Bizkaia

Adinekoen egoitzak medikalizatzea eta langile plantillak indartzea eskatu du EH Bildu Bizkaiak

Adinekoen egoitzetan egoerak okerrera egingo duela aurreikusten denez, Osakidetzarekin koordinatzea eta mediku, erizain eta laguntzaileak egoitzetara bideratzea eskatu du EH Bilduk

| 2020-04-08 13:04:00

Adinekoen egoitzen egoera larria kontuan izanda eta aste honetan are okerragoa izango dela aurreikusita, EH Bilduk egoitza horietara baliabide gehiago bideratzea eskatu dio Aldundiari.

 

Atzo ahaldun nagusiak esan zuen hurrengo egunetan egoerak okerrera egingo duela. Egoera, jada, gaur egun larria da eta baliabideak ahalik eta azkarren bideratu behar dira adinekoen egoitzetara. Okerrena etorriko dela esatea ez da nahikoa. Neurriak hartu behar dira”, adierazi du Bea Ilardia EH Bildu Bizkaiako bozeramaileak.

 

Hori dela eta, EH Bilduk eskatu du norbera babesteko ekipamenduak (NBE) bideratu behar direla adinekoen egoitzetara eta bertako langile zein erabiltzaileei test-ak egitea ezinbestekoa dela. “Kolektibo zaurgarrienetako baten aurrean gaude. Baliabide horiek ezinbestekoak dira egoera kontrolatzeko”, azpimarratu du Ilardiak.

 

Osakidetzako baliabideak bideratzea

 

Horretaz gain, EH Bilduk zaintzan ari diren taldeak indartzea eskatu du. Osakidetzarekin koordinatuz, adinekoen egoitzetara medikuak, erizainak eta erizain laguntzaileak bideratzea beharrezkoa dela azpimarratu du.

Ilardia: “Adinekoen egoitzen egoera larriaren aurrean Rementeriak errealitatetik urrun dagoen autokonplazentziazko diskurtsoa dauka”

EH Bilduk salatu du ahaldun nagusiak ez diela jaramonik egiten baliabide gehiago eskatzen dituzten egoitzetako langileen eskaerei

| 2020-04-07 13:12:00

Bea Ilardia EH Bildu Bizkaiko bozeramailearen ustez, adinekoen egoitzen egoeraren aurrean “autokonplazentzian oinarritutako eta errealitatetik urrun dagoen diskurtsoa egiten du ahaldun nagusiak hildakoen kopuruak gora egiten duen bitartean”.

 

EH Bilduk azpimarratzen du adinekoen egoitzen egoera oso larria dela eta berandu eta txarto aritu beharrean, neurri eraginkorrak hartu behar direla kolektibo zaurgarrienetako bat eta bere zaintzaz arduratzen diren langileak babesteko.

 

Ilardiaren iritziz, Unai Rementeria ahaldun nagusiak “egoitzak lehentasuna direla esaten duen bitartean ez die jaramonik egiten langileen eskaerei jaramonik egiten. Lehentasuna egoitzak badira ekintzekin erakutsi beharko du·”.

 

Gardentasun eza

 

Horretaz gain, EH Bilduk Aldundiaren gardentasun eza salatu du. “Ahaldun nagusiak dio ez dituztela zuzenean ematen egoitzetan izandako hildakoen zifra konfidentzialtasun kontu batengatik. Zifra batek ez du inolako konfidentzialtasunik urratzen, baina gobernuari balio dio benetako egoera ezkutatzeko”, azpimarratu du Ilardiak.

Rementeriak Batzar Nagusietan azalpenik ez ematea salatu du EH Bilduk

EH Bilduren ustez, Rementeriak instituzioei zor dien begirunea ez du errespetatu eta estrategia horrekin edozein kritika saihesten saiatzen da

| 2020-04-06 16:29:00

Unai Rementeria Bizkaiko Ahaldun Nagusiak jakitera eman du bihar, prentsaurreko telematiko baten bitartez, koronabirusak eragindako egoeraren inguruko informazioa emango duela.

Bea Ilardia EH Bildu Bizkaiko bozeramaileak gogoratu duen bezala, “azken asteetan hainbat agerraldi eta informazio eskatu dugu eta ez dute behar bezala erantzun. Orain, prentsaurreko honekin, Rementeriak kudeaketari kritikak ekidin eta guztion arteko elkarlana modu larrian kaltetzen du”.

EH Bilduren ustez, Rementeriaren erabaki hori errespetu falta larria da Bizkaiko Batzar Nagusiekiko.

“Gaur bertan Ahaldun nagusiak Batzar Nagusietan agerraldia egiteko aurkeztu du. Hori egin eta ordu gutxira jakin dugu bihar bertan prentsaurrekoa emango duela. Bizkaitar guztiak ordezkatuta dauden instituzioekin izandako errespetu falta oso larria da”, adierazi du Ilardiak.

Astetan inolako agerraldi publikorik egin gabe egon ondoren eta Batzar Nagusietako ordezkariei informazioa helarazterako orduan erakutsitako interes ezaren ondoren, oso larria da Rementeriak bere lehen agerraldia prentsaurreko telematiko baten bitartez egitea eta ez dagokion lekuan; hau da, Bizkaiko Batzar Nagusietan.

Bizkaiko hainbat udalek baliabide medikoak eta babes ekipoak eskatu dizkiote zonaldeko ospitalari haien herrietako adinekoen egoitzetan erabiltzeko

Galdakao, Arrigorriaga eta Urduña bezalako herriek egin dute eskaera gutun bidez

| 2020-04-03 11:57:00

Adinekoen egoitzetan izandako heriotzen ondoren eta COVID-19 birusari aurre egiteko zailtasunen aurrean, hainbat herrietako udalek laguntza eskatu diete haien zonaldeko ospitaleei.

 

Martxoaren 24ean onartutako arauean oinarrituz, zeinaren arabera pandemia-egoeran dauden egoitzek osasun-laguntza jaso dezaketen, udal horiek eskaera bideratu diete gertuko ospitalari.

 

Gutun baten bitartez, Galdakao, Arrigorriaga eta Urduñako udalek baliabide medikoak eskatu dizkiete birusak adinekoen egoitzetan sortzen ari den arazoei aurre egiteko. Gutunean aipatzen den bezala, ospitaletan emandako berrantolaketarengatik lan karga gutxitu zaien edo erreserban egon daitezkeen espezialitate zehatz batzuetako medikuak egoitzetara bideratzea eskatu dute.

 

Horretaz gain, udal ezberdinek egoitzetako langileentzako babes ekipamendua ere eskatu dute, jakinda infektatu kopuruak gora egin duela kolektibo horretan ere. Arlo zehatz honetan laguntza eskatu dute langileek norbera babesteko ekipamenduak behar bezala erabiltzeko eta isolamendu eta euste-neurriak betetzeko langile kualifikaturik ez dagoelako.

 

Udalek azaldu dutenez, eskaera hau ospitaleetako arduradunei zuzentzen diete jakinda birusak hirugarren adinekoengan osasun-kalteberatasun handia daukala eta infektatutako langile eta egoiliarren kopurua oso handia delako.

Aldundiak adinekoen egoitzetan hildakoen kopurua ezkutatzen duela salatu du EH Bilduk

Beste lurralde batzuetan informazio hori ematen den bitartean, Bizkaian ez dago datu ofizialik

| 2020-04-02 12:41:00

EH Bildu Bizkaiak salatu du Aldundiak adineko egoitzetan izandako hildakoen kopuruaren datua ezkutatzen dabilela eta ez duela informaziorik eskaintzen. “Bizkaiko egoitza batzuetako egoera komunikabideen bitartez ezagutu dugu, Balmaseda adibidez, eta baita ere herrietatik heltzen zaigun informazioari esker. Oso larria da iturri ofizialetatik inolako informaziorik ez egotea eta Aldundiaren estrategia konziente bat dela uste dugu egoitzen egoeraren aurrean. Aldundiak neurri eraginkorragoak hartu behar ditu”, salatu du Bea Ilardia EH Bildu Bizkaiako bozeramaileak.

 

EH Bilduren iritziz, adinekoen egoitzen egoera erreala ezagutzea ezinbestekoa da Covid-19ak kolektibo zaurgarrienetako batean daukan eragina kontuan izanda. “Aldunditik ez dago informazio argirik beste lurralde batzuetan informazio hori ematen den bitartean”, azpimarratu du Ilardiak.

 

Premiazko neurri eraginkorragoak

 

Horretaz gain, EH Bilduren ustez, egoitzetako egoera oso zaila da neurri eraginkorrik ez delako hartu eta ez daudelako baliabide nahikorik kutsatutako pertsonak artatzeko eta zaintza lanetan ari direnak babesteko.

 

EH Bilduk azpimarratu du protokoloak berandu aplikatu direla eta egondako positibo kopuru altuak erakusten duela ez direla eraginkorrak izan.

 

Egoitzen egoera oso zaila izaten ari da. Hori dela eta, berriz ere dei bat egiten dugu elkarlanerako. Baina horretarako ezinbestekoa da gardentasunetik aritzea eta informazioa elkarbanatzea”, adierazi du Ilardiak.

ALBISTEAK

Murriztutako lineatako frekuentziak berreskuratzea eskatu dio EH Bilduk Renferi

2020-10-16 13:56:00

Ezkerraldea, Hego Uribe eta Meatzaldeako udaletan mozioa aurkeztuko du C1, C2, C3 eta C4 lineak bere osotasunean berreskuratzeko eta zerbitzu duin bat eskatzeko

Udalek finantzazio egokia izan dezaten neurriak adostu ditu EH Bilduk Batzar Nagusietan

2020-10-05 12:39:00

Bidegorrien arloan eta epe luzeko zaintzan ere akordioak lortuta, Arantza Urkaregi EH Bilduko batzarkideak elkarlanaren beharra azpimarratu du

Udalentzako finantzazio lerro berezia sortzea eta Bizkaiko Susperraldi Ekonomikorako mahaia abian jartzea proposatuko du EH Bildu Bizkaiak asteleheneko osoko bilkuran

2020-10-01 12:54:00

Horretaz gain, zaintzarekin, berdintasunarekin eta garraioarekin lotutako proposamenak egingo ditu

Inertzia alde batera uzteko eta aldaketa sakonak eskatu dizkio EH Bilduk Rementeriari

2020-09-28 16:41:00

Elkarlanerako asmoa erakutsi du EH Bilduk, betiere azken urteetako politiketan ageriko norabide aldaketa ematen bada