Aste honetan Bizkaia Dorrerako eta itsasadar azpiko tunelerako 20 milioi euro iragarri dira, enplegu planerako bost milioi bakarrik bideratu diren bitartean

| 2020-06-03 14:10:00

Lamiakoko subflubialeko proiekturako 8,9 milioi euroko jarriko dituela jakinarazi du Aldundiak. Erabaki horren aurrean EH Bildu Bizkaia azpimarratu du, beste behin ere, krisi soziosanitario baten erdian Aldundiaren lehentasunak zeintzuk diren.

“Aste honetan Aldundiak iragarri du Bizkaiko Dorrerako 11 milioi euro gehiago bideratuko dituela eta subflubialaren lanekin hasteko ia 9 milioi euro ordainduko dituela. Bien bitartean, gaur aurkeztutako enplegu planak 5 milioi izango ditu. Horrek agerian uzten du une honetan zeintzuk diren Aldundiaren lehentasunak”, adierazi du Bea Ilardia EH Bildu Bizkaiko bozeramaileak.

Lehentasunak berraztertzeko beharra

EH Bilduk beste behin eskatzen du Aldundiak urte honetarako inbertsioak berraztertu ditzala eta azpiegitura eta ekitaldi handien aldeko politika berplanteatzea.

Horretarako EH Bilduk 10 arlotan eragiten duen emergentzia plana aurkeztu du aste honetan. Plan horren arabera, Aldundiak herritarren beharrizanei erantzuteko 110 milioi euro lortuko lituzke berehala eta, epe ertainean, askoz ere baliabide gehiago izateko aukera izango luke.

“Garai berri honetan ezin dira aplikatu errezeta zaharrak. Egoera goitik behera aldatu da eta lehentasunak ere aldatu behar dira”, esan du Ilardiak.

EH Bilduk proposatutako planarekin 110 milioi euro berehala lortuko lirateke koronabirusaren ondorioei aurre egiteko

Kopuru horretaz gain, epe ertainean diru gehiago lortzea ahalbidetuko duen plana aurkeztu du EH Bilduk Bizkaiko Batzar Nagusietan

| 2020-05-29 12:55:00

EH Bilduk Bizkaiko Batzar Nagusietan aurkeztutako planak koronabirusaren ondorioei aurre egiteko 110 milioi euro lortzea aurreikusten du. Plan horrek arlo ezberdinetan moldaketak aurreikusten ditu eta urte honetarako Bizkaiko aurrekontuak moldatzeko beharra azpimarratzen du.

“Hurrengo hilabeteak erabakigarriak izango dira Bizkaiaren etorkizunerako. COVID 19-ak ondorio larriak izango ditu gure eguneroko bizitzan eta aurretiaz erantzutea ezinbestekoa izango da.  Hori dela eta, EH Bildu Bizkaiak krisi soziosanitarioak eragindako ondorioei aurre egiteko proposamena aurkeztu du gaur bizkaitarron ongizatea bermatuz eta zerbitzu publikoak indartuz”, adierazi du Bea Ilardia EH Bildu Bizkaiko bozeramaileak.

Gaur aurkeztutako planak aplikatuko balitz, epe motzera lortuko liratekeen baliabideez gain, baliabideak bermatuko lituzke epe ertainera.

“Krisi honetatik irteteko betiko errezetek ez dute baliorik izango, eredu berri bat sustatu beharra dago.Plan horren helburuetariko bat sistema publikoa sendotzea da”, azpimarratu du Ilardiak.

 

Hemen irakurri dezakegu Larrialdi Plana

Ilardia: “Bizkaia Aurrera planak neurri puntualak eskaintzen ditu. Bizkaiak plan integral bat behar du”

EH Bildu Bizkaiko bozeramaileak gogoratu du plan horrek ez duela zaintza bezalako gaientzat neurririk aurreikusten

| 2020-05-20 12:39:00

Bea Ilardia EH Bildu Bizkaiko bozeramaileak Bizkaiarentzat plan integral baten garrantzia azpimarratu du bizi dugun krisi soziosanitarioari aurre egiteko.

Bizkaiko ahaldun nagusiak egindako agerraldian Ilardiak gogoratu dio aurkeztutako Bizkaia Aurrera plana neurri ekonomiko puntual batzuez osatutako plan bat dela.

“Etxean zaintzan ari diren pertsonak ere ekonomiaren parte dira eta planak ez du inolako aipamenik egiten horretan aritzen diren pertsonei begira. Ez dago neurririk hain garrantzitsua dela erakutsi duen zaintza ereduarentzat. Ez dago ere kontsumo eta elikadura eredua aldatzeko edo mugikortasun ereduaren inguruko hausnarketarik. Plan integral bat lantzeko aukera galdu dugu”, azpimarratu du Ilardiak.

Oposizioaren gutxiestea

Azkenik Ilardiak azpimarratu egin du Aldundiak planaren diseinuan izan duen jarrera. EH Bilduko bozeramaileak gogoratu duen bezala, Aldundiak elkarlanerako deia egin du baina ez da aldi bakar batean ere oposizioarekin bildu krisi soziosanitarioari aurre egiteko neurriez hitz egiteko. “Guri proposamenak eta ekimenak aurkezteko 48 orduko epemuga eman digute eta, hala ere, egin ditugu. Jakin nahiko genuke beste eragileekin ere horrelako jarrera izan duzuen”.

EH Bildu-k, EAJ-k eta Elkarrekin Bizkaiak Espainiako Gobernuari eskatu diote askatasun-gabetzearen alternatibak bilatzea presoen osasun eskubidea bermatzeko

| 2020-05-18 13:18:00

COVID-19ak sortarazi duen pandemiak eragindako osasun-krisia espetxeetan dauden pertsonengan eragin handia izaten ari dela jakitun eta Nazioarteko erakundeen gomendioei jarraiki, hala nola OMEren edo Europako Kontseiluaren gomendioei jarraituz, hiru alderdi politikoek askatasun gabetzearen ordezko neurriak martxan jartzea eskatzen dute, besteak beste, presoak espetxetik ateratzea eta hurbiltzea, presoen eta senideen arteko komunikazioak ahalbidetzea, birusa espetxe barruan zabaltzea saihesteko diagnostiko azkarrak egitea eta talde ahulei edo arrisku-taldeei arreta medikua bermatzea,hau da, adin nagusiko taldeei edo aldez aurretik patologiak dituztenei.

(Adierazpena)

COVID-19ren pandemiak sortutako osasun-krisiak eragin handia du espetxean dauden pertsonengan. Testuinguru horretan, nazioarteko erakunde garrantzitsuek espetxeei buruzko neurri espezifikoak hartzera premiatzen dute. Horren adibide dira, besteak beste, Osasunaren Mundu Erakundea, Giza Eskubideen Goi Komisarioa eta Tortura eta bestelako tratu edo zigor krudel, anker edo apalesgarriak prebenitzeko Nazio Batuen azpibatzordea, Tortura Prebenitzeko Batzordea, Europako Kontseiluko Giza Eskubideen komisarioa eta Estatuko presoekiko giza eskubideen eta elkartasunaren erakunde eta elkarteak.

Horiek guztiek azpimarratzen dute askatasuna gabetzearen aurrean alternatibak hartu behar direla, presoak espetxetik ateratzea barne, era berean premia espezifikoetara egokitutako arreta medikoa bermatu behar dela ere, batez ere, talde kaltebera edo arrisku-taldeei zuzendutakoa: adinekoak eta aurretiazko patologiak dituztenak. Era berean, egiaztatu dugu Europako zenbait estatuk ildo horretako neurriak hartu dituztela, edo diseinatzen ari direla. Horiei dagokienez, Espainiako Estatua presoen tasa globalik altuena dutenen artean dago (126 preso 100.000 biztanleko), emakumeen ratio handienetakoa (presoen %7,5), atzerritarrak (%28,1), 50 urtetik gorakoak (%20), desgaitasun psikiko edo fisikoa dutenak (%5,17), bai eta espetxealdiaren batez besteko iraupen altuenetakoak (21 hilabete) ere.

Beraz, uste dugu tarte handia dagoela, pandemiari eraginkortasunez aurre egiteaz gain, espetxeratzeestatistika aurrerakoiagoetara hurbiltzeko. Jakin badakigu, Barne Ministerioak neurriak iragarri dituela hirugarren graduan dauden eta gaua espetxean igaro behar duten pertsonek kartzelara itzuli behar ez izateko. Baina kontrol telematikorako gabeziak direla eta, 3.000 preso ingururi bakarrik aplika dakiekeela. Hala eta guztiz ere, uste dugu kutsadurak geldiarazteko eta birusaren hedapena saihesteko eskubideak murrizten dituzten neurriez gain (horien beharraz eta aukeraz inork ez du zalantzarik), Espetxe Erakundeetako Idazkaritza Nagusiak neurri alternatibo sakonagoak hartu beharko lituzkeela presoen osasuna bermatzeko, ahulezia bereziko kolektibo edo arrisku-talde batzuen irteera malgutuz, bai eta espetxetik epe laburrean aterako direnak, euren konfinamendurako baldintza egokiak izan ditzaten gainontzeko herritarrek duten egoera berdinean.

Hala, ekimen honen sustatzaileek uste dute guztiz lehentasunezkoa dela espetxetik ateratzeko neurri zorrotzagoak hartzea, presoak espetxeak ematen dizkien baino espazio osasuntsuagoetan, arreta eta zaintza baldintza profilaktikoagoetan eta osasun aldetik baldintza egokiagoetan egon daitezen. Neurri horiek, lagungarriak dira birusa presondegietan ez zabaltzeko, osasun-baliabide urriak eta presondegietako tentsioa arintzeko, eta aldi berean, familia eta gizartearekin presoek dituzten harremanak errotu eta indartzeko.

Espetxean egiaztatu diren kasuek zorigaiztoko amaiera izan baino lehen hartu behar dira prebentzio neurriok, gaur arte tamalez gertatu diren horietatik haratago ez joateko. Espetxeetako araudiak hainbat bide eskaintzen ditu COVID-19aren arriskuagatik planteatutako salbuespenaren aurrean modu humanitarioan erantzuteko, hala nola hirugarren graduko sailkapen humanitarioa (PAko 104.4. artikuloa eta KP 36.3), aurretiazko patologia serioak, kronikoak edo adinagatik larriagotuak (65 urtetik gorakoak) dituzten eta pandemiarekiko bereziki kalteberak diren pertsonei zigorra etxean bete dezatela agintzeko. Oro har, ZKko 86.4 artikuluan eta ZRko 100.2 artikuluan aurreikusitako modalitatea aplikatuko zaie; 3. graduan sailkatuta daudenei, edo lehenbailehen berrikusi beharko da gaur egun 2. graduan sailkatuta dauden eta baimenak hartzen ari diren eta gizarteratzearen aldeko pronostikoa duten pertsonen gradusailkapena, berehala 3. gradura iristeko. Ildo beretik, ZKren 91. artikuluaren bidez, zigortutako pertsonen egoera indibidualak berrikusiko dira, eta Tratamendu Batzordeek baldintzapeko askatasunaren proposamena helaraziko diete epaitegiei, zigorraren hiru laurdenak bete dituzten barnekoei, berrerortzeko arrisku handirik ez dutenei edo/eta gizarteratzeko aldeko pronostikoa dutenei, hirugarren graduan sailkatu ondoren. Horregatik guztiagatik, Espainako Gobernuari eskatzen diogu neurri hauek martxan jarri ditzala:

- Bere ahalmenak erabiliz, ordenamendu juridikoaren barruan eta nazioarteko erakundeen gomendioei jarraituz, presoak espetxetik ateratzeko neurri egokiak har ditzala, bereziki COVID19ren aurrean kalte-beratasun berezia dutenak, zehazki, pandemia kutsatzearen aurrean arriskutaldeak osatzeagatik 65 urtetik gorako adinagatik aurretiko patologia serioak, kronikoak edo larriagotuak dituztenak.

- Neurriak har ditzala, delituaren tipologia edo larritasunetik eratorritako inolako salbuespenik gabe, zigorraren hiru laurdenak bete dituzten presoak espetxetik ateratzeko, berrerortzeko arrisku handirik ez dutenak edo/eta gizarteratzearen aldeko pronostikoa dutenak, familiabaliabideekin edo hurbileko gizarte-inguruneko baliabideekin, konfinamendua gizartearen baldintza berberetan egiteko.

- Osasun, Justizia eta Herrizaingo sailen arteko koordinazioa bermatu dezala, babes-neurriak orokortzeko, prebentzio sintomak aztertzeko eta espetxean dauden pertsonen diagnostiko azkarra egiteko. Berehala sare publikoko ospitaleetara bideratuko dira COVID-19 gaixotasunagatik positibo ematen duten edo sintomak dituzten pertsonak.

- Osasun-krisiak irauten duen bitartean berma dezala presoei informazioa emateko eskubidea, pandemiaren garapenari eta hartutako neurriei buruzko ezagutza eguneratua eta eskuragarria eskainiz, bereziki espetxeen barruan, birusaren hedapena prebenitzeko eta geldiarazteko. Era berean, presoen eta senideen arteko zeharkako komunikazioa hedatu behar da, telefono-deien doakotasunarekin, eta bideo-deien erabilera zabalduz gaixotasun edo familia-larrialdiagatik ezarritako egungo murrizketetatik harago.

- Pandemia piztu aurreko normalizazioaren bila deseskalada hasten denean, kontuan har ditzala askatasunik gabe dauden pertsonak, eta arindu daitezela presoek beren familiekin eta abokatuekin zuzeneko komunikazioei berrekiteko erabakiak. Ildo horretan, beharrezko urratsak eman behar dira hala eskatzen duten presoak, euren etxeetatik gertu dauden espetxeetara hurbiltzeko. Ez bakarrik bere eskubidea delako, baizik eta presoen komunikazioak normalizatzeko eragozpen erantsi bat delako. Presoak beren familiengana geografikoki hurbiltzea; horretarako, beharrezkoa da beste garraio-mota batzuen antzeko higiene- eta segurtasun-neurriak dituzten garraiobideak berreskuratzea. Hurbilketa hasi beharko litzateke etxetik urrunen dauden presoekin eta seme-alaba adingabeen gurasoekin.
 

Aldundiak 26 milioi euroko finantziazioa kentzea oso larritzat jotzen duten hainbat udalek

Krisi soziosanitario baten erdian diru iturri nagusia murriztuko zaiela salatu dutela

| 2020-05-14 14:48:00

Aldundiak aurreratu zuen bezala, Bizkaiko herriei ez zaie 2019. urteari dagokion Udalkutxako soberakina bideratuko. Hain zuzen ere, udalek ez dituzte jasoko 26 milioi euro. Erabaki horren aurrean hainbat udalek bere kexa adierazi dute eta azpimarratu dute haien diru-iturri nagusia murrizten dela horrela.

“Bizkaiko Finantza Kontseiluak, Udalkutxaren bitartez, erabaki du dagokizkigun 26 milioi euroak ez ordaintzea. Udalak burujabeak gara erabakiak hartzerako orduan eta ez dugu inoren tutelarik behar”, adierazi du Saioa Elejabarrieta Lemoako alkateak.

Zentzu berean hitz egin du Amets Jauregizar Bakioko alkateak gogoratuz udalak direla COVID-19-ak eragindako krisiaren aurrean hainbat ekimen abian jarri behar dituztenak.

“Krisi soziosanitario honek eragin handia izan du udaletan. Espazio publikoa berrantolatu behar dugu, gure enpresak lagundu behar ditugu eta gure herritarrak babestu behar ditugu. Horregatik orain behar dugu Udalkutxako soberakina”, azpimarratu du Jauregizarrek.

Horretaz gain, udalek bere kezka agertu dute hurrengo urtean gerta daitekeenarekin. Beste herrialde batzuetan gertatu den bezala Udal Finantzaketarako Foru Funtsatik etor daitekeen murrizketak are gehiago zailduko du udalen kudeaketa.

• «
• 1
• 2
• 3
• 4
• 5
• 6
• 7
• 8
• ...
• 15
• 16
• »