Eibar

Albisteak

Zaldibarko zabortegiaren hondamendiaren inguruan herritarrei informazio osoagoa eskaintzea eskatu dio EH Bilduk udal Gobernuari


Eskaera bat zuzendu diogu Alkate eta PSOEren Udal Gobernuari. Azken helburua, eibartarrek izan ditzazketen zalantza eta informazio beharra asetzea da. Hondamendi honen aurrean, herritarrek informazio gardena merezi dute.

| 2020-02-19 11:05:00

Bost puntutako eskaera bideratu diegu:

  1. Eusko Jaurlaritzari egiten ari diren aire, ur eta bestelako neurketen emaitzak eskatzea eta neurketa hauen emaitzak Eibarko biztanleei azaltzea: Gure neurketa propioek webgunean atal bat duten bezela, Jaurlaritzakoek ere une oro azaltzea eskatu dugu. Gardentasuna.

 

  1. Eibarko udal ordezkari guztien oniritzia izango duen kanpo ingurumen aholkularitza eta ikuskaritza  bat kontratatzea  azterketak egiteko: Alderdi politikoetatik harago, teknikari aditu multidisziplanarrak beharrezkoak dira herritarrak informatu eta lasaitu ahal izateko.

 

  1. URA Agentziari, Ego-gain eta Deba erreketako uraren kalitatean neurketak egiteko eta neurketa horien emaitzak une oro herritarrei jakinarazteko eskatzea: Jakin badakigu neurketak egiten ari direla. Datu hauek ere webgunean eta herritarren esku egon beharko lukete une oro.

 

  1. Zabortegiaren hondamendiaren arrazoiak ikertzeko Eibarko Udala Durangoko epaitegian irekitako auzian pertsonatzea eskatzen dugu: Hondamendia gertatu ahala Durangoko Epaitegiak aurretiazko eginbideei hasiera eman zien. Gertatutakoaren egi guztia jakin nahi dugunez, Eibarko Udala auzi horretan pertsonatzea ezinbestekoa da.

 

  1. Eusko Jaurlaritzari herritarren eskura "Leihatila bakarra" jartzeko eskatzea, gertatzen ari denari buruzko informazioa denbora errealean lortu ahal izateko, baita babes zibilari zalantzak argitu ahal izateko ere. Herritarrei auto-babesari buruzko informazioa ematea: Ermuko esperientzia ikusita, gaur Coliseoan eskainiko den informazio bilera irekia ez da nahikoa, herritarrek une oro behar dute informazio zuzena krisialdi honetan, horretarako Jaurlaritzak premiazko informazio leihatila bakarra martxan jartzea eskatu dugu. Informazio iturri guztiak izango dira baliagarriak (webgunea, bandoak, oharrak pegoretan edo auzoetako paneletan), ahalik eta herritar gehiengana heldu ahal izateko.