Bizkaia

Ilardiak kalitatezko enpleguaren aldeko apustu egin du azken urteotako politika publikoek prekarietatea ekarri dutelako

Ahaldungai nagusiak sektore industrialaren suntsidura salatu du Sestaon eta industria aurreratua sustatzeko konpromisoa hartu du.

| 2019-05-21 21:49:00

Bea Ilardiak uste du Bizkaiak industria aurreratuaren eta kalitatezko enpleguaren aldeko apustu egin behar duela azken urteotako politika publikoak kontrako norabidean joan direlako. EH Bilduren ahaldungai nagusiak hala adierazi du gaur arratsaldean Sestaon Mikel Izquierdo bertako alkategaiarekin eta Diana Urrea Orain Errepublikak Europako Parlamenturako hautagaitzako kidearekin batera.

Ilardiak instituzio publikoen lana kritikatu du, azken urteotan Bizkaian hirugarren sektoreari begira aritu direlako eta industria eta kalitatezko enplegua, aldiz, bazterrean utzi dituztelako. “Euren politika ekonomikoa prekarietatea areagotzen ari da industriaren sektorea desegiten ari den bitartean. Industria-birmoldaketa saldu ziguten, baina desindustrializazioa izan dugu”.

EH Bilduk, ostera, industria aurreratuaren eta kalitatezko enpleguaren aldeko apustu egiten du eta, horretarako, “egun erabiltzen ez diren lurzoru industrialak, Babcockenak kasu, berreskuratzea” proposatu du Ilardiak, horrek balio erantsia duten industria berriak erakartzea ahalbidetuko duelakoan. Halaber, kinka larrian dauden enpresei laguntzeko 50 milioi euroko funts bat sortzea ere planteatu du, “politika industrialak aurrea hartu behar dielako ager daitezkeen arazoei eta egoerari buruzko jarraipena egin behar du zehazteko zer nolako laguntzak, maileguak edo bestelako neurriak behar dituzten enpresek”.

Otegi: “EH Bildu da boto erabilgarria burujabetzan sakontzeko eta horrela jendearen bizi baldintzak hobetzeko”

Arnaldo Otegiren irudiko, “igandean hautatu beharko da EAJ buru duen bloke kontserbadorearen eta EH Bildu buru duen bloke aurrerakoiaren artean”. EAJri eskatu dio argitzeko ea prest dagoen alkatetzak PPren bozekin lortzeko.

| 2019-05-20 22:29:00

“EH Bildu da boto erabilgarria burujabetzan sakontzeko eta, modu horretan, jendearen bizi baldintzak hobetzeko”, azpimarratu du Arnaldo Otegik gaur arratsaldean Markinan, Bea Ilardia ahaldungai nagusiarekin batera. Azaldu duenez, egungo koiuntura politikoan bi bloke nagusi gailentzen ari dira. “Batetik, bloke kontserbadorea, EAJ buru, daukagu, xede bakarra duena, nola edo hala botereari eustea, hain zuzen ere; bestetik, bloke aurrerakoia agertzen da, EH Bildu buru duena, jendea eta haren lehentasunak defendatu, babestu eta zaindu egiten dituena”.

EH Bilduko koordinatzaile nagusia kezkatuta agertu da EAJ egiten ari den kanpainaren tonuarekin. Izan ere, “egunero gezurretan ibiltzen ari dira, guri erasotzeko eta iraintzeko, Casado eta Riveraren estilo bera erabilita; haien lekukoa hartu dutela dirudi”. Dena den, Otegiren aburuz, hori ez da kasualitatea, baizik eta estrategia zehatz bati erantzuten dio. “Azken batean, EAJ, PP eta C’s boto poltsa berean ari dira arrantzan, boto kontserbadore eta unionistaren bila; horregatik egiten digute eraso egunero”.

Hori, hala ere, kezkagarria iruditzen zaio EH Bilduko buruzagiari, “ezinezkoa delako hauteskundeetan boto autonomistekin loditzea eta horren ostean testu eta akordio subiranistak egitea; hori bateraezina da”. Hori dela eta, erantsi du, “kezkatuta gaude logikak dioelako EAJk, autogobernuari dagokionez, ez duela aliantza abertzale eta aurrerakoi baten aldeko apustu egingo”, orain erakusten ari den jarrerak ez daramalako EH Bildurekiko akordio bat egitera termino subiranistetan.

Horren haritik, Gasteizko Legebiltzarreko autogobernu ponentzia egiten ari den lana gogorarazi eta kezka adierazi du adituen batzordea ez delako aurrerapausoak ematen ari. Edonola ere, ziurtatu du EH Bilduk “denboran eta forman” beteko duela Parlamentuaren agindua, bere iritziz berebiziko garrantzia duelako Arabak, Bizkaiak eta Gipuzkoak estatus politiko berria edukitzeak. “Ezin dugu aukera galdu, burujabetzan sakontzeko tresnak behar ditugu bestelako politika publikoak egin ahal izateko eta euskal herritarren bizi baldintzak hobetzeko”.

Beraz, ondorioztatu du, datorren igandeko hauteskundeetan “EH Bildu da boto erabilgarria”, eta ohartarazi du “jokoan dagoena herri gisa dagokigun burujabetza dela”. Horregatik, “EH Bildu da boto erabilgarria burujabetzan sakontzeko eta jendearen bizi baldintzak hobetzeko; ezker independentista norabide horretan aurrera egitea bermatzen duen bakarra da, gainerako alderdiak kezkatuago daudelako euren emaitza elektoralekin jendearen borondateari erantzutearekin baino”.

EH Bilduko koordinatzaile nagusiaren hitzetan, “proiektu aurrerakoiak aurrera egingo du ezker independentista Bizkaian eta metropolian indartsua baldin bada soilik; horixe da gure erronka Bizkaian lehenengo fase honetan, ordezkaritza maila handitzea eta EH Bildu alternatiba gisa kontsolidatzea”.

Amaitzeko, Otegik dei zuzena egin dio EAJri: “Gure botoekin eskuin espainolek ez dute boterea lortuko ez udaletxeetan ez aldundietan; EH Bilduk uko egiten dio alkatetzak edota diputazioak lortzeari horretarako eskuin espainolen bozak behar badira, baina EAJk ez dio oraindik erantzun azken egunotan egiten ari gatzaizkion galderari: EAJ prest dago Gasteizen, edo beste herriren batean, alkatetza lortzeko PPren botoei esker?”.

Bea Ilardia: “EH Bilduk gobernatzen duenean jendearen bizitzak hobera egiten du”

Arnaldo Otegik bezala, Bea Ilardia ahaldungai nagusiak ere ohartarazi du igandean jokoan egongo dela “nola nahi dugun Bizkaia gobernatzea”. Zentzu horretan, nabarmendu du “EH Bilduk gobernatzen duen tokietan jendearen bizitzak hobera egiten duela, EH Bilduk herritarrekin batera gobernatzen duelako, gardentasunez, hurbiltasunez eta jendearen parte-hartzea sustatuz, horrela bakarrik lortzen baita jendearen bizitza hobetzea”.

Ilardiak Ezkerraldean industria bultzatzeko EH Bilduren proposamenak aurkeztu dizkie langileen ordezkariei

Ahaldungai nagusia eskualdeko enpresa komiteetako ordezkariekin batzartu da Barakaldon. Industrializazio prozesu baten baitan 50 milioi euroko funtsa sortu nahi du kinka larrian dauden enpresei laguntzeko

| 2019-05-20 15:30:00

Bea Ilardiak Ezkerraldeak industrializazio prozesu baten beharra duela adierazi du gaur goizean Barakaldon, eskualdeko enpresa komiteetako ordezkariekin egin duen bileran, hain zuzen ere. Ezkerraldeko egoera, bai eta balizko irtenbideak ere, langileekin batera aztertu ditu ahaldungai nagusiak, eta proposamen zehatzak helarazi dizkie “benetako industrializazio prozesu bat” abian jartzeko.

EH Bilduko hautagaiak ohartarazi duenez, “Ezkerraldeak Bizkaiko datu sozioekonomikorik txarrenak ditu eta langabezia tasa herri batzuetan, Sestaon esaterako, %18 baino altuagoa da, eta hori onartezina da gaur egungo Bizkaian”. Egoera horren jatorrian urteetako politikak daude, “hemen arduradun politikoek industria birmoldaketa saldu zuten arren, heldu zen gauza bakarra desindustrializazioa izan zelako”.

Ilardiaren iritziz, enplegu arloan egoera larria da eskualdean eta horrek industrializazio prozesu bat eskatzen du. Hala, EH Bilduk 50 milioi euroko funtsa sortzea proposatu du arazo ekonomikoak dituzten enpresa industrialei laguntzeko. Hori ez da, edonola ere, bere proposamen bakarra, lurzoru industrialak berreskuratzea ere hartu beharreko beste neurri bat delako, ahaldungai nagusiaren aburuz.

Ilardiak “industria garatuaren aldeko apustu garbia” berretsi du, batetik, “gaur egun Bizkaian dauden enpresa industrialak joan ez daitezen” eta, bestetik, “herrialdea berriro erakargarria izan dadin”, hori baita bidea kalitatezko enplegua lortzeko eta bizkaitar guztien ongizatea bermatuko duen ekonomia egonkor eta indartsu bat egituratzeko.

Ilardiak Enkarterrien abandonua salatu du Gueñesen eta konpromisoa adierazi du Bizkaia osoaren garapen orekatuarekin

Ahaldun nagusigaiak lurzoru industrialak berreskuratu beharra azpimarratu du eta egungo garapen ereduaren aurka azaldu da, jarduera ekonomikoa Bilboko Gran Via kalean zentralizatzen duelako.

| 2019-05-18 19:11:00

Bea Ilardiak Enkarterriak historikoki pairatu duen abandonu instituzionala salatu du gaur goizean Gueñesen Idoia Perez bertako alkategai eta Iker Casanova legebiltzarkidearekin batera. Ahaldungai nagusiak esan duenez, utzikeriak ezaugarritu dituen politika instituzional horiek langabezia tasa altuak ekarri dituzte, “eta gero, adabakia jartzeko edo, zalaparta handiz iragarri diren proiektuak ezerezean geratu dira beti azkenean”.

 

Ilardiak kritikatu du zer nolako aldeak eta desorekak dauden, sozialak zein ekonomikoak, Bizkaiko eskualdeen artean, eta egoera hori azken urteotan eginiko politikei egotzi die, zonalde zehatz batzuen garapena lehenetsi delako. Hori ez da, ordea, EH Bilduko hautagaiak defendatzen duen eredua. Bere hitzetan, “gure ereduak ez du jarduera ekonomikoa Bilboko Gran Via kalean zentralizatzen; guk herrialde orekatu eta kohesionatua nahi dugu eta argi dugu Enkarterrien etorkizuna, Bizkaia osoarena bezala, jarduera ekonomikoaren banaketa orekatuaren eskutik etorriko dela. Bizkaiak daukan potentzial ekonomikoa lurralde guztian banatu behar da, jarduera ekonomikoa ezin delako hiri handian bakarrik geratu”.

 

Horren haritik, Aldundiak lurzoru industrial zaharrak berreskuratzea nahi du ahaldungai nagusiak: Trapagaranen Babcock zaharrean, Basaurin Baskonia zegoen tokian eta Gernikan Labeagako zonaldean. “Berreskuratu dezagun Bizkaiko leku batzuetan daukagun lurzoru industriala eta eman diezaiegun bigarren aukera bat arduradun politiko batzuek ahaztuta dituzten eskualde horiei”.

Ilardiak industriaren desagerpenaz ohartarazi eta Bizkaia orekatu eta kohesionatu baten aldeko apustu egin du

Ahaldun nagusigaiak oreka nahi du “herritarren artean, eskualdeen artean eta aberastasunaren banaketan” eta salatu du azken urteotan Aldundia kontrako norabidean aritu dela eskualde batzuen kalterako, Busturialdea kasu.

| 2019-05-17 12:47:00

Bea Ilardia EH Bilduren ahaldungai nagusia Bermeon izan da gaur goizean, Busturialdean, eskualde hori azken urteotan Bizkaiko Foru Aldundiak egin duen politikaren “adibide paradigmatikoa” delako. Izan ere, “Busturialdean industria desagertzen joan da hirugarren sektorearen mesedetan, zerbitzuen mesedetan, eta gabeziak larriak dira garraio publikoari eta errepideei dagokienez”. Ilardiak salatu duenez, Aldundiak ez ditu eskualde guztiak aintzat hartu eta haien arteko aldeak areagotu ditu. Hala, “eskualde batzuetan bizitzeak zerbitzu okerragoak eta bizitza maila eskasagoa izatera kondenatzen ditu bertan bizi direnak”.


EH Bilduko hautagaiak, berriz, argi du “Bizkaia kohesionatu bat beharrezkoa dela jendearen ongizatea eta beharrizanak eskualde guztietan bermatzeko” eta, beraz, “Bizkaia orekatua lortzea” du helburu datorren legealdirako. “Behetik gora eraikitako Bizkaia nahi dugu, herritarrak eta haien beharrak kontuan hartzen dituena eta inor bazterrean uzten ez duena. Oreka behar dugu herritarren artean, eskualdeen artean eta aberastasunaren banaketan”.
 

Idurre Bideguren: Kudeaketa hurbila eta gardena
Bea Ilardiak ez ezik, Idurre Bideguren alkateak –Senatuan arituko da datozen lau urteotan– eta Bittor Asteinza alkategaiak ere parte hartu dute Bermeoko ekitaldian. Bidegurenek EH Bilduren kudeaketa eredua goraipatu du, “hurbiltasunean eta gardentasunean oinarritutako eredua” delako. Adierazi duenez, EH Bilduk hala gobernatu du Bermeo azken zortzi urteotan, “argi dugulako hori dela kudeaketa arrakastatsuaren formula”.

Bertako Udalean eginiko lana Europan ere aitortu eta saritu dutela gogora ekarri ostean, alkateak azaldu du hilaren 26ko hauteskundeetan herritarrek bi eredu ezberdinen artean aukeratu beharko dutela. Batetik, “gardentasuna oinarri daukan politika”; bestetik, “bete gabe geratzen diren promesetatik harago ez doan politika”.

 

ALBISTEAK

Asier Vega: «EH Bilduren egiteko moduak gero eta jende gehiago biltzen du, baita Bizkaian ere»

2021-06-13 19:29:00

EH Bildu Bizkaiak bere zuzendaritza berria aurkeztu du gaur goizean, Bilbon.

EH Bilduko Bizkaiko zuzendaritza berriak %90,62ko babesa jaso du

2021-06-05 12:29:00

Asier Vega Isasik aurkeztutako lan taldeak zuzenduko du hurrengo lau urteetan EH Bildu Bizkaia

Lurralde politika eta plangintza estrategikoa eskatu ditu EH Bilduk Ezkerraldera inbertsio industriala erakartzeko

2021-06-05 12:12:00

EAJk eta PSEk Ezkerraldearekiko ahanztura instituzionala eta tertziarizazioaren aldeko urteetan nahita egindako apustua gaitzetsi ditu. Horren aurrean, lurzoruaren kudeaketa bere katalogazio industrialaren araberakoa izan dadila aldarrikatu du EH Bilduk, inbertsioak erakartzeko eta eskualdeari etorkizun duina bermatzeko.

EH Bilduk Bizkaiko Foru Aldundiari eskatu dio hobari-sistema bat ezar dezala AP-68ko ordainlekuan, Bizkaiko zatian

2021-06-01 14:32:00

Neurri horri esker, Hego Uribek jasaten duen diskriminazioarekin amaitu eta BI-625 errepidetik kamioien trafikoa murriztuko litzateke