AKTUALITATEA

| 2026-02-25 13:11:00

Bihar Loiolako Erriberetan dagoen G.002 lurzatiari buruzko mozio arrunta eztabaidatuko da osoko bilkuran. Eta zarata politikoaren testuinguru honetan, ezer gutxi ematen diona sakoneko eztabaidari, EH Bildutik nabarmendu nahi dugu gakoa ez dela zenbat, baizik eta nola.

Alde horretatik, gogorarazi nahi dugu joan den hilean, urtarrileko osoko bilkuran, auzo bereko lursail batean 83 zuzkidura-apartamentu eraikitzeko Plan Berezia onartu zela, g.007 lursailean. Auzotarren eskaerari erantzunez, EH Bilduk ez zuen Plan Berezia babestu, uste baitugu alternatiba bideragarriak daudela, eta desblokeatu beharrekoak, hiriko beste puntu batzuetan, hala nola AEMETen edo Agustindarren eraikinean. Hirigintza ikuspegitik desegokitzat jotzen dugun lursail batera jotzeko beharrik ez dago eta areagotu egiten du inguruko ekipamendu komunitarioen defizita.

Ricardo Burutaran zinegotziak asteazken honetan hedabideen aurrean egin duen agerraldian esan duenez, udal jabetzako lursail hori dotazio gisa kalifikatuta zegoen auzoarentzat, eta bertan ekipamendu desberdinak aurreikusten ziren auzoarentzat, G.002 lursailean ez bezala, Eusko Jaurlaritzarena baita. Bihar eztabaidatuko dugun azken honetan, bere garaian Eusko Jaurlaritzak Donostian dituen zerbitzu administratibo guztiak zentralizatzeko azpiegiturak eraikitzea aurreikusten zen.

Ezin dugu alde batera utzi G.002 lur sail honek tirabirak sortu dituela Udal Gobernuaren zein Eusko Jaurlaritzaren bazkideen artean. Zaratatik aldendu eta eztabaida zentratu nahi dugu, ordea: EH Bilduren ustez, partzela honetan prozesu parte-hartzaile erreal eta eraginkor bat lehenetsi behar da, bertan kokatu beharreko ekipamenduak zein etxebizitza dotazionalak zehazteko. Beti, berriro diogu, Loiolako Erriberako bizilagunekin adostasuna bilatuz.

Horregatik guztiagatik, EH Bilduk zuzenketa bat aurkeztu du, g.007 ekipamenduko lurzatiari eman beharreko aurreikuspena berriz aztertzeko eskatuz, auzoaren ekipamendu-beharrei zerbitzua eman ahal izateko. Hau da, aurreko osoko bilkuran onartutakoari buruz hausnartzeko eskatzen dugu.

Bihar eztabaidatuko dugun G.002 lurzatiari dagokionez, aipatutako gehikuntza-zuzenketa onartzeko eskatzeaz gain, gure babesa benetan partaidetza-prozesu eraginkorra eta bermeduna irekitzera baldintzatuko dugu, baita Loiolako Erriberan beharrezkoak diren ekipamenduei lehentasuna ematera ere. Beharrezkoa da adostasuna bilatzea eta ekipamenduei dagokienez dauden gabeziak asetzea.

Garrantzitsuena, ezinbestekoa, parte-hartze prozesu horretatik auzoan gauzatu beharreko proiektua sortzea da. Hori dela eta, EH Bilduk konpromisoa hartu du herritarrekin prozedura hori bultzatzeko eta prozesua bermatzeko. Hala helarazi diegu zuzenean bizilagunei.