Oso egoera larriak ari dira bizitzen Eibarko bi pertsona nagusien egoitzetan. Segurtasun material eta protokolo faltan, langileria gutxiago egoiliar gehiago hartatzeko… Une latz hauetan, gure elkartasunik beroena helarazi nahi diegu bi egoitzetako langile, egoiliar eta senideei.
Konfinamendua hasi zenetik eta larrialdi egoera honetan, Eibarko EH Bilduk hainbat proposamen egin ditu eibartar guztien osasuna bermatu eta krisialdi honek sortutako ondorioak txikitzeko.
Osasun krisi larri honetan, neurri ausartak eta adostuak hartu behar dira. Lehen unetik gainontzeko alderdiekin batera elkarlanean aritu da Eibarko EH Bildu. Argi dugu egin beharreko ibilbidea: 2020ko aurrekontu osoa aztertzea, premiazkoak ez diren ekintzak 2021era atzeratzea, eta baliabide ekonomikoak Covid-19aren krisialdiak eragin eta eragingo dituen ondorioak apaltzeko bideratzea. Urte berezia izango da aurtengoa, neurri bereziak beharko dituena.
Eibarren indarrean dugun Plan Nagusia higiezin-boomaren garaian idatzi zen. Aspaldi zaharkituta dagoela, ez dagoela Eibarko egungo egoera sozioekonomikoarekin lerratuta. EH Bildu ere aspaldi dabil Plan Nagusi berria idazteko eskatzen, baina PSOEren udal Gobernua oso astiro dabil gaiarekin.