Eibar

Hiriko erronka ezberdinek duten paralisiaz ohartarazi du EH Bilduk

Erronka handiak ditu hiriak aurretik baina hainbat proiektu geldirik ditu PSEren udal gobernuak. Ordua da alkate berriaren salmenta eta promozioarekin bukatzeko. Ordua da erronkei aurre egin eta lanean hasteko.

| 2021-03-18 12:44:00

Alkate aldaketarekin batera, geldialdia iritsi da Eibarko Udalera. Proiektu asko eta asko geldirik daudela salatu du EH Bilduk. Erronka handiak ditu herriak aurretik eta horrela gogoratu zion Gorka Errastik, EH Bilduko bozeramaileak, alkate berriari alkate aldaketa Plenoan:

- Hirigintza Plan Orokorra berritzen hasiak gara, baina geldo doa, oso geldo. Hiria egituratuko duen dokumentu garrantzitsu honen diagnostikoari ekarpenak egin dizkio EH Bilduk duela aste batzuk eta oraindik ez dugu erantzunik jaso. Berritze prozesua luzea da baina ezin du PSEk gehiago luzatu.
- Txonta eta Barrena auzoen biziberritzea premiazkoa da.
- Errebal berriko obra laister bukatuko da. Dagoeneko bertara joango diren baserritarrek hitzarmena sinatuta izan beharko lukete. Bertako postuen eta tabernaren titularrak ere izendatuta egon beharko lirateke. Zergaitik ez dituzte behingoz pliegoak lotzen? Eta noski, EH Bilduk urteetan eskatutako dinamizatzaile soziokulturala aspaldi egon beharko litzateke lanean eta Errebal eta Coliseo traktore izateko buruari eragiten.
- Zer egingo dute langabezi tasari buelta eman ahal izateko? Joan zan krisialditik zama latza da Eibarko langabezi tasa altua. Formakuntza eta dirulaguntza puntualek ez diote buelta eman egoerari. Hau eta hiriak aberastasuna berreskuratu ahal izateko eman beharko den berrindustrializazioa, premiazkoak dira.
- Noiz lotuko ditugu Europako Funtsetara aurkeztuko ditugun Eibarko proiektu eraldatzaileak? Aspaldi eskatu dugu adostasun foroa eta oraindik ere ez dugu honen berririk. Edo trenaren estaldura al da PSEren lehentasun bakarra?

Ordua da beraz, argazki, propaganda eta promozioekin bukatzeko eta hiriarentzako benetan lanean hasteko. Geldirik, iniziatiba pribatuaren zain edo gainontzeko administrazioen esku hartzeen zain, ez diozkiogulako erronka hauei behar bezela erantzungo.

Errebal eraikinaren obrak diru publikoa xahutzen jarraitzen duela salatu du EH Bilduk

Enpresa eraikitzaileak obrarekin jarraitzeko 700.000€ gehiago behar dituela jakinarazi digute. Noiz arte jarraituko du diru publikoa xahutzen Errebal eraikinak?

| 2020-07-28 17:53:00

Atzoko Plenoko puntu bat izan zen Errebal obrarentzat diru gehiago bideratzea. EH Bildu oso kritikoa izan zen erabakiarekin. Obra batek ez al dauka gastu mugarik? Langileriaren lan baldintzak hobetzeko, garbiketa zerbitzua berriz publiko egiteagatik zinegotziok kartzela zigorra izateko arriskua daukagun bitartean, obra batera diru publikoa etengabe bideratu al daiteke? Ez dauka ez hanka ez buru. Oso haserre dago EH Bildu.

2020 urte latza daramagu. Aurrekontuarekin malabarismoa egin dugu, hainbat milioitan aurrekontua murriztu eta krisiari aurre egiteko Talka Plana finantzatzeko. Baina orain, PSOEren Udal Gobernuak 2021eko aurrekontua 710.000 eurotan hipotekatu nahi du, pertsonen ongizatean inbertitu beharrean, porlanean gastatzeko.

Gainera, 710.000 euro gehiago bideratzeak ez du esan nahi obraren likidazioa heltzerakoan enpresak diru gehiago eskatuko ez digunik. Gogorarazi beharra dago azken lizitazio prezioa 6.400.000 eurotan jarri zuela Udalak. Iza-Campezo enpresak irabazi zuen lehiaketa publikoa, milioi bateko beherapenarekin, 5.370.000 eurotan. Dagoeneko 710.000 gehiago eskatu dizkigute. Likidazioan beste 300.000 euro eskatuz gero, obraren bukaerako prezioak Udalak markatutako lizitazio prezioa gaindituko luke! Beste marka bat Errebalen historia tristearentzat.

Nazkatuta gaude enpresa eraikitzaileek eta administrazio publikoek duten joko maltzur honekin. Lehiaketa irabazteko prezioak bota, obra bukatu arte diru gehiago eskatu eta administrazioak etengabe estutuz. Gainera praktika hau normaltzat hartzen da!

Ez kostua bakarrik, epeak ere luzatuko dira eta 2021eko urte erdialdean bukatzea aurreikusten da orain. Gauzak horrela eta PSOEren udal gobernuak 2020rako bukatuta egongo zela askotan zin egin duenez, galdera zehatza bota genien Plenoan, baina ez genuen erantzunik jaso: udal gobernuko kideren batek azaldu ahal dezake bi esalditan ze zerbitzu eskainiko diren zehazki Errebal eraikinean? Dagoeneko zehaztuta egon beharko litzateke baina ez ziren erantzuteko gai izan.

EH Bilduren konpromisoa oso argia da. Eraikina bukatuta eta martxan ikustea nahi dugu. Baina edozein preziotan? Zein da Errebal eraikinak izango duen kostua urte guzti hauek eta gero?

Garapen ekonomikoan murrizketak salatu eta udal lan orientazio zerbitzua martxan jartzearen beharraz ohartarazi du EH Bilduk

Ekaineko Plenoan udal dirulaguntzetan aldaketak onartu ziren. EH Bilduk Garapen Ekonomikoan egindako murrizketak salatu zituen. Gainera, udal lan orientazio zerbitzua martxan jartzearen garrantzia azpimarratu du.

| 2020-07-10 11:35:00

Osasun krisialdi hasieratik udal aurrekontua bere osotasunean berraztertzeko eskaera egin du EH Bilduk. Azterketa hori egin da baina ez gaude ados emandako murrizketa batzukin, batez ere Garapen Ekonomikoa ardatz dutenekin.

Lan munduan hobetzeko dirulaguntza ildoa dago martxan Udalean. Formakuntzak eta lanean hobetzeko egindako ikasketak diruz laguntzen dira ildo honen bitartez. PSOEk partida hau murriztu du, diruz laguntzen diren ekintzen zerrenda handitu beharrean. Bizi dugun krisi egoera honetan udal gobernuak hartutako erabaki honek ez dauka ez hanka ez buru. Are larriagoa da oraindik  Gizarteratze enpresak sortzeko dirulaguntza ildoa bere osotasunean ezabatzea. Krisialdiak gogor joko du Eibar, gainera, baztertzea arriskuan dauden herritarrek pairatuko dituzte ondorio larrienak, beraz, nola da posible kolektibo honen lan txertatzean murrizketak egitea?

EH Bilduren ustez, kontrako bidea jarraitu behar du Udalak. Langabezi maila azkar goraka doan une honetan, lan munduan txertatzeko ekintzetan eta lan orientazio pertsonalizatuan jarri beharko luke indarra Eibarko Udalak. Ez al dugu ezer ikasi azken urteotan? Eibarko langabetu perfilari erantzun ahal izateko ekintza egoki eta arrakastatsuenak lan orientazio pertsonalizatua txertatuta eraman dituztenak izan dira. Hau da jarraitu beharreko bidea.

Azken urteotan Lanbide kolapsatuta dago, ordua da beraz, udal lan orientazio zerbitzua martxan jartzeko. Zerbitzu zentrala izan beharko litzateke eta zentrala den heinean, hiri erdigunean kokatu. Ez hori bakarrik, lan orientazio zerbitzuak zeharka egin beharko luke lan Garapen Ekonomiko eta Gizartekintza sailekin. EH Bilduk lanean jarraituko du udal lan orientazio zerbitzua gauzatu arte.

 

Pertsonak politiken erdigunean jartzeko ordua dela uste du EH Bilduk

Osasun krisialdian egindako lanaren berri eman du EH Bilduk. Gainera, etorkizunera begira eman beharreko pausuak azaldu dituzte. Elkarlana eta eibartarren ongizatea beti ardatz.

| 2020-05-30 09:04:00

Bizi dugun krisialdi latz honetan, elkarlana lehenetsi dugu. Alkatetzarekin batera esku hartu dugu, proposamenak egin eta eibartarrentzat irtenbideak topatu ditugu hilabete hauetan. Alderdikerietatik harago, kokudeaketarako eta elkarlanerako egunak izan dira. Harro gaude gainera egin dugun lanaz.

Talka eta erreskateak. Horiek dira buruan izan ditugun printzipioak. Bizi eta biziko ditugunak jakinda, obretara pertsonen ongizatera baino diru gehiago bideratzea planteatze hutsak ez dauka ez hanka ez buru. Argi geneukan dendari, ostalari, autonomo, pertsona eta familien ondoan egon behar ginela eta garala. Horregatik Talka Planean ezinbestekoak ikusi ditugu, besteak, beste, ondokoak jasotzea: automoentzat dirulaguntza zuzenak, negoziak dibertsifikatzeko laguntzak, enplegu industriala mantentzeko beste ildo bat eta nola ez, herriko komertzio eta ostalaritza txikian herritar guztien kontsumoa sustatzea. Gainera, EH Bilduk proposatuta martxan jarritako mahai sektorialak oso aberasgarriak izan dira eta talka planeko neurri posibleak eragileekin kontrastatzeko eta beraiekin batera adosteko aukera eman digute.

EH Bildurentzat azken hilabeteotako kudeaketa zailena, eskumako alderdi batekin egoeraren diagnostikoa konpartitzea eta krisiari aurre egiteko neurriak adostea izan da. Krisialdiak politiketan ditugun ezberdintasunak gehiago azaleratu ditu.

2020ko aurrekontuak 6 hilebeteetako bizitza izango du. Ez ohiko egoerek ere ez ohiko neurriak behar dituzte. Horrelakoa behar du aurtengo aurrekontuak eta datozen urteetakoak ere. Aurreko krisialdi larritik gutxika gutxika burua altzatzen ari ginela, beste krisialdi batek jo gaitu. PSOE zerura begira egon izan ez balitz, 2012an sortu zuen Garapen Ekonomiko sailak nahi beste profesional izango lituzke lanean, krisiari aurre egiteko ekintzak pentsatu eta garatzen. Teknikari bakarrak jarraitzen du bertan lanean eta aurrera eramandako ekintza gehienak azpikontratatuak izaten jarraitzen dute. PSOEk berriz ere trena galdu du.

Datozen aurrekontuek pertsonen ongizatea, duintasuna eta garapen ekonomikoa izan behar dute ardatz. Pertsonak jarri behar dira politika guztien erdigunean. Udal tasak aztertzeko prest dago EH Bildu. Krisialdi hau ez dugu betikoek ordainduko, gehien dutenek, pixka bat gehiago emateko bideak aztertu beharra dago. Deskonfinamendu garai honetan ere, kulturak eta kultur eskaintzak berebiziko garrantzia izango du, baita herritarren osasun mentalarentzat ere. Kultur kontsumoa sustatu eta zabaltzeko, besteak beste, irailetik urte bukaerara, Coliseoko programazioa prezio erdira jaistea proposatu dugu.

EH Bilduk ezinbestekoa ikusten du Eibarko Plan Estrategikoaren eguneratzea. Erdibidean dago plana, 5 urterako bizitza du. Bizi dugun krisialdia ikusita, plana eguneratzea eskatu dugu berandu baino lehen. Baliabideak urriak diren honetan, alderdien arteko akordio estrategikoek berebiziko garrantzia izango dute hiriaren etorkizunerako.

 

Debegesa egoera berrira egokitzeko ordua dela uste du EH Bilduk

Osasun krisialdia dela eta aurrekontuan doikuntza ausartak egin beharko ditu Eibarko Udalak. Baita lehentasun berriak markatu ere. Gutxienez berdina egitea eskatzen diogu eskualdeko Garapen Agentziari. Kudeaketa plana berraztertu eta lehentasunezko ekintzak burutzea.

| 2020-05-19 11:30:00

Krisialdi larria pairatuko dugu Eibarren eta Debabarrenan. Eragile guztien elkarlana inoiz baino beharrezkoagoa izango da. Eibarko egoera sozioekonomikoari buruz asko dauka esateko Debegesa Garapen Agentziak. Baina Udalak egin duen bezela, lehentasun berriak markatu eta kudeaketa plana lehenbailehen eguneratzea eskatzen dio EH Bilduk.

Debegesak krisialdi garai honetan eskualdeko garapen ekonomikoa bermatzeko txostena helarazi digu Udalei. Bertan hainbat ekintza martxan jartzea planteatzen ditu. Baina kudeaketa planean jasota ez dauden ekintzek gainkostua dute. Ez da bidezkoa eta Eibarko EH Bilduk ez du horrelakorik onartuko. Denok markatu behar izan ditugu lehentasun berriak, Debegesak ere berdina egin beharko luke. Jar ditzala martxan Eibarko garapen sozioekonomikoa bermatuko dituzten ekintzak, baina EH Bilduk ez du inolako gainkosturik onartuko. Norabide berdinean ekiteko ordua da.

Lan orientazio zerbitzua Udalean eskaintzea

Krisialdi honi aurre egiteko Talka Plana adostu berri dugu Eibarko Udalean. Talka Planeko neurri asko, EH Bilduk proposatutako mahai sektorialetan kontrastatu genituen hainbat eragilerekin. Gizarte Ekintza Mahaian, lan orientazio zerbitzua udalean eskaintzea proposatu zuen EH Bilduk. Harrera oso ona izan zuen proposamenak eragileen artean. Gaur egun, Garapen Agentzian eskaintzea da zerbitzua, Azitaingo industrialdean.

Enplegua, pertsonen ongizatea eta garapen sozioekonomikoa erdigunean jartzeko ordua da. Eta Eibarko erdigunean egon beharko luke berebiziko garrantzia duen zerbitzu hau. Lanbidek ez du gaitasunik lan orientazio zerbitzu duin bat aurrera eramateko, hain zuzen ere, Eibarko langabetuen perfilak behar duen zerbitzu garrantzitsuena. EH Bilduren ustez eta krisialdi gogor honen aurrean, Eibarko udalak Gizartekintza sailarekin elkarlanean Lan orientazio zerbitzua martxan jartzeko ordua da.

ALBISTEAK

Peatonalizazioan sakontzea eskatu du EH Bilduk

2020-05-08 11:02:00

Covid-19 osasun krisi larriak biztanleriaren mugikortasun ohiturak aldatu ditu. Herritarrek ibiltzeko toki zabalagoak behar ditugu segurtasun tarteak bete ahal izateko. Deseskalada fase honetan gainera, ohikoa da eibartarrak karreterak hartu eta ibilgailuei tokia hartzen ikustea. EH Bildurentzat ordua da hiriaren egituraz hausnartzeko eta peatonalizazioan gehiago sakontzeko.

Komertzio txiki eta ostalaritzarentzat premiazko talka planak behar direla uste du EH Bilduk

2020-05-04 17:05:00

EH Bilduk eskatutako mahai sektorialetan ere premiazko Talka Plan hauen beharra agerian geratzen ari da. Osasun krisiaren ondorioz, 300 komertzio txikik eta 155 taberna eta jatetxek itxi behar izan dituzte beraien ateak Eibarren.

Krisi Mahaia sortzea proposatu du EH Bilduk

2020-04-21 10:33:00

Krisi mahai sektoriala eratzea premiazkoa dela uste du EH Bilduk. Osasun krisi larrialdi honek erantzun eta neurri bateratuak behar ditu. Proposatzen dugun krisi mahaiak alderdi, eragile ekonomiko, sozial eta sindikalek osatuko lukete.

Egogain eta San Andres egoitzetako langile eta senideei elkartasuna helarazi nahi die EH Bilduk

2020-04-14 17:55:00

Oso egoera larriak ari dira bizitzen Eibarko bi pertsona nagusien egoitzetan. Segurtasun material eta protokolo faltan, langileria gutxiago egoiliar gehiago hartatzeko… Une latz hauetan, gure elkartasunik beroena helarazi nahi diegu bi egoitzetako langile, egoiliar eta senideei.