AKTUALITATEA

| 2025-03-27 14:12:00

Kaiko pasealekuko 7. eta 8. atarietan bizi diren familien bizi-baldintzekin kezkatuta, EH Bilduren udal taldetik gure esku dauden ekimenak abiatu ditugu azken asteotan. Kaltetuak diren herritarren eskutik, agerraldi bateratua egin genuen haien egoera salatu eta Udal Gobernuari irtenbide bat eskatzeko. Ondoren etorri zen interpelazioa, epeen inguruan Hirigintza delegatuak batzordeetan azalpenak eman zitzan.

Erantzunak nahikoak ez ziren izan orduan ere, eta konpromiso falta agerikoa izan zen. Hala, ostegun honetako Osoko Bilkuran aho batez onartu den kontrol mozioa defendatu dugu EH Bildutik, behingoz, Hirigintza arduradunak hartu ditzan hartu beharreko neurriak.

EH Bildutik positiboki baloratzen dugu gainontzeko alderdi guztien babesa jaso izana aurkeztu dugun kontrol mozioari argi berdea emanez eta, hala, familiei irtenbiderako bidea irekiaz. Lehenik eta behin, Udalbatzak gobernu-taldeari informazio-bilera baterako deia egiteko eskatu dio Parte Zaharreko eta Portuko Plan Bereziari buruz orain arte egindako dokumentuari buruzko azalpenak emateko, eta horren kopia bat eman diezaiela Udaleko alderdi politikoei dokumentua bera aztertu ahal izateko.

Ricardo Burutaran zinegotziak berak adierazi duenez, gaur gaurkoz Udal Gobernuak ez du dokumenturik igorri eta horrela nekez har daitezke erabakiak. Horregatik premiazkoa da berandu baino lehen informazio hori aldedi guztietara iristea.

Era berean, kontrol mozioari esker EAJ-PSEren gobernuari eskatu diogu «azter dezala kaltetutako bizilagunen egoera, eta hala badagokio, har ditzala hartu beharreko neurriak, behin behinekoak barne, oraingo egoera hainbeste denboran luzatzeak haien bizi- baldintzetan ekarri dituen gabezia larriak arintzeko». Planeamendua onartzea gauza bat da, eta jakin badakigu prozesu konplexua dela, baina bide luze honetan izan dira justifikaezinak diren atzerapenak.

Gogoratu beharra dago 2015eko urtarrilean, duela hamar urte baino gehiago, Udalak behin betiko onartu zuela, Burutaran bera Hirigintza departamentuaren buru zelarik, Alde Zaharra eta Portua Birgaitzeko Plan Bereziaren aldaketa CE.02 Portuko AUko A.10/30/31/32 lursailetan, zehazki eztabaidagai ditugun eraikinei eraginez. Onarpena 2015eko otsailaren 13ko Gipuzkoako Aldizkari Ofizialean argitaratu zen.

Aldeko boto guztiekin, EH Bildutik espero duguna da hartutako konpromisoa zorrotz bete dezala Hirigintza sailak, eta orain bai, diligentziaz ekin diezaiola familia hauen egoerari irtenbide bat emateko bideari. Nekane Arzallus Hirigintza delegatuak datorren astearteko Tokiko Gobernu Batzordean onartuko denaren iragarpena gertutik segituko dugu hala dela bermatzeko.