AKTUALITATEA

| 2026-05-21 13:30:00

Etxebizitza parkea handitzeko bai ala bai lur gehiago okupatuz egin behar denaren ideia zalantzan jarri nahi dugu eta hausnarketa sakon bat mahai gaineratu. Egin al daiteke beste modu batera? EH Bildun uste dugu baietz eta kalifikazioa da aukera bat. Izan ere, sustatu nahi dugun etxebizitza ereduak oinarrian dituen lau ezaugarrietako bat horixe baita: barrurantz hazteko garaia da. Baina zer da barrurantz haztea?

Besteak beste, garapen urbanistiko berriak leku degradatuetan edo zaharberritzeko beharra duten eremuetan egitea lehenestea da, baita ere dagoeneko eraikita dauden eremu zein auzoetan etxebizitza sortzeko aukerak sustatzea. Biak ala biak, etxebizitza babestua sortzeko abagunea direla uste dugu.

Ostegun goiz honetan Donostiako Gros auzoan Juankar Karlos Izagirre EH Bilduren udal bozeramaileak Izar Hernando eta Ricardo Burutaran zinegotziekin batera egin duen agerraldian adierazi duen bezala, barrurantz haztea gakoa da modu erabakigarrian bi norabidetan eragiteko: etxebizitza babestu gehiago sortzeko eta Donostiako auzoen artean dauden desorekak lausotzeko.

«Aste honetan Sebastiá Jornet hirigilea egon da gurean, eta nazioarte mailan punta puntako ibilbidea duen adituak argi azaldu du: borondate politikoa badago posible da, tresnak existitu existitzen direlako. Are gehiago, Auzitegi Gorenak ere babestu du norabide hau berriki sinatu duen ebazpen batekin. Zehazki, berretsi du hirigintza-plangintzak etxebizitza babestuen erreserbak ezar ditzakeela eraikita dagoen hirian, kalte-ordainerako eskubide automatikorik sortu gabe, gainera. Eta Donostiak maneiatzen dituen datuak ez dira nolanahikoak», adierazi du Izagirrek.

Donostiako Plan Orokorraren berrikuspenaren aurrerapen testuak, Jornetek berak aditu lan talde batekin ondu duena, dio 4.000 etxebizitzatik gora lortu daitezkeela, eta babestu gisa izendatu noski, kalifikazioaren formula aplikatuz. Eta hau, lur metro koadro bakar bat gehiago kontsumitu gabe. Aipatu nahi dugu bost egoeratan dela aplikagarria hau: etxabeak bizitoki bihurtuz, etxebizitza handiak segregatuz, solairuak gehituz (levante gazteleraz), eraikin osoak modu integralean zaharberrituz eta etxe txikietan dentsifikazioa gehituz. «Kasu hauetan sortutako etxebizitza berrien portzentai bat babestu gisa izendatuko litzateke eta alokairuan edo salmentan izan, prezio tasatuan izango lirateke derrigorrez», zehaztu du.

Formula honen hiru ezaugarriak oso positiboak dira, eta hirian bizi dugun egoerari buelta emateko bultzada litzateke aplikatzen hastea. Lehenik eta behin, lur gehiago kontsumitzeari utziko genioke dugunari etekin handiagoa ateratzearen aldeko apustua eginez. Bigarrenik, udalarentzat kosturik gabeko operazioak lirateke, ondasunen jabeek hartuko lituzketeelako lanak bere gain eta, hirugarrenik, etxebizitza babestu berria sortzea ezinezkoa den auzoetan ere aukerak sortuko genituzke donostiarrentzat , finean, bizitza proiektuak bertan egiteko aukerak eskainiz. Gros da adibide bat.

Gros, hain zuzen, bizi dugun errealitatearen isla gordina da. Erabat saturatua dagoen auzo honetan zaila da etxebizitza promozio berriak sustatzea, eta egiten den apur hori bakar batzuen esku baino ez dago, inbertsio pribatuak dira eliteei zuzendutakoak. Sartu den kapitala inbertsio funtsak dira, funts putreak ere zenbait kasutan bizilagunak beren auzoetatik kanporatzen dituztenak, eta egiten den guztia luxuzkoa da. Proposatzen dugun formularekin, kalifikazioarekin, norabide aldaketa ematen has gaitezke.