Bizkaia

Murriztutako lineatako frekuentziak berreskuratzea eskatu dio EH Bilduk Renferi

Ezkerraldea, Hego Uribe eta Meatzaldeako udaletan mozioa aurkeztuko du C1, C2, C3 eta C4 lineak bere osotasunean berreskuratzeko eta zerbitzu duin bat eskatzeko

| 2020-10-16 13:56:00

Renfek hainbat lineatan murriztutako zerbitzuen aurrean EH Bilduk eskatu du zerbitzu horiek bere osotasunean berrezartzea eta kalitatezko zerbitzu duin bat eskaintzea.

 

Hain zuzen ere, Renfek lineen frekuentzietan egindako murrizketek C1, C2, C3 eta C4 lineei eragiten diete. Bilborekin Santurtzi, Muskiz, Urduña eta Balmaseda lotzen dituzten lineei, hurrenez hurren.

 

“Azken asteetan egindako murrizketak, frekuentziak egun batetik bestera kenduz, zonalde ezberdinetako herritar askori eragin die. Garraio zerbitzu publiko duin batean ezin da onartu horrelako murrizketarik. Hori dela eta, Renferi eskatu nahi diogu kendutako zerbitzuak berreskuratu ditzala eta kalitatezko garraio publiko baten aldeko apustua egin dezala”, adierazi du Raul Mendez EH Bilduko batzarkideak.

 

Mozioak udaletan

 

Tren zerbitzuan egindako murrizketen aurrean EH Bilduk mozioak proposatuko ditu Ezkerraldea, Meatzaldea eta Hego Uribeko udaletan. Asmoa da udalek ere Renferi eskaera bideratzea murrizketak egin diren herrietan kalitatezko eta leihakorra den tren-zerbitzua eskaintzeko.

 

Zerbitzu duin hori, EH Bilduren ustez, frekuentziak berreskuratzean eta langile kopuruaren handitzean eta aldiri sarearen mantentze lan egoki batean oinarritu behar dira.

Udalek finantzazio egokia izan dezaten neurriak adostu ditu EH Bilduk Batzar Nagusietan

Bidegorrien arloan eta epe luzeko zaintzan ere akordioak lortuta, Arantza Urkaregi EH Bilduko batzarkideak elkarlanaren beharra azpimarratu du

| 2020-10-05 12:39:00

EH Bilduk udalek finantzazio egokia izan dezaten neurriak adostu ditu gaur goizean Gernikako Batzar Nagusietan ospatu den bilkuran.

Arantza Urkaregi EH Bilduko batzarkideak azpimarratu duen bezala, akordioak ahalbidetuko du lortutako akordioarekin udalen finantzazioa berraztertuko da EUDELekin batera eta COVID-19aren ondorioei aurre egiteko 2021eko finantzazioa bermatzeko neurriak aztertuko dira.

Urkaregik elkarlanaren beharra azpimarratu du “Covid-19ak guztiok mugiarazi gaituela. Gaur Plenoan, aurrekoetan baino erdibideko gehiago onartuko ditugu. Ez da erraza izan, are gehiago hain denbora-tarte laburrean, baino guztiok ahaleginak egin ditugu eta lortu dugu adostasun garrantzitsuak”.

Akordioak ere zaintza-sisteman, berdintasunean eta trantsizio ekologikoan

Izan ere, EH Bilduk beste hiru arlotan ere lortu du adostasuna, hain zuzen ere, zaintza sistemarekin, berdintasunarekin eta trantsizio ekologikoaren lotutakoak.

Alde batetik, zaintza-sistemaren inguruan, EH Bilduk epe luzeko zaintzaren ereduaren alde bozkatu eta horren azterketa berdintasun ikuspegitik egitea adostu du. Beste alde batetik, Berdintasun Foru Arauari dagokionez, EH Bilduk ere erdibidekoa adostu du EAJ eta PSErekin genero-ikuspegia politika publikoetan, aurrekontuen diseinuan eta kudeaketan txertatzeko. Azkenik, bidegorrien sarea eskualde ezberdinetara zabaltzea adostu du EH Bilduk EAJ eta PSErekin.

Udalentzako finantzazio lerro berezia sortzea eta Bizkaiko Susperraldi Ekonomikorako mahaia abian jartzea proposatuko du EH Bildu Bizkaiak asteleheneko osoko bilkuran

Horretaz gain, zaintzarekin, berdintasunarekin eta garraioarekin lotutako proposamenak egingo ditu

| 2020-10-01 12:54:00

EH Bilduk bost ebazpen aurkeztu ditu hurrengo astelehenean Gernikan egingo den bilkuran eztabaidatzeko. Pandemia egoerak areagotutako arazoei aurre egitea da EH Bilduren helburua eta, horretarako, ekonomia suspertzeko eta udalen finantziazioa hobetzeko neurriak aurkeztuko ditu.

Azken gai horrekin lotuta, EH Bilduk bere kezka agertu du udalek bizi duten egoerarekin eta udalentzako finantziazio lerro berezi bat sortzea proposatuko du COVID-19ak eragindako gastuei aurre egin ahal izateko. “Udalek egoera zail bati aurre egin behar izan diote eta Aldundiak tresna hori abian jarri behar du herritarrengandik hurbilen dagoen instituzioei laguntzeko”, azpimarratu du Arantza Urkaregi batzarkideak.

Ekonomia suspertzeko neurriekin lotuta, EH Bilduk Susperraldi Ekonomikorako Mahaia osatzea proposatuko du.

“Aurreko bilkuran ahaldun nagusiak elkarlanaren garrantzia aipatu zuen eta EH Bildun argi daukagu elkarlan hori garrantzitsua izango dela. Hori dela eta Bizkaiko Susperraldi Mahaia eratzea proposatu dugu. Guztion artean, agente ezberdinen parte hartzearekin, elkarlana sustatu eta egoerari aurre egiteko neurriak partekatuko genituzke”, adierazi du Urkaregik.

Beste alde batetik, berdintasunarekin lotuta, EH Bilduk zainketen egoera ikuspegi feminista batetik aztertzea eskatuko du. “Zaintzak etxean ahalik eta denbora gehien egitea proposatu zuen ahaldun nagusiak. Horrek zaintza emakumeen esku uztea ekar dezake, rol banaketa indartuz. Uste dugu horren inguruko hausnarketa eta neurri zehatzak beharrezkoak direla”.

Garraioari dagokionez, pandemiaren ondorioz Bizkaibuseko edukiera aztertzea eskatuko du EH Bilduk eta, azkenik, zerbitzu publikoetan (egoitzak, esaterako) Bizkaiko ekoizleen produktuak kontsumitu ahal izateko plangintza egitea.

Inertzia alde batera uzteko eta aldaketa sakonak eskatu dizkio EH Bilduk Rementeriari

Elkarlanerako asmoa erakutsi du EH Bilduk, betiere azken urteetako politiketan ageriko norabide aldaketa ematen bada

| 2020-09-28 16:41:00

COVID-19arengatik hildakoak gogoratuz eta bere senideei babesa adieraziz hasi duen hitzartzean, Arantza Urkaregi EH Bilduko batzarkideak politiken ageriko norabide aldaketa eskatu dio Unai Rementeria Bizkaiko Ahaldun Nagusia.

Urkaregik gogoratu du “pandemiak krisi sozioekonomikoa, zaintza eredua, ekologikoa eta gobernantza eredua krisian agerian utzi ditu” eta horren aurrean Aldundia inertziaz aritu dela.

Izan ere, udalekin, gizarte eragileekin eta beste alderdiekin elkarlanik ez dela egon azpimarratu du EH Bilduko batzarkideak. “Instituzio, oposizio eta gizarte eragile nagusiekin elkarrizketa lantzea ezinbestekoa da, baina hilabete hauetan ez da horrelakorik eman. Arrazoia ematen dizuenarekin biltzen zarete bakarrik”.

Hori dela eta, ezohiko egoera honi aurre egiteko hitzetatik ekintzetara pasatzea beharrezkoa dela esan du. “Pertsonek eta haien familiek bizi duten babes eza ezinbestean konpondu behar dugun arazo bat da. Are gehiago egungo egoeran. Eta hor diseinatzen eta abian jartzen ditugun politika publikoek zeresan handia daukate. Zerbitzu publiko duin eta kalitatekoak ezinbestekoak dira egoera horri aurre egiteko. Baina, zoritxarrez, hor ere baditugu gabezia larriak”.

Jaurlaritzak eskatzen zuenaren aurka, Aldundiak nagusien egoitzetako egoiliarren egun batzuetako egonaldiak ez dituela baimentzen azpimarratu du EH Bilduk

Nagusien irteerak arautzeko Jaurlaritzaren protokoloan oinarritzeko eskatu dio EH Bilduk Aldundiari

| 2020-09-24 15:16:00

Gaur goizean Bizkaiko Foru Aldundiak egoiliarren bisitak arautzen duen Foru Agindua argitaratu du. EH Bilduk azpimarratu duenez, argitaratutako agindua Jaurlaritzak proposatzen zuena baino askoz murriztaileagoa da.

 

Foru agindu hori Jaurlaritzak nagusien egoitzetarako bisita baldintzak malgutzeko neurriak aurkeztu eta egun batera argitaratu du Aldundiak. Agindu horrek, Jaurlaritzak proposatzen zuenaren kontra eginez, ez ditu baimentzen egoiliarren egun batzuetako egonaldiak egoitzatik kanpo ezta autonomoak diren pertsonen irteerak ere ez.

 

“Jaurlaritzak Aldundien esku utzi protokoloaren diseinua eta, Bizkaiaren kasuan, protokoloa egoiliarren beharretara moldatu beharrean, egoitzen egoerara moldatu du. Hau da, egoiliarrentzako malguagoa izango litzatekeen protokolo batek baliabide gehiago eskatuko lituzke; Aldundiak, inbertsio hori egin beharrean, egoiliarren eskubideak mugatzea erabaki du”, azpimarratu du Izaskun Duque batzarkideak.

 

Egoera horren aurrean EH Bilduk Aldundiari eskatu dio senitartekoen bisiten eta egoitzako irteeren baldintzak arautzeko, Eusko Jaurlaritzak argitaratutako protokoloari jarraituz.

 

“Jaurlaritzaren protokoloan jasotzen den bezala, familiarekiko edo hurbileneko pertsonekiko harremana egoiliarren eskubidea eta beharra da. Bisitak jasotzeko eta egoitzetatik kanpora irteteko aukera, hilabeteak konfinatuta egon ondoren, adinekoek berdintasunezko tratua jasotzeko eta diskriminaziorik ez jasateko duten eskubidean oinarritzen da, herritar guztientzako mugikortasun-murrizketak pixkanaka desagertzen ari diren egoera batean”, adierazi du Duquek.

ALBISTEAK

Murriztutako lineatako frekuentziak berreskuratzea eskatu dio EH Bilduk Renferi

2020-10-16 13:56:00

Ezkerraldea, Hego Uribe eta Meatzaldeako udaletan mozioa aurkeztuko du C1, C2, C3 eta C4 lineak bere osotasunean berreskuratzeko eta zerbitzu duin bat eskatzeko

Udalek finantzazio egokia izan dezaten neurriak adostu ditu EH Bilduk Batzar Nagusietan

2020-10-05 12:39:00

Bidegorrien arloan eta epe luzeko zaintzan ere akordioak lortuta, Arantza Urkaregi EH Bilduko batzarkideak elkarlanaren beharra azpimarratu du

Udalentzako finantzazio lerro berezia sortzea eta Bizkaiko Susperraldi Ekonomikorako mahaia abian jartzea proposatuko du EH Bildu Bizkaiak asteleheneko osoko bilkuran

2020-10-01 12:54:00

Horretaz gain, zaintzarekin, berdintasunarekin eta garraioarekin lotutako proposamenak egingo ditu

Inertzia alde batera uzteko eta aldaketa sakonak eskatu dizkio EH Bilduk Rementeriari

2020-09-28 16:41:00

Elkarlanerako asmoa erakutsi du EH Bilduk, betiere azken urteetako politiketan ageriko norabide aldaketa ematen bada