantzitsuena. EH Bilduren ustez eta krisialdi gogor honen aurrean, Eibarko udalak Gizartekintza sailarekin elkarlanean Lan orientazio zerbitzua martxan jartzeko ordua da.

Peatonalizazioan sakontzea eskatu du EH Bilduk

Covid-19 osasun krisi larriak biztanleriaren mugikortasun ohiturak aldatu ditu. Herritarrek ibiltzeko toki zabalagoak behar ditugu segurtasun tarteak bete ahal izateko. Deseskalada fase honetan gainera, ohikoa da eibartarrak karreterak hartu eta ibilgailuei tokia hartzen ikustea. EH Bildurentzat ordua da hiriaren egituraz hausnartzeko eta peatonalizazioan gehiago sakontzeko.

| 2020-05-08 11:02:00

Osasun krisiak kotxez eginiko desplazamenduak murriztu ditu eta Eibarko hiriaren egiturak dituen gabeziak ere oso agerian utzi ditu. Erabateko lehentasuna dute ibilgailuek. Paradigma aldaketa bat aurrera eramateko une egokia bizi dugu. Gainera, ostalariek terrazak handitzeko eskaera mahai gaineratu duten honetan, EH Bilduk argi dauka hausnarketa hori oinezkoentzako guneak handitzearekin lotuta joan behar dela.

Une egokia da ere, Eibar osoa zeharkatu dezakeen bidegorri-pasealekua gauzatzeko. Barrenatik Amañara joango zena. Aspaldi dabil EH Bildu errepikatzen: Oso inbertsio ekonomiko gutxirekin etekin sozial eta komunitario handia izango luke proiektu honek.

EH Bildu beraz, prest azaltzen da peatonalizazioan sakontzeko, ordutegiak handitzeko, gune gehiago sortzeko, espaloiak handitzeko eta hiri barruko bidegorri-pasealekuan aurrera pausoak emateko. Azken finean, hiriaren egitura aldatu eta herritarrek espazio publikoa berreskuratzeko. Eibarko kaleak ireki!

• «
• 1
• 2
• 3
• 4
• 5
• 6
• 7
• 8
• »