AKTUALITATEA

Udal Gobernuak onartu du ez duela ikuskapenik egin eta, gaur gaurkoz, ez diola espedienterik ireki Zmare-ri

| 2025-03-17 14:22:00

EH Bilduk interpelazio bat eraman du astelehen honetako Ogasun batzordera, Zmare-ri egindako kontzesio publikoan atzemandako irregulartasunen inguruan. EAJko Ogasun ordezkariaren azalpenak entzun ondoren, adierazi genuena berretsi dugu: Udalean ez da espedienterik ireki emakidaren pleguetan ezarritako baldintzak ez betetzeagatik.

Are gehiago, Kerman Orbegozok aitortu du Ondare Sailari ez diola inolako ikuskapenik egiteko agindurik eman, ez Kostaldearen Zuzendaritzak bederatzi arau-hauste egiaztatu eta espedientea ireki aurretik, ez ondoren.

Nahikoa al da adieraztea ‘ez dutela baztertzen’ espediente bat ireki behar izatea? Nahikoa al da Zmare fede onez ari zela uste zutela esatea? EH Bildurentzat, ez. Baieztapen horiek adierazten dute iniziatiba eta ardura eza. Zentzu horretan, deigarria da egiaztatzea, aitortu duen bezala, egindako errekerimenduak hitzezkoak baino ez direla izan, pasealekuko barandari lotutako aulkiak kentzeko errekerimendua salbu.

EH Bildutik uste dugu ez dutela jakin edo ez dituztela argitu nahi izan interpelazio honen bidez mahai gainean jarri ditugun zalantza guztiak, eta estrategia, berriz ere, beren erantzukizunei aurre ez egitea dela. Ez da hori arretaz jokatzen duela baieztatzen duen Gobernu baten aldetik espero daitekeena.